Efésios 1:10 - Tradução Bíblica Pacaas Novos

¹⁰ Ca' na ca param nucun ca om an hwet querec ca ira: Maqui' iri tara xec nein ca wara an pe xo' ta' ne, cut in xo' cut in xo' pi' pin ac toton tara oro wari' co to nanain pawin je macan' ma', querec joc mam' mi' ac toton tara con Cristo, taramaxicon pe ho' pan ac cocon tara quem. Ac i ma' tain oro carawa quem, cut in xo' pi' pin tain, querec joc mam' mi' ac tain tara con Cristo, taramaxicon pe ho' pan ac cain tara quem.

Efésios 1:10 Iomraidhean Croise

Mateus 25:32

Tomi' cut in ac tococwa tara oro wari' pain oro xijein macan'. Coco' quima hwet ac cacapa' tara, cut to ni ac toton tara co xuruxut xo' nana, cut to ni ac toton tara co om xuruxut xo' nana quem. Win ca wari' co querec wet taxipa' nain ovelha ma', co cut to ni ca' nain ovelha nucun pain bode nucun ma'.

Marcos 1:15

Ca' na ca pijim' nucun pane: Wixicam pin na xec nein ca taramaxicon pe ho' xim capari' Iri' Jam ta na. Cwirin' je, howa jein capijacon ca tomi' hwet nuhu' pain ca to' witan xim cuhu' ta na ca pijim' nucun pane.

1 Coríntios 10:11

Je ca tomi' xuhu' pain oro ca ara nonon hwanana pane. Para ara cocon quem? Om na, ma' ta ma' ne xumuhu' ta napari' Iri' Jam. Wap ac i ma' inonon oro wari' co om tomi' ha' nanapa' ta napari'. Xirao' jein ta ac tococwa na oro co xirao' pe nanain capijacon quem. Hu napari' pain. Wixicam pin ara xi' na ca pi' pin ta' ne macan' pain oro xec nexi' ca'.

1 Coríntios 11:3

Tomi' querec te paxi' inuhu' pain, ane ma' ma' wet ne i ca' ca taraju pa' je xuhu' ca' ne. Ca' na: Wirico Cristo co taramaxicon pe ho' non tarama' ma', taramaxicon pe ho' taramaxicon pe ho' xam' tata pain ca tarama' nucucun. Wirico tarama' co taramaxicon pe ho' nam narima' ma'. Wirico Iri' Jam co taramaxicon pe ho' non Cristo ma' quem.

Gálatas 4:4

Ane maqui' pa' capari' iri' xec nein ca coromicat an pe xo' ca Iri' Jam ne, pain ca mam' xim xuhu' con Panxita' cwa' capari' pane. Hwet roron oro wari' pain macan' ta non pari'. Wari' pin na, wari' na jicon co wijima non. Judeu na quem, tomi' ha' taxipa' nain ca xirao' nucun Moisés pane.

Efésios 1:22

Wirico Iri' Jam co taramaxicon pe ho' roron oro wari' ta non Cristo. Oro wari', pi' pin nana, oro carawa quem, taramaxicon pe ho' taramaxicon pe ho' pi' pin roron ta non quem. Taramaxicon pe ho' roron co howa nenem quem non pari'. Ac winacocon ra ta non Cristo pari' pain ca howa xun ca'.

Efésios 2:15

Mi' pin iri na Cristo ne, to' om pin ac cain na ca hwara' opa nein ca xirao' nucun Moisés pain oro ca tomi' ha' je nucun. Ma' ta xucun wari' xucun wari' om pin hwe ta napari'. Win ma' ne pin xijexi' con. Mi' napari' pain ca nari pin xijexi' pain ca win cwere pin xun quem. Ac i ma' na ca to' om pin cain ca noc xijexi' pane.

Efésios 3:15

Te Te pi' pin urun pain ca to to wet xin macan' ca', te te pi' pin nonon oro co to pin nanain pawin ma' quem.

Efésios 3:2

Om ca taxi' mahu' pain ca mi' capa' pain ca taramaja wa Iri' Jam cwa' ra, pain ca pijim' hwet roron pain ca xiram pa' tamana toton oro wari' co om judeu nana ta napa' pahu' ra? Taxi' mahu' pain ca tomi' ac i ma' capa' ca' ira.

Colossenses 1:16

Xi om ne ca wirico ara ca co win mu pan ca Iri' Jam pain ca tomi' ma' tomi' ma' pi' pin cain oro carawa pane. Win mu non Cristo Iri' Jam pain ca tomi' ma' pin cain oro carawa ca to nain pawin ma', ca to nain macan' ca' quem, oro ca querec iri', oro ca om querec iri' quem, win mu non Cristo Iri' Jam pain ca tomi' ma' pin cain pane. Win mu non pain ca tomi' ma' pin cain oro carawa, oro wari' cocon oro jam ma' quem, oro co taramaxicon to nanain pawin ma', co hwara' opa nana ma', win mu non Cristo pain ca tomi' ma' tomi' ma' pi' pin tococwa pane. Ma' ta querec pin' xim pain ca awi tamana nem ta non.

Colossenses 1:20

Ao mao tara cocum pain ca mi' pin pe main pana, ma' ta in hwet in hwet pi' pin cacapa' oro wari', je oro carawa quem, in hwet in hwet pi' pin tatarapa' oro co to nanain macan' je pawin ta. Tomi' querec te mami' tatarapa', taxipa' taxipa' pi' pin ac cacapa' tara quem. Ac i ma' na ca tomi' con Cristo Iri' Jam ma'.

Colossenses 3:11

Pain ca to' xocoricon wari' pin capari' Iri' Jam cwa', om ca jimama' ca' xijexi' pain ca wari' nexi' ca'. Wahu' pain ca om judeu hwe ma', pain ca om wac xirac xihwe ma', warut quem, pain ca judeu urut ca', pain ca wac xirac urut pain taparinain ca xirac nuxut ca' quem, om ca jimama' ca' xijexi' pain ca to' xocoricon wari' pin capari' Iri' Jam cwa'. Oro wari', oro tatirim co capija ni ca' nonon oro xucucun wari' ma', oro co om to xo' nana pain ca to e' cacain mi ma' quem, oro co taramaja mi' e' nonon xucun wari' ma', oro co taramaja mi' pan xucucun ma' quem, om ca jimama' ca' xucucun. Ac wiricoco ac wiricoco ari nana, xi om ne ca to' xocoricon wari' pin ara tococwa ta. Wirico pan ara xi' na Cristo co iri' taramaxicon. Om na xucun co win hwara' opa ca. Wirico co win cwere win cwere pi' pin napari' pain ca howa xun ca' quem.

Hebreus 1:2

Pain xocori ca' iri na ne, pain ca tomi' xim capari' ca', wirico Panxica co tomi' hwet roron pain capija ta ca quem. Wirico Panxica co tora' ca pain ca mene rain oro carawa ta con pane quem. Wirico Panxica co win mu ca pain ca to' ma' qui' cain macan' je pawin, je oro caramajinain ca' quem.

Hebreus 11:40

Xi ma' ara ne ca coromicat xo' mi' capari' cocon ta. Awi tiquin' ca' nain ca wara coromicat xo' mi' tococwa oro hwanana cara pane. Ca' na ca coromicat xo' nucun pari': Om ta ara mi' ho' toton pain ca wara tomi' pe ne ca' napari'. Winim' xuhu' pain ca aram aram howa xim mahu', to' hohot wi ac xuhu' cocon tara ta napari'.

Hebreus 9:10

Oro ca ara caca pain ca in ac cocon Iri' Jam ma', ara taxipa' e' nanain ca hu pan tococwa pain carawa ca cao' wa, je pain ca toc wa quem, je pain ca hohoc xo' xucucun quem. Tomi' ha' je e' tata, tomi' ha' tomi' ha' maqui' pa' ac cuhu' tara xec nein ca to' xocori pin tain cain oro ca tomi' xo' xim xuhu' ta nonon ma'.

1Pedro 1:20

Wara tora' paxi' non Cristo Iri' Jam pain cara pane, pain ca om tomi' ma' querec qui' cain macan' pane. Ane an hwet e' con pain xocori ca' ne. Ma' ta to' witan pin cuhu' ta nuhu'.

Apocalipse 5:9

Com ac cacain na xocori tamara': Wum co awi tamana, wum co hohot pain ca an main tapari carawa ca joc top ma', je pain ca pa main oro ca hupa' caho' nein ma'. Xi om ne ca to' pa' pin ara xima pane ta. Cut mi' momon con Iri' Jam oro wari' co xucun wari' xucun wari' pi' pin nana ma', co capija ni ca' nonon oro xucucun wari' ma', co to ni ca' nonon oro xucucun wari' pain macaracocon ma', co to nanain oro xijein macan' ma' quem. Pain ca cut mi' momon con Iri' Jam ma', mam' to' witan momon pain cocum.