Efésios 5:25 - Tradução Bíblica Pacaas Novos

²⁵ Wahu' quem, pain ca tarama' nuhu', tomi' inuhu' quem. Ta noc hwem manahu' me. Win ca Cristo pain ca om noc capari' pain ca howa xun ca', pain ca om narain ho' xucun pari' pane. Mi' pin caho' ara xi' napari' pane.

Efésios 5:25 Iomraidhean Croise

Mateus 20:28

Win ta' ca', pain ca Iri' Wari' ta' ca'. Om ca maqui' ta' pain ca taramaja mi' xine xuhu', om na. Taramaja mi' pan xim inuhu'. Mi' pin caho' xim inuhu', ma' ta witan mija hwe ta inuhu'. Je ca maqui' ta' ca' na ca tomi' caparut ca'.

João 6:51

Wata' co Iri' Capam' ca mi' nain ca e' cara wa pain pawin. Quiji' qui' inain pawin ta. Wari' co cao' napa' pain ca Iri' Capam' ta' ca', e' cara ac ca tara pain pawin. Capam' ca mi' ta' ta' ca', je cwere ca'. Mi' tain cwere. Ma' ta e' caca oro wari' ta ina na ca tomi' tococwa ma'.

Atos 20:28

Ma' tara xumuhu' me, ara xite xujuhu' pain ca xuruxut xo' hwe ma' ac tococwa na. Querec wet jujun oro wari' co howa nonon Jeju pain Éfeso ma'. Win ne ca querec wet jujun ta cuhu' Tamataracon Iri' Jam ca'. Ac oro ovelha nuhu' ara xi' nana. Ac pastor co querec wet taxipa' nain winacon je, querec wet jujun, pa' mi' jujun pain ca cut in xucucun pain ca wari' nucun Iri' Jam caca ma'. Mam' to' witan ara xi' tata pain quicon Panxica pane ta.

Gálatas 1:4

Taramaxicon nexi' Jeju Cristo ma', om ca narain ho' xucun pari'. Mi' pin caho' napari', xic am ca' napari' pain ca caracat nexi'. To' witan napari', ma' ta ha' cuhu' pain ca om an xiho' mami' huhun pain oro ca pan teretem nucucun oro wari' co om howa nanapa' ta napari'. Je ca param mi' capari' Cotere' Iri' Jam.

Gálatas 2:20

Ac ca mi' pin wi ta' na con Cristo quem, pain ca mi' pin pe cain panaxicon pane. E' e' wet paxi' ina, ane om e' pan ta' ne. Wirico Cristo co e' pe ho' napa' pain cwere. Tomi' ha' e' inain ca param nucun. Pain ca e' e' wet ta' pain macan' ca', howa cara inon Panxica Iri' Jam co om noc napa' cwa', co om nain ho' xucun pata' pain ca mi' pin caho' xim ta capa' ca'.

Efésios 5:2

Ta noc camain' xujuhu' me. Win ca Cristo pain ca om noc qui' capari' pain ca om narain ho' qui' xucun pari' pane, ac i ma' je pain ca om noc xujuhu' me. Mi' pan xucun con Iri' Jam Cristo. Ma' ta mi' pin caho' toton ta non pari' pane. Hohot tamana non Iri' Jam quem, hohot tamana non pain ca mi' pin caho' capari'.

Efésios 5:24

Je ca tomi' xuhu' quem oro narima': Tomi' ha' jujun waram taxuhu', tomi' ha' jujun pain iri' xumuhu'. Win ne ca tomi' ha' xun Cristo pain ca howa xun ca'.

Efésios 5:28

Je ca tomi' xuhu' pain ca tarama' nuhu' ca': Ta noc hwehwem oro manahu' ta. Ac ca om noc hwein curuhu' ma' tara pain ca om noc hwehwem ma'. Wari' co om noc nam manacon ma', om ca noc pan xucun.

Efésios 5:33

Tomi' paxi' ta Cristo pain ca om noc capari' pain ca howa xun ca'. Ane tomi' tomi' xam' cuhu' pain ca tarama' nuhu' pain ca ma' cuhu' narima' quem ne. Ta noc hwehwem manahu' ta. Win ne ca om noc pan xujuhu' ma'. Wahu' quem oro narima', na e' na pain ca tomi' ha' huhun waram taxuhu' ma' quem.

Colossenses 3:19

Wahu' quem, pain ca cut hwehwem narima' ma', tomi' inuhu' quem: Ta noc hwehwem manahu' me. Ta tomi' mana' hwehwem me, tomi' wixite e' jem ta.

1 Timóteo 2:6

Om ca narain ho' xucun pari'. To' pa' pin ma' tatarapa' ne na pane. Ma' ta to' witan ca' toton pain ca caracat nucucun ta napari'. Maqui' iri na xec nein ca wara coromicat an pe xo' ca Cote ca pane ne, je i ma' xec nein ca to' querec pin' capari' pain ca to' witan xuhu' ta capari' ca'.

1Pedro 3:7

Wahu' quem, pain ca ma' cuhu' narima' ma' quem. Ma' tara xumuhu' pain ca to ho' xujuhu' ma'. Tomi' querec te jejem pain ca querec wet xo' hwehwem ma'. Querec pin' jejem pain ca om hwara' opa homa cacama ma', je pain ca om an xiho' cucuhu' pain ca hwara' opa nuhu' ma'. Xi mi' ara cacam pain ca om pi' ra ha' ne ca e' wa Iri' Jam ta. Win cuhu' ma'. Ac i ma' jejem manahu', ma' ta om i'ina hwe pain ca tomi' xun hun Iri' Jam ma' quem.

Apocalipse 1:5

Param inon Jeju Cristo pain ca quep xiho' cuhu' pain ca mi' cuhu' pain ca param nucun, param inon pain ca mi' cuhu' pain ca om toron ne xumuhu' quem. Wirico Jeju co tama' tomi' iri'o' ma', co to' e' mami' cain' ca Iri' Jam pane, co iri' Taramaxicon co hwara' opa tiquin' ca' nonon oro taramaxicon co taramaxicon to nanain oro xijein macan' ca'. Wirico Jeju Cristo co om noc napari' ta. To' witan ca' napari' pain ca caracat nexi' ca'. Mam' to' witan napari' pain quicon.

Apocalipse 5:9

Com ac cacain na xocori tamara': Wum co awi tamana, wum co hohot pain ca an main tapari carawa ca joc top ma', je pain ca pa main oro ca hupa' caho' nein ma'. Xi om ne ca to' pa' pin ara xima pane ta. Cut mi' momon con Iri' Jam oro wari' co xucun wari' xucun wari' pi' pin nana ma', co capija ni ca' nonon oro xucucun wari' ma', co to ni ca' nonon oro xucucun wari' pain macaracocon ma', co to nanain oro xijein macan' ma' quem. Pain ca cut mi' momon con Iri' Jam ma', mam' to' witan momon pain cocum.