Gálatas 1:6 - Tradução Bíblica Pacaas Novos

⁶ Wa inuhu' pain ca an pe hap pin hun Iri' Jam ma', co tora' nuhu' pane. Om xi tora' cuhu', ane xiram pa' e' cuhu' Cristo ne. Je xi om howa ni ca' hwein capijacon Iri' Jam ca tomi' hwet napari' con Cristo quem? Ac ca howa hwein na xijein topac ca tomi' hwet napari' con Cristo ta!

Gálatas 1:6 Iomraidhean Croise

Marcos 6:6

He, para om howa cacapa' oro win ma' ne cwa' ne ta ac ca na pain ca coromicat nucun. Hwet toton oro wari' co to nanain oro ca paric to ne xirim ma' ac ca na Jeju ma', mao ac ca na, ca' na ac tococwa na pain capijacon Iri' Jam oro wari'.

João 9:30

Wa inuhu' me! Xi quep xio pin ara capa' ta! Je xi taxi' hun co mi' non pain ca hwara' opa wa ma' quem?

Atos 15:11

Om ca to' witan camain' capari' ca tomi' ha' wa oro ca xirao' nucun Moisés ta. Ca' na ca howa iri' ca': To' witan pan napari' Taramaxicon nexi' Jeju ma', xi om ne ca xiram pa' pan ara capari' ta. Om xi to' witan capari', xi iri' wari' iri' ta. Ane xiram pa' e' capari' ne. Je ca witan iri' ca'. Je ca witan caca oro xerexi' co om judeu nana ma' quem. Ac i ma' na ca tomi' cocon Pedro ma'.

Romanos 10:3

Xi querec pin' cacain ca ara pan ca Iri' Jam ma', pain ca to' hohot pin e' capari' pain ca howa xun Jeju cwa'. Howa e' nanain ca ara pan caca ma', pain ca tama' ara xo' xi', ma' ta hohot iri' paxi' caca ma', pain ca to' hohot pan xijexi' con Iri' Jam ta paxi' caca ma'. Om ca howa je na cocon Iri' Jam pain ca to' hohot pan xuhu' ta tococwa ma.

Romanos 5:2

Wirico Jeju Cristo co o mi' napari' con Iri' Jam ma', xi om ne ca howa ara xun ta. Wirico co mi' napari' pain ca querec pin' xun pain ca tama' xiram pa' e' capari' pain ca tama' quep xiho' e' capari' ca'. Taxi' urun pain ca tama' xiram pa' e' capari' pain ca tama' quep xiho' e' capari' ca'. Tomi' querec te urun pain ca winim' cara xun pain ca aram aram mi' xim capari' pain ca jao jao ma' xun pain ca awi nucun pain ca hwara' opa nucun ta.

Romanos 8:28

Taxi' irin i ca' quem: Oro carawa ca ara napari' ca', je ca mam' quep xiho' capari' Iri' Jam ta. Mam' quep xiho' quep xiho' pi' pin napari' pain oro carawa ca ara napari'. Pain ca om noc xun Iri' Jam cwa', mam' quep xiho' pan napari' pain oro carawa ca ara napari'. Wara tomi' ca' napari' Iri' Jam: Wari' ne inuhu' ta napari'. Ma' ta aram aram ara tain ca param ne pahu' ta napari'.

Romanos 8:30

Pain ca wara tora' capari' ca', wari' ne napari'. Pain ca wari' ne capari' ca', to' hohot pin napari'. Pain ca to' hohot pin capari' ca', mi' napari' pain ca jao jao ma' xun pain ca awi nucun pain ca hwara' opa nucun ta.

1 Coríntios 4:15

Mija paxi' tatara oro co ca' na nunuhu' ma', pain ca howa hun Cristo ma'. Ma' 10.000 paxi' tatara, ane om mija caca co te hwe ma' ne. Xica' pe ina. Ac ca te mahu' na, xi wata' ara ne co pijim' mi' cain' nuhu' pain capijacon Iri' Jam con Jeju pain ca to' witan xim cuhu' pane. Howa ac hun na Cristo Jeju.

2 Coríntios 11:4

Toron napa' xumu pahu', xi i'ina taraju wet huhun oro co pijim' ni ca' nanain ca pijim' nuxut pain ca pijim' hwet urut pahu' con Jeju pane. Xin ne huhun pain ca pijim' ni ca' cacain Tamataracon Iri' Jam ca howa hwe pane, xin ne huhun pain ca pijim' ni ca' cacain capijacon Iri' Jam ca wara howa hwe con Jeju pane quem.

2 Coríntios 2:17

Ane om an xiho' urut cocon oro co om pijim' xo' nana ma' ne. Mija ara xi' nana co pijim' pan teretem nana ma', ac ca vender xin cacain na capijacon Iri' Jam pain ca caramaju xixi' na caca ma'. Om ca an xiho' urut cocon quem. Xi pijim' jein capija ta ara caparut Iri' Jam ta. Taxi' naparut pain ca pijim' xo' nuxut quem. Wirico Cristo co mi' naparut pain ca pijim' nuxut ta.

Gálatas 1:11

Je ca tomi' xuhu' ca' xere, taraju pa' jein ca tomi' xuhu' ca'. Capijacon Iri' Jam ca pijim' xuhu' con Jeju Cristo cwa', om ca maqui' nein ca coromicat nucun wari'.

Gálatas 1:15

Ane xiram pa' pan capa' Iri' Jam ne. Wara tora' napa' pain ca pe pe wet tain monocwam na' pane, pain ca om pan' querec ta' pane. Wara taramaja mi' ne ta napa' pane. Om xi tora' capa', xi iri' wari' ta' ta. Ane xiram pa' pan capa' ne. Maqui' pin iri na xec nein

Gálatas 1:7

Xi ma' ne xijein capijacon Iri' Jam ca tomi' hwet napari' con Cristo ta. Tomi' e' inain i ma' pahu', pain ca xijein capijacon Iri' Jam con Cristo ta xuhu' ca', xi om ne ca ma' ara caca wari' co to' i'ina nunuhu' ma', co pijim' jimama' nunuhu' pain ca an in xin paxi' cacain capijacon Iri' Jam con Cristo ma'.

Gálatas 2:14

Querec pin' iri inonon pain ca om xuruxut xo' nucucun ne, pain ca om tomi' ha' cacain oro ca hu nucun Jeju ca iri'o' ma', ca ara je capari' ma', tomi' in pin ac ton na Pedro. Taraju taraju pi' pin nanapa' pain ca tomi' in pin ton quem. Tomi' ca' inon: Cain' cain' xima quem Pedro, ac i ma' na ca tomi' ton ca'. Judeu paxi' ma, ane om an xiho' mami' momon oro hwanana nexi' co tomi' ha' taxipa' nanain oro ca xirao' nucun Moisés ne. An xiho' pin momon co om judeu nana cwa'. Cain' cain' xima quem? Ac ca cuc cuc momon a xira co om judeu nana ma', ac ca an xiho' jujun oro judeu pain ca tomi' ha' cacain oro ca xirao' nucun Moisés ta momon na. Ac i ma' na ca tomi' in pin ton ma'.

Gálatas 2:2

Mao inain Jerusalém, xi om ne ca mao rain i cain ara capa' Iri' Jam ta. Tan' mama' iri urut ne, cut in ac xujuxut na cocon oro co querec wet nonon co howa nana ma', co ac ca taramaxicon caca na ma'. Xica' to urut pain ca cut in xujuxut. Tomi' xo' ac toton na pain ca taramaja ne ca', pain ca pijim' toton co om judeu nana ma', pain ca pijim' hwet toton pain capijacon Iri' Jam ca tomi' hwet napari' con Jeju. Ma' ta taxi' mahu' pain ca pijim' ta' ca' inonon, ma' ta hohot na ca pijim' nem mahu' quem inonon. Mo xi om hohot cocon ca pijim' ne ca', taramaja ximao ac ta' xira pain ca pijim' toton oro co om judeu nana ta.

Gálatas 2:5

Om ca ha' camain' urut cocon. Ma' ta om wanan xine ca pijim' mixein wa pain ca pijim' iri'o' wa ta urut cocon. Ma' ta howa cara hwein capijacon Iri' Jam ca iri'o' con Jeju ta urut pahu' quem.

Gálatas 2:7

Je i ma' ta, je ca tomi' xuhu' cocon, tomi' ca' nanapa' co querec wet nonon co howa nana: Hohot na ta nanapa', xi om ne ca querec pin' ara cacapa' pain ca tomi' capa' Iri' Jam ta. Pijim' roron co om judeu nana ta nem Iri' Jam, pijim' roron pain capija con Panxita' ta nem ta nanapa'. Win ne ca pijim' roron oro judeu ta con Pedro cwa' quem nana.

Gálatas 5:14

Je ca hu capari' ca xirao' nucun Moisés quem: Ta noc momon oro win ma' ma me ta. Win ne ca om noc pan xijem ma' quem napari'. Mo ta tomi' ha' hwein i ma' con, ac ca wara tomi' ha' tomi' ha' pi' pin hwein na oro ca xirao' nucun ta.

Gálatas 5:4

Wahu' pain ca to' hohot xijexi' pain ca tomi' ha' xin ca xirao' nucun Moisés hwe ma', to ni ca' hun Cristo. To' hohot xijexi' pain ca tomi' ha' xin ca xirao' nucun Moisés ta iri hwe ne, noc pin ac hun na Iri' Jam pain ca xiram pa' e' cuhu' ma'.

2 Tessalonicenses 2:14

To' witan xim nuhu' pane. Je ca howa xine cuhu' pain ca xo' taraju hwein capijacon ca tomi' hwet urut pahu' con Jeju quem. Ma' ta aram aram mi' xim cuhu' pain ca awi nucun Taramaxicon nexi' Jeju Cristo ma', je pain ca hwara' opa nucun ma', je pain ca om caracat nucun ma' quem.

1 Timóteo 1:14

Om xi xiram pa' capa' Taramaxicon nexi' Cristo Jeju pane, xi iri' wari' ta' ta. Ane xiram pa' tamana pan capa' ne. Mi' e' napa' pain ca howa ton. Mi' e' napa' pain ca om noc ton, je pain ca om noc toton oro wari' co howa nonon ma' quem.

1 Timóteo 1:3

Wara tomi' inem pane, tomi' mip inem pain ca mao tain qui' tain Macedônia pane. Mon to wet rain Éfeso ta inem pane. Ma' ta hu mip momon pain ca pijim' maho' je ta momon co pijim' pan teretem nanain capijacon Iri' Jam ta inem pane.

2 Timóteo 1:9

Wirico co to' witan napari', wirico co tora' napari', iri' wari' ne napari' quem. Om ca mam' to' witan capari' pain carawa ca awi ca ara xi' paxi' iri', om na. Mam' to' witan napari' pain ca param pan nucun. Mam' to' witan napari' pain ca xiram pa' pan capari' quem. Om xi xiram pa' capari', xi iri' wari' iri' ta. Ane wara xiram pa' qui' capari' pain cara pane ne, pain ca om tomi' ma' pin querec cain macan' pane, wara coromicat an pe xo' mi' napari' pain ca xiram pa' nucun. Main to' witan turuhu' Cristo Jeju cwa' napari', ac i ma' tara ca xiram pa' xuhu' ta napari' pane.

2 Timóteo 2:1

Je ca tomi' xim ca' arain. To' hwara' opa ne pain xumu ca' ron Iri' Jam. Na non pain ca to' hwara' opa quem. Xi om ca Cristo co xiram pa' e' nem ma', pain ca mi' e' quem, pain oro ca param nucun.

1Pedro 1:15

To ni ca' jein ca caracat wa pain oro ca ara hwe ta. Win ne ca pe ni ca' cain ca caracat wa Iri' Jam co howa xine nuhu' ma'.

2 Pedro 1:3

Quep xiho' tamana napari' Iri' Jam, xi om ne ca hwara' opa ara ca pain ca mi' mi' pi' pin capari' pain oro ca to' xuruxut xo' napari' pain ca win xumu e' xin ca param nucun. Ha' napari' pain ca xuruxut xo' wa quem, xi mi' ara capari' pain ca querec pin' xo' xun Jeju Cristo. Wirico co wari' ne napari', ma' ta jao jao ma' mahu' pain ca hwara' opa ne ca', je pain ca awi tamana ne ca' quem napari'.

Apocalipse 22:21

Param inon Taramaxicon nexi' Jeju pain ca quep xiho' quep xiho' xam' cuhu' ma', pain ca mi' e' cuhu' pain ca param nucun ta. Amém, iri'o' na ca tomi' nucun ta.