Efésios 4:12 - Tradução Bíblica Pacaas Novos

¹² Ma' ta ca' na tococwa oro wari' nucun Iri' Jam pain ca taramaja taxi' wa pain ca taramaja mi' cocon ta tata oro wari' nucun. Ma' ta horon horon tiquin' hwe pain ca howa nuhu' ma', pain ca ac cwere hwe ne pain ca win cwere xijexi' ca' napari'.

Efésios 4:12 Iomraidhean Croise

Lucas 22:32

Ane tomi' mi' xim con Te quem ne Simão. Ma' ta om pan' ma con, ma' ta hwara' opa cara ma pain ca howa nem inon pum. Cwirin' pin iri rain ca caracat nem ne, to' hwara' opa ac momon tara pain ca howa nucucun xerem cwa' quem na ca tomi' con Simão Jeju ma'.

Atos 11:23

Wa' mao iri nain i cain ne, querec pin' ac tococwa na pain ca xiram pa' cocon Iri' Jam, je pain ca quep xiho' cocon quem. Hu ac tococwa na: Win xumu jun Taramaxicon nexi' ma'. Hwara' opa cara je pain ca howa hun quem tata.

Atos 20:24

Je i ma' ira ina ta. To' pa' ma' tatarapa' ne ina. Om ca xiram pa' xije. Ma' xica' pe na carawa ca param ta' ca', param e' inain ca ara ara pi' pin wa ca taramaja ne ca ara ra capa' Taramaxicon nexi' Jeju cwa', pain ca pijim' mi' roron pain capijacon Iri' Jam oro wari' ta capa' pane. Je ca tomi' xuhu' ca', tomi' hwet toton pain capijacon Iri' Jam oro wari' ta. Tomi' hwet toton pain ca xiram pa' capari' Iri' Jam ta. Om xi xiram pa' capari', xi awi iri' ta. Ane xiram pa' e' capari' ne.

Atos 20:28

Ma' tara xumuhu' me, ara xite xujuhu' pain ca xuruxut xo' hwe ma' ac tococwa na. Querec wet jujun oro wari' co howa nonon Jeju pain Éfeso ma'. Win ne ca querec wet jujun ta cuhu' Tamataracon Iri' Jam ca'. Ac oro ovelha nuhu' ara xi' nana. Ac pastor co querec wet taxipa' nain winacon je, querec wet jujun, pa' mi' jujun pain ca cut in xucucun pain ca wari' nucun Iri' Jam caca ma'. Mam' to' witan ara xi' tata pain quicon Panxica pane ta.

Atos 9:31

Pain oro xijein cidade pain Judeia, je pain Galileia, je pain Samaria ma', om pin na wari' co mana' nonon oro co howa nonon Jeju, om pin na wari' co quep em' nonon quem. Mija pin ac caca na co howa nana ma', xi om ne ca quep xiho' pan ara cocon Tamataracon Iri' Jam ta. To' hwara' opa tata pain ca howa nucucun. Win xumu e' nanain ca param pan nucun Taramaxicon nexi' quem.

Romanos 12:5

Ac i ma' iri' pain ca win cwere xun Cristo quem. Mija paxi' iri', ane xica' pe ne cwerexi' con Cristo ne. Xi om ne ca win cwere ara xun ta. Jao jao ma' pin xijexi' pain ca coximinain curucun Cristo iri' ca'.

Romanos 12:7

Mo ta mi' capari' pain ca quep xiho' taxi' xuxun oro win ma' nexi' cwa', na e' na pain ca quep xiho' xo' xuxun quem. Mo ta mi' capari' pain ca ca' na taxi' xin capijacon ca', na e' na pain ca ca' na xo' xin.

Romanos 14:19

Je ca tomi' ca' xuhu' ca': Win xumu xin oro carawa ca mi' napari' pain ca om toron ne ximixi'. Win xumu xin oro carawa ca to' hwara' opa napari' pain ca howa xun Iri' Jam quem.

Romanos 15:14

Taxi' inuhu' pain ca xuruxut xo' tamana hwe quem xere. Taraju pa' tamana hwe, hu taxi' xujuhu' quem.

Romanos 15:2

Ara xica' pe ara xica' pe xam' xin ca param pan caca xerexi', ma' ta quep xiho' xuxun, ma' ta to' hwara' opa xuxun pain ca howa nucucun quem.

Romanos 15:29

Querec iri xuhu' ne, ja' tomi' querec te ac xuhu' tara con Cristo. Ara mi' tamana ac capari' tara pain oro ca awi wa, taxi' inon ta.

1 Coríntios 12:27

Je ca tomi' xuhu' ca': Curucun Cristo iri' pain ca jao jao ma' xijexi'. Coximinain curucun Cristo coximinain Cristo xam' iri'.

1 Coríntios 12:7

Mi' mi' xam' napari' pain ca taramaja taxi' wa Iri' Jam. Mi' napari' pain ca hwara' opa nein Tamataracon quem, ma' ta quep xiho' xujuhu' ta napari'.

1 Coríntios 14:12

Je ca tomi' xuhu' ca': Win ne ca param hwein oro ca taramaja taxi' wa ca mi' ne Tamataracon Iri' Jam ma'. Na e' na pain ca param hwein ca taramaja taxi' wa ca to' hwara' opa nonon oro co win howa hwe ma' quem.

1 Coríntios 14:14

Taraju wet je e'. Mo ta tomi' xun Iri' Jam cwa', mo ta tomi' xun pain xijein ca capija wa ca om wara tomi' taxi' iri' ca'. Je paxi' na Tamataracon ca mi' napari' pain ca tomi' wa ca'. Ane om taraju pa' pan iri' ne. Om ca mam' tomi' irin ca coromicat nexi'.

1 Coríntios 14:26

Je ca tomi' xuhu' ca' xere: Ara ac i ca' ara ac i ca' xam' je pain ca cut in xujuhu' ma'. Com tara tamara' xucun. Pijim' ac cain tara capijacon Iri' Jam xucun. Tomi' hwet ac cain tara xocori ca tomi' nucun Iri' Jam xucun. Tomi' ac cain tara xijein ca capija wa ca om wara tomi' taxi' ca xucun. Tomi' xo' ac cain tara xucun quem. Na e' na pain ca quep xiho' xujuhu' pain oro ca ara nuhu' pain ca cut in xujuhu' ma'. Ma' ta to' hwara' opa xujuhu' con Taramaxicon nexi' ta.

2 Coríntios 12:19

Am coromicat mi' ca' maparut: Tomi' narain ho' taxipa' e' xucucun pain ca xirao' nucucun ta, am ac i ma' ne ca coromicat mi' maparut ma'. Om na ta, ta coromicat mi' ac i ma' maparut me. Taxi' naparut Iri' Jam pain ca tomi' iri'o' urut ca', xi om ne ca mi' pan ara caparut pain ca tomi' iri'o' nuxut Cristo ta. Je ca tomi' xuhu' pain ca tomi' querec te xuhu' ca' xere. To' hwara' opa e' xim urut pahu'. Je ca taramaja mi' urut pahu' pain oro ca ara nuxut ta.

2 Coríntios 13:11

Je i ca' ca xirao' ne ca' xere. Tomi' querec te je me. Win xumu jein ca xuruxut xo' hwe. Tomi' ha' xine pain ca hu xuhu' ca'. Ac je ac je ari tara ca coromicat nuhu'. Tomi' querec te xujuhu' pain ca to ho' xujuhu' ma' quem. Pe ho' ac cuhu' tara Iri' Jam. Wirico co mi' napari' pain ca om noc xijexi' ca', wirico co mi' napari' pain ca om toron ne ximixi' ca' quem.

2 Coríntios 13:9

Je ca tomi' xuhu' ca'. Om paxi' tara ca hwara' opa pan urut. Je i ma' ira, tomi' querec te cara urut pain ca xuruxut xo' pan nuhu' ma'. Je ca tomi' mi' urut pahu' con Iri' Jam quem. Mi' roron pain ca horon horon tiquin' wa pain ca xuruxut xo' nucucun ta urut con pahu'.

2 Coríntios 3:8

Je ca tomi' xuhu' ca', pain xocori ca tomi' xo' nucun Iri' Jam ma', pain ca taramaja pe ho' pin cain ximixi' Tamataracon ca'. Om ca hwara' opa tiquin' ca' nein ca wara tomi' xo' nucun ra? Hwara' opa tiquin' ca' nein ma' ira!

2 Coríntios 4:1

Wirico Iri' Jam co xiram pa' naparut pain ca mi' caparut pain ca taramaja mi' urut con ca'. Je ca om naro urut ca'.

2 Coríntios 5:18

Wirico Iri' Jam co to' xocoricon wari' pin napari' cwa'. Wirico co taxipa' pin xijexi' ta napari', xi om ne ca mi' pin caho' ara capari' Cristo ta. Mi' naparut pain ca taramaja nuxut ca' quem, pain ca tomi' xo' jujun oro wari', ma' ta wari' ne toton, je pain ca taxipa' pin cacapa' ta naparut.

2 Coríntios 6:3

Ara xite xujuxut pain oro ca xuruxut nuxut ca', ma' ta om tomi' em' cacain capijacon Iri' Jam ca pijim' hwet urut cocon. Ma' ta om tomi' in pin cacaparut pain ca pijim' hwet urut pain capijacon Iri' Jam ta urut quem.

2 Coríntios 7:1

Je ca tomi' urut pahu' pain ca tomi' querec te urut pahu' ca'. Tomi' ac i ma' napari' Iri' Jam pain ca tomi' an pe mi' capari' pain ca tomi' nucun ca'. Na e' na pain ca an to pin xin oro ca to' pan teretem napari' pain cwerexi', je pain ca coromicat nexi' ca'. Na e' na pain ca tomi' ha' xun pain ca in ac xun quem. Win xumu xun pain ca to' hohot pin xim capari' ca'. Ca win xumu ac xun tara, ca win xumu ac xun tara, to' hohot mip ac capari' tara quem.

Efésios 1:23

Curucun iri' pain ca howa xun ca'. Wirico co win cwere napari' pain ca mi' capari' pain ca hwara' opa tamana nucun, wirico co mi' napari' pain ca taxi' tamana nucun quem. Pe ho' pe ho' pi' pin nain oro carawa quem.

Efésios 4:16

Ac curucun pan iri' quem. Noro jein iri' cwerexi' ca'. Je winaxi' ca taramaxicon pe ho' nain oro coximixi' ca'. Ac taramaxicon na winaxi'. Je oro carapitaxi' pain oro caramaxi' ca to' wi nain oro araxi' pain coximixi' ca' quem. Mo ta taramaja xo' ne oro coximixi' ca', horon xo' ac iri' na, hwara' opa pin ac iri' na quem. Ac i ma' na pain ca curucun Cristo iri' quem. Mo ta om noc xijexi', mo ta ara xo' xin ca taramaja nexi' ca ara je capari' quem, horon tiquin' ac iri' tara pain ca hwara' opa nucun Cristo.

Efésios 4:29

Ta tomi' xirac camain' hwe me. Tomi' xo' e' je. Ma' ta to' hwara' opa huhun oro win ma' nuhu' pain carawa ca to' i'ina nonon ma'. Ma' ta quep xiho' huhun oro wari' co taraju nunuhu' ma' quem.

Efésios 4:4

Je ca xica' pe tara xumuhu' me xuhu' ca'. Xi om ne ca ac ca ma' xica' pe ne ara ne cwerexi' con Cristo pain ca howa xun ca'. Ma' xica' pe na Tamataracon Iri' Jam ca pe ho' napari' pain ximixi' quem. Ac i ma' na ca ma' xica' pe ne carawa ca winim' iri' ca', ca tomi' pe mi' capari' pain ca xo' howa xine qui' capari' Iri' Jam pane.

Colossenses 1:24

Jain jain paxi' ina pain xocori ca', xi om ne oro ca taramaja ne pain ca quep xiho' toton oro win ma' nuhu' pain ca om judeu hwe ma'. Ane tomi' querec te pan ta' ne. Ac ca jain jain wi ta' con Cristo na, ac ca moin' pin ne na ca jain jain ne pahu'. Xi om ne ca quep xiho' ara xihwe pain ca jain jain ne ca', pain ca ac curucun iri' pain ca howa xun ca'.

Colossenses 1:28

Pijim' hwet pijim' hwet pi' pin urut cocon con Cristo oro wari' ta. Hu hu pi' pin urut cocon, ca' na xo' ca' na xo' pi' pin urut cocon pain capijacon Iri' Jam pain ca taraju pa' urut pain quem. Ma' ta querec pin' xihwe pain ca iri' wari' pin hwe, je pain ca ximicon hwanana pin hwe pain ca win cwere pin hun Cristo ta urut cocon. Wara ac i ma' tatara ta urut pahu' pain ca aram aram o mi' xut pahu' con Iri' Jam ta, ac i ma' na ca coromicat nuxut.

Colossenses 4:17

Tomi' ca' jun Arquipo ma': Ara xo' ara xo' pi' pin rain ca taramaja nem ca mi' xima ma', xi om ne ca win cwere ara mon Taramaxicon nexi' ta jun.

1 Timóteo 1:12

Tomi' querec te inon Jeju Cristo co Taramaxicon ne iri' cwa', pain ca quep xiho' capa' pain ca taramaja ne ca'. Tomi' querec te inon pain ca querec pin' capa' pain ca om taramaja nene ta' ca' quem. Je ca taramaja mi' ne ta capa' ca'.

2 Timóteo 4:11

Pe ho' xica' pe napa' Lucas cwa'. Hwet xim iri ne ne, o qui' ac mon tara Marcos quem. Quep xiho' ara xi' napa' pain ca taramaja ne ta.

2 Timóteo 4:5

Ac i ma' tatara co noc nanain capijacon Iri' Jam. Wum iri na ne, ma' tara xumum ta Timóteo. Tama' coromicat xo' ra pain oro carawa ca ara nem. Quereme rain oro ca to' i'ina nem ma'. Pijim' mi' roron pain capijacon Iri' Jam oro wari', pijim' mi' roron pain capijacon Iri' Jam ca tomi' hwet napari' con Cristo Jeju co to' witan xim napari'. Ara ara pi' pin rain oro ca ara ra quem Iri' Jam pain ca taramaja mi' mon ma' quem.

Hebreus 13:17

Tomi' ha' jujun co querec wet nunuhu' pain ca hu cucuhu' ma'. Ta tomi' in pin huhun me. Wiricoco ara xi' nana co querec wet xo' nunuhu' pain ca howa nuhu' ma', xi taxi' pan ara xucucun pain ca maqui' ta' ne xec nein ca coco' quima hwet xun cocon Iri' Jam ma', pain ca tomi' hwet xun cocon pain oro ca taramaja nucucun pain ca querec wet cucuhu' ta. Je ca tomi' xuhu' ca'. Tomi' ha' jujun, ma' ta ara tomi' querec te cacain ca taramaja nucucun ta. Mo ta om tomi' ha' huhun, mo ta ara tomi' xaxa' e' cacain ca taramaja nucucun pahu', om ta quep xiho' ac cucuhu' ta.

Hebreus 6:1

Je ca tomi' xuhu' ca'. Hohot na pain ca om noro in hwet noro in hwet e' xin oro capijacon Iri' Jam con Cristo ca wara ca' na qui' urut pahu' pain cara pane. Ca' na ca' na tiquin' xut urut pahu' pain oro xocori capijacon Iri' Jam con Cristo quem, ma' ta horon horon tiquin' hwe pain ca howa nuhu' ta urut pahu'. Wara pijim' ca' ara xi' urut pahu' pane: An to pin jein oro ca ara ximama' ne wara curuhu' ma'. Howa e' jun Iri' Jam ta, ac i ma' na ca wara pijim' urut pahu' pane.