Efésios 2:11 - Tradução Bíblica Pacaas Novos

¹¹ Mam' pe wet jein i ca': Om paxi' na ca judeu hwe ma'. Om ca wari' nucun Iri' Jam hwe nunuhu' oro judeu ma'. Xi wac xirac hwein taparinain ca xirac nuhu' ta nunuhu'. Tomi' ca' nunuhu' quem: Warut pain ca judeu urut ca', wari' nucun Iri' Jam urut, xi om ne ca wac xirac ara urut pain taparixut ca' nunuhu'.

Efésios 2:11 Iomraidhean Croise

Mateus 20:7

Xi ma' ca wari' co taramaja je naparut ta ac cocon na. Je xi mo taramaja mama' hwein tota cain quem ac tococwa na. Mama' ac caca na quem.

Romanos 11:17

Panaji oliva ma', an xiho' naparut pain ca judeu urut ca', ac iri' panaji oliva urut. Ac ca jicaracat paric xine na taparaxut, maqui' ac hwe na pain ca om judeu hwe ma', pain ca an xiho' hwein taparain panaji caji oliva ma', an tan pan mi' ac xihwe na pain panaji iri' oliva ma', ca an xiho' naparut ma', jao jao ma' pin ac maparut na quem. Je ca tomi' xuhu' ca': Wahu' pain ca om judeu hwe ma', pain ca an xiho' hwein taparain caji oliva ma', jao jao ma' pin hwein oro iri' taparain panaji oliva. Jao jao ma' pin ac maparut na pain ca judeu urut ca'. Quep xiho' pin nuhu' Iri' Jam quem, xi om ne ca xiram pa' ara cuhu' ta. Win ne ca quep xiho' caparut pain ca judeu urut ca'. Ac ca e' wi maparut na, ac ca toc wi maparut na pain waraqui pana ca maqui' nein caximain ma'.

Romanos 2:26

Mo ta tomi' ha' cacain ca xirao' nucun Moisés oro co om judeu nana ma' quem, co om wac xirac wawa pain taparinain ca xirac nucucun ma' quem, hohot totoron Iri' Jam ta. Tomi' ca' totoron Iri' Jam, ac ca wac xirac xihwe na, xi om ne ca tomi' ha' ara hwein ca xirao' nucun Moisés ma', ac i ma' tara ca tomi' cocon.

Romanos 2:27

Noro ron wari' co om judeu ma', co om wac xirac wa pain taparinain ca xirac nucun ma'. Mo ta tomi' ha' cain ca xirao' nucun Moisés ma', to' querec pin' ac quem tara pain ca pan tem nem ma'. Xi tomi' ha' ma ta. Taxi' paxi' main ca xirao' nucun Moisés ma'. Wac xirac paxi' main taparinain ca xirac nem ma'. Ane om tomi' ha' ma ne.

1 Coríntios 12:2

Pain ca om howa querec nuhu' pane, ha' ximama' hun Caxicon Jam, ac ca joc wat cuhu' na pane, wara taxi' ara xi' hwein i ma' ta. Howa jein oro caji pacun ca Iri' Jam xi' ma hwe ma' iri nuhu' ne, howa ximama' ac hwein na oro caji pacun ca om e' ma', ca om capijain ma' quem.

1 Coríntios 6:11

Ma' paxi' nana win ma' nuhu' co ac i ma' nana pain cara pane. Ane hohoc pin cuhu' pain ca caracat nuhu' Iri' Jam ne. Iri' wari' ne pin inuhu' ta nuhu'. To' hohot pin nuhu'. Xi om ca Taramaxicon nexi' Jeju Cristo pain Tamataracon pahu'.

Gálatas 2:15

Tomi' tomi' tiquin' ac ton na: Judeu pan iri' pain ca wari' iri' ca', xi om ne ca judeu ara caca mana cotere' cacam waram xi' ta. Om ca an xiho' xuxun oro co om judeu nana ma', co om querec pin' nonon Iri' Jam ma'.

Gálatas 6:12

Oro wari' co wac xirac jein taparinain ca xirac nuhu' ta nunuhu' ma', xec xec e' nana. Querec pin' tataraparut oro win judeu urut pain ca tomi' ha' taxipa' urut pain oro ca xirao' nucun Moisés ta nana. Jin' nonon oro win ma' caca. Tomi' ca' nana: Mo ta pijim' e' xut pain ca mi' pin nucun Cristo ma', pain ca to' witan e' napari' ca mi' pin nucun ta urut ca', mo ta pijim' ac i ma' urut, quep em' ac cacaparut tara ta na ca coromicat pan teretem nucucun. Je ca wac xirac jein ta cucuhu'.

Efésios 2:2

Pan teretem taxipa' hwe, je curuhu' pane. An xiho' e' huhun oro wari' co om howa nonon Iri' Jam. Tomi' ha' taxipa' hun Caxicon Jam co taramaxicon pe ho' nonon oro caxicon jam co taramaja mi' nonon pain nanawin ma'. Wirico Caxicon Jam co taramaja pe ho' nain ximicocon oro wari' co om tomi' ha' camain' nana cwa', wirico co tomi' ha' hwe pane.

Efésios 5:8

To paxi' hwein ca jitacat nein pane, pain ca om querec pin' querec hun Iri' Jam pane. Ane to pin hwein xec pain xocori ca' ne. Xi om ne ca win cwere pin ara hun Taramaxicon nexi' ta. Je ca tomi' xuhu' ca': Xuruxut xo' je. Win caca oro wari' co to nanain xec ma'.

Filipenses 3:3

Xi iri' wari' nucun Iri' Jam pan caca ta. Wari' pan, pain ca howa xun Cristo cwa', wari' co iri' wari' ne ca Iri' Jam ta. Tamataracon pan ca mi' napari' pain ca in ac xun ca'. Tomi' querec te pan urun Cristo Jeju co to' wari' nucun Iri' Jam napari' quem. Om ca howa camain' xin carawa ca ara pan iri' ca', om na.

Colossenses 1:21

Wahu' ma', pain ca om howa querec hwe pane, to pira ca' hun Iri' Jam. Noc hun pane. Xi om ne ca pan teretem ara hwe pain ca coromicat nuhu', je pain ca xuruxut nuhu' pane ta.

Colossenses 2:11

Oro judeu ma', wac xirac xucucun pain taparinain ca xirac nucucun ma', ma' ta querec pin' cacapari' oro wari' pain ca wari' nucun Iri' Jam iri' ca' nana. Wahu' iri na ne, pain ca win cwere hun Cristo ma', je ca iri' wari' nucun Iri' Jam pin hwe quem. Om ca wari' ca co to' iri' wari' nucun Iri' Jam pin nuhu' ma', om na. Wirico Cristo co to' iri' wari' nucun Iri' Jam pin nuhu' ma'. To' jimama' pin nuhu', an ca' nuhu' pain wara curuhu' ca caracat taxipa' ma'.

Colossenses 2:13

Wahu' pain ca om judeu hwe ma', pain ca om an ca' querec xihwe pain wara curuhu' ca to' caracat nuhu' pane, ac ca cono' hwe na pain xumuhu' pane, xi om ne ca caracat taxipa' ara hwe ta. Ane to' e' cuhu' Iri' Jam ne. To' e' wi nuhu' con Cristo. Xic am xic am pi' pin nain oro ca caracat nexi' quem.

Colossenses 3:11

Pain ca to' xocoricon wari' pin capari' Iri' Jam cwa', om ca jimama' ca' xijexi' pain ca wari' nexi' ca'. Wahu' pain ca om judeu hwe ma', pain ca om wac xirac xihwe ma', warut quem, pain ca judeu urut ca', pain ca wac xirac urut pain taparinain ca xirac nuxut ca' quem, om ca jimama' ca' xijexi' pain ca to' xocoricon wari' pin capari' Iri' Jam cwa'. Oro wari', oro tatirim co capija ni ca' nonon oro xucucun wari' ma', oro co om to xo' nana pain ca to e' cacain mi ma' quem, oro co taramaja mi' e' nonon xucun wari' ma', oro co taramaja mi' pan xucucun ma' quem, om ca jimama' ca' xucucun. Ac wiricoco ac wiricoco ari nana, xi om ne ca to' xocoricon wari' pin ara tococwa ta. Wirico pan ara xi' na Cristo co iri' taramaxicon. Om na xucun co win hwara' opa ca. Wirico co win cwere win cwere pi' pin napari' pain ca howa xun ca' quem.