Efésios 6:8 - Tradução Bíblica Pacaas Novos

⁸ Xi taxi' ara hun Taramaxicon nexi' pain ca mi' mi' xam' ton cocon pain carawa ca awi oro wari' co taramaja xo' nana ma'. Co taramaja mi' e' nonon taramaxicon nucucun ma', co taramaja mi' pan xucucun ma' quem, mi' ac tococwa tara pain oro ca awi wa pain ca taramaja xo' nucucun.

Efésios 6:8 Iomraidhean Croise

Mateus 16:27

Je ca tomi' xuhu' ca' ac caparut na. Ja' ja' xine. Ta jin' huhun oro wari' co quep em' xim nunuhu' pain ca ja' ja' mahu' me. Maqui' ta' ara xi' na xec nein ca in qui' ta' ne ca', wata' pain ca Iri' Wari' ta' ca', in qui' ac tain tara pawin. Maqui' wi ta' cocon oro jam co taramaja mi' nanapa'. Maqui' wi ta' pain ca hwara' opa nucun Te quem. Pagar ac toton tara oro wari', pagar toton pain oro ca ara caca pain ca e' e' wet nucucun. Win ne ca ara hwe pane toton, mi' mi' xam' ac toton pain tara. Wahu' quem, win ne ca ara hwe pain ca ja' ja' mahu' pane xuhu', pagar pagar xam' ac xuhu' tara quem.

Mateus 20:7

Xi ma' ca wari' co taramaja je naparut ta ac cocon na. Je xi mo taramaja mama' hwein tota cain quem ac tococwa na. Mama' ac caca na quem.

Mateus 5:12

Tomi' querec te je pain ca to' i'ina ac i ma' xihwe. Tomi' querec te tamana je. Xi om ne ca awi tamana ara ne oro ca mi' xim cuhu' Iri' Jam pain pawin cain ta. Ac i ma' ara xi' na ca ja' tequi' quep em' qui' tococwa oro profeta co wara ma' nana pane.

Mateus 6:1

Ma' tara xumuhu' me. Ara iri jein ca awi wa pain ca ara xin hwein ca param nucun Iri' Jam ne, ta ara hwet to hwein cocon oro wari' me ta ac tococwa na. Ta querec ma' tatarapa' pain hwe me. Mo ta querec ma' tatarapa' pain hwe, om ta mi' cuhu' pain oro ca awi wa Cotere' co pe pawin cwain.

Mateus 6:4

Ma' ta om taxi' quequem oro wari' pain ca mi' mon pain caramajum. Cut mi' ac quem, pain tara ca awi wa Cotere'. Taraju pa' ra e': Ara iri irin ca awi wa pain ca xica' pe nexi' ne, om paxi' na ca querec cacapari' oro wari' ma'. Ane querec pan capari' Cotere' ne ta. Wirico tara co cut mi' nem pain oro ca awi wa quem.

Lucas 14:14

Param mi' ac quem tara pain ca awi wa Iri' Jam ma', xi ha' cocon pain ca pagar in hwet ac quequem co ximin nana ma'. Om ca win maparut pain ca harahap je maparut pane ac quequem. Pagar in hwet pan terem Iri' Jam ma', pagar in hwet pan terem pain xec nein ca to' e' mami' toton cocon oro wari' co hohot nonon ma' na ca tomi' con ma'.

Lucas 6:35

Je ca tomi' xuhu' ca': Ta noc huhun co noc nunuhu' ma' me. Xiram pa' jujun. Mo ta wajim' cucuhu' pain oro carawa ma', mi' ac huhun pain tara. Ta main mi' in hwet tatarapa' pain hwe me. Main mi' ac cuhu' tara pain oro ca awi tamana Iri' Jam. Querec pin' ac cucuhu' tara oro wari' pain ca an xiho' huhun Iri' Jam co Iri' Taramaxicon pan. Xi xiram pa' ara cocon oro caxicon wari' Iri' Jam ta. Oro wari' co om tomi' querec te taxi' nana pain ca cut caca carawa ca awi, je i ma' ira, xiram pa' pan nonon Iri' Jam ta. Oro wari' co pan teretem nana ma', je i ma' ira, xiram pa' pan ac cocon na quem.

1 Coríntios 12:13

Ac i ma' iri' pain ca curucun Cristo iri' quem. Mija paxi' iri'. Ma' nana co judeu nana. Ma' nana co om judeu nana. Ma' nana co taramaja mi' e' nonon oro xucucun wari'. Ma' nana co om taramaja mi' nonon oro xucucun wari'. Mija paxi' iri', ane cut corom to cut corom to xam' capari' pain curucun Cristo Tamataracon Iri' Jam ne. An xiho' nain ca ja' iri' com pane, pain ca cut corom to mi' capari' pain curucun Cristo. Ma' xica' pe na Tamataracon Iri' Jam ca cut corom to mi' napari' pain curucun Cristo, om na xijein. Pe ho' pe ho' xam' napari' quem.

2 Coríntios 5:10

Xi na e' ara ne pain ca main coco' quima hwet xun Cristo ta. Coco' quima hwet coco' quima hwet pi' pin xun, tomi' xo' ac capari' tara pain oro ca ara iri' pain ca e' e' wet nexi' ca'. Mi' mi' xam' ac capari' tara pain oro carawa ca taramaja mi' iri' ca'. Wari' co ara nain oro ca awi wa, mi' ac tocwa tara pain ca awi wa. Wari' co ara nain oro ca om awi wa ma' iri tara ne, mi' ac tocwa tara pain ca om awi wa quem.

Gálatas 3:28

Pain ca win cwere pin xun ca', an xiho' pin xijexi', om ca querec jimama' ca' xijexi' con Iri' Jam. Warut pain ca judeu urut ca', wahu' pain ca om judeu hwe ma' quem, an an ari xijexi'. Co taramaja mi' e' nonon xucun wari' ma', co om taramaja mi' nonon xucun wari' ma' quem, an an ari xucucun. Ca tarama' nexi' ca', ca narima' nequequem oro narima' ma' quem, an an ari xijexi'. Ac ca xica' pe ne na ximixi' pain ca wari' nexi'. Xi om ne ca win cwere ara xun Cristo Jeju ta.

Colossenses 3:11

Pain ca to' xocoricon wari' pin capari' Iri' Jam cwa', om ca jimama' ca' xijexi' pain ca wari' nexi' ca'. Wahu' pain ca om judeu hwe ma', pain ca om wac xirac xihwe ma', warut quem, pain ca judeu urut ca', pain ca wac xirac urut pain taparinain ca xirac nuxut ca' quem, om ca jimama' ca' xijexi' pain ca to' xocoricon wari' pin capari' Iri' Jam cwa'. Oro wari', oro tatirim co capija ni ca' nonon oro xucucun wari' ma', oro co om to xo' nana pain ca to e' cacain mi ma' quem, oro co taramaja mi' e' nonon xucun wari' ma', oro co taramaja mi' pan xucucun ma' quem, om ca jimama' ca' xucucun. Ac wiricoco ac wiricoco ari nana, xi om ne ca to' xocoricon wari' pin ara tococwa ta. Wirico pan ara xi' na Cristo co iri' taramaxicon. Om na xucun co win hwara' opa ca. Wirico co win cwere win cwere pi' pin napari' pain ca howa xun ca' quem.

Colossenses 3:24

Xi om ne ca taxi' ara hun Taramaxicon nexi' pain ca main mi' xuhu' pain carawa ca taramaja mi' hwe pane cuhu' ma'. Mi' xuhu' pain iri' caramaju ca wara tomi' pe mi' xuhu' pane ta nuhu'. Wirico Taramaxicon nexi' Cristo co taramaja mi' hwe ma' ira.

Colossenses 3:25

Oro wari' co pan teretem nana ma', win hwe pane ac cocon tara Iri' Jam, wap wap ac tococwa tara pain ca pan teretem nucucun. Xi tomi' querec te paxica' ca Iri' Jam ta.

Hebreus 10:35

Je ca tomi' xuhu' ca'. Quereme cara je, ta jin' camain' hwe me ta. Mo ta howa cara hun Iri' Jam con Jeju Cristo ma', mi' ac xihwe tara pain ca awi tamana wa ta.

Hebreus 11:26

Mo ta tomi' xirac cacapa' oro wari' ma', je i ma' ira, tomi' xirac ma' tatarapa' ne! Hohot pan napa' ca jain jain wa pain ca howa ton Cristo ma', co wara tora' ca Iri' Jam pain ca wirico tara co Iri' Taramaxicon ta ca ma', hohot tiquin' ca' nain ca cut wa oro carawa ca awi pain Egito ta, ac i ma' na ca coromicat nucun pane. Xi win xumu pan ara cain oro ca awi wa ca aram aram mi' xim pain con Iri' Jam ta.