Efésios 2:2 - Tradução Bíblica Pacaas Novos

² Pan teretem taxipa' hwe, je curuhu' pane. An xiho' e' huhun oro wari' co om howa nonon Iri' Jam. Tomi' ha' taxipa' hun Caxicon Jam co taramaxicon pe ho' nonon oro caxicon jam co taramaja mi' nonon pain nanawin ma'. Wirico Caxicon Jam co taramaja pe ho' nain ximicocon oro wari' co om tomi' ha' camain' nana cwa', wirico co tomi' ha' hwe pane.

Efésios 2:2 Iomraidhean Croise

Mateus 11:19

Wata' pain ca Iri' Wari' ta' ca' iri na ne, cao' ina, toc inain comi uva quem. Tomi' ximama' ac mahu' na: Xocomu ma, toc tamanain pe ma, taxipa' momon oro caracat ma', oro co cut in taxipa' nanain oro imposto ma', wiricoco oro wari' co hwet taxipa' wixicocon pain ca pan teretem nucucun ma' quem, wiricoco nana co taxipa' ma ma', ac i ma' na ca tomi' ximama' mahu'. Tomi' ximama' ac i ma' paxi' maparut, ane tomi' iri'o' urut pain ca pijim' nuxut ne. Oro wari' co taraju nanapa' pain ca pijim' ne ca', mo ta querec cocon oro co xuruxut xo' nana pain ca tomi' ha' cacapa' ma', querec pin' ac cacapa' tara pain ca tomi' iri'o' ta' ca' na ca tomi' tococwa ma'.

Mateus 13:22

Oro xucucun ma' iri nana ne, co tomi' joc mam' mi' nanain macan' ca ma' pi ma', taraju paxi' nanain capijacon Iri' Jam. Aram aram coromicat ni ca' ac cacain na. Toron ximama' ac ne na ximicocon pain oro ca to' i'ina nonon, caramaju xixi' na nana quem. Mo xi quep xiho' cocon oro caramaji macan' ca', ane om quep xiho' cocon ne, mixein e' nonon. Ac ca mo' nein pi na capijacon Iri' Jam pain ximicocon. Ac ca om wina ne na, xi to' xucun wari' tococwa pain ta.

Mateus 13:38

Totacon ma' iri na ne, an xiho' nain macan' ca to pan caca oro wari'. Trigo ca awi tocwi ma', an xiho' nonon oro wari' co taramaxicon pe ho' ca Iri' Jam. Caji tononoin ma' iri na ne, an xiho' nonon oro wari' nucun Caxicon Jam quem.

Marcos 4:19

Ane coromicat ni ca' cacain ne. Ma' pin iri na oro ca to' i'ina nonon ne, toron ximama' ac ne na ximicocon. Caramaju xixi' na nana quem. Mo xi quep xiho' cocon oro caramaji macan' ca', ane om quep xiho' cocon ne, mixein e' nonon. Win xumu e' nanain oro ca param nucucun quem. Ac ca mo' nein na capijacon Iri' Jam oro caramaji macan' pain ximicocon. Ac ca om wina ne na, xi to' xucun wari' tococwa pain ta.

Lucas 16:8

Taramaxicon nucun ma', taxi' pin iri non pain ca mixein ca ne pain ca waraju cain caramaxicon ma', he ac con na. In ac non quem. Om ca in ac con pain ca mixein nucun. In ac non pain ca ma' ne ximicon ma', pain ca wara coromicat an pe xo' nucun pain ca main quep xiho' tatarapa' oro win ma' ne pain ca aram aram ximin ta' ca ma' na ca pijim' tococwa ma'. Tomi' ac tococwa na: Ac i ma' taxipa' nana oro wari' co om howa nonon Iri' Jam. Coromicat xo' tiquin' ca' nonon oro wari' co howa nana cwa', ma' tiquin' ca' nonon pain ca xumu wa pain ca wara coromicat an pe xo' taxi' nucucun ma', pain ca to' querec pin' cocon oro win ma' caca co aram aram quep xiho' xun nonon pain ca ximin nucucun ma'.

Lucas 22:31

Simão Simão, taraju wet ne e' ac ca na Jeju. Param nuhu' Caxicon Jam. To' i'ina xuhu', am ja' camara' xuhu' ta nuhu'. Tomi' non Te Iri' Jam quem, ta narain ho' mapa' cocon me ta non pahu'.

João 12:31

Maqui' pin na xec pain ca tomi' xun tococwa oro wari' co om howa nana ma', pain ca em' hwe, mama' jein cote ne xe ta xun tococwa ma'. Xin hwet pin ac tocwa tara Caxicon Jam co taramaxicon pe ho' nonon quem.

João 13:2

Irawin cao' ac urut na. Judas ma', panxica Simão Iscariotes ma', wara coromicat ca' na quem: Quep xiho' toton oro taramaxicon pain ca quep xun cocon Jeju ta na. Tomi' mi' toton con ta na. Wirico Caxicon Jam co mi' non pain ca coromicat ac i ma' nucun.

João 13:27

Cao' pin iri nain Judas ne, corom hwet pin ac con na Caxicon Jam quem. Tomi' ac con na Jeju: Ara hap rain ca ara ta' ma ma' na ca tomi' con ma'.

João 14:30

Om ta momon tomi' tomi' tiquin' xuhu' pain xocori ca' quem, xi ma' ara ne carawa ca ara xim napa' ca'. To' quiji' pin xim paxi' napa' Caxicon Jam co taramaxicon pe ho' nonon oro wari' pain macan' ca', ane om na con pain ca to' quiji' pin capa' ne, xi taramaxicon pe ho' capa' ta.

João 15:19

Mo xi win ma' ne huhun oro wari' co om howa nanapa' ma', om ac ne xira ca noc cucuhu' pain ca win ma' ne cucuhu' ma'. Ane tora' ca' xuhu' cocon ne. Om ca win ma' ne mami' huhun. Je ca noc cucuhu' ma' quem.

João 16:11

To' querec pin' totoron pain ca wap toton cocon Te ma' quem, xi om ne ca wara wap ton ara con Caxicon Jam co taramaxicon pe ho' nonon ma'. Taxi' pin ac cocon tara Te pain ca wap toton pan cocon pain ca caracat nucucun.

João 7:7

Om paxi' na ca noc cucuhu' oro wari' co om tomi' ha' nonon Iri' Jam. Ane noc cacapa' ne. Xi om ne ca pan to' ara tain taraxicocon pain ca pan teretem nucucun ta.

João 8:23

Om na, wari' nein macan' hwe ta ac tococwa na. Wata' iri na ne, wari' nein pawin ina. Coromicat an xiho' huhun oro wari' nein macan' ca'. Wata' iri na ne, om ca coromicat an xiho' toton wari' nein macan'.

João 8:44

Te hun Caxicon Jam ma' ira. An xiho' hun quem. Wara to' pa' taxipa' non wari' pain ca xo' quep qui' xine macan' pane, mao ac ne ma' na con, je curucun mao na. Noc nain ca tomi' iri'o' wa. Om ca tomi' iri'o' taxi' ca. Tomi' mixein iri na ne, ara e' nain carawa ca maqui' nain ximicon. Xi tomi' mixein taxipa' ara ca ta. Wirico co ja' tomi' mixein nonon oro wari' co tomi' mixein nana ma' quem.

Atos 19:35

Om na, tacana to je ta pan ac cocon na oro wari' taramaxicon nucucun ma'. Xirao' pe taxipa' nain oro ca tomi' nucucun iri' taramaxicon nucucun oro romano ma', je i ma' ca taramaja nucun. Tacana to pin iri nana oro wari' ma' ne, tomi' pan ac cocon na taramaxicon nucucun: Taraju wet xine me oro win ma' ta' pain ca wari' nein Éfeso iri' ca'. Taxi' taxi' xam' nanapari' oro wari' pain oro xijein macan' ma'. Taxi' nanapari' pain ca querec wet pan xin xirim ca in ac pe tacama Ártemis nexi' co hwara' opa tamana cwa'. Taxi' nanapari' pain ca querec wet pan xin jamicam ca pan' qui' nain pawin pane quem.

Atos 5:3

Tomi' querec pan ac con na Pedro: Para om ari mon Caxicon Jam pain ca quep mip xim quem ma', pain ca mixein rain Tamataracon Iri' Jam quem ma' Ananias? Xi pe ho' cara ara quem tamain dinheiro ca cut ma pain macaram ta.

Romanos 12:2

Ta an xiho' huhun oro wari' co pan teretem nana ma' me ta. To' jimama' xut pain iri' xumuxut ca' me jun Iri' Jam. To' xocori pin rain iri' ca coromicat nuxut ca' me jun. Ma' ta ha' cuhu' pain ca querec pin' hwein oro ca param nucun ca an pe mi' capari' ca', ma' ta ara hwein quem. Param ara xi' nain oro ca awi wa Iri' Jam ta. Param nain carawa ca hohot non. Om ca param ni ca' cain oro ca param nucun

1 Coríntios 5:10

Om paxi' na ca tomi' caho' xuhu' cocon oro wari' co om howa nonon Iri' Jam ma'. Co quep ximama' nana ma', co narain ho' xucucun pain carawa pain ca param ximama' nucucun ma', co cut noc xa nana carawa ma', co pe torotop mi' querec te nanain oro caji pacun ca Iri' Jam xi' ma caca ma' quem, om ca moji'ac ca' jujun caram ma' ta xuhu'. Mo xi moji'ac ca' xuxun huhun, na e' xira pain ca paca' hwein macan' ca', xi to to xam' ara cacain macan' oro wari' ta.

1 Coríntios 6:11

Ma' paxi' nana win ma' nuhu' co ac i ma' nana pain cara pane. Ane hohoc pin cuhu' pain ca caracat nuhu' Iri' Jam ne. Iri' wari' ne pin inuhu' ta nuhu'. To' hohot pin nuhu'. Xi om ca Taramaxicon nexi' Jeju Cristo pain Tamataracon pahu'.

2 Coríntios 4:4

Wirico Caxicon Jam co ac Iri' Jam nonon oro co om howa nonon Cristo ma', wirico co to' i'ina nonon pain ca coromicat xo' nucucun. Ac ca to' om pin cain na tococon pain ca om coromicat nucucun. Ma' ta om taraju pa' hwe ta nonon. Ma' ta om querec pin' hwein naran nein capijacon Iri' Jam ca an hwet pe nain ca toc meremem nucun Cristo pain ca hwara' opa tamana nucun ma' nonon. Wirico Cristo ara xi' na co an tan pan non Iri' Jam ma', iri' wirico na.

Gálatas 1:4

Taramaxicon nexi' Jeju Cristo ma', om ca narain ho' xucun pari'. Mi' pin caho' napari', xic am ca' napari' pain ca caracat nexi'. To' witan napari', ma' ta ha' cuhu' pain ca om an xiho' mami' huhun pain oro ca pan teretem nucucun oro wari' co om howa nanapa' ta napari'. Je ca param mi' capari' Cotere' Iri' Jam.

Efésios 1:21

Iri' taramaxicon pin na Cristo. Taramaxicon hwara' opa tiquin' ca' nonon oro jam co taramaxicon paxi' nana cwa', co hwara' opa to paxi' nanain macan' je nanawin quem, hwara' opa tiquin' hwara' opa tiquin' pi' pin ca' tata. Hwara' opa tiquin' ca' tata pain oro xec nexi' pain xocori ca', hwara' opa tiquin' ca' ac tococwa tara pain ca aram aram in qui' nucun quem.

Efésios 2:11

Mam' pe wet jein i ca': Om paxi' na ca judeu hwe ma'. Om ca wari' nucun Iri' Jam hwe nunuhu' oro judeu ma'. Xi wac xirac hwein taparinain ca xirac nuhu' ta nunuhu'. Tomi' ca' nunuhu' quem: Warut pain ca judeu urut ca', wari' nucun Iri' Jam urut, xi om ne ca wac xirac ara urut pain taparixut ca' nunuhu'.

Efésios 2:13

To pira ca' paxi' hun Iri' Jam pane. Ane cut in pan cuhu' pain xocori ca' ne. Xi om ne ca win cwere ara hun Cristo Jeju ta. To' wixicam pin nuhu' con. Xi om ne ca ao mao ara ne quicon Cristo pain ca mi' pin caho' capari' pane ta.

Efésios 2:3

Je cwerexi' pane quem. Ac i ma' ac i ma' pi' pin iri' pane ira. Ara e' irin ca param ne cwerexi'. Tomi' ha' e' irin ca param pan teretem ne cwerexi' pain ca coromicat pan teretem nexi'. Wap xim napari' Iri' Jam pane quem. Win ne ca wap wap pi' pin tococwa oro wari' co pan teretem nana ma'.

Efésios 4:17

Je ca tomi' xuhu' ca'. Ac ca tomi' mip cuhu' na Taramaxicon nexi' pata'. Ta an xiho' mami' huhun oro wari' co om howa nonon Cristo me. Coromicat ximama' ara xi' nana.

Efésios 4:22

Ca' na ca tomi' urut pahu' pane: An to pin jein wara curuhu' ca ara taxipa' hwe pain ca om howa querec hun Iri' Jam pane. Oro ca param ne wara curuhu' ma', mixein nuhu'. To' em' nuhu'.

Efésios 5:6

Ta tomi' mixein cuhu' wari' co tomi' ximao nuhu' ma' me, pain ca hohot na pain ca ara hwein i ma' ta cuhu' ma'. Oro wari' co om tomi' ha' nonon Iri' Jam ma', co ara ximama' nanain oro ca om awi wa ma', wap totoron Iri' Jam ta.

Efésios 5:8

To paxi' hwein ca jitacat nein pane, pain ca om querec pin' querec hun Iri' Jam pane. Ane to pin hwein xec pain xocori ca' ne. Xi om ne ca win cwere pin ara hun Taramaxicon nexi' ta. Je ca tomi' xuhu' ca': Xuruxut xo' je. Win caca oro wari' co to nanain xec ma'.

Efésios 6:12

Xi wari' caca co mixita iri' ta. Oro caxicon jam nana co mixita iri'. Mixita ururun oro caxicon jam cocon oro taramaxicon nucucun co taramaxicon to ho' nanain oro ca om awi wa pain macan' ca', cocon oro wari' co ac ca to cacain ca jitacat nein na pain ca ari cocon Iri' Jam ma' quem. Mixita ururun oro caxicon jam co hwara' opa to nanain nanawin cain quem. Wiricoco co mixita iri' ta.

Colossenses 1:21

Wahu' ma', pain ca om howa querec hwe pane, to pira ca' hun Iri' Jam. Noc hun pane. Xi om ne ca pan teretem ara hwe pain ca coromicat nuhu', je pain ca xuruxut nuhu' pane ta.

2 Timóteo 4:10

Xi paca' ara capa' Demas cara pane. Win xumu ara xi' nain oro caramaji macan', paca' ac capa' na, mao ac cain na Tessalônica. Mao nain Galácia Crescente, mao nain Dalmácia Tito quem.

Tiago 1:27

Wari' co hohot ton non Cotere' Iri' Jam ma' iri na ne, pain ca xut xo' iri'o' ca pain ca win xumu xo' con ma', ara ac i ca' na: Querec wet nonon oro hwijima' co cono' ca' nanam mana cote cacama cacam waram jicacam ma', querec wet nanam oro narima' co cono' ca' nanam waram taxicacam ma', querec wet nanam pain oro ca to' i'ina nanam quem. Ara xite xucun, om ca to' em' camain' xucun pain ca an xiho' cocon oro caracat co om howa nonon Iri' Jam quem.

Tiago 1:7

Wari' co coromicat ac i ma' ma', om ta cut cain carawa ca mi' ne pain con Taramaxicon nexi'. Om ca ha' ne pain ca mi' tarapa' pain con.

Tiago 4:4

Cain' cain' xihwe pain ca an pe pin hun Iri' Jam quem? Om ca taraju pa' hwe ra? Wari' co win ma' ne nonon oro co tama' pan teretem nana pain ca om howa cocon Iri' Jam ma', wirico co noc non Iri' Jam.

1Pedro 1:14

Tomi' ha' jun Iri' Jam, win ne ca mana panxita' cuhu' ma'. Ta tomi' ha' mami' hwein oro ca param pan teretem nuhu' ca ara taxipa' hwe pane, pain ca om querec pin' querec hun Iri' Jam pane.

1Pedro 4:3

Pain cara pane, ara taxipa' hwein oro ca param ximama' nucucun co om howa nonon Iri' Jam. Quep ximama' taxipa' hwe. Tamanain to taxipa' hwe pain ca win xumu hwein oro ca om awi wa. Tama' toc tamanain to hwein caji tocwa ca mana'. Tamanain to hwe pain ca waraju ximama' nuhu', tamanain to hwe pain ca pe torotop mi' querec te ximama' hwein oro caji pacun ca Iri' Jam xi' ma hwe pane, ca noc tamana pan ca Iri' Jam.

2 Pedro 2:14

Tama' querec param nanam oro narima' ma', quep xitatam na nanam, om ca maho' camain' cacain ca caracat wa. Mixein nonon co om hwara' opa nana pain ca howa nucucun, hohot na pain ca caracat hwe ta tata. Param taxipa' nanain oro caramaxicocon oro win ma' caca, win xumu nanain. Iri' caxicon wari' nana! Wap pan totoron Iri' Jam ta.

1João 3:10

Je i ca' ca to' querec pin' napari' ca jimama' ca' xucucun mana panxica Iri' Jam cocon mana panxica Caxicon Jam: Wari' co om ara xo' taxipa' ma', co noc non win howa ca ma' quem, om ca panxica Iri' Jam ca co ma'.

1João 3:8

Wari' nucun Caxicon Jam na co ma' co caracat taxipa' ma', xi caracat taxipa' pan ara ca Caxicon Jam ta. Wara caracat qui' ara xi' nain ca xo' tomi' ma' ten qui' xine macan' pane. Je ca maqui' cain macan' Panxica Iri' Jam quem. Ma' ta to' om pin tain oro ca ara nucun Caxicon Jam ta na pane.

1João 4:4

Je ca tomi' xuhu' ca', pain ca ac ca mana panxita' xuhu' ne ca'. Wari' nucun Iri' Jam hwe ta. To' quiji' pin huhun oro co pijim' mixein nana ma'. Xi om ne ca hwara' opa ara ne Tamataracon Iri' Jam ca win cwere nuhu' ta. Hwara' opa tiquin' ca' non Caxicon Jam co win cwere nonon oro co om howa nonon Jeju ma'.

1João 5:19

Taxi' xijexi' pain ca mana panxita' capari' Iri' Jam. Taxi' ururun oro co caracat taxipa' nana ma' quem, pain ca taramaxicon pe ho' pan cocon Caxicon Jam ma'.

1João 5:4

Wari' co panxica Iri' Jam ma', ha' ara xi' non pain ca to' quiji' pin cain oro ca om awi wa ca i'ina non pain macan' ca'. Je ca tomi' xuhu' ca': Je i ca' ca mam' to' quiji' pin xin quem, mam' to' quiji' pin irin pain ca howa xun Jeju Cristo ta.

Apocalipse 12:9

Xin hwet pin ac tocwa na co ma' co ac cote ne caji hop ma'. Wirico co ma' co caxicon em' cara pane, co mixein nonon hwanana pain cara pane. Wirico co Caxicon Jam ma', co Satanás na xijein wixicon ma', wirico co mixein taxipa' nonon oro wari' pain macan' ca'. Xin pan' hwet pin ac tocwa na pain macan'. Wixicaracao' camara' hwet pin ac tococwa na pain macan' oro caxicon jam co taramaja mi' nonon ma' quem.

Apocalipse 13:14

Mixein mixein pi' pin tata oro wari' co to nanain oro xijein macan', xi om ne oro ca ara ca ma', ca om ara taxi' ne ca wari' wa ma', ca ara ra pan con co hwet qui' cain' ma'. Tomi' ac tococwa na oro wari': Quep jein caji pacun ma', ara an xiho' jein curucun co ma' co hwet qui' cain' ma', co to' pa' pin paxi' wa pain cote ne quit ma', co e' mami' ma'. Pe torotop mi' querec te ac hwein tara ta, ac i ma' na ca tomi' tococwa oro wari'.

Apocalipse 13:8

Co ma' co ac Wijimain Taramaji Ovelha ma', co wara coromicat an pe xo' ca Iri' Jam pain cara pane, pain ca om tomi' ma' pin querec cain macan' pane, co main to' pa' pin xim nenem oro caracat ta ca pane, ma' non tapari carawa ca xirao' to xine wixicocon oro co e' cara xi' nana ma'. Oro wari' co to nanain oro xijein macan' ma', co om xirao' to wa wixicocon pain tapari carawa nucun co ma' co ac Wijimain Taramaji Ovelha ma', wa wa wa wa xam' totoron co ma' co ac caji carawa ma'. Pe torotop mi' querec te totoron quem.

Apocalipse 16:17

Mao ac ca na xucun jam ma', co ja' corom mao nonon win ma' ca ma', ma' 7 pin ac caca na jam co mama' nana. Ji'ao pin ac cain na ca xirac wa ca moin' pe nain too nucun. Ji'ao na pain pawin. Ji'ao iri nain ne, taraju ac tain na ca tomi' wa ca maqui' nain xiricon Iri' Jam ma', maqui' nain ca mam' xao pe nucun ma'. Tomi' mip ac ne na: Ara pi' pin inain oro ca ara ta' ta' pane na.

Apocalipse 20:2

Quep xat ac con na co ma' co ac caji hop ma', co caxicon em' pain cara pane, co Caxicon Jam ma', co Satanás na xijein wixicon. Pao' pe ac con na pain arain too, xin mi' ac con na pain cote ne man ca om tawirinain cain. Tao' pa' ac cain na, tao' pa' mip nain, ma' ta om mixein mami' momon oro wari' co to nanain oro xijein macan' ta non. Tao' pa' cara ac tocwa tara, maqui' pa' toron ca 1.000 nein cawaxi' pain ca tao' pa' tocwa ta. Pi' pin iri tara ca 1.000 nein cawaxi' ne, pa hwet wijimain ac tocwa tara, ame hwe e'.