Xi maqui' ara nein ca xumu wa oro carawa ca to' em' nain ca wari' wa ta. Mo na: Ca coromicat pan teretem wa ma', ca to' pa' wa wari' ma', ca quep tacacama oro manacocon oro wari' ma', je pain ca quep ne cocon xucun tarama' oro narima' ma' quem, oro ca caracat wa pain ca quep ximama' wa ma', ca cut noc xa wa carawa ma', ca tomi' mixein wa ma', ca tomi' napat wa ma' quem.
Efésios 5:3 - Tradução Bíblica Pacaas Novos3 Tomi' inuhu' pain ca tarama' hwe ma': Om ca na ne pain ca quep hwem xequem narima'. Wahu' quem oro narima', quep e' turuhu' waram taxuhu' ma'. Ta coromicat camain' hwein ca quep ximama' wa me. Ta tomi' camain' hwein me. Ta param ximama' hwein oro carawa quem me. Xi hohot cuhu' pain ca wari' nucun Iri' Jam hwe ta. Faic an caibideil |
Efésios 5:3
58 Iomraidhean Croise
Ara ca' xi', na e' na pain ca xirao' mi' xuxun pain carta. Ca' tara ca xirao' mi' xuxun: Wahu' pain ca tarama' nuhu' ma', ta quep hwem xequem narima' me. Wahu' quem oro narima', quep e' turuhu' waram taxuhu' quem, ac i ma' tara ca xirao' mi' xuxun ta. Xirao' mi' ca' xuxun quem: Ein jein carawa ca mi' querec te xine pain oro caji pacun ca Iri' Jam xi' ma caca oro wari'. Xi to' em' pan ara nein oro caji pacun ta. Ein jein carawa ca juhum' pa' xine quem, pain ca pe ho' nein quinain pain cwerein ma' quem. Ein jein quinain carawa ma' quem, ac i ma' tara ca xirao' mi' xuxun ta.
Mija na ca caracat nucucun. Pan teretem tamana nana. Querec param ximama' nanain caramaxicocon oro win ma' caca. Om ca xumu xo' camain' caca. Mija na ca noc mi' xucucun pain oro carawa. To' parapa' caracan xucucun. Tama' mana' caracan xucucun. Mixein xucucun. Tama' coromicat mi' xucucun pain ca pan teretem wa. Tama' tomi' nanain waracocon oro win ma' caca.
Tomi' querec te jem. Wari' nucun Taramaxicon nexi' ara xi' na. Ac ca tomi' querec te xujuhu' pain ca xere xujuhu' ma' tara pain ca tomi' querec te hwem me. Quep xiho' jem quem. Mo ta ma' ne carawa ca om nam, mi' ac hwem pain tara. Mija ara xi' na oro wari' co quep xiho' cama pane, quep xiho' napa' pane quem.
Tomi' xim inuhu' pain i ca' quem: Taraju inonon oro wari' co tomi' hwet nanapa' con win ma' nuhu' ma'. Tomi' ca' nanapa' con: Ma' na win ma' caca co quep ximao ta na ca tomi' hwet cacapa' con. Iri' caracat na ta nonon. Om ca awi camain' ne ca caracat nucun ta nonon. An pin nam manacon cote ca na ca tomi' hwet cacapa' con. Xi hohot na ta cacain i ma' co om howa nonon Iri' Jam ta. Noc nanain ta.
Ma' ac caca na xucucun co tomi' ca' nana quem: Mi' napari' pain carawa Iri' Jam, ma' ta ma'am hwe ta napari'. Je ca mi' capari' pain pemenexi' ca' quem, ma' ta ma'am hwein carawa ca cao' hwe ta napari' na ca tomi' caca quem. Je i ma' ira, iri'o' paxi' na ca tomi' nucucun ma'. Ane ara om pin tain cain carawa je pemenexi' Iri' Jam ne. Cwerexi' ma' iri na ne, om ca mi' capari' pain, ma' ta mam' quep ximama' hwein ta capari', om na. Xi wirico Taramaxicon nexi' ara ca co mene nain cwerexi'. Mam' taramaja mi' xine pain curuhu' ta napari'. Wirico co querec wet nain cwerexi' quem.
Toron napa' xumu pahu'. Mo ta aram aram in hwet xuhu', am to' wixipa' capa' Iri' Jam pahu'. Am tomi' xaxa' ta', am aca ta' cocon oro win ma' nuhu' co caracat nana pane, co om cwirin' querec nanain oro ca quep ximama' nucucun, je pain ca tamanain to nucucun pain ca win xumu cacain oro ca om awi wa ma' quem.
Taxi' jein i ca' quem: Ximin tara wari' co quep nam xequem narima', ximin tara narima' co quep ne non xucun tarama' ma' quem. Ximin tara co coromicat ximao nain quem. Ximin tara wari' co param ximao nain oro carawa ca om awi ma'. Param ximao iri nain oro caramaji macan' wari' ma' ne, ac ca howa cain na, ac Iri' Jam non carawa ca param ximao ca ma'. Wari' co ac i ma' ma', om ta mao camain' cain ca taramaxicon pe ca Cristo con Iri' Jam ta.
Je ca tomi' xuhu' ca', win xumu cain' jein ca xuruxut xo' wa ta. Ac oro wari' co xuruxut xo' nana pain ca howa cacain capijacon Iri' Jam ca tomi' hwet napari' con Cristo ta je, ac i ma' tara ca xuruxut xo' nuhu' ta. Am ha' capa' pain ca hwet xuhu', am om ha' capa'. Am taraju e' xuhu' pain ca tomi' hwet xihwe pain ca xuruxut nuhu' ma', je i ma' ira. Taxi' xuxuhu' na inuhu' pain ca hwara' opa hwe pain ca ac ca xica' pe ne ne xumuhu' ma', pain ca tomi' in pin wi huhun oro wari' co ari nanain capijacon Iri' Jam ca tomi' hwet napari' con Cristo ta.
Je ca tomi' xuhu' ca'. To' om pin jein oro ca param pan teretem ne wara curuhu' ma', ac ca to' parapa' pin hwein tara. Ta quep hwem xequem narima' me. Wahu' quem, pain ca narima' hwe ma', quep e' turuhu' taxuhu' ma'. Ta mam' pe wet hwein oro ca quep ximama' wa me. Ta jain jain hwein oro ca om awi wa me. Ta param hwein ca pan teretem wa me. Ta param ximama' hwein oro carawa me. Wari' co param ximama' nanain oro carawa ma', ac ca Iri' Jam ne cacain na.
Xi ma' xi' ara caca wari' co miri'om nanain carawa ca param caca oro win ma' caca ma', win xumu e' tatarain ca param pan nucucun. Narain ho' ac xucucun tara pain carawa pain ca param ximama' nucucun ma'. Tomi' xec xec taxipa' tatara. Om ta wixipa' caca pain ca xin to nucucun. Tomi' napat totoron oro win ma' caca. Om ta tomi' ha' cocon mana cote caca cacam waram jicocon. Om ta tomi' querec te cocon oro win ma' caca co xiram pa' paxi' nonon. Miri'om tatarain oro caramaxicon Iri' Jam.
Na e' na pain ca pijim' ximama' maho' je e' momon ta. Xi to' i'ina ara tococwa co howa nonon Jeju ta. Caram ma' co howa nonon ma', to' i'ina pin ac tococwa na, to' i'ina pin ac tacacama na oro ca nari nucucun ma' quem. Om xi pijim' caca ta. Pijim' ximama' e' nana, ma' ta cut tamana xin dinheiro pain ca mixein nexi' ta nana.
Wari' co querec wet nonon co howa nonon Jeju ma', na e' na pain ca om hwet ne wixicon. Xi wirico pan ara ca Iri' Jam co mi' non pain ca taramaja nucun pain ca querec wet roron co howa nonon Jeju ta con. Om ta tomi' xec xec ca. Om ta mana' ximao ca. Om ta toc tamanain pe cain comi uva ca mana'. Om ta to' xitoton na cocon oro wari' co tomi' taparam' nonon ma'. Om ta mixein con win ma' ca pain ca param ximao cain dinheiro.
Ac i ma' raram oro narima' co wara tiquin' mama' cawaxi' nequequem ma' quem. Tomi' ca' raram: Pain ca xuruxut nuhu' ma', xuruxut xo' je, ma' ta querec pin' xihwe pain ca howa hun Iri' Jam ta raram. Ta tomi' napat huhun oro wari' me ta raram. Ta toc tamanain to hwein comi uva ca mana' me ta raram. An hwet mi' jejem pain ca awi wa
Ma' tara xumuhu' me, ma' ta om ma' camain' ca win ma' nuhu' co quep ximao ma', co miri'om nain oro caramaxicon Iri' Jam ma', co om coromicat camain' non ma', co an xiho' non Esaú cara pane. Wirico paxi' xira co ara mi' wa pain ca wara tomi' pe nucun cote ca pane, xi om ne ca wara pan' cain' ara ca con coxa' ca ta. Ane param ni ca' cain ne. Param pan ac cain na wijimain carawa ca cao' wa pane.
Je i ca' ca tomi' mip xuhu' ca'. Querec wet xo' jujun oro co howa nonon Jeju ma', co querec wet jujun ta ca Iri' Jam ma'. Win ca pastor pain ca querec wet xo' cain ovelha nucun ma', ac i ma' je pain ca querec wet xo' huhun co howa nonon Jeju. Om ca na ne pain ca cuc cuc a xirapa' na inon me hun Iri' Jam pain ca querec wet jujun ta cuhu' ma'. Maqui' tarain iri' xumuhu' pain ca querec wet huhun. Je ca param mi' cuhu' Iri' Jam quem. Querec wet xuxun iri je ne, ta cut ta' dinheiro pain ca taramaja ne ca', pain ca querec wet toton ca' hwe me. Taramaja e' je pain ca param pan nuhu' ma', pain ca taramaja mi' e' ton Iri' Jam ta hwe ma'.
Wap xun paxi' tata oro caracat, ane wap tamana pan xun tococwa oro co xuruxut pan teretem nana pain ca win xumu e' cacain ca quep ximama' wa ne, je pain ca tomi' napat cocon Iri' Jam pain ca om tomi' ha' jun na caca ma' quem. Oro co ca' na mixein nunuhu' ma', tomi' xec xec e' nana. Om ca ara jin' cacain ca param pan nucucun. Tomi' napat nonon oro jam co hwara' opa nana cwain, co to nanain pawin cain. Om ca jin' cocon quem.
Tama' querec param nanam oro narima' ma', quep xitatam na nanam, om ca maho' camain' cacain ca caracat wa. Mixein nonon co om hwara' opa nana pain ca howa nucucun, hohot na pain ca caracat hwe ta tata. Param taxipa' nanain oro caramaxicocon oro win ma' caca, win xumu nanain. Iri' caxicon wari' nana! Wap pan totoron Iri' Jam ta.
Pain ca ca' na mixein xim cucuhu' ma', mixein ac cucuhu' tara, pijim' ximama' e' ac cucuhu' tara, xi jain jain ara cacain oro caramajuhu' ta, param e' nanain. Ane wap ho' xun tococwa ne. Wara awori xo' na Iri' Jam, wara coromicat an pe xo' nain ca wap xun tococwa pain cara pane. Querec na, om ca pi'am ca' cocon, wap ho' toton ta na.
Taxi' paxi' inuhu' pain ca ara ac i ma' hwe ma', ane ma' ne oro carawa ca om hohot napa' pahu' ne. Ma' nana win ma' nuhu' co tomi' ha' nanain oro ca hu nucun Balaão cara pane, pain ca hu qui' con Balaque pain cara pane, pain ca ara ac i ca' roron oro wari' nein Israel ma', ma' ta caracat caca ta con pane. To' caracat pin ac tococwa na, cao' cao' pin ac cacain na cwerein carawa ca mi' querec te xine pain oro caji pacun ca Iri' Jam xi' ma caca oro wari' pane. Quep ximama' quep ximama' ac tacacama na oro xequem narima' pane, quep quep ne ac cocon na oro xucun tarama' oro narima' pane quem.
Ac i ma' paxi' toton oro co hwara' opa cara nana pain ca howa nucucun ma', ane om ac i ma' toton oro xucucun co caracat cara nana ne. Mo nana: Co jin' nanain ca quep em' wa pain ca howa nucucun ma', co om howa je ha' nana ma', co ara taxipa' nanain oro ca om querec awi non Iri' Jam ma', co to' parapa' pin nonon wari' ma', co quep ximama' xequequem ma', co ara xirac nonon oro wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co tomi' mixein nana ma' quem, wixicaracao' mi' ac tococwa tara pain iri' maxicocon ma', je pain cote ne xe ca ac xuterem' ma', ca wiran wi nain pacun ca weo tamana ma', ca enxofre caca oro wari' ma'. Cote ne xe ma', tomi' joc mam' mi' nain ca cono' mami' wa pain ca to ni cara ca' xun cocon Iri' Jam ta.
Om ta corom ac caca oro caracat co ac caxicon oromijac. Mo nana: Co ara xirac nonon oro wari' ma', co quep ximama' xequequem ma', co to' parapa' pin nonon wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co hohot nonon ca tomi' mixein wa ma', co tomi' mixein taxipa' nana ma' quem. Oro wari' co ara nanain i ma', om ta corom ac cacain cidade nucun Iri' Jam.
Sanasan