Apocalipse 6:16 - Tradução Bíblica Pacaas Novos

¹⁶ Merem ac cacain oro pacun na: Camara' hwet xut ta pacun! Tequi' pa' xut, ma' ta om querec caparut co cwain co xao pe pe nain ca mam' xao pe nucun cwain. Narain ho' xut pain ca mana' nucun co cwain co ac Wijimain Taramaji Ovelha cwain.

Apocalipse 6:16 Iomraidhean Croise

Mateus 26:64

Wata' cwa' ira. Win ne ca tomi' pan ma ma' ac ca na Jeju. Ane tomi' tomi' pi' pin xuhu' pain i ca' ne. Main maqui' tara xec nein ca querec xim mahu' pain ca xao pe ho' ton Iri' Jam co hwara' opa pan. Wata' pain ca Iri' Wari' ta' ca', querec ac mahu' tara pain ca xao pe ho' tain iri' curucun pain i cain. Querec ac mahu' tara pain ca maqui' wi ta' pain tajain nanawin quem ta na ca tomi' con ma'.

Marcos 3:5

Noro ac tococwa na pain ca to to mam' pin cocon ma'. Mana' tata, tomi' xaxa' na cocon quem. Xi noc ara cacain ca taraju pa' wa ta. Tomi' ac con na co xirac micon ma': Coc matam rain mum ma' ta non. Coc matam ac cain na, awi pin ac ne na con.

Lucas 23:30

Merem ac caca tara oro wari': Camara' hwet ma' tarapari' oro pacun je oro ca tamaja pan ne macan' ne. Xin xam' corom ma' tarapari' ne tatara.

Apocalipse 10:6

Om ta winim' mami' ca Iri' Jam ta ac ca na. Iri'o' na ca tomi' ne ca', wara an pe xo' nain ca coromicat nucun Iri' Jam co e' cara cwa', co tomi' ma' pin nain pawin je macan' je cote ne com je oro carawa ca to nain quem. Om ta winim' mami' ca.

Apocalipse 19:15

Hwet qui' nain capijacon cote ne quit ca xa ma', ca mam' to' quiji' pin toton cocon oro wari' co to nanain oro xijein macan'. Iri' taramaxicon tara, taramaxicon hwara' opa tamana tara. Om ta xiram pa' camain' cocon oro wari' co om tomi' ha' nonon. To' quiji' pin totoron, ac ca xom xom torotot pin xine tara winain uva pain manain cote ne pacun ca tomi' joc mam' mi' nain ca mana' nucun Iri' Jam ma', co hwara' opa tamana pan.

Apocalipse 20:11

Querec ac tain na cote ne ca mam' xao pe ca taramaxicon. Towo' na. Querec inon co xao pe pe nain quem. Jein ca' non macan' je pawin quem. Om ca querec mami' xine.

Apocalipse 4:2

Ane ane pe ho' mip ac capa' na Tamataracon Iri' Jam. Pe quima hwet ac capa' na ca mam' xao pe ca taramaxicon ma', pain pawin ma'. Querec inon co xao pe pe nain ma'.

Apocalipse 4:5

Mija na ca coc wein ca comerem ma', coc wein qui' nain ca mam' xao pe nucun taramaxicon ma'. Toroho mip na comerem quem, mija na. To quima hwet non naran ca wara tom ma', ca ma' 7 ma', ca ac Tamataracon Iri' Jam ma' quem.

Apocalipse 4:9

Caram ma' co e' nana ma', co ac jam paxi' nana ma', com mi' nonon co xao pe pe nain ca mam' xao pe nucun ma', co e' cara ma', co om pi' camain' ca e' nucun ma'. Wum co awi tamana, querec pin' urut pum pain ca awi tamana nem. Tomi' querec te tamana urut pum ta nonon. Com mi' ac i ma' iri nonon ne,

Apocalipse 5:1

Querec ac tain na tapari carawa ca joc top ma', ca an ca co xao pe pe nain ca mam' xao pe nucun ma'. An na pain micon ma', pain iri' curucun ma'. Wara xirao' nain pain quimain je xonein. Mam' hupa' caho' na pain carawa ca ac catocwan' ma' quem. Ma' 7 na ca hupa' caho' nein. Ma' ta pa xica' pe cain co pa rain ta ta' ca' na.

Apocalipse 6:10

Merem mip ca' nana: Cain' cain' ta' ma ma' quem Iri' Taramaxicon co iri'o' ma', co awi tamana pain ca pe ni ca' main ca caracat wa ma'? Cain' cain' ta' ma ma' quem? Je xi wap hap momon oro wari' co to nanain oro xijein macan' quem? Em' hwe, mama' jein cote ne xe ta ximomon quem? Win ne ca to' parapa' pin cacaparut pane, ac i ma' na ca merem mip cocon ma'.

Apocalipse 9:6

Pain oro xec pain ca tan caxi xun tococwa oro wari' ma', jain jain tamana tatara. Cono' xixi' na paxi' tatara, om ta ha' cocon ca cono' wa. Param tamana paxi' tatarain ca cono' wa, om ta ha' cocon ta.