Efésios 5:5 - Tradução Bíblica Pacaas Novos

⁵ Taxi' jein i ca' quem: Ximin tara wari' co quep nam xequem narima', ximin tara narima' co quep ne non xucun tarama' ma' quem. Ximin tara co coromicat ximao nain quem. Ximin tara wari' co param ximao nain oro carawa ca om awi ma'. Param ximao iri nain oro caramaji macan' wari' ma' ne, ac ca howa cain na, ac Iri' Jam non carawa ca param ximao ca ma'. Wari' co ac i ma' ma', om ta mao camain' cain ca taramaxicon pe ca Cristo con Iri' Jam ta.

Efésios 5:5 Iomraidhean Croise

Atos 20:32

Je ca tomi' xuhu' ca' ac tococwa na. Tomi' mi' inuhu' con Iri' Jam. Querec wet roron me inon pahu'. Mi' roron pain ca howa cara cacain capijam ca tomi' hwet naparut pain ca xiram pa' pan maparut ta inon pahu'. Mo ta howa cara hwein capijacon Iri' Jam ca pijim' hwet xuhu' pane, to' hwara' opa ac cuhu' tara, aram aram mi' ac cuhu' tara pain oro ca param nucun ca an to xo' mi' cuhu' ma', ca mi' xun tococwa oro wari' nucun co to' hohot ca cwa'.

Atos 8:21

Om ca na camain' ne pain ca taramaja wi maparut ta, xi taramaja wi roron ta quem Iri' Jam parut ta. Querec pin' nem pain ca om xumu xo' ma ma'.

Gálatas 5:19

Querec pin' irin oro ca ara nucucun wari' co tomi' ha' e' nanain ca param nucucun. Mo na ca ara nucucun: Quep nanam oro xequem narima', quep xut nonon oro xucun tarama' pain ca narima' nequequem quem. Mam' pe wet e' nanain oro ca quep ximama' wa, jain jain ximama' nanain. Tamanain to nana pain ca win xumu cacain oro ca om awi wa.

Gálatas 5:21

Noc mi' xucucun pain oro carawa. Toc tamanain to nanain oro comi uva ca mana'. Tamanain to nana pain ca waraju ximama' nucucun. Ma' nonon oro xijein ca pan teretem wa ca an xiho' nain ca xirao' ne ca' quem. Je ca tomi' xuhu' ca', wara hu inuhu' pain cara pane, hu mami' inuhu' pain xocori ca' quem. Oro wari' co ara taxipa' nanain oro ca pan teretem wa ca xirao' ta' ca', om ta mi' tococwa pain ca to ho' cocon Iri' Jam ma', pain ca taramaxicon pe ho' toton cocon oro wari' nucun ta.

Efésios 5:3

Tomi' inuhu' pain ca tarama' hwe ma': Om ca na ne pain ca quep hwem xequem narima'. Wahu' quem oro narima', quep e' turuhu' waram taxuhu' ma'. Ta coromicat camain' hwein ca quep ximama' wa me. Ta tomi' camain' hwein me. Ta param ximama' hwein oro carawa quem me. Xi hohot cuhu' pain ca wari' nucun Iri' Jam hwe ta.

Colossenses 1:13

Xi wirico ara ca co to' witan ca' napari' con Caxicon Jam ma', co taramaxicon pe nain ca jitacat nein xim ma'. To' witan ca' napari' con, an to pin ac capari' na pain ca taramaxicon pe ca Panxica co om noc ca ma'.

Colossenses 3:5

Je ca tomi' xuhu' ca'. To' om pin jein oro ca param pan teretem ne wara curuhu' ma', ac ca to' parapa' pin hwein tara. Ta quep hwem xequem narima' me. Wahu' quem, pain ca narima' hwe ma', quep e' turuhu' taxuhu' ma'. Ta mam' pe wet hwein oro ca quep ximama' wa me. Ta jain jain hwein oro ca om awi wa me. Ta param hwein ca pan teretem wa me. Ta param ximama' hwein oro carawa me. Wari' co param ximama' nanain oro carawa ma', ac ca Iri' Jam ne cacain na.

1 Timóteo 6:10

Param tamana iri irin dinheiro ne, je ca maqui' ne oro ca om awi wa ma'. Ma' nana wari' co param tamana nanain dinheiro pane, howa howa om pin ac cocon na Cristo Jeju. To' ara pan ac xucucun na pain oro carawa ca param caca ma'. Mija na ca jain jain caca pane ta.

1 Timóteo 6:17

Hu mip roron co howa nana ma', co caramaju nana pain macan' pain xocori ca'. Ta xec xec hwe pain caramajuhu' me ta roron. Ta howa hwein me roron. Main om pin ta' ara xi' na oro caramajixi' ta. Howa e' jun Iri' Jam ta roron. Wirico pan na Iri' Jam co mi' mi' pi' pin napari' pain oro carawa ca om napari' ca'. Ma' ta tomi' querec te hwe ta napari'.

Hebreus 13:4

Na e' na pain ca coromicat ca' hwe ma', pain ca awi tamana ne ca an wa narima' ma', je pain ca awi tamana ne ca an wa tarama' ma' quem. Om ca na camain' ne pain ca an wa xequem narima', om ca na camain' ne pain ca an wa xucun tarama' ma' quem. Wari' co quep ximao ma', co an nam xequem narima' ma', wap ac con tara Iri' Jam. Narima' co quep ximao ma' quem, co an non xucun tarama' ma' quem, wap ac cam tara Iri' Jam quem.

Apocalipse 21:8

Ac i ma' paxi' toton oro co hwara' opa cara nana pain ca howa nucucun ma', ane om ac i ma' toton oro xucucun co caracat cara nana ne. Mo nana: Co jin' nanain ca quep em' wa pain ca howa nucucun ma', co om howa je ha' nana ma', co ara taxipa' nanain oro ca om querec awi non Iri' Jam ma', co to' parapa' pin nonon wari' ma', co quep ximama' xequequem ma', co ara xirac nonon oro wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co tomi' mixein nana ma' quem, wixicaracao' mi' ac tococwa tara pain iri' maxicocon ma', je pain cote ne xe ca ac xuterem' ma', ca wiran wi nain pacun ca weo tamana ma', ca enxofre caca oro wari' ma'. Cote ne xe ma', tomi' joc mam' mi' nain ca cono' mami' wa pain ca to ni cara ca' xun cocon Iri' Jam ta.

Apocalipse 22:15

Om ta corom ac caca oro caracat co ac caxicon oromijac. Mo nana: Co ara xirac nonon oro wari' ma', co quep ximama' xequequem ma', co to' parapa' pin nonon wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co hohot nonon ca tomi' mixein wa ma', co tomi' mixein taxipa' nana ma' quem. Oro wari' co ara nanain i ma', om ta corom ac cacain cidade nucun Iri' Jam.