Efésios 1:17 - Tradução Bíblica Pacaas Novos

¹⁷ Tomi' inon Cotere' co awi tamana ma', pain ca om caracat nucun pain ca hwara' opa tamana nucun ma', co Iri' Jam ne ca Taramaxicon nexi' Jeju Cristo. Tomi' mi' ac i ca' inuhu' con: Mi' roron pain ca taxi' wa, mi' roron pain ca taraju pa' wa quem, mam' mi' roron pain Tamataram, ma' ta querec pin' quequem pain iri' xumum, ac i ma' na ca tomi' mi' xuhu' con.

Efésios 1:17 Iomraidhean Croise

Mateus 11:25

Tomi' ac con na Iri' Jam Jeju: Tomi' querec te inem ta Te. Wum co Taramaxicon pe nain pawin je macan' ca'. Tomi' querec te inem pain ca tora' momon oro wari' co om xec xec nana cwa', co an xiho' nonon oro hwijima' pain ca om xec xec nucucun ca'. An hwet mi' momon pain oro ca joc xim ma cocon oro wari' co taxi' urut xi' ma nana ma'.

Mateus 11:27

Wirico Te co mi' napa' pain ca hwara' opa tiquin' ca' toton oro wari' ta ac tococwa na. Mi' napa' pain ca querec pin' tain oro ca coromicat nucun quem. Oro ca param nucun, oro ca ara nucun quem, taxi' taxi' pi' pin inain con. Querec pin' napa' pain ca Panxita' capa' ca' quem. Om na xucun wari' co querec pin' nain oro ca coromicat ne. Xica' pe na Te co querec pin' nain oro ca coromicat ne. Wata' iri na ne, pain ca Te ton ca', querec pin' inon quem. Oro wari' co an hwet mi' ta' con, querec pin' nonon quem na ca tomi' tococwa ma'.

Mateus 16:17

Param mi' nem pain ca awi wa Iri' Jam ta Simão panxica João ac con na Jeju. Xi wari' ca co an hwet mi' nem pain ca tomi' nem ma', pain ca Cristo ma ta mapa' ma', pain ca Panxica Iri' Jam ma ta mapa' ma'. Te ma', co pe pawin cain, wirico co an hwet mi' nem pain ca tomi' nem.

Mateus 20:33

Om na, querec xixi' na urut ta Taramaxicon ac cocon na.

Mateus 6:13

Narain ho' xut pain ca tomi' querec caparut Caxicon Jam quem. To' witan ca' xut con quem. Wum pan ara xi' na co Iri' Taramaxicon cara ma'. Tama' hwara' opa cara ma quem. Tama' awi tamana na ta cara nenem oro wari' cwa' quem. Amém, iri'o' na ca tomi' ne ta. Ac i ma' je pain ca tomi' xun hun Iri' Jam ta na ca tomi' tococwa ma'.

Lucas 12:12

Xi ma' ara ne Tamataracon Iri' Jam ca quep xiho' xim nuhu' ta. Coco' quima hwet xun iri jujun pain ca tomi' querec xim cucuhu' ne, mi' ac cuhu' tara pain ca tomi' wa. Ca' tara ca tomi' huhun ta turuhu' ta na ca tomi' tococwa ma'.

Lucas 2:14

Tomi' querec te tomi' querec te pi' pin nonon Iri' Jam oro co to nanain iri' pawin cain. Toron toron om pin tara ximicocon oro wari' co xiram pa' pan ca pain macan' ca' quem na ca tomi' caca ma'.

Lucas 21:15

Xi wata' pan ara ne co tomi' xim nuhu' pain ca tomi' xo' wa pain ca tomi' querec xim cucuhu' co noc nunuhu' ta. Om ta tomi' in pin ac cucuhu'. Hehe e' tatara pahu'.

João 14:17

Mam' turuhu' pain Tamataracon. Je tara Tamataracon ca an hwet mi' nuhu' pain oro ca iri'o' wa con Te Iri' Jam. Om ca mi' ac tococwa pain Tamataracon Te oro wari' co om howa nanapa' ma'. Xi querec cacain ta. Om ca querec pin' camain' cacain. Wahu' iri na ne, querec pin' hwein. Xi om ne ca pe ho' ara cuhu' ta. Win cwere turuhu' quem.

João 14:26

Ane maqui' ta' ne Tamataracon Te ca quep xiho' xim nuhu' ne, ame hwe e'. Wirico Te tara co mam' xim nuhu' pain. Pe rain maxicon Panxita' ta tarain. Ma, maqui' ac ne tara, tomi' xo' tomi' xo' pi' pin ac cuhu' tara pain oro ca iri'o' wa con Te Iri' Jam. Mam' pe wet ac cuhu' tara pain oro ca tomi' xuhu' ca' quem.

João 16:3

Ara ac i ma' tuturuhu', xi querec pin' cocon Te Iri' Jam ta. Om ca querec pin' cacapa' quem.

João 17:3

Oro wari' co e' cara xi' nana ma', na e' na pain ca querec pin' quequem pain ca Iri' Jam iri'o' ma ma'. Om na win Iri' Jam ma ta teterem. Xica' pe ma ta teterem. Na e' na pain ca querec pin' cacapa' pain ca Jeju Cristo ta' ca' quem, pain ca hwet roron oro wari' pain macan' ta mapa' quem.

João 20:17

Ta quep mapa' me ta Maria ac cam na. Xi hwet querec ton Te ta. Mo hwet roron xere ma', co taxipa' ta' ma'. Tomi' ca' roron: Piri' hwet ton Te co Iri' Jam ne ta' ca', co Iri' Jam ne hwe ma' quem nuhu'. Wirico co Te ta' ca' quem, co Te hwe ma' quem nuhu', ac i ma' na ca tomi' cuhu' ta roron na ca tomi' cam ma'.

Atos 6:10

Ane quep xiho' con Estêvão Tamataracon Iri' Jam ne. Mi' hwara' non pain ca tomi' taxi' wa. Tomi' in pin xun paxi' nonon caram ma' co noc nonon ma'. Ane om ha' cocon ne. Hehe e' nana con.

Atos 7:2

Tomi' ac ca na Estêvão: Taraju wet xine me xere cocon oro taramaxicon ma'. Iri' Jam co howa iri' cwa', co in ac iri' pain ca hwara' opa tamana nucun ma', hwet pa' non hwanana nexi' Abraão cara pane, pain ca pe pe wet cain macaracon pain Mesopotâmia pane, pain ca om mao querec cain xijein cidade pain Harã pane. Tomi' ac con na:

Romanos 1:28

An to pin xun Iri' Jam, om ta mam' pe wet mami' xun ta nana. Je ca pin caca ma' ne tococwa pane. Wirico Iri' Jam pan na co pin caca ma' ne nonon pane. Coromicat pan teretem cara je ta ac tococwa na. Ara cara jein oro ca om awi wa ta ac tococwa na quem.

Romanos 15:6

Ma' ta awi na Iri' Jam awi na Iri' Jam pi' pin hwe ta inuhu'. Ac ca xica' pe ne tara capijahu' pain ca tomi' hwet hwein ca awi nucun. Awi na Iri' Jam ta, awi na Cote ca Taramaxicon nexi' Jeju Cristo ta, ac i ma' tara ca tomi' nuhu' ta.

1 Coríntios 12:8

Ma' nana co mi' wawa pain ca tomi' hwet taxi' cacain xocori ca coromicat nucun Iri' Jam ma'. Je Tamataracon ca mi' pan nain i ma'. Ma' nana xucucun co mi' wawa pain ca tomi' xo' taxi' cacain xocori capijacon ca taraju pa' je capari' ma' quem. Je Tamataracon ca mi' nain i ma' quem, om na xijein ca mi' nain.

1 Coríntios 14:6

Je ca tomi' xuhu' ca' xere: Mo ta hwet xuhu', mo ta tomi' e' xuhu' pain xijein ca capija wa ca om taraju pa' hwe ma', ha' tarapa' pain ca quep xiho' xuhu' ra? Om na, om ca quep xiho' xuhu'. Quep xiho' e' xuxuhu' pain ca tomi' hwet xo' xuhu' pain ca tomi' capa' Iri' Jam. Quep xiho' e' xuxuhu' pain ca tomi' hwet xo' xuhu' pain ca taraju pa' ne ca'. Quep xiho' e' xuxuhu' pain ca pijim' hwet xo' xuhu' pain ca ca' na xuhu' pain capijacon quem.

1 Coríntios 2:10

Ane an hwet mi' capari' pain ca wara coromicat xo' nucun Iri' Jam ne. Je Tamataracon ca an hwet mi' napari' pain. Xi taxi' taxi' xam' pan ara cain oro ca coromicat nucun ta. Taxi' taxi' xam' pan nain oro ca wara coromicat nucun ca joc xim ca pane quem.

1 Coríntios 2:8

Om ca taraju pa' caca oro taramaxicon co om howa nana cwa', om ca ma' camain' ca taramaxicon co taraju pa' nain ca coromicat nucun Iri' Jam. Mo xi taraju pa' cacain, om xi tatatain mi' qui' cocon pain pana Taramaxicon nexi' co awi tamana pain ca om caracat nucun pain ca hwara' opa tamana nucun.

2 Coríntios 12:1

Na e' na pain ca tomi' cara xuhu' pain ca ac ca tomi' xec xec xuhu' ne pain carawa ca ara napa' pane. Om paxi' na ca quep xiho' pan xuhu' pain, ane tomi' hwet xim xuhu' con wari' co tohwein' pane ne. Wirico Taramaxicon nexi' co ara mi' non pain, an hwet mi' ac con na pain carawa ca querec pin' ra con pane. Ac ca tohwein' ca na pain ca tomi' tocwa pane.

Efésios 1:3

Tomi' querec te xun Iri' Jam co Te ca Taramaxicon nexi' Jeju Cristo. Ja' tomi' querec te napari' pain iri' ximixi' ca' quem. Xi mi' mi' pi' pin ara capari' pain oro caramaxicon ca awi ca to pawin cain. Win cwere ara xi' urun Cristo.

Efésios 3:5

Om ca mi' tococwa pain ca taraju pa' wa oro hwanana cara pane. Pain xocori ca' iri na ne, mi' ac tococwa na pain ca taraju pa' wa oro apóstolo nucun cocon oro profeta nucun cwa'. Je Tamataracon Iri' Jam ca mi' nonon pain.

Efésios 4:13

Mo ta pijim' ac i ma' cacapari', horon horon tiquin' pi' pin ac iri' tara, horon horon tiquin' pi' pin ac iri' tara, win ma' ne pin ac xijexi' tara pain ca howa wi xun Panxica Iri' Jam pain ca querec pin' wi pin xun quem. Ximicon hwanana ac iri' tara, an xiho' pin ac xun tara Cristo pain ca awi tamana nucun quem.

Filipenses 3:15

Je ca tomi' xuhu' ca'. Wari' pain ca ximicon hwanana iri' con Cristo cwa', coromicat ac i ma' coromicat ac i ma' xam' ac iri' tara ta. Tara pahu' pain ca coromicat jimama' hwe ma'. Mo ta coromicat jimama' hwe, main mi' turuhu' pain ca coromicat xo' wa Iri' Jam quem.

2 Timóteo 2:25

Na e' na pain ca hu wixite xuxun co tomi' in pin nanapari'. Am mi' ton cocon pain ca cwirin' wa Iri' Jam ma'. Am mi' ton cocon pain ca taraju pa' wa capijacon ca iri'o' ma' quem.

Tito 1:1

Paulo ina pain ca xirao' mi' xim ca'. Wari' nucun Iri' Jam ina pain ca taramaja mi' e' ton ca'. Apóstolo ra napa' Jeju Cristo quem, pain ca tomi' hwet roron pain capija oro wari' ta capa' pane. Quep xiho' roron oro wari' co tora' ta' cwa' napa' pane. Ma' ta howa xo' cacapa' ta napa' cocon. Ma' ta taraju pa' cacain capija ca iri'o' ca', ca ca' na nonon pain ca xuruxut xo' taxi' wa pain ca win xumu e' cacain ca param ne ta napa'.

Tiago 2:1

Je ca tomi' xuhu' ca' xere. Wahu' pain ca howa hun Taramaxicon nexi' Jeju Cristo co awi tamana ma', pain ca om caracat nucun pain ca hwara' opa tamana nucun ma', om ca ha' ne pain ca tomi' querec te paxica' huhun oro wari' ta.

2 Pedro 1:3

Quep xiho' tamana napari' Iri' Jam, xi om ne ca hwara' opa ara ca pain ca mi' mi' pi' pin capari' pain oro ca to' xuruxut xo' napari' pain ca win xumu e' xin ca param nucun. Ha' napari' pain ca xuruxut xo' wa quem, xi mi' ara capari' pain ca querec pin' xo' xun Jeju Cristo. Wirico co wari' ne napari', ma' ta jao jao ma' mahu' pain ca hwara' opa ne ca', je pain ca awi tamana ne ca' quem napari'.

2 Pedro 3:18

Xuruxut xo' xuruxut xo' tiquin' e' je, ma' ta querec pin' hun Taramaxicon nexi' Jeju Cristo co to' witan napari' cwa', co xiram pa' e' napari' cwa'. Tomi' hwet xin ca awi nucun pain xocori ca', tomi' hwet cara xin ca awi nucun pain oro xec ca maqui' ta' ma' quem. Amém, iri'o' na ca tomi' ne ta. Je i ca' ca xirao' ne ca'.

Apocalipse 7:12

Tomi' ac caca na: Amém, iri'o' na ca tomi' urut pum ca'. Wum co Iri' Jam ne urut cwa'. In ac cara xim urut pum. Tomi' hwet cara xim urut pain ca awi tamana nem. Querec pin' cara xim urut pum pain ca taxi' tamana ma ma'. Tomi' querec te cara xim urut pum pain oro ca ara mi' maparut ca'. Querec pin' cara xim urut pum pain ca awi tamana nem ma', je pain ca Iri' Taramaxicon ma ma', je pain ca hwara' opa tamana ma ma' quem. Amém, iri'o' na ca tomi' urut pum ca'! Ac i ma' na ca tomi' caca ma'.