Efésios 2:13 - Tradução Bíblica Pacaas Novos

¹³ To pira ca' paxi' hun Iri' Jam pane. Ane cut in pan cuhu' pain xocori ca' ne. Xi om ne ca win cwere ara hun Cristo Jeju ta. To' wixicam pin nuhu' con. Xi om ne ca ao mao ara ne quicon Cristo pain ca mi' pin caho' capari' pane ta.

Efésios 2:13 Iomraidhean Croise

João 10:16

Ma' nanapa' oro xucucun wari' co om howa querec nanapa' quem. Wari' ne toton inonon. An xiho' nanain oro ovelha ca corom to nain xijein ca tao' caho' nein ma'. Na e' na pain ca cut qui' toton quem. Taraju wet tatarain ca tomi' ne. Jao jao ma' ac cocon tara co wara howa nanapa', querec wet querec wet pi' pin ac toton tara quem. Xica' pe ta' pain ca querec wet toton ta.

Atos 15:14

Je ca tomi' capari' Simão cwa'. Tomi' hwet napari' con Iri' Jam ma', pain ca xo' xiram pa' ten qui' cocon oro wari' co om judeu nana pain cara pane. Ma' tatara co tora' ta', co wari' ne ta' ta na Iri' Jam ta napari'.

Atos 2:39

Je ara xi' na ca wara tomi' pe cuhu' ta. Wahu', mana panxihwe cocon waram winahu', oro wari' pain oro xijein macan' quem, wara tomi' pe mi' nuhu' pain Tamataracon. Wara tomi' pe wara tomi' pe pi' pin tata pain Tamataracon oro wari' co howa xine pan ca Taramaxicon Iri' Jam ta. Ac i ma' na ca tomi' cocon oro wari' Pedro ma'.

Atos 22:21

Om na ta ac capa' na. Mao ra, mao rain pira inem. Tomi' hwet ne cocon oro wari' co om judeu nana inem ta napa'. Ac i ma' na ca tomi' cocon oro wari' Paulo ma'.

Atos 26:18

Ac ca to' querec pin momon tara pain tococon ma', ma' ta querec pin' cacapa'. Ac ca to' xuruxut ni ca' momon tara pain ca jitacat nein ma', pain ca xuruxut pin xin cacain naran ne ca', pain ca an to pin xin cacain ca caracat nucucun ma' quem. Taramaxicon pe ho' taramaxicon pe ho' om pin ac cocon tara Caxicon Jam, taramaxicon pe ho' pin ac cocon tara Iri' Jam ma' quem. Howa iri tatarapa' ne, xic am pin ac tococwa tara pain ca caracat nucucun, aram aram mi' mi' ac tococwa tara pain oro ca param nucun Iri' Jam ca cut to xo' mi' xun tococwa pain oro wari' nucun co to' hohot pin ca ma'. Ac i ma' na ca tomi' capa' Jeju pane.

Romanos 8:1

Je ca tomi' xuhu' ca': Pain xocori ca' iri na ne, pain ca win cwere pin xun Cristo Jeju cwa', om ca em' hwe ta mami' capari' Iri' Jam. Om ca wap xim mami' capari'.

1 Coríntios 1:30

Ane mi' cuhu' pain ca win cwere pin hun Cristo Jeju Iri' Jam ne. Wirico Cristo Jeju co to' taxi' napari' pain ca coromicat xo' nucun Iri' Jam ma', pain ca to' hohot capari' ca', je pain ca wari' ne capari' ca', je pain ca to' witan capari' ca' quem.

1 Coríntios 12:13

Ac i ma' iri' pain ca curucun Cristo iri' quem. Mija paxi' iri'. Ma' nana co judeu nana. Ma' nana co om judeu nana. Ma' nana co taramaja mi' e' nonon oro xucucun wari'. Ma' nana co om taramaja mi' nonon oro xucucun wari'. Mija paxi' iri', ane cut corom to cut corom to xam' capari' pain curucun Cristo Tamataracon Iri' Jam ne. An xiho' nain ca ja' iri' com pane, pain ca cut corom to mi' capari' pain curucun Cristo. Ma' xica' pe na Tamataracon Iri' Jam ca cut corom to mi' napari' pain curucun Cristo, om na xijein. Pe ho' pe ho' xam' napari' quem.

1 Coríntios 6:11

Ma' paxi' nana win ma' nuhu' co ac i ma' nana pain cara pane. Ane hohoc pin cuhu' pain ca caracat nuhu' Iri' Jam ne. Iri' wari' ne pin inuhu' ta nuhu'. To' hohot pin nuhu'. Xi om ca Taramaxicon nexi' Jeju Cristo pain Tamataracon pahu'.

2 Coríntios 5:17

Je ca tomi' xuhu' ca'. Pain ca win cwere pin xun Cristo cwa', xocoricon wari' pin iri'. Om pin na wara cwerexi' ca xuruxut pan teretem pain cara pane. Ma' pin na xocori cwerexi' ca xuruxut xo' pin pain xocori ca' quem.

Gálatas 3:28

Pain ca win cwere pin xun ca', an xiho' pin xijexi', om ca querec jimama' ca' xijexi' con Iri' Jam. Warut pain ca judeu urut ca', wahu' pain ca om judeu hwe ma' quem, an an ari xijexi'. Co taramaja mi' e' nonon xucun wari' ma', co om taramaja mi' nonon xucun wari' ma' quem, an an ari xucucun. Ca tarama' nexi' ca', ca narima' nequequem oro narima' ma' quem, an an ari xijexi'. Ac ca xica' pe ne na ximixi' pain ca wari' nexi'. Xi om ne ca win cwere ara xun Cristo Jeju ta.

Efésios 1:1

Paulo ina pain ca xirao' mi' xuhu' ca'. Apóstolo ra napa' Cristo Jeju pane, pain ca tomi' hwet roron pain capija oro wari' capa' pane. Wirico Iri' Jam co param mi' napa' pain. Xirao' mi' inuhu' pain ca to hwein Éfeso ma', pain ca wari' nucun Iri' Jam hwe ma', je pain ca tomi' ha' hun Cristo Jeju pain ca howa hun ma'.

Efésios 1:7

To' witan ca' napari' pain ca caracat nexi' Cristo. Xi ao mao ara ne quicon pain ca mi' pin caho' capari' pane. Je ca xic am pin cain ca caracat nexi' Iri' Jam quem. Xiram pa' tamana e' napari' ta.

Efésios 2:10

Wirico ara xi' na Iri' Jam co to' xocoricon wari' pin napari' pain ca win cwere pin xun Cristo Jeju. Ma' ta ara hwein ca awi wa ca wara coromicat an pe mi' xuhu' pane napari' pain ca ara tatarain ta capari' pain cara pane.

Efésios 2:12

Mam' pe wet jein i ca': Om ca querec pin' hun Cristo pane. Om ca win ma' ne huhun oro wari' nein Israel co tora' ca Iri' Jam pane quem. Om ca taxi' hwein oro ca tomi' an pe xo' tococwa pain ca tomi' pe pin qui' cocon pain ca tomi' nucun Iri' Jam pane. Ximin hwe pain ca to ho' huhun oro caracat pain macan' ca' pane. Om ca main witan xi' camain' hwe pane ira. Om ca querec pin' camain' hun Iri' Jam pane.

Efésios 2:2

Pan teretem taxipa' hwe, je curuhu' pane. An xiho' e' huhun oro wari' co om howa nonon Iri' Jam. Tomi' ha' taxipa' hun Caxicon Jam co taramaxicon pe ho' nonon oro caxicon jam co taramaja mi' nonon pain nanawin ma'. Wirico Caxicon Jam co taramaja pe ho' nain ximicocon oro wari' co om tomi' ha' camain' nana cwa', wirico co tomi' ha' hwe pane.

Efésios 2:6

To' e' mami' wi napari' con Cristo Jeju Iri' Jam pane. Mi' ac capari' na pain ca xao to ho' xun pain pawin quem. Xi om ne ca win cwere ara hun Cristo Jeju napari'.

Hebreus 9:18

Je ca to' pa' mi' jun pain winahu' Iri' Jam ta tococwa oro hwanana pain ca wara tomi' xo' nucun pane quem. Om iri na ca ao ne quinain winacocon ne, om ca to' hwara' opa ac xine ca wara tomi' xo' nucun ta.

1Pedro 3:18

Xi jain jain ara ca Cristo pain ca mi' pin caho' capari' pain ca caracat nexi' pane ta. Pain ca mi' pin nucun pane, mi' pin na. Om ta mi' pin mami' ca. Om ca caracat camain' ca, xut xo' na, awi na. Ane mi' pin caho' pan capari' pain ca pan teretem nexi' pain ca om xuruxut xo' nexi' ne. Ma' ta o mi' xuhu' con Iri' Jam ta napari'. To' pa' pin iri ta pane ne, mi' pin ac ne na curucun. To' e' mami' iri ta ne, je Tamataracon Iri' Jam ac ne na ca to' e' mami' non quem.

Apocalipse 5:9

Com ac cacain na xocori tamara': Wum co awi tamana, wum co hohot pain ca an main tapari carawa ca joc top ma', je pain ca pa main oro ca hupa' caho' nein ma'. Xi om ne ca to' pa' pin ara xima pane ta. Cut mi' momon con Iri' Jam oro wari' co xucun wari' xucun wari' pi' pin nana ma', co capija ni ca' nonon oro xucucun wari' ma', co to ni ca' nonon oro xucucun wari' pain macaracocon ma', co to nanain oro xijein macan' ma' quem. Pain ca cut mi' momon con Iri' Jam ma', mam' to' witan momon pain cocum.