Efésios 1:19 - Tradução Bíblica Pacaas Novos

^19-20 Ma' ta querec pin' hwein ca hwara' opa tamana nucun ca taramaja pe ho' napari' pain ca howa xun ca' quem. Ca hwara' opa nucun ca', ca pe ho' napari' ca', je ca mam' to' e' pin con Cristo pane. Je ca mam' mi' con pain ca xao pe ho' pin con pain iri' curucun pain pawin cain.

Efésios 1:19 Iomraidhean Croise

João 3:6

Wari' co pan' qui' pain ca wanxi' con cote ca ma', panxica wari' e' na. Wari' co pan' qui' mami' pain ca meo cain ximicon Tamataracon Iri' Jam ma' iri na ne, panxica Iri' Jam na co ma'.

Atos 26:18

Ac ca to' querec pin momon tara pain tococon ma', ma' ta querec pin' cacapa'. Ac ca to' xuruxut ni ca' momon tara pain ca jitacat nein ma', pain ca xuruxut pin xin cacain naran ne ca', pain ca an to pin xin cacain ca caracat nucucun ma' quem. Taramaxicon pe ho' taramaxicon pe ho' om pin ac cocon tara Caxicon Jam, taramaxicon pe ho' pin ac cocon tara Iri' Jam ma' quem. Howa iri tatarapa' ne, xic am pin ac tococwa tara pain ca caracat nucucun, aram aram mi' mi' ac tococwa tara pain oro ca param nucun Iri' Jam ca cut to xo' mi' xun tococwa pain oro wari' nucun co to' hohot pin ca ma'. Ac i ma' na ca tomi' capa' Jeju pane.

Romanos 1:16

Xi wixipa' ta' pain capijacon Iri' Jam ca tomi' hwet napari' pain ca to' witan xim capari' Jeju ta. Om ca wixipa' ta' pain. Howa inain. Hwara' opa ara xi' na. Iri' ca hwara' opa nucun Iri' Jam ta. Je ca mam' to' witan pin tococwa oro wari' co howa nana. To' witan xuhu' cain' tata oro win judeu ta' cwa', to' witan xuhu' quem ac tococwa na oro win ma' hwe pain ca om judeu hwe ma' quem. To' witan to' witan xam' napari' pain ca howa iri' ca'. Mam' to' witan pin napari' pain capijacon ca tomi' hwet napari' con Jeju cwa'.

2 Coríntios 4:7

Je ca tomi' xuhu' ca'. Querec pin' paxi' urut pain ca hwara' opa nucun Iri' Jam cwa', ane om hwara' opa pan urut ne. Ac tapaxi' e' urut. Ac ca an ho' pe mi' caparut na pain carawa ca awi tamana ca', pain ca mi' caparut pain ca querec pin' urut con pain ca hwara' opa nucun. Ma' ta querec pin' xihwe pain ca om maqui' pan cuhu' ca hwara' opa tamana ne ta naparut. Ma' ta querec pin' cacapa' oro wari' pain ca maqui' pan capa' ca hwara' opa tamana ne pain ca taramaja mi' mahu' ta naparut quem.

2 Coríntios 5:17

Je ca tomi' xuhu' ca'. Pain ca win cwere pin xun Cristo cwa', xocoricon wari' pin iri'. Om pin na wara cwerexi' ca xuruxut pan teretem pain cara pane. Ma' pin na xocori cwerexi' ca xuruxut xo' pin pain xocori ca' quem.

Efésios 2:10

Wirico ara xi' na Iri' Jam co to' xocoricon wari' pin napari' pain ca win cwere pin xun Cristo Jeju. Ma' ta ara hwein ca awi wa ca wara coromicat an pe mi' xuhu' pane napari' pain ca ara tatarain ta capari' pain cara pane.

Efésios 3:20

Tomi' querec te xun Iri' Jam co hwara' opa tamana ta. Ha' ha' pi' pin non oro carawa. Ha' ha' tiquin' ca' nain ca param iri' ca' con. Ha' ha' tiquin' ca' cain ca coromicat iri' ca' quem. Win ne ca hwara' opa pe ho' capari' pain ximixi' ca'.

Efésios 3:7

Hwara' opa pe ho' napa' Iri' Jam pane, xi xiram pa' ara capa' pain ca mi' capa' pain ca taramaja ne ca', pain ca pijim' hwet roron pain capija con Panxita' oro wari' ta capa' pane.

Efésios 6:10

Tomi' xim inuhu' pain i ca' quem: Win cwere cara jun Taramaxicon nexi' ta, ma' ta to' hwara' opa cuhu' ca hwara' opa tamana nucun.

Filipenses 2:13

Xi om ne ca wirico Iri' Jam ara ca co mi' nuhu' pain ca tomi' ha' xixi' na wa ma', wirico co mi' nuhu' pain ca ara hwein iri' ca param nucun quem.

Filipenses 3:21

To' jimama' tarain oro cwerexi' ca om hwara' opa ca', ca cono' taxipa' ca'. An xiho' ac xin tara curucun ca awi tamana ma', ca om mi' pin camain' ma'. To' jimama' tarapari' pain iri' ca hwara' opa nucun. Ha' toron pain ca to' jimama' capari' quem, xi om ne ca to' jimama' xim ara capari' pain ca hwara' opa nucun ca mam' taramaxicon pe ho' tococwa oro wari' je oro carawa ta.

Colossenses 1:29

Je ca taramaja tamana ta' ca', mija na ca taramaja ta' ca'. Mam' taramaja inain ca hwara' opa nucun Cristo co pe ho' napa' cwa' quem.

Colossenses 2:12

Ja' iri xihwe pain com pane ne, ac ca cut corom to wi xihwe con na, ac ca e' mami' wi hwe con na quem. Xi om ne ca howa ara hun Iri' Jam pain ca hwara' opa nucun ma', pain ca ha' con pain ca to' e' mami' con Cristo pane.

1 Tessalonicenses 1:5

Xi pijim' mi' ara urut pahu' pain capijacon Iri' Jam ca tomi' hwet napari' pain ca to' witan xim capari' Cristo Jeju pane ta. Om ca capijacon wari' ne ca pijim' urut pahu' pane, om na. Quep xiho' naparut Tamataracon Iri' Jam pain ca pijim' hwara' opa urut pahu' pane. Iri'o' na ca pijim' nuxut pane quem, taxi' urut. Querec pin' maparut pain ca xuruxut nuxut pain ca to ho' urut pahu' pane quem, pain ca quep xiho' xim urut pahu' pane.

2 Tessalonicenses 1:11

Je ca tama' tomi' mi' urut pahu' con Cotere' Iri' Jam quem. Tomi' ca' urut con pahu': Quep xiho' roron, mi' roron pain ca hohot quequem pain ca xuruxut nucucun urut con pahu'. Win ne ca xuruxut xo' je momon pain ca xo' howa xine qui' momon pane urut con pahu'. Mam' quep xiho' roron pain ca hwara' opa tamana nem quem urut con pahu'. Ma' ta ara ara pi' pin cacain oro ca awi wa ca ara xi' caca pain ca howa cocon Jeju ta urut con pahu'.

Tiago 1:18

Mi' iri napari' pain ca howa xin capijacon ca iri'o' ca' ne, to' e' ac capari' na, mana panxita' pin ac capari' na quem. Maqui' nain ximicon, wirico co coromicat an pe mi' napari' pain. Tomi' ca' napari': Tomi' querec te paxi' inain oro carawa ca tomi' ma' ta' ca', ane tomi' querec te tamana pan xuhu' pain ca wari' ne xuhu' ca' ne napari'.

1Pedro 4:11

Mo ta mi' cuhu' pain ca pijim' wa ma', pijim' xo' ac hwe tara. Xi capijacon Iri' Jam pan ara ne ca pijim' hwe ta. Mo ta mi' cuhu' pain ca quep xiho' hun win ma' nuhu' ma', mam' quep xiho' ac hun tara pain ca hwara' opa nucun Iri' Jam ca mi' taxipa' ca ma'. Ma' ta awi na Iri' Jam ta caca oro wari'. Wirico Jeju Cristo tara co mi' nonon pain ca tomi' ac i ma' caca ma'. Hohot na pain ca tomi' querec te xun pain ca awi tamana cara nucun. Na e' na pain ca tomi' querec te xun pain ca hwara' opa tamana cara nucun ma' quem. Amém, iri'o' na ca tomi' ne ta.