Efésios 4:1 - Tradução Bíblica Pacaas Novos

¹ Je ca tomi' xuhu' ca'. Wata' pain ca tao' pe pin cacapa' pain ca taramaja mi' ton Taramaxicon nexi' ca', hu ca' inuhu': Xuruxut xo' je ta inuhu'. Win ne ca xuruxut xo' je cuhu' Iri' Jam pain ca xo' howa xine qui' cuhu' pane.

Efésios 4:1 Iomraidhean Croise

Atos 9:31

Pain oro xijein cidade pain Judeia, je pain Galileia, je pain Samaria ma', om pin na wari' co mana' nonon oro co howa nonon Jeju, om pin na wari' co quep em' nonon quem. Mija pin ac caca na co howa nana ma', xi om ne ca quep xiho' pan ara cocon Tamataracon Iri' Jam ta. To' hwara' opa tata pain ca howa nucucun. Win xumu e' nanain ca param pan nucun Taramaxicon nexi' quem.

Romanos 11:29

Xi coromicat ni ra na ca Iri' Jam ta. Om ca coromicat ni ca' cain ca wara coromicat nucun cocon oro wari' co tora' to ca pane, om ca cut in ra na cain oro caramaxicon ca awi ca wara mi' cocon pain pane.

Romanos 12:1

Je ca tomi' xuhu' ca' xere, tomi' ca' inuhu' pain ca hu xim xuhu' ca'. Xi om ne ca xiram pa' ara capari' Iri' Jam ta. Win xumu jun, ac ca mi' hun tara pain curuhu' ma'. Win ne ca tom tain' mi' tocwa pain cwerein carawa ma', ac je paxi' tara pain ca mi' hun pain curuhu'. Om e' tara pain ca mi' hun pain ca cono' nein. Mi' jun pain ca e' nein, mene rain curuxut jun. Ara xite jein quem, ma' ta hohot hun. Mi' iri jun pain curuhu' ma' ne, in ac xo' ac hun tara pain ca coromicat nuhu' pain xumuhu' ma'.

1 Coríntios 4:16

Je ca tomi' mip xuhu' ca': An xiho' xine pain ca xut xo' ne pain ca howa ton Cristo ca' me inuhu'.

2 Coríntios 10:1

Wata' pain ca Paulo ta' ca', tomi' ca' inuhu' pain ca an xiho' ton Cristo pain ca tomi' wixite nucun, je pain ca tomi' pan hot nucun ma' quem. Tomi' mip ca' inuhu' cocon oro win ma' nuhu' co tomi' ximama' ca' nana pata': Tomi' iri napari' pain ca pe ho' capari' ca' ne, tomi' pan hot e' napari'. Pe ni ca' iri napari' ne, pan to' ac cain na tarajixi', ac i ma' na ca tomi' ximama' caca pata'.

2 Coríntios 5:20

Je ca tomi' hwet jujun pain capija oro wari' ta caparut Cristo cwa'. Ac ca mam' tomi' caparut na Iri' Jam cwa', pain ca tomi' mip urut pahu' ca'. Ac ca tomi' mip pan cuhu' na Cristo pain ca tomi' urut pahu' ca'. Ha' jun Iri' Jam pain ca taxipa' xijexi' ta cuhu' ta.

2 Coríntios 6:1

Je ca tomi' mip urut pahu' pain ca taramaja wi urut con Iri' Jam cwa'. Xin ne cara jun pain ca xiram pa' xuhu' ta cuhu' ma'. Ma' ta om werem pa' ne capijacon pahu' ta urut pahu'.

Gálatas 4:12

Je ca tomi' xuhu' ca' xere, jain jain ina pain ca tomi' mip xuhu' ca'. An xiho' xine pain ca om jain jain mami' tain oro ca tomi' ha' xine ca xirao' nucun Moisés ca'. Win ne ca an xiho' xuhu' pain ca om judeu nuhu' pane, pain ca om jain jain hwein ca tomi' ha' xine ca xirao' nucun Moisés pane. Tomi' querec te tamana paxi' mahu' pain cara pane.

Efésios 2:10

Wirico ara xi' na Iri' Jam co to' xocoricon wari' pin napari' pain ca win cwere pin xun Cristo Jeju. Ma' ta ara hwein ca awi wa ca wara coromicat an pe mi' xuhu' pane napari' pain ca ara tatarain ta capari' pain cara pane.

Efésios 3:1

Je ca tomi' mi' xuhu' con Iri' Jam ca'. Wata' pain ca Paulo ta' ca', pe inain xirinain ca tao' to tao' to to wa ca'. Xi om ne ca taramaja mi' ara ton Cristo Jeju pain ca quep xiho' xuhu' pain ca om judeu hwe ma' quem.

Efésios 4:17

Je ca tomi' xuhu' ca'. Ac ca tomi' mip cuhu' na Taramaxicon nexi' pata'. Ta an xiho' mami' huhun oro wari' co om howa nonon Cristo me. Coromicat ximama' ara xi' nana.

Efésios 4:4

Je ca xica' pe tara xumuhu' me xuhu' ca'. Xi om ne ca ac ca ma' xica' pe ne ara ne cwerexi' con Cristo pain ca howa xun ca'. Ma' xica' pe na Tamataracon Iri' Jam ca pe ho' napari' pain ximixi' quem. Ac i ma' na ca ma' xica' pe ne carawa ca winim' iri' ca', ca tomi' pe mi' capari' pain ca xo' howa xine qui' capari' Iri' Jam pane.

Efésios 5:2

Ta noc camain' xujuhu' me. Win ca Cristo pain ca om noc qui' capari' pain ca om narain ho' qui' xucun pari' pane, ac i ma' je pain ca om noc xujuhu' me. Mi' pan xucun con Iri' Jam Cristo. Ma' ta mi' pin caho' toton ta non pari' pane. Hohot tamana non Iri' Jam quem, hohot tamana non pain ca mi' pin caho' capari'.

Filipenses 1:27

Je ca tomi' xuhu' ca', win xumu cain' jein ca xuruxut xo' wa ta. Ac oro wari' co xuruxut xo' nana pain ca howa cacain capijacon Iri' Jam ca tomi' hwet napari' con Cristo ta je, ac i ma' tara ca xuruxut xo' nuhu' ta. Am ha' capa' pain ca hwet xuhu', am om ha' capa'. Am taraju e' xuhu' pain ca tomi' hwet xihwe pain ca xuruxut nuhu' ma', je i ma' ira. Taxi' xuxuhu' na inuhu' pain ca hwara' opa hwe pain ca ac ca xica' pe ne ne xumuhu' ma', pain ca tomi' in pin wi huhun oro wari' co ari nanain capijacon Iri' Jam ca tomi' hwet napari' con Cristo ta.

Filipenses 3:14

Win ca wari' co mo ma', pain ca jein hwet xin tawiri wana cocon oro win ma' ca ma'. Om ca noro in cain waracon. Mo mip e' na, hwet cain' tain tawiri wana, ma' ta an tain carawa ca awi ta na. Ac i ma' ina quem. Win xumu e' inon Cristo Jeju, ma' ta aram aram mi' xim capa' pain ca param nucun Iri' Jam pain pawin ina.

Colossenses 1:10

Tomi' mi' ac i ma' urut pahu' con, ma' ta xuruxut xo' hwe pain ca howa hun Taramaxicon nexi' ma'. Ma' ta hohot hun pain oro ca ara hwe ma', pain ca ara cara hwein oro ca awi wa ta urut pahu'. Ma' ta horon horon tiquin' hwe pain ca querec pin' hun Iri' Jam ta urut pahu'.

Colossenses 2:6

Je ca tomi' xuhu' ca'. Xuruxut xo' xuruxut xo' tiquin' je pain ca win cwere hun Cristo Jeju ma'. Win ne ca howa hwein ca pijim' xihwe con, pain ca Taramaxicon na ta xihwe con pane.

Colossenses 4:12

Mam' pe wet inonon ta nuhu' win ma' nuhu' Epafras cwa', co taramaja mi' non Cristo Jeju cwa'. Mija na ca tama' tomi' mi' cuhu' con Iri' Jam quem. Ma' ta ximicon hwanana caca ma', ma' ta hwara' opa caca pain ca howa nucucun ma', ma' ta om tara con ta'a camain' quequem pain oro ca param nem ca ara je momon ma' non pain ca tomi' mi' cuhu' con Iri' Jam.

1 Tessalonicenses 2:12

Ac cote cacama hwijima' urut pahu' pain ca hu urut pahu' ma'. Tomi' toto urut pahu', hu urut pahu' pain ca xuruxut xo' je urut pahu' ma'. Win ne ca howa pin hun Iri' Jam co tora' nuhu' ma', pain ca taramaxicon pe ho' xim cuhu' ma', je pain ca jao jao ma' xine pain ca awi tamana ne cuhu' ma' urut pahu' pane.

2 Tessalonicenses 1:11

Je ca tama' tomi' mi' urut pahu' con Cotere' Iri' Jam quem. Tomi' ca' urut con pahu': Quep xiho' roron, mi' roron pain ca hohot quequem pain ca xuruxut nucucun urut con pahu'. Win ne ca xuruxut xo' je momon pain ca xo' howa xine qui' momon pane urut con pahu'. Mam' quep xiho' roron pain ca hwara' opa tamana nem quem urut con pahu'. Ma' ta ara ara pi' pin cacain oro ca awi wa ca ara xi' caca pain ca howa cocon Jeju ta urut con pahu'.

2 Timóteo 1:9

Wirico co to' witan napari', wirico co tora' napari', iri' wari' ne napari' quem. Om ca mam' to' witan capari' pain carawa ca awi ca ara xi' paxi' iri', om na. Mam' to' witan napari' pain ca param pan nucun. Mam' to' witan napari' pain ca xiram pa' pan capari' quem. Om xi xiram pa' capari', xi iri' wari' iri' ta. Ane wara xiram pa' qui' capari' pain cara pane ne, pain ca om tomi' ma' pin querec cain macan' pane, wara coromicat an pe xo' mi' napari' pain ca xiram pa' nucun. Main to' witan turuhu' Cristo Jeju cwa' napari', ac i ma' tara ca xiram pa' xuhu' ta napari' pane.

Tito 2:10

Ta an noc xa hwein carawa nucucun me ta roron. An hwet mi' pan jujun pain ca xuruxut xo' nuhu' ma', ma' ta querec pin' cucuhu' pain ca om mixein camain' nuhu' pain ca ara cara xin hwein oro ca param nucucun ta roron. Querec pin' iri tuturuhu' pain oro ca taramaja xo' nuhu' oro wari' ma' ne, taraju toto napa' me ac caca tara pain ca taraju cacain ca pijim' xine capijacon Iri' Jam co to' witan napari' ta roron.

Hebreus 13:21

pain ca mi' cuhu' pain ca ara taxi' hwein ca awi wa ma', ma' ta ha' cuhu' pain ca ara hwein ca param nucun ma'. Param inon pain ca meo capari' pain iri' ximixi' ca', pain ca mi' capari' pain ca ara e' xin ca hohot pan non quem. Wirico Jeju Cristo ara xi' na co mi' napari' pain ca ara e' xin ca hohot pan non quem. Na e' na pain ca tomi' querec te cara xun co awi tamana ta! Amém, iri'o' na ca tomi' ne ta.

Hebreus 3:1

Je ca tomi' xuhu' ca' xere, pain ca wari' ne cuhu' Iri' Jam ma', je pain ca tora' cuhu' pain ca howa xine cuhu' ma' quem. Tomi' xim inuhu'. Mam' pe wet cara jun Jeju cwa', co tomi' hwet napari' pain ca tomi' nucun Iri' Jam cwa', co sacerdote co iri' taramaxicon cwa'. Wirico co howa iri' cwa'.

1Pedro 2:11

Je ca tomi' xuhu' pain ca tomi' querec te xuhu' ca'. Ac ca tatirim hwe na pain macan' ca', pain ca om to xo' hwe ma'. Je ca hu ca' xuhu' ca': Ein jein oro ca param ne ca cwere wa ca to' i'ina nuhu' ma', ca ac ca mixita cuhu' ne pain ca to' quiji' pin xim cuhu' ma'.

1Pedro 3:9

Mo ta quep em' cuhu' wari' ma', mo ta tomi' xirac cuhu', ta win mapa' ne hun me. Tomi' mi' pan jun con Iri' Jam. Xiram pa' ron, quep xiho' ron ta Te Iri' Jam jun. Xi wara param mi' xuhu' pain ca awi wa ta ara cuhu' pain ca xo' howa xine ta qui' cuhu' pane ta.

1Pedro 5:10

Ame hwe e', om ta jain jain cara hwe, main pi' pin tara ca jain jain nuhu'. To' hohot pin ac cuhu' tara Iri' Jam. To' hwara' opa turuhu', mi' turuhu' pain ca om naro camain' wa, to' hwara' opa cara ac cuhu' tara. Xi wirico ara ca co xiram pa' taxipa' nuhu'. Wirico co wara param mi' nuhu' pain ca jao jao ma' hun pain ca awi nucun pain ca hwara' opa nucun ca om pi' ra ha' ma', xi om ne ca win cwere ara hun Cristo Jeju ta.

2 Pedro 1:3

Quep xiho' tamana napari' Iri' Jam, xi om ne ca hwara' opa ara ca pain ca mi' mi' pi' pin capari' pain oro ca to' xuruxut xo' napari' pain ca win xumu e' xin ca param nucun. Ha' napari' pain ca xuruxut xo' wa quem, xi mi' ara capari' pain ca querec pin' xo' xun Jeju Cristo. Wirico co wari' ne napari', ma' ta jao jao ma' mahu' pain ca hwara' opa ne ca', je pain ca awi tamana ne ca' quem napari'.

2João 1:5

Tomi' xim inuhu' pain i ca' quem we. Ta noc caracan xijexi' me. Pain ca hu ac i ma' capari' Iri' Jam ma', om ca xocori ne ca hu nucun. Wara hu ac i ma' napari' pain cara pane, pain ca xo' pijim' ten qui' xin capijacon con Jeju pane.