Efésios 5:2 - Tradução Bíblica Pacaas Novos

² Ta noc camain' xujuhu' me. Win ca Cristo pain ca om noc qui' capari' pain ca om narain ho' qui' xucun pari' pane, ac i ma' je pain ca om noc xujuhu' me. Mi' pan xucun con Iri' Jam Cristo. Ma' ta mi' pin caho' toton ta non pari' pane. Hohot tamana non Iri' Jam quem, hohot tamana non pain ca mi' pin caho' capari'.

Efésios 5:2 Iomraidhean Croise

Mateus 20:28

Win ta' ca', pain ca Iri' Wari' ta' ca'. Om ca maqui' ta' pain ca taramaja mi' xine xuhu', om na. Taramaja mi' pan xim inuhu'. Mi' pin caho' xim inuhu', ma' ta witan mija hwe ta inuhu'. Je ca maqui' ta' ca' na ca tomi' caparut ca'.

João 13:34

Je i ca' xocori ca tomi' ne ca tomi' ha' je xuhu' ca' ac caparut na. Ta noc camain' xujuhu' me ta. Win ne ca om noc camain' xuhu' ca', ac i ma' tara ca om noc camain' xujuhu' quem.

João 6:51

Wata' co Iri' Capam' ca mi' nain ca e' cara wa pain pawin. Quiji' qui' inain pawin ta. Wari' co cao' napa' pain ca Iri' Capam' ta' ca', e' cara ac ca tara pain pawin. Capam' ca mi' ta' ta' ca', je cwere ca'. Mi' tain cwere. Ma' ta e' caca oro wari' ta ina na ca tomi' tococwa ma'.

Romanos 15:16

pain ca taramaja mi' ron Cristo Jeju pain ca pijim' mi' momon con oro co om judeu nana ta capa' pahu' pane. Ara inain ca taramaja nucun wari' co tom tain' mi' taxipa' non pain carawa Iri' Jam ma', pain ca pijim' mi' xuhu' pain capijacon Iri' Jam ca tomi' hwet napari' con Jeju. Pijim' mi' inuhu' pain capijacon Iri' Jam, ma' ta tomi' querec te cuhu' pain ca o mi' xuhu' con inuhu'. Ac carawa ca mi' querec te wa hwe pata', ac ca cut mi' e' xuhu' con tara pain ca o mi' xuhu' con. Mam' to' hohot ara xi' nuhu' pain Tamataracon ta.

Romanos 4:25

Je ca tomi' xuhu' ca'. Om ca nain ho' con Jeju Iri' Jam pane. To' pa' pin jun tata co to' pa' pin xun nonon pane. Xi om ne ca caracat nexi' ta. To' e' mami' ac con na quem. Ma' ta to' hohot pin xuhu' ta napari' ta.

Romanos 8:3

Ca xirao' nucun Moisés ma', om ca hwara' opa ne, om ca to' om pin ac nein ca hwara' opa nein ca caracat nexi'. Xi tomi' ha' pan xin ta. Ane hwara' opa pan ca Iri' Jam ne. To' om pin nain ca hwara' opa nein ca caracat nexi', xi om ne ca mam' ara capari' con iri' Panxica cwa' ta. An tan pan rain curucucun oro wari' co caracat nana ma', mi' pin caho' roron pain ca caracat nucucun ta non, to' om pin ac cain na ca hwara' opa nein ca caracat nexi' ca pe ho' napari' pain cwerexi' ca'.

Romanos 8:37

Ac je paxi' napari' oro carawa ca to' ara pin napari' ca', ane om to' quiji' pin capari' ne. Hwara' opa cara iri'. Wirico Cristo ma', co om noc napari' ma', wirico co to' hwara' opa napari'.

1 Coríntios 16:14

Oro carawa ca ara xi' hwe ma', an hwet pe ac hwein tara ca om noc caracan xujuhu' pain ca ara hwein quem.

1 Coríntios 5:7

Je ca tomi' xuhu' ca': Xin hwet pin jun co caracat ma'. Win urut pain ca judeu urut ca', pain ca xin hwet pin urut pain wara ca to' memerem nein capam' pain ca to' pa' pin xin urut pain wijimain taramaji ovelha ca to' mam' pe wet naparut pain ca to' witan qui' tococwa oro hwanana nuxut co to nanain Egito pane. Xin hwet pin jun, ma' ta hohot pin hwe. Wari' nucun Iri' Jam hwe ma' ira. Xi mi' pin caho' ara capari' Cristo pane ta. Win ne wijimain taramaji ovelha cocon oro hwanana pane, ma' ta witan ca' hwein ca wap wa pain ca caracat nuhu' ta nonon Iri' Jam pane. Ac i ma' napari' con Cristo pain ca mi' pin caho' capari' quem.

2 Coríntios 2:14

Ane tomi' querec te ton Iri' Jam ne. Ac ca tama' o mama' caparut na pain ca ja' ja' urut con ca', pain ca win cwere urut con Cristo cwa'. Wirico co mi' naparut pain ca an hwet pe urut pain ca hwara' opa nucun ma', pain ca pijim' hwet urut cocon oro wari' con Cristo cwa'. Ac ca hu xain ne na ca pijim' nuxut quem, hu xain hu xain pi' pin tata oro wari' pain ca to' querec pin' tococwa con Cristo.

2 Coríntios 2:15

Xi an xiho' ara urut pain caji towaxi' ca hu xain tamana con Cristo ta, ac i ma' na ca coromicat mi' capari' Iri' Jam. Pijim' iri irin capijacon con Cristo ma' ne, ac ca nac cacain na oro wari'. Nac nanain co witan pin nana, nac nanain co pan' ara'am xi' nana quem.

2 Coríntios 8:9

Win ca Taramaxicon nexi' Jeju Cristo cwa'. Taxi' ara xi' hun pain ca xiram pa' tamana capari'. Caramaju tamana paxi' na pain ca hwara' opa tamana nucun pain ca taramaxicon nucun pane, je pain ca Iri' Jam nucun pane. Ane an pe pin tain pahu' ta capari' ne. An pe pin iri nain ne, wari' pin ac ca na, ximin pin ac ca na quem. Ma' ta to' caramaju pin xuhu' pain ca mi' xim xuhu' pain oro ca awi wa con Te ta napari'.

Gálatas 1:4

Taramaxicon nexi' Jeju Cristo ma', om ca narain ho' xucun pari'. Mi' pin caho' napari', xic am ca' napari' pain ca caracat nexi'. To' witan napari', ma' ta ha' cuhu' pain ca om an xiho' mami' huhun pain oro ca pan teretem nucucun oro wari' co om howa nanapa' ta napari'. Je ca param mi' capari' Cotere' Iri' Jam.

Gálatas 2:20

Ac ca mi' pin wi ta' na con Cristo quem, pain ca mi' pin pe cain panaxicon pane. E' e' wet paxi' ina, ane om e' pan ta' ne. Wirico Cristo co e' pe ho' napa' pain cwere. Tomi' ha' e' inain ca param nucun. Pain ca e' e' wet ta' pain macan' ca', howa cara inon Panxica Iri' Jam co om noc napa' cwa', co om nain ho' xucun pata' pain ca mi' pin caho' xim ta capa' ca'.

Efésios 1:4

Wara tora' napari' Iri' Jam pain cara pane, pain ca om tomi' ma' querec qui' cain macan' je oro carawa pane. Xi om ne ca win cwere ara xun Cristo ta. Tomi' ca' napari' pane: Iri' wari' ne inuhu'. Om ca ma' camain' cuhu' ca caracat wa pain ca querec joc mam' mi' xuhu' con Panxita' cwa' ta napari' pane. Om ca noc capari'.

Efésios 3:17

E' pe ho' tarain ximicocon Cristo ta inon pahu' quem. Win ne ca howa cocon ma' inon pahu'. Mi' roron pain ca om noc camain' quequem je pain ca om noc camain' xucucun quem. Hwara' opa tatara, om ta camara' caca pain ca caracat wa ta inon pahu'.

Efésios 3:19

Om paxi' na ca querec pin' ac urut con Cristo pain ca om noc camain' caparut. Xi noc camain' caparut ta inon pahu'. Ane tomi' cara xim cocon ne, mi' roron pain ca querec pin' cocon Cristo pain ca om noc caparut. Ma' ta an xiho' quequem pain iri' xumum ta, ac i ma' na ca tomi' ton Iri' Jam pahu'.

Efésios 4:15

Om ta pijim' pan teretem ac i ma' xijexi'. Pijim' hwet e' xijexi' pain oro ca iri'o' wa con Iri' Jam. An hwet pe xin ca om noc xijexi' pain ca pijim' nexi' quem. Ca horon horon ac iri' tara, ca horon horon ac iri' tara, horon pin ac iri' tara con Cristo co ac winaxi' pain ca curucun pin iri' ca'.

Efésios 4:2

Ta xec xec hwe me. Tomi' wixite xujuhu'. An hwet pe jein ca om noc xujuhu' pain ca tomi' pan hot xujuhu' ma'.

Efésios 5:15

Ma' tara xumuhu' me. Am xuruxut xo' hwe, querec querec je me. Ta an xiho' huhun co om coromicat xo' nana me. An xiho' e' jujun co coromicat xo' nana ma'.

Efésios 5:25

Wahu' quem, pain ca tarama' nuhu', tomi' inuhu' quem. Ta noc hwem manahu' me. Win ca Cristo pain ca om noc capari' pain ca howa xun ca', pain ca om narain ho' xucun pari' pane. Mi' pin caho' ara xi' napari' pane.

Filipenses 4:18

Je ca tomi' xuhu' ca'. Epafrodito cwa', mi' napa' pain carawa ca mam' mahu' con. Cut mi' cut mi' pi' pin napa' pain, moin' pin napa' quem. Ma' pin napa' oro carawa ca param ta', ma' tiquin' ca' napa' pain ca param ne. Carawa ca mam' mahu' ca', mi' pan hun pain Iri' Jam quem. Hohot tamana non pahu', tomi' querec te tamana nuhu' pain quem.

Colossenses 3:14

Ta noc camain' xujuhu' me, je ca param mip ca Iri' Jam ma', pain ca om noc camain' xujuhu' ma'. Pain ca tomi' querec te tamana xijexi' ca', je ca to' jao jao ma' capari' pain ca xica' pe pin ne ximixi'.

1 Tessalonicenses 4:9

Xirao' mi' xun paxi' urut pahu' pain i ca' quem, pain ca om noc xujuhu' pain ca xere xujuhu' ma'. Ane hohot ne pain ca om xirao' mi' urut pahu' pain ne. Xi wara hu pan ara cuhu' pain Iri' Jam ta. Ta noc camain' xujuhu' me ta cuhu' ma' ira.

1 Timóteo 2:6

Om ca narain ho' xucun pari'. To' pa' pin ma' tatarapa' ne na pane. Ma' ta to' witan ca' toton pain ca caracat nucucun ta napari'. Maqui' iri na xec nein ca wara coromicat an pe xo' ca Cote ca pane ne, je i ma' xec nein ca to' querec pin' capari' pain ca to' witan xuhu' ta capari' ca'.

1 Timóteo 4:12

Xo' hwara' paxi' ma. Ane om na ne pain ca tomi' napat quequem co howa nana ma' ne. Om ca na ne pain ca tomi' napat quequem pain ca xo' hwara' nem ma'. Na e' na pain ca win ca ne quequem pain ca querec pin' quequem pain ca tomi' xo' nem ma', je pain ca xut xo' nem ma' quem. Na e' na pain ca win ca ne quequem pain ca om noc momon oro wari', je pain ca howa mon Iri' Jam ma', je pain ca miri'om main oro ca caracat wa ma' quem.

Tito 2:14

Om ca nain ho' xucun pari' pane, mi' pin caho' xuhu' ta napari' pane. Ma' ta to' witan ca' xuhu' pain oro ca pan teretem nuhu' ta napari'. Ac ca hohoc capari' na pain quicon. Ma' ta to' om pin tain ca caracat nuhu' ta napari'. Ma' ta iri' wari' ne xuhu' ta napari'. Param napari' pain ca win xumu xun pain ca tama' ara xin oro ca awi wa quem.

Hebreus 8:3

Pain ca tomi' xo' tococwa oro sacerdote co iri' taramaxicon nana ma', wirico Iri' Jam co taramaja mi' xine nonon. Cut mi' xine pain oro carawa ca mi' xim cacapa' oro wari', tom tain' mi' xine pain oro winacocon quem tata. Ac i ma' na con sacerdote nexi' co iri' taramaxicon quem. Na e' na pain ca ma' con carawa ca mi' ton con Iri' Jam quem.

Hebreus 9:14

Ac i ma' na ca hwara' opa ne quinain oro carawa ma'. Hwara' opa paxi' na quinain oro carawa, ane hwara' opa tamana pan ne quicon Cristo ne. Hwara' opa tiquin' ca' nain quinain carawa, xi om ne ca awi tamana ara ca Cristo ta. Om ca em' camain' ca. Ha' non pain ca mi' pan xucun con Iri' Jam pane, xi quep xiho' pan ara con Tamataracon ca e' cara ta. To' hohot pin napari' quicon. To' om pin nain ca em' nexi' pain ximixi' pain ca coromicat nexi'. To' om pin nain ca toron ne ximixi' pain ca caracat nexi'. Om ca to' i'ina mami' capari' oro ca ara nexi' ca to' cono' pin napari' ca'. Ha' pin ac capari' na pain ca in ac xun Iri' Jam co e' cara quem.

Hebreus 9:23

Xiricon Iri' Jam ca pe macan' pane, an xiho' e' nain iri' xiricon ca pe pawin cain. Oro coximinain quem, an xiho' e' nain oro coximinain ca to pawin cain. Na e' na pain ca mam' to' hohot pin xine pain quinain carawa pane quem. Iri' xiricon je coximinain ca to pawin cain iri na ne, na e' na pain ca mam' to' hohot pin xine pain xijein wic ca awi tiquin' ca' nein quinain carawa ma' quem.

Hebreus 9:26

Mo xi mi' pin ho' mi' pin ho' ca ma', na e' na pain ca jain jain ho' jain jain ho' qui' ca pain ca xo' tomi' ma' qui' xine macan' pain cara pane. Ane om ac i ma' ca ne. Pain ca maqui' cain macan' ca', pain oro xec nein ca pi' pin ta' ne macan' ca', maqui' xica' pe na. Om ca maqui' mami' ca. Ma' ta mam' xic am pin tain ca caracat wa pain ca mi' pin ne ca', pain ca mi' pan xije con Te Iri' Jam ta na pane.

1Pedro 4:8

Ta noc camain' xujuhu' me, je ca param mip ca Iri' Jam. Ta tomi' querec te e' ne capijahu' me, tomi' querec te iri'o' xujuhu' ta. Tomi' querec te iri'o' iri xijexi' ne, ha' ac capari' tara pain ca mana' mana' om pin xijexi' pain oro ca ara cup xijexi' ta.

1João 3:16

Mi' pin caho' iri napari' Jeju Cristo pane ne, to' querec pin' ac capari' na pain ca om noc camain' capari' ta. Om ca nain ho' xucun pari', mi' pin caho' napari'. Ac i ma' xi' quem, om ta narain ho' xijexi' cocon oro xerexi' cwa'. Quep xiho' xijexi', am cono' xi' iri' pain ca quep xiho' xijexi' ca'. Je i ma' ira xi'.

1João 3:23

Je i ca' ca ara je capari': Howa jun Panxita' Jeju Cristo cwa' napari'. Tomi' querec te taxipa' xujuhu' ta napari' quem. Je ca ara je capari'.

Apocalipse 1:5

Param inon Jeju Cristo pain ca quep xiho' cuhu' pain ca mi' cuhu' pain ca param nucun, param inon pain ca mi' cuhu' pain ca om toron ne xumuhu' quem. Wirico Jeju co tama' tomi' iri'o' ma', co to' e' mami' cain' ca Iri' Jam pane, co iri' Taramaxicon co hwara' opa tiquin' ca' nonon oro taramaxicon co taramaxicon to nanain oro xijein macan' ca'. Wirico Jeju Cristo co om noc napari' ta. To' witan ca' napari' pain ca caracat nexi' ca'. Mam' to' witan napari' pain quicon.

Apocalipse 5:9

Com ac cacain na xocori tamara': Wum co awi tamana, wum co hohot pain ca an main tapari carawa ca joc top ma', je pain ca pa main oro ca hupa' caho' nein ma'. Xi om ne ca to' pa' pin ara xima pane ta. Cut mi' momon con Iri' Jam oro wari' co xucun wari' xucun wari' pi' pin nana ma', co capija ni ca' nonon oro xucucun wari' ma', co to ni ca' nonon oro xucucun wari' pain macaracocon ma', co to nanain oro xijein macan' ma' quem. Pain ca cut mi' momon con Iri' Jam ma', mam' to' witan momon pain cocum.