Efésios 3:1 - Tradução Bíblica Pacaas Novos

¹ Je ca tomi' mi' xuhu' con Iri' Jam ca'. Wata' pain ca Paulo ta' ca', pe inain xirinain ca tao' to tao' to to wa ca'. Xi om ne ca taramaja mi' ara ton Cristo Jeju pain ca quep xiho' xuhu' pain ca om judeu hwe ma' quem.

Efésios 3:1 Iomraidhean Croise

Lucas 21:12

Ac i ma' paxi' tara ca hwet pa' tococwa pain oro ca om awi wa oro wari' ma', ane om hwet pa' hap xun tococwa pain ne. Pain ca om hwet pa' querec tococwa pain, quep cain' ac cucuhu' tara, quep em' ac cucuhu' tara quem. Cut mama' ac cucuhu' tara pain oro xirim ca cut in to xucucun ma', tao' to ac cucuhu' tara pain xirinain ca tao' to tao' to to wa ma' quem. Cut mi' ac cucuhu' tara cocon oro xucucun taramaxicon, tomi' querec ac cucuhu' tara pain oro ca ara hwe quem. Ara ac i ma' tuturuhu', xi om ne ca howa ara mahu' ta.

Atos 21:33

Mo hwet ac con Paulo na comandante ma', quep ac con na. Pao' pe jun pain arain too, ma' 2 tara arain too ta ac tococwa na oro soldado nucun, pao' pe ac cocon na. Tomi' querec ac tococwa na oro wari' ma': Cain' ca wari' ca co cwa' co to' hwe cwa'? Ma' carawa ca ara ca quem ac tococwa na.

Atos 23:18

Ma, hap ra ta arain ac ca na, o mi' ac con na con comandante. Tomi' napa' Paulo ma' ne, co tao' pe ma ma' ne ac con na. O mi' ron con co cwa' co xo' hwara' cwa' e' napa' pum. Ma' na carawa ca tomi' hwet xim quem ta ac con na.

Atos 26:29

Tara pum quem taramaxicon ac ca na Paulo. Mo ta howa hap ma. Mo ta ame mapa' e' ma. Howa xira na inem ta. Howa howa xam' xirara na inuhu' pain ca taraju wet mahu' ca' quem. Je ca tomi' mi' xuhu' con Iri' Jam quem. An xiho' xirarapa' na inuhu' pain ca howa ta' ca'. Noc e' inuhu' pain ca an xiho' mahu' pain ca tao' pe cacapa' pain xirinain ca tao' to tao' to to wa ca'. Ac i ma' na ca tomi' cacam Agripa cam Berenice Paulo pane.

Atos 9:15

Om na ta Ananias ac con na Taramaxicon nexi'. Mo hwet ron Saulo cwain. Wara tora' inon. Mi' ton inon pain ca taramaja mi' capa'. Tomi' hwet tarapa' cocon oro wari' co om judeu nana, wiricoco oro taramaxicon nucucun quem. Tomi' hwet tarapa' cocon oro wari' nein Israel ma' quem.

2 Coríntios 1:6

Jain jain iri urut ne, to' hwara' opa pan ac xihwe na pain xumuhu' ma', witan ac hwe na, e' cara ac hwe tara quem. Ac i ma' na pain ca to' hwara' opa caparut pain xumuxut Iri' Jam quem. To' hwara' opa iri naparut ne, to' hwara' opa ac cuhu' na quem, mi' ac cuhu' na pain ca quereme hwein oro ca to' i'ina nuhu' ma' quem. Oro ca jain jain nuhu' ma', an xiho' ara xi' nain oro ca jain jain nuxut ca' quem.

2 Coríntios 10:1

Wata' pain ca Paulo ta' ca', tomi' ca' inuhu' pain ca an xiho' ton Cristo pain ca tomi' wixite nucun, je pain ca tomi' pan hot nucun ma' quem. Tomi' mip ca' inuhu' cocon oro win ma' nuhu' co tomi' ximama' ca' nana pata': Tomi' iri napari' pain ca pe ho' capari' ca' ne, tomi' pan hot e' napari'. Pe ni ca' iri napari' ne, pan to' ac cain na tarajixi', ac i ma' na ca tomi' ximama' caca pata'.

2 Coríntios 11:23

Om ca taramaja mi' urut con Cristo ta caca ra? Wata' co taramaja mi' pan non Cristo ta. Ac ca tamanain ta' a xira pain ca tomi' ac i ma' ta' ta. Taramaja tamana nana ra? Taramaja tiquin' ca' inonon quem. Tao' to tata pain xirinain ca tao' to tao' to to wa ra? Wata' pan co tao' pe ho' tao' pe ho' wa pain xirinain ca tao' to tao' to to wa ta. Wap tata ra? Wata' pan co wap mip ho' wap mip ho' wa ta. Mija na ca mi' pin ho' mi' pin ho' ta' quem.

Gálatas 5:11

Tomi' xo' xim inuhu' pain i ca' quem xere: Ma' nana co tomi' em' nanapa'. Tomi' ca' nana: Wac xirac tatarain taparinain ca xirac nucucun oro wari' ta na Paulo ta nanapa' ma'. Cain' cain' xirara quem? Mo xi pijim' pijim' wet ac i ma' ta', je xi om quep em' quep em' tiquin' cacapa' oro win judeu ta' cwa'? Mo xi pijim' ac i ma' ta', om xi mana' cacapa' pain ca pijim' hwet toton con Jeju oro wari' ma', pain ca mi' pin caho' napari' pain pana Cristo ta toton ca'.

Gálatas 5:2

Taraju wet xine e'. Wata' pain ca Paulo ta' ca', tomi' inuhu'. Mo ta coromicat ca' hwe: Wac xirac xin taparinain ca xirac nexi' ca', ma' ta hohot xun Iri' Jam ta, mo ta coromicat ac i ma' hwe, om ta quep xiho' camain' cuhu' Cristo pain ca mi' pin caho' cuhu' ta.

Gálatas 5:24

Wari' cwa', pain ca wari' ne pin capari' Cristo Jeju cwa', om ca ara mami' xin ca param pan nexi'. Ac ca to' pa' pin xin na ca param pan nexi'. Oro ca param ximama' nexi' ca', je oro ca win xumu ximama' xin ca om awi wa ca', ac ca tatatain mi' xin na pain panaxicon Cristo.

Efésios 3:11

Wara coromicat xo' ac i ma' na Iri' Jam pain cara pane, pain ca om quep querec cain macan' pane. Ara nain quem, ara pin nain ca coromicat nucun pain ca mam' capari' con Taramaxicon nexi' Jeju Cristo.

Efésios 3:13

Je ca tomi' xuhu' ca': Jain jain paxi' ina pain ca quep em' cacapa' pain ca pijim' mi' xuhu' pain capijacon Iri' Jam ca'. Je i ma' ira, ta tomi' xaxa' tomi' xaxa' naro pin hwe me ta. Tomi' querec te pan e' je, xi quep xiho' ara cuhu' oro carawa ca ara napa' ta.

Efésios 3:8

Om paxi' na ca awi ta' pane. Awi tiquin' ca' paxi' nanapa' oro xucucun wari' nucun Iri' Jam cwa'. Ane mi' pan capa' pain ca pijim' mi' wa capijacon ne. Xiram pa' napa' pain ca pijim' mi' roron pain capija oro wari' co om judeu nana ta capa' pane. Pijim' hwet roron pain carawa ca awi tamana ca mi' toton capari' Cristo ta napa'. Xi na capari' pain ca querec pin' pi' pin xin ta.

Efésios 4:1

Je ca tomi' xuhu' ca'. Wata' pain ca tao' pe pin cacapa' pain ca taramaja mi' ton Taramaxicon nexi' ca', hu ca' inuhu': Xuruxut xo' je ta inuhu'. Win ne ca xuruxut xo' je cuhu' Iri' Jam pain ca xo' howa xine qui' cuhu' pane.

Efésios 6:20

Wirico Cristo co pijim' rain capija napa' pane. Wirico co mi' napa' pain ca tomi' hwet tain iri' capijacon. Je ca tao' pe cacapa' ca'. Tomi' mi' xine con Iri' Jam me. Ma' ta pijim' quereme ta'. Je ca param mi' capa' ca'.

Filipenses 1:7

Ac i ma' na ca coromicat mi' coromicat mi' pi' pin xuhu' ca'. Hohot na quem, xi tomi' querec te ara xuhu' pain iri' xumu ta. Taramaja wi iri', xi om ne ca quep xiho' quep xiho' xam' ara mahu' pain ca taramaja ne ca mi' capa' Iri' Jam ta. Quep xiho' mahu' pain ca tao' pe cacapa' pain xirinain ca tao' to tao' to to wa ca', quep xiho' mahu' pain ca tomi' xo' toton co tomi' napat nanain capijacon Iri' Jam ca tomi' hwet napari' con Jeju cwa', je pain ca tomi' tomi' na pin toton pain ca iri'o' nein ca' quem.

Colossenses 1:24

Jain jain paxi' ina pain xocori ca', xi om ne oro ca taramaja ne pain ca quep xiho' toton oro win ma' nuhu' pain ca om judeu hwe ma'. Ane tomi' querec te pan ta' ne. Ac ca jain jain wi ta' con Cristo na, ac ca moin' pin ne na ca jain jain ne pahu'. Xi om ne ca quep xiho' ara xihwe pain ca jain jain ne ca', pain ca ac curucun iri' pain ca howa xun ca'.

Colossenses 4:18

Wata' pain ca Paulo ta' ca', xirao' pan inain wuxu pain tawirinain ca xirao' ne ca'. Mam' pe wet xine pain ca tao' pe pe cacapa' pain xirinain ca tao' to tao' to to wa ca'. Param inon Iri' Jam pain ca quep xiho' cuhu' ma', pain ca mi' e' cuhu' pain ca param nucun ma'. Je i ca' ca xirao' ne ca'.

Colossenses 4:3

Tomi' iri jun ne, tomi' mi' ac maparut con tara quem. Mi' roron pain ca pijim' wa capijam ta jun. Tao' pe ara xi' nanapa' pain xirinain ca tao' to tao' to to wa ca', xi om ne ca pijim' hwet ara toton pain capijacon Iri' Jam oro wari' ta. Je ca tomi' xut pahu' ca': Tomi' mi' xut con Iri' Jam me, ma' ta ha' caparut pain ca pijim' pijim' tiquin' xut pain ca coromicat an pe xo' nucun Iri' Jam ca tomi' hwet pin capari' con Cristo pain xocori ca'.

2 Timóteo 1:16

Onesíforo iri na ne, quep xiho' napa' quem. Param inon Taramaxicon nexi' pain ca xiram pa' cocon oro ca nari nucun cocon oro wari' co to ho' nonon pain xiricon ma' quem. Xi quep xiho' ho' quep xiho' ho' ara capa' ta, to' wa' to' wa' napa' pain xumu quem. Om ca wixipa' ca pain ca tao' pe cacapa' pain xirinain ca tao' to tao' to to wa ca', om na.

2 Timóteo 1:8

Je ca tomi' xim ca'. Ta wixipa' ma pain ca tomi' hwet momon con Taramaxicon nexi' oro wari' me. Ta wixipa' ma pain ca tao' pe cacapa' pain xirinain ca tao' to tao' to to wa quem me. Tao' pe e' nanapa', xi om ne ca taramaja mi' ara ton Taramaxicon nexi' ta. Je i ma' ira, ta wixipa' ma pata' me ta. Quereme rain ca jain jain wa pain ca pijim' hwet main capijacon Iri' Jam ca tomi' hwet napari' con Cristo ta. Win ta' ca'. To' hwara' opa terem pain Iri' Jam ta.

Filemom 1:1

Paulo ina pain ca xirao' mi' xim ca' Filemom. Tao' pe nanapa' pain xirinain ca tao' to tao' to to wa ca', xi om ne ca taramaja mi' ara ton Cristo Jeju ta. Wata', wirico coxari' Timóteo cwa' quem, xirao' mi' urut pum pain ca tomi' querec te tamana urut pum ca', je pain ca taramaja wi maparut ma'.

Filemom 1:23

Mam' pe wet inon ta nem Epafras co win tao' pe ta' cwa'. Tao' pe nonon Epafras, xi om ne ca taramaja mi' ara con Cristo Jeju ta.

Filemom 1:9

Ane tomi' toto e' xim pain ne, xi om ne ca tomi' querec te ara xim ta. Wata' pain ca Paulo ta' ca', pain ca horon pin ta' ca', pain ca tao' pe pin cacapa' pain ca taramaja mi' ton Cristo Jeju ca',

Apocalipse 2:10

Ta jin' hwein oro ca jain jain wa ca maqui' pa' xim nuhu' con Caxicon Jam me ta. Ma' tatara oro win ma' nuhu' co wixicao' mi' ca pain xirinain ca tao' to tao' to to wa, quep em' querec ac tococwa tara, am an pe pin xin hwein ca howa nuhu' ta ac tococwa tara quem. Ma' 10 tara xec pain ca jain jain xi' hwe pain ca quep em' xim cuhu' Caxicon Jam. Win xumu cara xine me. Mo ta to' parapa' pin xim cucuhu' pain ca howa mahu' ma', je i ma' ira, to' parapa' pin ma' tatarapa' ne ac huhun tara. Mi' pan ac xuhu' tara pain ca om pi' ra ha' ne ca e' wa ta.