Apocalipse 7:2 - Tradução Bíblica Pacaas Novos

² Querec ac ton na xucun jam co taramaja mi' non Iri' Jam. Piri' ca' nain ca maqui' ac ca xina. An nain ca mam' xirao' nucun Iri' Jam co e' cara. Merem mip ac ca na, merem mip tata oro jam co taramaja mi' nonon Iri' Jam ma', co ma' 4 nana ma', co to' em' jein macan' je oro cote ne com je oro pana ta wawa ma'.

Apocalipse 7:2 Iomraidhean Croise

Mateus 16:16

Wum co Cristo ta. Panxica Iri' Jam co e' cara ma ta ac con na Simão Pedro.

Mateus 26:63

Ane tacana pe ca Jeju ne. Om ca tomi' in pin camain' tococwa. Tomi' ac con na: Wum co Cristo cwa' ra? Tomi' xo' xut e'. Xi taraju ara quem Iri' Jam co e' cara ta. Taraju nem pain ca tomi' nem quem. Wum co Panxica Iri' Jam ra non.

João 6:27

Je ca tomi' xuhu' ca' ac tococwa na. Ta taramaja mi' hwein capam' ca om awi cara ma' me ta. Taramaja mi' jein capam' ca om pi' ra ha' ma', ca mi' nain ca e' cara wa pain pawin ma'. Mi' pan xuhu' pain, wata' pain ca Iri' Wari' ta' ca', mi' pan xuhu' pain. Tomi' ara xi' napa' pain Te Iri' Jam ta. Mi' roron pain ta napa' pahu' ta ac tococwa na.

2 Coríntios 1:22

Wari' ne napari' quem, ac ca xirao' capari' na pain wixicon ca', pain ca wari' ne xuhu' ta capari'. An pe mi' napari' pain Tamataracon pain ximixi' ca' quem. Je ca to' taxi' napari' pain ca aram aram mi' xim capari' pain oro ca wara tomi' pe mi' capari' quem.

Efésios 1:13

Ac i ma' nuhu' pain ca wari' ne pin cuhu' pain ca om judeu hwe pane quem. Taraju iri hwein capijacon ca iri'o' ca' ne. Taraju iri hwein capijacon ca tomi' hwet nuhu' pain ca to' witan xim cuhu' ne. Howa pin iri hwein ne. Mi' ac cuhu' na pain Tamataracon ca wara tomi' pe mi' cuhu' ma', ca to' querec pin' nuhu' pain ca wari' nucun hwe ma'.

Efésios 4:30

Ta ja' tomi' xaxa' hwein Tamataracon Iri' Jam me. Mi' iri nuhu' pain ne, ac ca xirao' cuhu' pain na wixicon. Ac i ma' na ca mene inuhu' ta cuhu' ma'. Pe ho' cara turuhu'. To' taxi' pin nuhu' pain ca main maqui' ta' ne xec nein ca to' witan pin xihwe pain oro ca caracat wa.

1 Tessalonicenses 1:9

Hwet iri urut cocon pain macaracocon ne, wiricoco pan ac caca na co tomi' hwet nanaparut pahu'. Tomi' hwet nanaparut pain ca tomi' querec te hwein capijacon Iri' Jam pain ca xo' hwet urut pahu' pain cidade nuhu' pane. Tomi' hwet nanaparut pain ca howa howa om pin hwein caji pacun ca Iri' Jam xi' ma hwe pane ira. Tomi' hwet nanaparut pain ca howa pin hun Iri' Jam, je pain ca taramaja mi' hun Iri' Jam co e' cara ma', co iri'o' ma'.

2 Timóteo 2:19

Pijim' ac i ma' paxi' nana, ane om ac i ma' ne capijacon Iri' Jam ne. Taxi' irin pain ca iri'o' cara ne. Om ca mixein camain' capari'. To wet cara na, om ca an in ac xine. Tomi' ca' napari': Wata' pain ca iri' Taramaxicon ta' ca', querec pin' inonon oro wari' ne ta na. Tomi' ca' napari' quem: Oro wari' co howa inem ta nanapa' ma', na e' na pain ca an to pin cacain ca caracat wa ta na ca tomi' nein.

Hebreus 12:22

Ane om wixicam hwein cote ne pacun pain mahweri ne, om na. Wixicam pan hwein xijein pacun ma', Sião ma', je ca pe ne macaracon Iri' Jam co e' cara ma'. Wixicam hwein Jerusalém ca pe pawin cain. Wixicam huhun oro jam co taramaja mi' nonon Iri' Jam ma', co mija tamana nana pain ca cut in xucucun pain ca tomi' querec te tamana nucucun ma' quem.

Apocalipse 1:3

Iri' Jam ma', param mi' non pain ca awi wa wari' co noro nain ca xirao' ne ca', param mi' nonon pain ca awi wa oro wari' co taraju nanain pain ca noro xine ma', wiricoco co tomi' ha' nanain quem. Xi om ne ca wixicam pin ara ne oro xec nein ca maqui' ta' ne oro ca xirao' ne ta.

Apocalipse 10:1

Querec ac ton na xucun jam co taramaja mi' non Iri' Jam. Hwara' opa na. Quiji' qui' nain pawin. Wiric pa' non tajain nanawin, ac wom na con. Ma' na wanaxicon comerem pain winacon ma', pain tamacon. Ac xina na tocon. Ac xipain xirim ca tom ma' na aracon ma' quem.

Apocalipse 10:4

Toroho mip iri na comerem ne, xirao' tain paxi' inain ca tomi' nucun ira. Ane taraju tain ca tomi' wa ca maqui' nain pawin ne. Joc xim rain ca tomi' ca comerem cwa', ta tomi' hwet main me. Ta xirao' main me ta ac capa' na.

Apocalipse 16:12

Mao ac ca na xucun ma', co ja' corom mao nonon ma', ma' 6 pin ac caca na jam co mama' nana. Ji'ao pin ac cain na ca xirac wa ca moin' pe nain too nucun. Ji'ao mi' nain pain cote ne iri' cwerein com ma', pain Eufrates ma'. Ji'ao mi' iri nain pain ne, am pin ac ne na quem. Pit pin na com. Ac ca wara quep xo' mi' tococwa na pain wana oro taramaxicon co maqui' xi' nana pain pira cain, pain ca maqui' ac ca xina cain.

Apocalipse 5:2

Querec inon jam co taramaja mi' non Iri' Jam quem. Hwara' opa na. Merem mip ac ca na: Ma' xi wari' co awi tamana ma', co hohot pain ca pa cain ca hupa' caho' nein ma', je pain ca pa pan cain tapari carawa ca joc top ma' quem? Ac i ma' paxi' na ca merem mip ca ma',

Apocalipse 8:3

Querec ac ton na xucun jam co taramaja mi' non Iri' Jam. An nain ouro ca mam' tom pe xine incenso ma'. Xut hwet ac cain na pana ca in ac pe tocwa Iri' Jam. Pe ja' pan nain. Cut mi' moin' pin ac tocwa na pain incenso. Moin' tamana na. Tomi' ac tocwa na: Tomi' xim iri tatarapa' oro wari' ne ne, win tom pe ac main tara incenso pain pana ca tom tain' pe xine ma', ca mam' toto pa' xine pain ouro ma', ca pe quima hwet nain ca mam' xao pe ne ca', ac i ma' na ca tomi' tocwa ma'.

Apocalipse 9:14

Tomi' ac tocwa na jam co xo' on nain caji taracom ma': Tacom' horohot pin roron oro jam co ma' 4 nana ma', co pao' to ja' pan wawa pain cacarain cote ne iri' cwerein com ma', ca Eufrates ne wixinain ma'. Ac i ma' na ca tomi' nucun ca maqui' nain ca puxu xirac nein pana ma'.

Apocalipse 9:4

Tomi' ac tocwa na: Ta cao' main oro tononoin je pana je oro ca oin' ximama' wa me. Tan caxi e' roron oro wari' co om xirao' wawa pain jitaracocon pain ca mam' xirao' nucun Iri' Jam ta.