Xi maqui' ara nein ca xumu wa oro carawa ca to' em' nain ca wari' wa ta. Mo na: Ca coromicat pan teretem wa ma', ca to' pa' wa wari' ma', ca quep tacacama oro manacocon oro wari' ma', je pain ca quep ne cocon xucun tarama' oro narima' ma' quem, oro ca caracat wa pain ca quep ximama' wa ma', ca cut noc xa wa carawa ma', ca tomi' mixein wa ma', ca tomi' napat wa ma' quem.
Apocalipse 9:21 - Tradução Bíblica Pacaas Novos21 Om ca cwirin' cacain oro ca ara caca ma', pain ca to' parapa' cocon oro wari', je pain ca ara xirac cocon, je pain oro ca quep ximama' xucucun, je pain ca an noc xa cacain caramaxicocon oro win ma' caca quem. Om ca cwirin' camain' caca ta. Faic an caibideil |
Apocalipse 9:21
24 Iomraidhean Croise
Toron napa' xumu pahu'. Mo ta aram aram in hwet xuhu', am to' wixipa' capa' Iri' Jam pahu'. Am tomi' xaxa' ta', am aca ta' cocon oro win ma' nuhu' co caracat nana pane, co om cwirin' querec nanain oro ca quep ximama' nucucun, je pain ca tamanain to nucucun pain ca win xumu cacain oro ca om awi wa ma' quem.
Pe torotop mi' querec te nanain oro caji pacun ca Iri' Jam xi' ma caca ma'. Ara xirac nonon oro wari'. Noc nonon oro win ma' caca, mana' ximama' nonon. Narain ho' xucucun pain oro caramaxicocon. Hwerehwet na mixitacocon. Joc in pin nonon oro win ma' caca pain ca wata' co taramaxicon ta caca. Ja' teretem nonon oro win ma' caca pain ca to' coromicat ni cocon. Tomi' querec te e' nonon oro win ma' caca co xin ne nonon.
Mi' ta pain ca mixita cocon oro wari' nucun Iri' Jam, mi' ta pain ca to' quiji' pin cocon quem. Mi' ta pain ca taramaxicon pe ho' cocon oro co xucun wari' xucun wari' pi' pin nana ma', cocon oro co to ni ca' nonon oro xucucun wari' pain macaracocon ma', cocon oro co capija ni ca' nonon ma', cocon oro co to nanain oro xijein macan' ma' quem.
Mao iri na jam co taramaja mi' non Iri' Jam ne, co maqui' cain' ma', maqui' ac ca na xucun jam co taramaja mi' non Iri' Jam. Ma' 2 pin nana. Tomi' ac ca na: Om pin na cidade pain Babilônia, om pin na Babilônia co hwara' opa tamana nana oro wari' nein ma'. Tomi' joc mam' mi' nam caxicam narima' co param ni ca' non taxicam ma'. Ac ca caracat wi xijexi' ta tococwa na oro xucucun wari' co to nanain oro xijein macan' ma', ac ca toc jein ta tococwa na pain comi uva ca mana' ma', ca an xiho' nain ca param ximama' xine oro ca om awi wa. Ac i ma' na ca tomi' ca ma'.
Caracat wi xi' ta nonon oro taramaxicon co taramaxicon to nanain oro xijein macan', win ne ca param ni ca' ton taxi cwa', param ni ca' jun Iri' Jam ta nonon. Oro wari' co to nanain oro xijein macan' ma' quem, ac ca toc tamanain to cacain na comi uva nequem ca mana' ma', ca tomi' joc mam' mi' nain oro ca om awi wa ca ara cama pain ca caracat wi cocon oro xucucun taramaxicon.
Caxicam narima' ma', pe non wom co tum ma', co paca' ma' quem. Mija na dinheiro nucun womicam. An warawa pan xequem pain oro xijein too ca mam' xec xec cama ma' quem, je ouro, je oro pacun ca awi tamana, je oro xijein wijimain pacun ma' quem, pérola na wixinain. An na pain micam ouro ca moin' pe nain oro ca om awi ma', ca noc tamana pan ca Iri' Jam. Moin' pe nain oro ca pan tem tamana nequem pain ca param ni ca' con Iri' Jam ma'.
Xirao' pe na pain jitaracam wixicam quem. Ma' na ca tomi' mao ne wixicam, i'ina na ca taraju pa' xine ca tomi' mao nein. Ca' na ca xirao' pe nein wixicam: Babilônia cwa', co hwara' opa tamana nana oro wari' nequem cwa', ac ca wijima cacam na oro caxicam narima' co param ni ca' nonon waram taxicacam ma'. Ca' na nanam pain oro ca pan teretem wa ca noc pan ca Iri' Jam. Je i ma' ca tomi' mao nein wixicam ca xirao' pe xine pain jitaracam.
Xi ara em' pin ara tococwa oro wari' co to nanain oro xijein macan' ta. Ac ca toc jein ta tococwa na pain comi uva ca mana' ma', ca tomi' joc mam' mi' nain oro ca param ximama' cama caxicam narima' ma'. Ac ca caracat wi xi' ta tococwa na oro xucucun taramaxicon co taramaxicon to nanain oro xijein macan' ma', pain ca param ni ca' xun Iri' Jam ta tococwa ma'. Oro wari' co maqui' nanain oro xijein macan' ma', co vender taxipa' nanain oro carawa ma', caramaju tamana pin nana, xi om ne ca param ximama' ara cacain oro carawa ca awi oro wari' nein Babilônia ta. Ac i ma' na ca tomi' mip capa' jam co taramaja mi' non Iri' Jam ma', co quiji' qui' nain pawin ma'.
Xi om ne ca iri'o' taxipa' ara ca ta. Ara xo' taxipa' na pain ca wap tococwa oro caracat co to nanain Babilônia ma', co hwara' opa tamana paxi' nana ma', co ara em' pin nonon co to nanain oro xijein macan' ma', pain ca an xiho' xut ta tococwa pain ca param ni ca' cocon Iri' Jam pane. Wap pin nonon Iri' Jam, wahu' pan co em' nana ta nonon, xi om ne ca to' parapa' pin ara tococwa oro wari' ne co taramaja mi' nanapa' ta nonon. Ac i ma' na ca merem mip caca co tomi' querec te xucucun pain pawin ma'.
Ac i ma' paxi' toton oro co hwara' opa cara nana pain ca howa nucucun ma', ane om ac i ma' toton oro xucucun co caracat cara nana ne. Mo nana: Co jin' nanain ca quep em' wa pain ca howa nucucun ma', co om howa je ha' nana ma', co ara taxipa' nanain oro ca om querec awi non Iri' Jam ma', co to' parapa' pin nonon wari' ma', co quep ximama' xequequem ma', co ara xirac nonon oro wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co tomi' mixein nana ma' quem, wixicaracao' mi' ac tococwa tara pain iri' maxicocon ma', je pain cote ne xe ca ac xuterem' ma', ca wiran wi nain pacun ca weo tamana ma', ca enxofre caca oro wari' ma'. Cote ne xe ma', tomi' joc mam' mi' nain ca cono' mami' wa pain ca to ni cara ca' xun cocon Iri' Jam ta.
Om ta corom ac caca oro caracat co ac caxicon oromijac. Mo nana: Co ara xirac nonon oro wari' ma', co quep ximama' xequequem ma', co to' parapa' pin nonon wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co hohot nonon ca tomi' mixein wa ma', co tomi' mixein taxipa' nana ma' quem. Oro wari' co ara nanain i ma', om ta corom ac cacain cidade nucun Iri' Jam.
Oro xucucun wari' co om to' parapa' wawa pain oro ca xirac wa ma', witan ca' paxi' nanain, ane om cwirin' pin cacain oro ca pan teretem nucucun ne. Om ca pe torotop mi' querec te maho' cocon oro caxicon jam, om ca pe torotop mi' querec te maho' cacain oro ca Iri' Jam xi' ma caca ma' quem, ca mam' quep pan caca pain ouro je bronze je pana je pacun ma' quem. Om paxi' na ca querec ac ne, om paxi' na ca taraju ac ne, om paxi' na ca xuruxut ac ne quem, ane pe torotop mi' querec te cara cacain ne.
Sanasan