Gálatas 1:4 - Tradução Bíblica Pacaas Novos

⁴ Taramaxicon nexi' Jeju Cristo ma', om ca narain ho' xucun pari'. Mi' pin caho' napari', xic am ca' napari' pain ca caracat nexi'. To' witan napari', ma' ta ha' cuhu' pain ca om an xiho' mami' huhun pain oro ca pan teretem nucucun oro wari' co om howa nanapa' ta napari'. Je ca param mi' capari' Cotere' Iri' Jam.

Gálatas 1:4 Iomraidhean Croise

Mateus 13:22

Oro xucucun ma' iri nana ne, co tomi' joc mam' mi' nanain macan' ca ma' pi ma', taraju paxi' nanain capijacon Iri' Jam. Aram aram coromicat ni ca' ac cacain na. Toron ximama' ac ne na ximicocon pain oro ca to' i'ina nonon, caramaju xixi' na nana quem. Mo xi quep xiho' cocon oro caramaji macan' ca', ane om quep xiho' cocon ne, mixein e' nonon. Ac ca mo' nein pi na capijacon Iri' Jam pain ximicocon. Ac ca om wina ne na, xi to' xucun wari' tococwa pain ta.

Mateus 20:28

Win ta' ca', pain ca Iri' Wari' ta' ca'. Om ca maqui' ta' pain ca taramaja mi' xine xuhu', om na. Taramaja mi' pan xim inuhu'. Mi' pin caho' xim inuhu', ma' ta witan mija hwe ta inuhu'. Je ca maqui' ta' ca' na ca tomi' caparut ca'.

Mateus 26:28

Comi memem ca', an xiho' nain cocu ta ac caparut na. Je ca to' querec pin' cuhu' pain ca tomi' an pe xo' mi' cuhu' Iri' Jam cwa', pain ca to' witan xim cuhu' ca'. Ao mao iri tara cocu pain ca mi' pin ta' ne ca' ne, je win ara pin tain cain ca wara tomi' an pe nucun. Mija tara oro wari' co mi' pin caho' ta' ta' quem. Xic am pin ac xine tara ca caracat nucucun pata'.

Mateus 26:42

In ca' mami' ac tococwa na, tomi' mami' ton Te ta ac ca na quem. Te ac con na. Am om xin ne mapa' pain ca tomi' xim ca', pain ca nain ho' ne pain ca jain jain ta' ne pain ca mi' pin ta' ne ca' xim ca'. Mo ta jain jain ra mapa', mo ta mi' pin ra mapa' quem. Je i ma' pum ta Te. Param e' inain ca param pan nem ta na ca tomi' con ma'.

Mateus 6:9

Tomi' xun iri jun ne, tomi' ca' jun: Coturut Iri' Jam co pe pawin. Param urut pum pain ca querec pin' querec pin' pi' pin quequem oro wari' pain ca awi tamana nem pain ca Iri' Jam nem.

Marcos 10:45

Win ta' ca'. Wata' paxi' na co Iri' Wari' cwa'. Ane om maqui' ta' pain ca taramaja mi' xine xuhu' ne, om na. Taramaja mi' pan xim inuhu'. Mi' pin caho' xim inuhu', ma' ta witan mija hwe ta inuhu'. Je ca maqui' ta' ca' na ca tomi' tococwa ma'.

Lucas 22:19

An iri nain capam' ne, tomi' ac con na Iri' Jam: Tomi' querec te urut pum pain ca mi' maparut pain capam' ca' quem Te non, jicat caracan ac cain na, mi' ac tococwa pain na. Capam' ca', an xiho' nain cwere ta ac tococwa na. Om ca narain ho' xuhu' pain. Cao' jein, tama' ara cara jein, ma' ta mam' pe wet mahu' pain ca mi' pin caho' xim xuhu' ca' inuhu' ta ac tococwa na.

Lucas 22:42

Te ac con na. Mo ta nain ho' xim mapa' pain ca jain jain ta' ne ca', pain ca mi' pin ta' ne ca' quem Te. Tara pum, nain ho' ne pain me paxi' inem. Ane param e' tain ca param nem ne. Noc inain ca param ne ca' na ca tomi' con Cote ca.

João 10:11

Wata' co iri' pastor co querec wet xo' nain ovelha. Iri' pastor ma', om ca nain ho' xucun pain ca querec wet xo' cain ovelha nucun. Mi' pin caho' tain ovelha ne ta na. Ac i ma' ina quem. Om ca nain ho' xije cocon oro wari' co howa nanapa' ma'. Mi' pin caho' toton inonon.

João 12:31

Maqui' pin na xec pain ca tomi' xun tococwa oro wari' co om howa nana ma', pain ca em' hwe, mama' jein cote ne xe ta xun tococwa ma'. Xin hwet pin ac tocwa tara Caxicon Jam co taramaxicon pe ho' nonon quem.

João 5:30

Om na carawa ca ara taxi' ta' pain ca param pan ne. Tomi' querec iri inonon oro wari' pain ca ac juiz ta' cocon ne, pain ca tomi' querec toton pain carawa ca ara caca ma', pain ca wum co em' ta toton ma', tomi' ha' e' inain ca tomi' nucun Te pain ca tomi' querec roron capa' ma'. Tomi' xo' e' inonon pain ca em' hwe, mama' jein cote ne xe ta toton. Xi win xumu tain ca param pan ne ta. Win xumu e' inain ca param pan nucun Te co hwet roron oro wari' ta napa' cwa' na ca tomi' cocon oro taramaxicon Jeju pane.

João 6:38

Pain ca quiji' qui' tain pawin pane, om ca maqui' ta' pain ca ara tain ca param pan ne ta', om na. Ara tain ca param nucun Te co hwet roron oro wari' ta napa', je ca ara ta' ta' pain ca quiji' qui' tain pawin pane.

Romanos 1:7

Je ca xirao' mi' xirao' mi' pi' pin xuhu' ca', pain ca to hwein Roma ma'. Xirao' mi' inuhu' pain ca om noc cuhu' Iri' Jam pain ca oro wari' ne pin cuhu' ma'. Param inon Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param inonon pain ca mi' cucuhu' pain ca om toron ne xumuhu' quem.

Romanos 12:2

Ta an xiho' huhun oro wari' co pan teretem nana ma' me ta. To' jimama' xut pain iri' xumuxut ca' me jun Iri' Jam. To' xocori pin rain iri' ca coromicat nuxut ca' me jun. Ma' ta ha' cuhu' pain ca querec pin' hwein oro ca param nucun ca an pe mi' capari' ca', ma' ta ara hwein quem. Param ara xi' nain oro ca awi wa Iri' Jam ta. Param nain carawa ca hohot non. Om ca param ni ca' cain oro ca param nucun

Romanos 4:25

Je ca tomi' xuhu' ca'. Om ca nain ho' con Jeju Iri' Jam pane. To' pa' pin jun tata co to' pa' pin xun nonon pane. Xi om ne ca caracat nexi' ta. To' e' mami' ac con na quem. Ma' ta to' hohot pin xuhu' ta napari' ta.

Romanos 8:27

Querec pin' nain ximixi' pain ca coromicat nexi' Iri' Jam. Je ca taxi' cain ca coromicat nein Tamataracon pain ca tomi' ne iri' ximinain ma', pain ca tomi' mi' capari' con. Tomi' nain ca param pan nucun Iri' Jam. Pain ca tomi' mi' capari' con, pain ca wari' nucun Iri' Jam iri' ca', tomi' nain ca param pan nucun Iri' Jam.

Romanos 8:3

Ca xirao' nucun Moisés ma', om ca hwara' opa ne, om ca to' om pin ac nein ca hwara' opa nein ca caracat nexi'. Xi tomi' ha' pan xin ta. Ane hwara' opa pan ca Iri' Jam ne. To' om pin nain ca hwara' opa nein ca caracat nexi', xi om ne ca mam' ara capari' con iri' Panxica cwa' ta. An tan pan rain curucucun oro wari' co caracat nana ma', mi' pin caho' roron pain ca caracat nucucun ta non, to' om pin ac cain na ca hwara' opa nein ca caracat nexi' ca pe ho' napari' pain cwerexi' ca'.

Romanos 8:32

Win ne ca om narain ho' capari' con Panxica pane, pain ca mi' pin caho' pin roron ta con pari' pane. Mi' napari' con, mi' mi' xam' napari' pain oro carawa con quem. Je ca tomi' xuhu' ca': Om ta mi' e' capari' pain oro carawa quem ra? Mi' e' tarapari' pain, xi wara mi' ara capari' con Panxica ta.

1 Coríntios 15:3

Pijim' hwet inuhu' pain capijacon Iri' Jam ca wara tomi' hwet capa' pane. Awi tiquin' ca' nain oro xijein capijacon ta. Ca' na con: Mi' pin caho' napari' Cristo, ma' ta om wap xihwe pain ca caracat nuhu' ta napari'. Win ne ca xirao' pe xine pain capijacon pane.

2 Coríntios 4:4

Wirico Caxicon Jam co ac Iri' Jam nonon oro co om howa nonon Cristo ma', wirico co to' i'ina nonon pain ca coromicat xo' nucucun. Ac ca to' om pin cain na tococon pain ca om coromicat nucucun. Ma' ta om taraju pa' hwe ta nonon. Ma' ta om querec pin' hwein naran nein capijacon Iri' Jam ca an hwet pe nain ca toc meremem nucun Cristo pain ca hwara' opa tamana nucun ma' nonon. Wirico Cristo ara xi' na co an tan pan non Iri' Jam ma', iri' wirico na.

Gálatas 2:20

Ac ca mi' pin wi ta' na con Cristo quem, pain ca mi' pin pe cain panaxicon pane. E' e' wet paxi' ina, ane om e' pan ta' ne. Wirico Cristo co e' pe ho' napa' pain cwere. Tomi' ha' e' inain ca param nucun. Pain ca e' e' wet ta' pain macan' ca', howa cara inon Panxica Iri' Jam co om noc napa' cwa', co om nain ho' xucun pata' pain ca mi' pin caho' xim ta capa' ca'.

Gálatas 6:14

Wata' iri na ne, noc inain ca xec xec wa. Ac ca xec xec e' ta' na pain ca tomi' querec te ton Taramaxicon nexi' Jeju Cristo pain ca mi' pin caho' capari' pain pana pane. Ac ca xec xec e' tain na panaxicon ta. Horoman pin napa' oro caramaji macan' ca', horoman pin napa' oro ca param ximama' wa ca' quem. Ac ca cono' ca' capa' na, xi win xumu mami' tain ta.

Efésios 1:11

Oro ca ara ca Iri' Jam cwa', ara nain ca wara coromicat an pe xo' nucun. Win ne ca param ta' ca' na, ara ara ac cain na. Je ca wara tora' caparut pain ca judeu urut ca'. Wari' ne naparut. Xi om ne ca ma' ara cuhu' Cristo ta naparut.

Efésios 2:2

Pan teretem taxipa' hwe, je curuhu' pane. An xiho' e' huhun oro wari' co om howa nonon Iri' Jam. Tomi' ha' taxipa' hun Caxicon Jam co taramaxicon pe ho' nonon oro caxicon jam co taramaja mi' nonon pain nanawin ma'. Wirico Caxicon Jam co taramaja pe ho' nain ximicocon oro wari' co om tomi' ha' camain' nana cwa', wirico co tomi' ha' hwe pane.

Efésios 5:16

Ta om camain' hwe pain ca ara hwein ca awi wa me. Mija ara xi' na ca caracat wa pain oro xec nexi' ta.

Efésios 5:2

Ta noc camain' xujuhu' me. Win ca Cristo pain ca om noc qui' capari' pain ca om narain ho' qui' xucun pari' pane, ac i ma' je pain ca om noc xujuhu' me. Mi' pan xucun con Iri' Jam Cristo. Ma' ta mi' pin caho' toton ta non pari' pane. Hohot tamana non Iri' Jam quem, hohot tamana non pain ca mi' pin caho' capari'.

Efésios 6:12

Xi wari' caca co mixita iri' ta. Oro caxicon jam nana co mixita iri'. Mixita ururun oro caxicon jam cocon oro taramaxicon nucucun co taramaxicon to ho' nanain oro ca om awi wa pain macan' ca', cocon oro wari' co ac ca to cacain ca jitacat nein na pain ca ari cocon Iri' Jam ma' quem. Mixita ururun oro caxicon jam co hwara' opa to nanain nanawin cain quem. Wiricoco co mixita iri' ta.

Filipenses 4:20

Na e' na pain ca tomi' querec te xun Cotere' Iri' Jam co awi tamana cara ta! Amém, iri'o' na ca xirao' ne ta.

1 Tessalonicenses 1:3

Tama' mam' pe wet urut pahu' pain ca taramaja nuhu' ma'. Taramaja mi' hun Iri' Jam, xi om ne ca howa ara hun ta. Jain jain huhun oro win ma' nuhu' pain ca quep xiho' xun huhun ma', xi noc camain' huhun ta. Quereme hwein oro ca to' i'ina cucuhu' ma' quem, xi om ne ca winim' ara hun Taramaxicon nexi' Jeju Cristo pain ca in qui' ta' nucun ma' quem. Je ca mam' pe wet urut ca', pain ca tomi' mi' urut pahu' con Cotere' Iri' Jam.

1 Tessalonicenses 3:11

Mi' xut pain ca hwet xo' urut cocon ta urut con pahu' quem, ac i ma' na ca tomi' urut con Cotere' Iri' Jam con Taramaxicon nexi' Jeju quem.

1 Tessalonicenses 3:13

Ac i ma' na ca tomi' mi' urut pahu' con. Ma' ta to' hwara' opa momon pain iri' ximicocon ma' urut con pahu'. Ma' ta hohot cocon Cotere' Iri' Jam, ma' ta om ma' camain' cocon carawa ca ja' tomi' em' cocon pain ca caracat wa pain ca aram aram coco' quima hwet xun cocon ma', pain ca in qui' tain main macan' ca', pain ca ja' ja' xim quequem oro wari' nem quem urut con pahu'.

2 Tessalonicenses 2:16

Tomi' mi' urut pahu' con Taramaxicon nexi' Jeju Cristo con Cotere' Iri' Jam. Om ca noc capari' Iri' Jam. Om ca pi' ra ha' ne ca to' hwara' opa cara capari'. Xiram pa' napari' pain ca mi' e' capari' pain ca momon winim' xun pain ca main mi' xim capari' pain carawa ca awi ca wara coromicat an pe xo' mi' capari' quem. Om xi mi' capari' pain, xi iri' wari' iri' ta. Ane xiram pa' pan capari' ne. Je ca mi' e' capari' pain.

1 Timóteo 2:6

Om ca narain ho' xucun pari'. To' pa' pin ma' tatarapa' ne na pane. Ma' ta to' witan ca' toton pain ca caracat nucucun ta napari'. Maqui' iri na xec nein ca wara coromicat an pe xo' ca Cote ca pane ne, je i ma' xec nein ca to' querec pin' capari' pain ca to' witan xuhu' ta capari' ca'.

Tito 2:14

Om ca nain ho' xucun pari' pane, mi' pin caho' xuhu' ta napari' pane. Ma' ta to' witan ca' xuhu' pain oro ca pan teretem nuhu' ta napari'. Ac ca hohoc capari' na pain quicon. Ma' ta to' om pin tain ca caracat nuhu' ta napari'. Ma' ta iri' wari' ne xuhu' ta napari'. Param napari' pain ca win xumu xun pain ca tama' ara xin oro ca awi wa quem.

Hebreus 2:5

Iri' Jam ma', pain ca coromicat an pe xo' cain xocori macan' je xocori pawin ca maqui' ta' ma', om ca taramaxicon to ho' jein ta tococwa oro jam co taramaja mi' nonon ma'.

Hebreus 6:5

Wara querec pin' paxi' nanain ca awi tamana nein oro capijacon Iri' Jam ma'. Wara querec pin' paxi' nanain ca hwara' opa nucun ca an hwet pe ta' ca Cristo pain ca aram aram in qui' ta' nucun quem.

Hebreus 9:14

Ac i ma' na ca hwara' opa ne quinain oro carawa ma'. Hwara' opa paxi' na quinain oro carawa, ane hwara' opa tamana pan ne quicon Cristo ne. Hwara' opa tiquin' ca' nain quinain carawa, xi om ne ca awi tamana ara ca Cristo ta. Om ca em' camain' ca. Ha' non pain ca mi' pan xucun con Iri' Jam pane, xi quep xiho' pan ara con Tamataracon ca e' cara ta. To' hohot pin napari' quicon. To' om pin nain ca em' nexi' pain ximixi' pain ca coromicat nexi'. To' om pin nain ca toron ne ximixi' pain ca caracat nexi'. Om ca to' i'ina mami' capari' oro ca ara nexi' ca to' cono' pin napari' ca'. Ha' pin ac capari' na pain ca in ac xun Iri' Jam co e' cara quem.

Tiago 4:4

Cain' cain' xihwe pain ca an pe pin hun Iri' Jam quem? Om ca taraju pa' hwe ra? Wari' co win ma' ne nonon oro co tama' pan teretem nana pain ca om howa cocon Iri' Jam ma', wirico co noc non Iri' Jam.

1Pedro 2:24

Wirico co quereme ma', pain ca tatatain pe tocwa pain pana pane. Cut pi' pin nain ca caracat nexi' pain curucun. Ma' ta caracat caracat om pin hwe ta napari'. Ma' ta xuruxut xo' hwe pain ca ara e' hwein ca awi wa ta napari' quem. To' xio pin nuhu', xi om ne ca wap wein pin ara xine curucun pane ta.

1Pedro 3:18

Xi jain jain ara ca Cristo pain ca mi' pin caho' capari' pain ca caracat nexi' pane ta. Pain ca mi' pin nucun pane, mi' pin na. Om ta mi' pin mami' ca. Om ca caracat camain' ca, xut xo' na, awi na. Ane mi' pin caho' pan capari' pain ca pan teretem nexi' pain ca om xuruxut xo' nexi' ne. Ma' ta o mi' xuhu' con Iri' Jam ta napari'. To' pa' pin iri ta pane ne, mi' pin ac ne na curucun. To' e' mami' iri ta ne, je Tamataracon Iri' Jam ac ne na ca to' e' mami' non quem.

1João 2:2

Wirico co pe nain maxixi' pain ca mi' pin caho' capari' pane. Ma' ta xic am pin cain ca caracat nuhu' Iri' Jam ta napari'. Om ca xica' mi' pin caho' capari' pain ca caracat nexi' quem, om na. Mi' pin caho' mi' pin caho' pi' pin tata pain ca caracat nucucun oro wari' pain oro xijein macan' ta.

1João 3:16

Mi' pin caho' iri napari' Jeju Cristo pane ne, to' querec pin' ac capari' na pain ca om noc camain' capari' ta. Om ca nain ho' xucun pari', mi' pin caho' napari'. Ac i ma' xi' quem, om ta narain ho' xijexi' cocon oro xerexi' cwa'. Quep xiho' xijexi', am cono' xi' iri' pain ca quep xiho' xijexi' ca'. Je i ma' ira xi'.

Apocalipse 1:5

Param inon Jeju Cristo pain ca quep xiho' cuhu' pain ca mi' cuhu' pain ca param nucun, param inon pain ca mi' cuhu' pain ca om toron ne xumuhu' quem. Wirico Jeju co tama' tomi' iri'o' ma', co to' e' mami' cain' ca Iri' Jam pane, co iri' Taramaxicon co hwara' opa tiquin' ca' nonon oro taramaxicon co taramaxicon to nanain oro xijein macan' ca'. Wirico Jeju Cristo co om noc napari' ta. To' witan ca' napari' pain ca caracat nexi' ca'. Mam' to' witan napari' pain quicon.

Apocalipse 5:9

Com ac cacain na xocori tamara': Wum co awi tamana, wum co hohot pain ca an main tapari carawa ca joc top ma', je pain ca pa main oro ca hupa' caho' nein ma'. Xi om ne ca to' pa' pin ara xima pane ta. Cut mi' momon con Iri' Jam oro wari' co xucun wari' xucun wari' pi' pin nana ma', co capija ni ca' nonon oro xucucun wari' ma', co to ni ca' nonon oro xucucun wari' pain macaracocon ma', co to nanain oro xijein macan' ma' quem. Pain ca cut mi' momon con Iri' Jam ma', mam' to' witan momon pain cocum.

Apocalipse 7:9

Xirao' pin iri tata pain jitaracocon oro waram winacon Israel ne, noro ac ta' na, querec ac toton na oro wari' pain ca cut in tamana nucucun. Mija nana wari' ta, om ca tomi' ac tococwa, xi paric caca ta. Maqui' nanain oro xijein macan'. Xucun wari' xucun wari' pi' pin nana, to ni ca' nonon oro xucucun wari' pain macaracocon, capija ni ca' xucucun quem. Coco' quima hwet nanain ca mam' xao pe pe ca Iri' Jam co Iri' Taramaxicon ma', coco' quima hwet nonon co ma' co ac Wijimain Taramaji Ovelha ma' quem. To nonon wom co towo', cut nanain tahot pain micocon quem.