Gálatas 1:7 - Tradução Bíblica Pacaas Novos

⁷ Xi ma' ne xijein capijacon Iri' Jam ca tomi' hwet napari' con Cristo ta. Tomi' e' inain i ma' pahu', pain ca xijein capijacon Iri' Jam con Cristo ta xuhu' ca', xi om ne ca ma' ara caca wari' co to' i'ina nunuhu' ma', co pijim' jimama' nunuhu' pain ca an in xin paxi' cacain capijacon Iri' Jam con Cristo ma'.

Gálatas 1:7 Iomraidhean Croise

Atos 13:10

An xiho' a ximon Caxicon Jam ta! Ari ari pi' pin main oro ca awi wa ta. Iri' waximain ca mixein wa pain ca pan tem wa a xima. Je xi tomi' napat maho' qui' mon Iri' Jam pain ca iri'o' nucun quem? Mixein taxipa' a xima, tomi' ni ca' a ximain capijacon ca iri'o' ta na ca tomi' carapita con ma'.

Atos 15:24

Ma' nana wari' co tomi' hwet nanaparut cocon oro win ma' nuxut co hwet nunuhu' pane, co to' i'ina nunuhu' pain ca tomi' ca' cucuhu' pane: Mo ta om tomi' ha' tomi' ha' pi' pin hwein oro ca xirao' nucun Moisés ma', mo ta om wac xirac hwein taparinain ca xirac nuhu' ma', om ta witan ac hwe ta nunuhu' pane. Om ca pijim' ac i ma' je ta urut cocon pane ta.

Atos 20:30

Ac i ma' tatara iri' win ma' nuhu' pain ca howa hun Jeju ma'. Main maqui' tara xec nein ca pijim' mixein xim cucuhu' ma'. Mixein tuturuhu', howa jein ca tomi' urut pahu' ca', ja' ja' xut ta tuturuhu', ja' ja' ac cocon tara co howa nonon Jeju.

2 Coríntios 11:13

Xi iri' apóstolo caca ta. Mixein e' nana pain ca taramaja nucucun. Iri'o' xi' ca' tara me e' nana pain ca apóstolo nucun Cristo urut ta caca ma'.

2 Coríntios 2:17

Ane om an xiho' urut cocon oro co om pijim' xo' nana ma' ne. Mija ara xi' nana co pijim' pan teretem nana ma', ac ca vender xin cacain na capijacon Iri' Jam pain ca caramaju xixi' na caca ma'. Om ca an xiho' urut cocon quem. Xi pijim' jein capija ta ara caparut Iri' Jam ta. Taxi' naparut pain ca pijim' xo' nuxut quem. Wirico Cristo co mi' naparut pain ca pijim' nuxut ta.

2 Coríntios 4:2

Pain ca taramaja mi' urut con ca', noc urut pain oro ca ara joc xim xine ca pan teretem wa ma', ca to' wixipa' ma'. Om ca pijim' mixein urut pain capijacon Iri' Jam, om ca tomi' ni ca' urut pain ca tomi' mao nein quem, om na. Pijim' iri'o' e' urut pain, ma' ta taraju pa' caca oro wari' ta urut. Querec pin' xut pain ca pijim' iri'o' nuxut ca' urut cocon. Taxi' naparut Iri' Jam pain ca taramaja ac i ma' urut quem.

Gálatas 1:6

Wa inuhu' pain ca an pe hap pin hun Iri' Jam ma', co tora' nuhu' pane. Om xi tora' cuhu', ane xiram pa' e' cuhu' Cristo ne. Je xi om howa ni ca' hwein capijacon Iri' Jam ca tomi' hwet napari' con Cristo quem? Ac ca howa hwein na xijein topac ca tomi' hwet napari' con Cristo ta!

Gálatas 2:4

Ma' paxi' nana oro xucucun co wac xirac teterem ta nonon Tito. Corom hwet taparu nanaparut pain ca cut in nuxut, mixein nana, ac ca howa iri'o' ta' ca' tara me nana. Tocojin' nanaparut pain ca om tomi' ha' mami' urut pain oro ca xirao' nucun Moisés pane, je pain ca to' witan pin caparut Cristo Jeju pain ca win cwere pin urut con quem. Je xi tomi' ha' cara hwein oro ca xirao' nucun Moisés pane quem nanaparut.

Gálatas 4:17

Om ca ara xo' caca caram ma' co jain jain nunuhu' ma', pain ca tomi' ha' jein oro ca xirao' nucun Moisés ta cucuhu' ma'. Quep xiho' xim paxi' nunuhu', ane om quep xiho' iri'o' cucuhu' ne. Param e' nunuhu' pain ca noc pin mahu', param nunuhu' pain ca to ni ca' mahu'. Ma' ta tomi' querec te e' maparut ta nunuhu'.

Gálatas 5:10

Ane taxi' xuhu' ne, xi om ne ca win cwere pi' pin ara xun Taramaxicon nexi' ta. Taxi' inuhu' pain ca coromicat xo' mami' xi' hwe. Wari' co to' i'ina nuhu' pain ca pijim' nucun ma' iri na ne, am wirico ca co hwara' opa ma', am xucun ca co hwara' opa ma' quem, tara con. Main wap ac tocwa tara ta.

Gálatas 5:12

Wa inonon co to' i'ina nunuhu' pain ca ja' teretem cucuhu' ma', pain ca wac xirac xirarain ca xirac nucucun oro wari' ta caca ma'. Wac pit pan xirarain ca xirac nucucun na inonon ta!

Gálatas 6:17

Tomi' xim inuhu' pain i ca' quem: Ta to' i'ina mami' cacapa' oro wari' me. Ha' ara xi' na pain ca querec pin' mahu' pain ca taramaja mi' ton Jeju cwa', xi ma' ara capa' oro jaminain ca quep em' cacapa' pain cwere pain ca taramaja mi' ton ca'.

2 Timóteo 2:18

Pijim' xo' pijim' xo' om pin nanain capijacon Iri' Jam ca iri'o'. Pijim' ni ac i ca' nanain: Oro wari' co howa nonon Jeju ma', wara e' mami' nana. Om ta e' mami' caca pain ca in qui' ta' nucun ta, xi wara e' mami' ara caca pain xocori ca', ac i ma' na ca pijim' ximama' caca ma'. Ma' nana wari' co to' em' pin caca, howa xo' howa xo' om pin ac caca na quem.

1João 2:26

Je ca xirao' mi' xuhu' ca'. Xirao' mi' inuhu' cocon caram ma' co pijim' mixein xim nunuhu' pain ca howa ni ca' jein capijacon Iri' Jam con Cristo ta nunuhu' ma'.

1João 4:1

Je ca tomi' xuhu' pain ca tomi' querec te xuhu' ca'. Ta howa ximama' huhun oro wari' co pijim' nunuhu' me ta. Taraju wet xo' jujun, tomi' querec jujun pain ca pijim' nucucun. Am maqui' con Iri' Jam ca coromicat nucucun ma', am maqui' pan nein ximicocon ca coromicat nucucun ma', tara cocon ta. Je ta coromicat xo' qui' hwe cocon, xi om ne ca mija ara caca co tomi' hwet mixein nonon pain capijacon Iri' Jam oro wari' pain oro xijein macan' ma'.

2João 1:10

Mo ta hwet cuhu' wari' co ca' na mixein nain capijacon Iri' Jam con Cristo ma', om ac ne tara ca tomi' querec te hun ta. Ta corom ra hun pain xuruhu' me, ta maqui' ma ra aji' camain' hun me ta.

2João 1:7

Mija ara xi' nana co mixein nana ma', co hwet nonon oro co om howa nana ma', pijim' mixein pijim' mixein ac cocon na quem. Om ca an tan pan capari' pain ca wari' nexi' Jeju Cristo ta nana pain ca pijim' mixein nucucun. Wari' co pijim' ac i ma' ma', wirico co mixein taxipa' ma', co ari mip non Cristo pain ca noc tamana con ma'.

Apocalipse 12:9

Xin hwet pin ac tocwa na co ma' co ac cote ne caji hop ma'. Wirico co ma' co caxicon em' cara pane, co mixein nonon hwanana pain cara pane. Wirico co Caxicon Jam ma', co Satanás na xijein wixicon ma', wirico co mixein taxipa' nonon oro wari' pain macan' ca'. Xin pan' hwet pin ac tocwa na pain macan'. Wixicaracao' camara' hwet pin ac tococwa na pain macan' oro caxicon jam co taramaja mi' nonon ma' quem.

Apocalipse 13:14

Mixein mixein pi' pin tata oro wari' co to nanain oro xijein macan', xi om ne oro ca ara ca ma', ca om ara taxi' ne ca wari' wa ma', ca ara ra pan con co hwet qui' cain' ma'. Tomi' ac tococwa na oro wari': Quep jein caji pacun ma', ara an xiho' jein curucun co ma' co hwet qui' cain' ma', co to' pa' pin paxi' wa pain cote ne quit ma', co e' mami' ma'. Pe torotop mi' querec te ac hwein tara ta, ac i ma' na ca tomi' tococwa oro wari'.

Apocalipse 19:20

Mixita xun paxi' totoron, ane quep pan tococwa ne. Quep ta co ma' co ac caji carawa co hwet qui' cain' ma', quep wi ta con co ma' co profeta mixein ma', co tomi' hwet taxipa' nain oro ca tomi' nucun ma'. Wirico co ma' co mi' ca pain ca hwara' opa nucun pain ca ara taxipa' cain oro ca om ara taxi' ne ca wari' wa ira. To' wa wa tamana nonon oro wari' pane ira. Oro ca ara ca ma', je i ma' ca mam' mixein cocon oro wari' co xirao' xirac wawa pain wixicon co ma' co ac caji carawa ma', co pe torotop mi' querec te nanain pacun ca ara an xiho' xine curucun ma'. Xin mi' ac tocwa na pain cote ne xe ma', ca ac xuterem' ma'. Co ma' co ac caji carawa co hwet qui' nain com ma', wirico win ma' nucun ma' quem, wixicao' mi' nunucun ac tococwa na pain cote ne xe ca wiran wi nain pacun ca weo tamana ma', ca enxofre caca oro wari' ma' quem.

Apocalipse 2:2

Taxi' inuhu' pain oro ca ara hwe ma'. Taxi' inuhu' pain ca taramaja tamana hwe ma', je pain ca quereme cara hwein oro ca to' i'ina nuhu' ma'. Taxi' inuhu' pain ca noc mip huhun oro wari' co pan teretem nana ma', je pain ca tomi' querec huhun caram ma' co apóstolo urut mixein nana ma'. Xi iri' apóstolo caca ta. Querec pin' huhun pain ca mixein nucucun ma'.

Apocalipse 2:20

Taxi' paxi' inuhu' pain ca ara ac i ma' hwe ma', ane ma' ne carawa ca om hohot napa' pahu' ne: Om ca tomi' in pin hwem caxicam narima' ma', co an xiho' nam Jezabel cara pane. Profeta ina, tomi' hwet inain capijacon Iri' Jam ta na. Mixein na, tomi' mixein nonon oro co taramaja mi' nanapa' ma'. To' caracat tata pain ca tomi' ca' tococwa ca': Hohot na pain ca quep ximama' xujuhu'. Hohot na pain ca cao' hwein cwerein carawa ca mi' querec te xine pain oro caji pacun ca Iri' Jam xi' ma caca oro wari' ma', ac i ma' na ca tomi' tococwa ma'.

Apocalipse 2:6

Ac i ma' paxi' na ca om hohot mahu' ma', ane ma' ne carawa ca hohot pan napa' pahu' ne, pain ca noc mip hwein oro ca ara caca oro nicolaíta ma'. An xiho' mahu' pain ca noc tain oro ca ara caca quem.