Apocalipse 7:14 - Tradução Bíblica Pacaas Novos

¹⁴ Om ca taxi' toton ta taramaxicon. Tomi' hwet ne cocon ac ton na. Tomi' hwet ac capa' na: Wiricoco co jain jain tamana nana pain oro cawaxi' pain ca quep em' tamana tococwa pain ca howa cocon Jeju pane. Hohoc hohoc towo' pin nonon womicocon pain quicon co ma' co ac Wijimain Taramaji Ovelha ma'.

Apocalipse 7:14 Iomraidhean Croise

João 16:33

Tomi' hwet inuhu' pain oro ca tomi' ne ca', ma' ta om toron ne xumuhu' pata' inuhu'. Ma' paxi' turuhu' oro ca to' i'ina nuhu' pain macan' ca'. Na e' nuhu' pain ca hwara' opa hwe. To' quiji' pin ara xi' inon co ma' co taramaxicon pe ho' nonon oro wari' co om howa nonon Te ta na ca tomi' caparut ca'.

Atos 14:22

Hwet iri tata co howa nonon Jeju pain oro cidade ma' ne, quep xiho' ac tococwa na pain ca howa nucucun. Hu ca' tata: Ta an to hwein ca howa wa me, howa cara jun Jeju ta ac tococwa na. To' i'ina tatarapari' oro wari' co om howa nonon Jeju ma' ac tococwa na. Quep em' xim paxi' tatarapari'. Je i ma' ira, na e' na pain ca jain jain iri' pain ca to' i'ina to' i'ina cacapari' ma', aram aram to ho' pin ac xun tara Iri' Jam ma', pain ca aram aram taramaxicon pe ho' toton cocon oro wari' nucun ta, ac i ma' na ca quep xiho' tococwa pain ca to' hwara' opa tococwa ma'.

Romanos 5:3

Cain' cain' iri' quem? Winim' cara e' urun pain ca aram aram mi' xim capari' pain ca jao jao ma' xun pain ca awi nucun pain ca hwara' opa nucun ra? Om na ta. Tomi' querec te urun pain ca to' i'ina capari' oro carawa, je pain ca to' jain jain cacapari' oro wari' cwa' quem. To' i'ina iri napari' oro carawa ca' ne, to' jain jain iri nanapari' oro wari' ma' ne, hwara' opa cara ac iri' na quem, wara taxi' irin i ma' ta.

1 Coríntios 6:11

Ma' paxi' nana win ma' nuhu' co ac i ma' nana pain cara pane. Ane hohoc pin cuhu' pain ca caracat nuhu' Iri' Jam ne. Iri' wari' ne pin inuhu' ta nuhu'. To' hohot pin nuhu'. Xi om ca Taramaxicon nexi' Jeju Cristo pain Tamataracon pahu'.

2 Tessalonicenses 1:4

Je ca tomi' hwet urut cocon oro win howa iri' cwa' pahu'. Hwet iri urut cocon pain ca cut in to nucucun pain ca howa cocon Iri' Jam ne, tomi' hwet tomi' hwet ac urut cocon na pain ca hwara' opa nuhu' pain ca quereme hwein oro ca jain jain wa ma'. Quep em' paxi' nunuhu' oro wari' co noc nunuhu' ma'. To' i'ina paxi' nuhu' oro carawa ma' quem. Ane quereme hwein ne. Howa cara hun Iri' Jam ma' quem.

Hebreus 13:12

Je ca mi' pin pe ni ca' cain oro xirim pain Jerusalém Jeju quem. Ma' ta to' hohot pin toton oro wari' ne na, mam' to' hohot toton pain cocu ta na.

Hebreus 9:14

Ac i ma' na ca hwara' opa ne quinain oro carawa ma'. Hwara' opa paxi' na quinain oro carawa, ane hwara' opa tamana pan ne quicon Cristo ne. Hwara' opa tiquin' ca' nain quinain carawa, xi om ne ca awi tamana ara ca Cristo ta. Om ca em' camain' ca. Ha' non pain ca mi' pan xucun con Iri' Jam pane, xi quep xiho' pan ara con Tamataracon ca e' cara ta. To' hohot pin napari' quicon. To' om pin nain ca em' nexi' pain ximixi' pain ca coromicat nexi'. To' om pin nain ca toron ne ximixi' pain ca caracat nexi'. Om ca to' i'ina mami' capari' oro ca ara nexi' ca to' cono' pin napari' ca'. Ha' pin ac capari' na pain ca in ac xun Iri' Jam co e' cara quem.

1Pedro 1:19

Mam' to' witan nuhu' pain wic ca awi tamana ma', je quicon Cristo co ac wijimain taramaji ovelha ca om em' camain' ma'.

1João 1:7

Xuruxut cara iri irin naran nucun Iri' Jam ma' ne, pain ca win xumu xin oro ca param nucun ma'. Win ne ca pe cain naran ma' quem. Xuruxut ac i ma' iri irin naran nucun ne, tomi' querec te caracan ac xijexi' na pain ca taxipa' xijexi' ca'. Hohoc pin ac capari' na pain ca caracat nexi' quicon Panxica cwa', Jeju cwa'. Ac i ma' na ca to' om to' om pi' pin cain ca caracat nexi' quem.

Apocalipse 1:5

Param inon Jeju Cristo pain ca quep xiho' cuhu' pain ca mi' cuhu' pain ca param nucun, param inon pain ca mi' cuhu' pain ca om toron ne xumuhu' quem. Wirico Jeju co tama' tomi' iri'o' ma', co to' e' mami' cain' ca Iri' Jam pane, co iri' Taramaxicon co hwara' opa tiquin' ca' nonon oro taramaxicon co taramaxicon to nanain oro xijein macan' ca'. Wirico Jeju Cristo co om noc napari' ta. To' witan ca' napari' pain ca caracat nexi' ca'. Mam' to' witan napari' pain quicon.

Apocalipse 12:11

Oro xerexi' ma', wiricoco co to' quiji' pin nonon. Mam' to' quiji' pin nonon pain ca hwara' opa nein quicon co ma' co ac Wijimain Taramaji Ovelha ma'. Mam' to' quiji' pin nonon pain capijacon Iri' Jam ca pijim' caca con Jeju ma' quem. Mo ta to' parapa' xim cacapari' pain ca howa xun Iri' Jam cwa', je i ma' ira, to' parapa' ma' tatarapari' ne nana.

Apocalipse 15:2

Querec ac tain na carawa ca ac cote ne com ma' quem, ca an xiho' nain ca mam' querec ca jamu wa ma'. Ac ca weo ne na xe pain ximijain. Querec ac toton na caram ma' co to' quiji' pin nonon co ac caji carawa co mana' tamana ma' quem, co hwet qui' cain' ma'. Caram ma' co querec ta' ma', to' quiji' pin nonon co ac caji carawa ma', xi pe torotop mi' querec te cacain caji pacun ca ara an xiho' tocwa ta, tomi' in pin nonon oro co xirao' xirac xut pahu' pain número nein wixicon ta nonon ma' quem. Coco' ja' pan nanain cacarain cote ne com ca an xiho' nain ca mam' querec ca jamu wa ma'. Cut nana ca mam' tao' wa ma', ca ac violão paxi' ma', ca mi' pan cocon Iri' Jam ma'.

Apocalipse 17:6

Querec pin' inam pain ca hohot tamana cam ca to' parapa' pin tococwa oro wari' nucun Iri' Jam pain ca howa cara cocon Jeju ma'. Pain ca tomi' querec te nequem pain ca cono' pin nucucun ma', ac ca toc tamanain pe camain na quicocon. Querec iri inam ne, wa wa tamana ac tam na.

Apocalipse 2:9

Taxi' inuhu' pain ca jain jain nuhu' pain ca quep em' xihwe ma'. Taxi' inuhu' pain ca ximin hwe ma', pain ca om cuhu' oro carawa ma' quem. Om paxi' nuhu' carawa, ane ma' cuhu' iri' carawa pata' ne. Taxi' inuhu' pain ca tomi' napat cucuhu' caram ma' co judeu urut paxi' nana ma'. Xi iri' judeu caca ta. Oro wari' nucun Satanás ara xi' nana pain ca ca' na cacain oro ca tomi' nucun ta.

Apocalipse 22:14

Param mi' tata pain ca awi wa oro wari' co hohoc nonon womicocon ma'. Om ta narain ho' tococwa pain ca xac wa winain panaji memem ca mi' nain ca e' cara wa. Ha' nonon pain ca corom mama' cacain cidade pain oro manain ca mam' corom ac xine quem.

Apocalipse 5:9

Com ac cacain na xocori tamara': Wum co awi tamana, wum co hohot pain ca an main tapari carawa ca joc top ma', je pain ca pa main oro ca hupa' caho' nein ma'. Xi om ne ca to' pa' pin ara xima pane ta. Cut mi' momon con Iri' Jam oro wari' co xucun wari' xucun wari' pi' pin nana ma', co capija ni ca' nonon oro xucucun wari' ma', co to ni ca' nonon oro xucucun wari' pain macaracocon ma', co to nanain oro xijein macan' ma' quem. Pain ca cut mi' momon con Iri' Jam ma', mam' to' witan momon pain cocum.

Apocalipse 7:9

Xirao' pin iri tata pain jitaracocon oro waram winacon Israel ne, noro ac ta' na, querec ac toton na oro wari' pain ca cut in tamana nucucun. Mija nana wari' ta, om ca tomi' ac tococwa, xi paric caca ta. Maqui' nanain oro xijein macan'. Xucun wari' xucun wari' pi' pin nana, to ni ca' nonon oro xucucun wari' pain macaracocon, capija ni ca' xucucun quem. Coco' quima hwet nanain ca mam' xao pe pe ca Iri' Jam co Iri' Taramaxicon ma', coco' quima hwet nonon co ma' co ac Wijimain Taramaji Ovelha ma' quem. To nonon wom co towo', cut nanain tahot pain micocon quem.