Apocalipse 7:12 - Tradução Bíblica Pacaas Novos

¹² Tomi' ac caca na: Amém, iri'o' na ca tomi' urut pum ca'. Wum co Iri' Jam ne urut cwa'. In ac cara xim urut pum. Tomi' hwet cara xim urut pain ca awi tamana nem. Querec pin' cara xim urut pum pain ca taxi' tamana ma ma'. Tomi' querec te cara xim urut pum pain oro ca ara mi' maparut ca'. Querec pin' cara xim urut pum pain ca awi tamana nem ma', je pain ca Iri' Taramaxicon ma ma', je pain ca hwara' opa tamana ma ma' quem. Amém, iri'o' na ca tomi' urut pum ca'! Ac i ma' na ca tomi' caca ma'.

Apocalipse 7:12 Iomraidhean Croise

Mateus 6:13

Narain ho' xut pain ca tomi' querec caparut Caxicon Jam quem. To' witan ca' xut con quem. Wum pan ara xi' na co Iri' Taramaxicon cara ma'. Tama' hwara' opa cara ma quem. Tama' awi tamana na ta cara nenem oro wari' cwa' quem. Amém, iri'o' na ca tomi' ne ta. Ac i ma' je pain ca tomi' xun hun Iri' Jam ta na ca tomi' tococwa ma'.

Romanos 11:36

Xi wirico ara ca co tomi' ma' tomi' ma' pi' pin nain oro carawa ta. Mam' to' e' nain pain ca hwara' opa nucun. Ma' ta querec pin' mahu' ta napari'. Ma' ta awi tamana na Iri' Jam ta mahu' ta napari'. Amém, iri'o' na ca tomi' ne ta.

1 Coríntios 14:16

Mo ta tomi' xun Iri' Jam pain ca in ac xun quem, mo ta tomi' e' xun pain xijein ca capija wa ca om wara tomi' taxi' iri' ca'. Mo ta pe ho' capari' wari' co om taraju pa' ma'. Ha' tara ca amém ac ca pain ca tomi' nexi' ra? Xi taraju pa' capari' pain ca tomi' nexi' ta.

2 Coríntios 4:15

Quereme urut pain oro ca jain jain wa pain ca pijim' urut pain capijacon Iri' Jam cwa'. Ma' ta quep xiho' xim urut pahu', ma' ta querec pin' tocwa Iri' Jam pain ca awi tamana nucun urut quem. Mija mija tiquin' iri tatara oro wari' co howa pin nonon ne, pain ca xiram pa' e' tococwa pain ca to' witan pin xun tococwa ma', tomi' querec te tamana ac cocon tara, an hwet pe ac cacain tara ca awi tamana nucun quem.

Colossenses 2:7

Win ne pana ca hwara' opa ma', pain ca corom mama' nein paxicom caximain ma', ac i ma' tara pain ca hwara' opa hwe con Taramaxicon nexi'. Horon horon tiquin' je pain ca win cwere hun ma'. Howa mip jein oro ca pijim' xihwe con pane. Tama' tomi' hwet tomi' hwet tiquin' jein ca tomi' querec te nuhu' con Iri' Jam quem.

Colossenses 3:17

Pain oro ca ara xi' hwe ma', je pain oro ca tomi' xi' hwe ma' quem, querec pin' pan tuturuhu' oro wari' pain ca taramaja mi' hun Taramaxicon nexi' Jeju. An hwet jein wixicon Jeju pain ca tomi' querec te hun Cotere' Iri' Jam quem.

Apocalipse 1:18

Wata' co e' cara cwa'. Mi' pin paxi' ina pane, ane e' cara ta' pain xocori ca' ne. Om ta pi' ra ha' ne ca e' ne ta. Wata' co taramaxicon hwara' opa tiquin' ca' nain ca cono' wa. Taramaxicon pe ho' inonon oro co cono' nana ma' quem, to ho' napa' oro ca mam' pa xine ca to pan caca ta, ac i ma' na ca tomi' capa' ma'.

Apocalipse 19:4

Torotop to ac caca na oro taramaxicon co ma' 24 nana ma'. Pe torotop mi' querec te nonon Iri' Jam ma', co xao pe pe nain ca mam' xao pe nucun pain ca Taramaxicon ca ma'. Merem ac caca na: Amém, iri'o' na ca tomi' nuxut ta. Aleluia! Tomi' querec te xun Iri' Jam ta! Ac i ma' na ca merem caca ma'.