Gálatas 1:10 - Tradução Bíblica Pacaas Novos

¹⁰ Cain' ca coromicat mi' mahu' pain ca xirao' mi' ac i ca' xuhu' ca' quem? Tomi' querec te xirarapa' na nonon oro wari' ta mahu' ra, ac i ma' na ca coromicat mi' mahu' quem? Om na ta! Tomi' querec te pan xirapa' Iri' Jam na ina. Mo xi win xumu toton oro wari' pain ca tomi' querec te pan tatarapa' ta toton ca', mo xi coromicat ac i ma' ta', om xi ha' capa' pain ca taramaja mi' ton Cristo. Taramaja mi' e' xitoton oro wari'.

Gálatas 1:10 Iomraidhean Croise

Mateus 22:16

Mo tomi' jun e' ac tococwa na oro win ma' caca cocon oro win ma' ca taramaxicon Herodes ma' quem. Ma ac caca na, mo hwet ac cocon na Jeju. Tomi' ac cocon na: Tomi' xim urut pum ta taramaxicon co ca' na taxipa' capijacon Iri' Jam. Taxi' urut pum pain ca om mixein ma ma'. Ca' na xo' maparut pain capijacon Iri' Jam ca an hwet mi' naparut pain ca xuruxut xo' wa pain ca tomi' ha' je caparut ca'. Querec querec ac wiricoco pi' pin nenem oro wari' ma' quem. Co hwara' opa nana ma', co om hwara' opa nana ma' quem, querec querec ac wiricoco nenem, xi tomi' querec te paxica' momon ta.

Mateus 28:14

Mo ta taxi' cuhu' taramaxicon ma', tomi' xo' ac xut con tara, om ca em' caca ta xut con pahu', tomi' tomi' na pin ac xut con tara. Om ac ne tara ca quep xirac cuhu' ma', ac i ma' na ca tomi' tococwa oro soldado ma'.

Mateus 6:24

Om ca taramaja mi' 2 ac tococwa oro taramaxicon. Mo ta param tocwa xucun, noc ac tocwa tara xucun. Mo ta win xumu tocwa xucun, tomi' napat ac tocwa tara xucun. Je ca tomi' xuhu' ca': Om ca taramaja mi' ac hun Iri' Jam pain ca taramaja mi' taramaja mi' wet hwein dinheiro ta.

Atos 12:20

Ac i ma' ac i ma' nana, mana' tamana ac tococwa na oro wari' nein Tiro je Sidom ma'. Cain' cain' xira con ne ac caca na. Na e' na pain ca tomi' xo' xun ta, xi maqui' pan ara nein macaracon oro carawa ca cao' iri' ca' ac caca na. Mo hwet xun ta ac caca na. Tomi' toto cain' nonon Blasto ma', co hwara' opa ma', pain ca taramaja mi' con Herodes ma', pain ca querec wet cain xiricon ma'. Quep xiho' xut me ac cocon na. Tomi' xo' ron Herodes ma', pain ca mana' caparut ca'. Mana' maho' xijexi' quem ca' xun urut quem, tomi' toto ac i ma' nonon Blasto ma'. Ma ac ca na.

Atos 5:29

Cain' cain' xuxut quem ac ca na Pedro cocon oro win apóstolo ca ma'. Hohot xiraparut pain ca tomi' in pin urut con Iri' Jam pain ca tomi' ha' pan urut pahu' pain ca wari' nuhu' ra? Om na ta! Na e' na pain ca tomi' ha' pan urut con Iri' Jam ta.

Romanos 1:1

Paulo ina pain ca xirao' mi' xuhu' ca'. Wari' nucun Jeju Cristo ina pain ca taramaja mi' e' ton ca' quem. Tora' napa' Iri' Jam pain ca apóstolo ra capa' pane, pain ca tomi' hwet rain capija ca tomi' xim ca', tomi' hwet rain capija ca tomi' hwet nuhu' pain ca to' witan xim cuhu' Jeju ta capa' pane quem.

Romanos 2:29

Om ca judeu ca wari' co tomi' ha' e' nain ca xirao' nucun Moisés ta. Judeu na wari' co iri' judeu pain iri' ximicon ma', co ac ca wac xirac xine na pain iri' ca coromicat nucun. Je Tamataracon Iri' Jam ca wac xirac non ma'. Wari' co wac xirac ac i ma' wa, wirico co hohot napa' ta ca Iri' Jam. Om na wari' co hohot na ta non.

Romanos 2:8

Co tama' win xumu e' nanain ca param pan nucucun ma' iri nana ne, pain ca om tomi' ha' cacain capijacon Iri' Jam ca iri'o' ma', je pain ca param e' cacain ca pan teretem wa ma', wiricoco tatara co mana' tamana ca Iri' Jam. Wiricoco tatara co wap tamana ca quem.

1 Coríntios 10:33

An xiho' xine quem. Querec wet taxipa' inain ca param pan caca oro wari', ma' ta tomi' querec te cacapa' ta inonon. Quep xiho' toton ina pain oro ca ara pan ta' ca'. Om ca win xumu tain ca param pan ne, miri'om inain cocon. Ma' ta witan pin caca oro wari' ta ina.

2 Coríntios 12:19

Am coromicat mi' ca' maparut: Tomi' narain ho' taxipa' e' xucucun pain ca xirao' nucucun ta, am ac i ma' ne ca coromicat mi' maparut ma'. Om na ta, ta coromicat mi' ac i ma' maparut me. Taxi' naparut Iri' Jam pain ca tomi' iri'o' urut ca', xi om ne ca mi' pan ara caparut pain ca tomi' iri'o' nuxut Cristo ta. Je ca tomi' xuhu' pain ca tomi' querec te xuhu' ca' xere. To' hwara' opa e' xim urut pahu'. Je ca taramaja mi' urut pahu' pain oro ca ara nuxut ta.

Efésios 6:6

Ta tomi' ha' e' huhun pain ca ja' noro cucuhu' me. Ma' nana co taramaja ac i ma' nana, ma' ta in ac cacapa' pain ca taramaja xo' ne ca' nana. Ta taramaja ac i ma' hwe me. Na e' na pain ca taramaja querec te hwe pain iri' xumuhu' ta. Ac ca taramaja mi' e' hun Cristo ma' tara pain ca taramaja mi' huhun ma'. Param nuhu' pain ca taramaja xo' wa Iri' Jam quem.

Filipenses 1:1

Paulo ina pain ca xirao' mi' xuhu' ca'. Wirico Timóteo cwa' quem, xirao' mi' urut pahu'. Wari' nucun Cristo Jeju urut pain ca taramaja mi' urut con ca'. Xirao' mi' xirao' mi' pi' pin urut pahu' pain ca wari' nucun Iri' Jam ma', pain ca win cwere hun Cristo Jeju hwe ma', pain ca to hwein Filipos ma'. Wahu' pain ca pastor hwe pain ca querec wet huhun oro co howa nana ma', wahu' pain ca diácono hwe ma' quem, xirao' mi' urut pahu' quem.

Colossenses 3:22

Tomi' inuhu' pain ca taramaja mi' e' huhun taramaxicon nuhu' pain macan' ca' quem. Tama' tomi' ha' jujun pain oro ca ara je cucuhu' ma'. Ta tomi' ha' e' huhun pain ca querec hohot xuxun pain ca ja' noro cacapari' ta hwe me. Tomi' ha' iri'o' jujun, tomi' ha' querec te tara iri' xumuhu' ta, xi tomi' ha' pan ara hun Taramaxicon nexi' ta.

1 Tessalonicenses 2:4

Pijim' mi' e' urut pain iri' capijacon Iri' Jam ca tomi' hwet napari' con Cristo Jeju. Win ne ca hohot hwe caparut Iri' Jam pane, pain ca pijim' jein capija ta caparut pane. Om ca tomi' ca' xujuxut cocon oro wari' pain ca pijim' mi' urut cocon pain capijacon Iri' Jam: Tomi' toto xuxun, ma' ta tomi' querec te cacapari', om ca tomi' ac i ma' xujuxut cocon. Pijim' xo' xuxun, ma' ta tomi' querec te pan capari' Iri' Jam co noro nain ximixi' ca', co taxi' napari' pain ca coromicat nexi' ca', ac i ma' xujuxut pain ca pijim' urut cocon oro wari' ma'.

Tiago 4:4

Cain' cain' xihwe pain ca an pe pin hun Iri' Jam quem? Om ca taraju pa' hwe ra? Wari' co win ma' ne nonon oro co tama' pan teretem nana pain ca om howa cocon Iri' Jam ma', wirico co noc non Iri' Jam.

1João 3:9

Oro wari' co mana panxica Iri' Jam pin nana ma', om ca caracat taxipa' caca, xi ma' ara cocon iri' ca e' nucun Iri' Jam ta. Om ca caracat taxipa' ac caca, xi mana panxica Iri' Jam ara caca ta.