Efésios 1:6 - Tradução Bíblica Pacaas Novos

⁶ Je ta tomi' querec te xun pain ca quep xiho' tamana capari' ta. Xi xiram pa' pan ara capari' pain ca mi' e' capari' pain ca win cwere pin xun Cristo co om noc ca ma'.

Efésios 1:6 Iomraidhean Croise

Mateus 17:5

Tomi' tomi' wet na Pedro ma', hwet qui' ac ne na tajain nanawin ca toc meremem tamana. Tatep pa' ac tococwa na. Taraju ac cacain na ca tomi' wa ma', ca maqui' nain nanawin ma'. Mon cwa' panxita' co om noc camain' ta' cwa'. Hohot tamana napa' ta. Taraju wet jun ta na.

Mateus 20:9

Caram ma' co xo' taramaja nanain irawin ma', an xica' an xica' xam' ac cacain na denário.

Mateus 3:17

Tomi' pan ac con na Iri' Jam. Maqui' nain pawin ca tomi' nucun. Mon cwa' panxita' co om noc camain' ta' cwa'. Hohot tamana napa' ta na ca tomi' con ma'.

Lucas 2:14

Tomi' querec te tomi' querec te pi' pin nonon Iri' Jam oro co to nanain iri' pawin cain. Toron toron om pin tara ximicocon oro wari' co xiram pa' pan ca pain macan' ca' quem na ca tomi' caca ma'.

João 10:17

Om ca noc capa' Te. Xi nain ho' xije ta. Mi' pin caho' toton oro wari' ne ina. Ma' ta e' mami' ta' ina.

João 3:35

Iri' Jam ma', om ca noc con Panxica. Wum co iri' Taramaxicon ta non. Taramaxicon pe ho' rain oro carawa cocon oro wari' quem ta non.

Romanos 8:1

Je ca tomi' xuhu' ca': Pain xocori ca' iri na ne, pain ca win cwere pin xun Cristo Jeju cwa', om ca em' hwe ta mami' capari' Iri' Jam. Om ca wap xim mami' capari'.

2 Coríntios 4:15

Quereme urut pain oro ca jain jain wa pain ca pijim' urut pain capijacon Iri' Jam cwa'. Ma' ta quep xiho' xim urut pahu', ma' ta querec pin' tocwa Iri' Jam pain ca awi tamana nucun urut quem. Mija mija tiquin' iri tatara oro wari' co howa pin nonon ne, pain ca xiram pa' e' tococwa pain ca to' witan pin xun tococwa ma', tomi' querec te tamana ac cocon tara, an hwet pe ac cacain tara ca awi tamana nucun quem.

2 Coríntios 5:21

Om paxi' na ca caracat ca Cristo pane, ane cut mi' pan con pain ca caracat nexi' Iri' Jam ne. Ac wari' co caracat pin ma ta non pari'. Ma' ta to' hohot pin xuhu' ta napari'. Win cwere iri jun Cristo ne, querec hohot ac xuhu' tara, ac ca om caracat camain' hwe tara con ta napari' quem.

Efésios 1:12

Ma' ta tomi' hwet hwein ca awi tamana ne ta naparut pain ca howa cain' urut con Cristo pain ca winim' urut con ca'.

Efésios 1:14

Tamataracon ca pe ho' napari' pain ximixi' ca', je ca to' taxi' napari' pain ca aram aram mi' toton capari' pain ca tomi' pe mi' capari' Iri' Jam pain ca wari' ne capari' ca'. Je ca taxi' xun pain ca aram aram to' witan pin toton capari' ca' quem. Je ca na e' ne pain ca tomi' hwet xin ca awi tamana nucun ta.

Efésios 1:18

Tomi' mi' inuhu' con. Ma' ta mi' cuhu' pain ca taraju pa' wa pain iri' xumuhu' ma'. Ac ca toha mi' cuhu' tara pain ca coromicat nuhu'. Ma' ta querec pin' hwein oro ca howa iri' ca', ca mi' toton capari' pain ca xo' howa xine qui' capari' pain ca wari' ne capari' pane.

Efésios 2:7

Ac i ma' napari' Iri' Jam pane. Ma' ta querec pin' cara mahu' pain ca xiram pa' tamana xuhu' ca', pain ca mi' xuhu' pain ca win cwere pin hun Cristo Jeju ta napari'.

Filipenses 1:11

Ma' ta ara taxipa' cacain oro ca awi wa ta inon pahu'. Wirico tara Jeju Cristo co mi' nuhu' pain oro ca ara xo' wa ma'. Querec pin' ac tocwa tara Iri' Jam pahu', pain ca hwara' opa nucun, je pain ca awi tamana nucun quem.

Filipenses 3:9

Win cwere ton ta inon quem. Om na ca xirao' nucun Moisés ca to' hohot napa' con Iri' Jam ta, om na. Wirico Iri' Jam pan co to' hohot pin napa', xi om ne ca howa ara ton Cristo ta. Howa inon Cristo, je ca to' hohot pin capa' Iri' Jam.

Filipenses 4:19

Iri' Jam ne cwa', co taramaja mi' ta' cwa', mija tamana na oro caramaxicon. Je ca ha' con pain ca mi' mi' pi' pin xim cuhu' pain oro ca param nuhu' pain ca ximin nuhu' ma'. Xi om ne ca win cwere ara hun Cristo Jeju ta.

Colossenses 1:13

Xi wirico ara ca co to' witan ca' napari' con Caxicon Jam ma', co taramaxicon pe nain ca jitacat nein xim ma'. To' witan ca' napari' con, an to pin ac capari' na pain ca taramaxicon pe ca Panxica co om noc ca ma'.

1Pedro 2:5

An xiho' hwein pacun ca e' ma' quem. Ac ca mam' quep xihwe na pain xirim ca pe pan ne Tamataracon Iri' Jam. Ac ca taramaja to hwein na pain ca taramaja mi' hun ma' quem. Win caca oro sacerdote ma'. To' sacerdote nuhu' Iri' Jam. Tora' inuhu' pain ca taramaja mi' mahu' ta nuhu', in ac taxipa' xine, an hwet mi' xine pain ca tomi' querec te nuhu' ta nuhu'. Je ca hohot capa' ta nuhu'. Wirico Jeju Cristo co mi' nuhu' pain ca taramaja mi' ac i ma' hun ta.

1Pedro 2:9

Wahu' iri na ne, tora' nuhu' Iri' Jam pain ca wari' ne cuhu' ma'. Ac sacerdote nucun pin hwe pain ca taramaja mi' hun pain ca Iri' Taramaxicon ca ma'. Xica' pe na Iri' Jam co wari' ne nuhu'. Ma' ta tomi' hwet huhun oro wari' pain ca hwara' opa tamana ne ca', pain ca ara mi' toton pain oro ca awi wa ca' nuhu'. Wirico co hwerehwet ca' jein ca jitacat nein xim ta nuhu' pane, wirico co wixicam pin xine pain naran ne ca awi tamana ca' nuhu' pane quem.

1Pedro 4:11

Mo ta mi' cuhu' pain ca pijim' wa ma', pijim' xo' ac hwe tara. Xi capijacon Iri' Jam pan ara ne ca pijim' hwe ta. Mo ta mi' cuhu' pain ca quep xiho' hun win ma' nuhu' ma', mam' quep xiho' ac hun tara pain ca hwara' opa nucun Iri' Jam ca mi' taxipa' ca ma'. Ma' ta awi na Iri' Jam ta caca oro wari'. Wirico Jeju Cristo tara co mi' nonon pain ca tomi' ac i ma' caca ma'. Hohot na pain ca tomi' querec te xun pain ca awi tamana cara nucun. Na e' na pain ca tomi' querec te xun pain ca hwara' opa tamana cara nucun ma' quem. Amém, iri'o' na ca tomi' ne ta.