Efésios 6:10 - Tradução Bíblica Pacaas Novos

¹⁰ Tomi' xim inuhu' pain i ca' quem: Win cwere cara jun Taramaxicon nexi' ta, ma' ta to' hwara' opa cuhu' ca hwara' opa tamana nucun.

Efésios 6:10 Iomraidhean Croise

1 Coríntios 16:13

Ma' tara xumuhu' me, hwara' opa cara je pain ca howa hun Jeju Cristo. Ac ximicon hwanana je. Hwara' opa cara je con Iri' Jam.

2 Coríntios 13:11

Je i ca' ca xirao' ne ca' xere. Tomi' querec te je me. Win xumu jein ca xuruxut xo' hwe. Tomi' ha' xine pain ca hu xuhu' ca'. Ac je ac je ari tara ca coromicat nuhu'. Tomi' querec te xujuhu' pain ca to ho' xujuhu' ma' quem. Pe ho' ac cuhu' tara Iri' Jam. Wirico co mi' napari' pain ca om noc xijexi' ca', wirico co mi' napari' pain ca om toron ne ximixi' ca' quem.

Efésios 1:19

Ma' ta querec pin' hwein ca hwara' opa tamana nucun ca taramaja pe ho' napari' pain ca howa xun ca' quem. Ca hwara' opa nucun ca', ca pe ho' napari' ca', je ca mam' to' e' pin con Cristo pane. Je ca mam' mi' con pain ca xao pe ho' pin con pain iri' curucun pain pawin cain.

Efésios 3:16

Ca' na ca tomi' mi' xuhu' con: Mi' roron pain ca hwara' opa caca pain iri' ximicocon, mam' to' hwara' opa roron pain Tamataram inon pahu'. Win ne ca hwara' opa tamana ma pain ca awi tamana ma ma' inon.

Filipenses 3:1

Tomi' xim inuhu' pain i ca' quem xere: Tomi' querec te je, xi om ne ca win cwere ara hun Taramaxicon nexi' ta. Ca xirao' mi' xuhu' ca', xirao' mi' paxi' inuhu' pain. Ane om horoman capa' pain ca xirao' mami' xuhu' pain ne. Quep xiho' turuhu' ca xirao' ne ca' quem, to' hwara' opa turuhu' pain ca ari huhun co pijim' mixein xim nunuhu' ta.

Filipenses 4:13

Quereme quereme pi' pin inain oro ca ara napa', xi om ne ca wirico ara ca co to' hwara' opa napa' ta.

Filipenses 4:8

Tomi' xim inuhu' pain i ca' quem xere: Coromicat e' jein oro ca iri'o' wa pain ca om mixein wa ma'. Coromicat e' jein oro ca hohot ma'. Coromicat e' jein oro ca ara xo' wa ma'. Coromicat e' jein oro ca om pan tem wa ma'. Coromicat e' jein oro ca om noc wa ma'. Coromicat e' jein oro ca om tomi' napat wa ma'. Oro ca awi ma', oro ca hohot ne pain ca in ac iri', je i ma' tara ca coromicat e' hwe.

Colossenses 1:11

Param urut con Iri' Jam pain ca to' hwara' opa cuhu' ma', mam' to' hwara' opa turuhu' pain ca hwara' opa pan nucun. Ma' ta tomi' querec te cara hwe pain ca quereme hwein oro ca to' i'ina nuhu', je pain ca om toron ne xumuhu' pain quem urut pahu'.

2 Timóteo 2:1

Je ca tomi' xim ca' arain. To' hwara' opa ne pain xumu ca' ron Iri' Jam. Na non pain ca to' hwara' opa quem. Xi om ca Cristo co xiram pa' e' nem ma', pain ca mi' e' quem, pain oro ca param nucun.

2 Timóteo 4:17

Paca' pin paxi' nanapa' pane, ane pe ho' pan capa' Taramaxicon nexi' ne. To' hwara' opa napa' quem. Ma' ta ara ara pi' pin main ca taramaja nem pain ca pijim' main oro capija ta napa', ma' ta taraju cacain ca pijim' nem oro wari' co om judeu nana ta napa' quem. To' witan napa' quem. Om ca to' pa' pin cacapa'. Ac ca to' witan ca' capa' na con copacao' ta.

1Pedro 3:8

Tomi' xim inuhu' pain i ca' quem: Je je ari tara ca coromicat nuhu' pain ca tomi' querec te xujuhu' ta. Quep xiho' xujuhu'. Ta noc camain' xujuhu' me, win ne ca xere xujuhu' ma'. Xiram pa' xujuhu', ta xec xec hwe pain ca quep xiho' xujuhu' me.

1Pedro 4:11

Mo ta mi' cuhu' pain ca pijim' wa ma', pijim' xo' ac hwe tara. Xi capijacon Iri' Jam pan ara ne ca pijim' hwe ta. Mo ta mi' cuhu' pain ca quep xiho' hun win ma' nuhu' ma', mam' quep xiho' ac hun tara pain ca hwara' opa nucun Iri' Jam ca mi' taxipa' ca ma'. Ma' ta awi na Iri' Jam ta caca oro wari'. Wirico Jeju Cristo tara co mi' nonon pain ca tomi' ac i ma' caca ma'. Hohot na pain ca tomi' querec te xun pain ca awi tamana cara nucun. Na e' na pain ca tomi' querec te xun pain ca hwara' opa tamana cara nucun ma' quem. Amém, iri'o' na ca tomi' ne ta.

1Pedro 5:10

Ame hwe e', om ta jain jain cara hwe, main pi' pin tara ca jain jain nuhu'. To' hohot pin ac cuhu' tara Iri' Jam. To' hwara' opa turuhu', mi' turuhu' pain ca om naro camain' wa, to' hwara' opa cara ac cuhu' tara. Xi wirico ara ca co xiram pa' taxipa' nuhu'. Wirico co wara param mi' nuhu' pain ca jao jao ma' hun pain ca awi nucun pain ca hwara' opa nucun ca om pi' ra ha' ma', xi om ne ca win cwere ara hun Cristo Jeju ta.

1João 2:14

Xirao' mi' inuhu' pain ca ac ca mana panxita' xuhu' ne ca'. Xi om ne ca querec pin' ara hun Cotere' ta. Xirao' mi' inuhu' pain ca wara horon hwe ma' quem. Xi om ne ca querec pin' ara hun co wara ma' ma', pain ca om om wet ne macan' pane ta. Wahu' pain ca xo' horon hwe ma' quem, xirao' mi' inuhu'. Xi om ne ca hwara' opa ara hwe ta. Pe ho' nuhu' capijacon Iri' Jam pain xumuhu', to' quiji' pin hun Caxicon Jam quem.