Apocalipse 5:8 - Tradução Bíblica Pacaas Novos

⁸ An ca' iri non pain ne, pe torotop mi' pan ac cocon na caram ma' co e' nana ma', co ac jam paxi' nana ma', co ma' 4 nana ma'. Pe torotop mi' nonon caram ma' co ma' 24 nana ma' quem. Ma' ma' xam' nonon ca mam' tao' wa, ac violão paxi' na cocon. Ma' ma' xam' nonon too ca mam' quep xine pain ouro ma', ca moin' to pain incenso ma', ca tomi' joc mam' mi' nain ca tomi' nucucun oro wari' nucun Iri' Jam ma', pain ca tomi' cocon ma' quem.

Apocalipse 5:8 Iomraidhean Croise

João 1:29

Xec pin iri na ne, querec ac con na Jeju João ma', pain ca xut hwet ton con ma'. Tomi' ac ca na: Noro jun co ma' co ac Wijimain Taramaji Ovelha nucun Iri' Jam ma'. Mi' pin pe rain maxicocon oro wari' ta non Iri' Jam pari'. Win ne wijimain taramaji ovelha ca mi' pin pe nain maxixi'. Xic am pin tain nain ca caracat nexi' ta na ca tomi' ca ma'.

João 5:23

Ma' ta in ac in ac pi' pin quequem oro wari' ta arain napa'. Win ne ca in ac cacapa' ca' napa'. Oro wari' co om in ac nanapa' pain ca Panxica Iri' Jam ta' ca', om ca in ac cocon Te co hwet roron oro wari' ta napa' quem.

Hebreus 1:6

Maqui' pin iri na xec pain ca hwet roron oro wari' pain macan' ta con Panxica ne, tomi' ac ca na: Na e' na pain ca in ac in ac xam' cocon Panxita' oro jam co taramaja mi' nanapa' ta. Ac i ma' na ca tomi' tococwa oro jam co taramaja mi' nonon pane.

Apocalipse 13:8

Co ma' co ac Wijimain Taramaji Ovelha ma', co wara coromicat an pe xo' ca Iri' Jam pain cara pane, pain ca om tomi' ma' pin querec cain macan' pane, co main to' pa' pin xim nenem oro caracat ta ca pane, ma' non tapari carawa ca xirao' to xine wixicocon oro co e' cara xi' nana ma'. Oro wari' co to nanain oro xijein macan' ma', co om xirao' to wa wixicocon pain tapari carawa nucun co ma' co ac Wijimain Taramaji Ovelha ma', wa wa wa wa xam' totoron co ma' co ac caji carawa ma'. Pe torotop mi' querec te totoron quem.

Apocalipse 15:2

Querec ac tain na carawa ca ac cote ne com ma' quem, ca an xiho' nain ca mam' querec ca jamu wa ma'. Ac ca weo ne na xe pain ximijain. Querec ac toton na caram ma' co to' quiji' pin nonon co ac caji carawa co mana' tamana ma' quem, co hwet qui' cain' ma'. Caram ma' co querec ta' ma', to' quiji' pin nonon co ac caji carawa ma', xi pe torotop mi' querec te cacain caji pacun ca ara an xiho' tocwa ta, tomi' in pin nonon oro co xirao' xirac xut pahu' pain número nein wixicon ta nonon ma' quem. Coco' ja' pan nanain cacarain cote ne com ca an xiho' nain ca mam' querec ca jamu wa ma'. Cut nana ca mam' tao' wa ma', ca ac violão paxi' ma', ca mi' pan cocon Iri' Jam ma'.

Apocalipse 15:7

Ma' na co win ma' ne nonon caram ma' co e' nana ma', co ac jam paxi' nana ma', co ma' 4 nana ma', mi' mi' xam' ac tococwa na pain ouro ma', ca wara moin' pe nain carawa ca tomi' joc mam' mi' nain ca mana' tamana nucun Iri' Jam ma', co e' cara ma'.

Apocalipse 19:4

Torotop to ac caca na oro taramaxicon co ma' 24 nana ma'. Pe torotop mi' querec te nonon Iri' Jam ma', co xao pe pe nain ca mam' xao pe nucun pain ca Taramaxicon ca ma'. Merem ac caca na: Amém, iri'o' na ca tomi' nuxut ta. Aleluia! Tomi' querec te xun Iri' Jam ta! Ac i ma' na ca merem caca ma'.

Apocalipse 4:10

pe torotop mi' pan ac cocon na xucucun taramaxicon ma', co ma' 24 nana ma'. Pe torotop mi' querec te nonon co xao pe pe nain ca mam' xao pe nucun ma', co e' cara ma', co om pi' camain' ca e' nucun ma'. An toco' mi' ac cocon na pain caji waji' nucucun. Tomi' ho' tomi' ho' ac cocon na:

Apocalipse 4:4

To to mam' pin nain ca mam' xao pe nucun oro wirain ca mam' xao pe wa, ma' 24 nana xucucun taramaxicon co xao to nanain quem. To nonon wom co towo', to nanain caji waji' nucun taramaxicon pain winacocon quem. Mam' quep ta pain ouro caji waji' nucucun.

Apocalipse 4:6

Pe quima hwet nain ca mam' xao pe nucun cote ne com ma' quem. Ac ca mam' querec ca jamu wa paxi' na. Awi tamana na, om na homiri, om ca tocohon camain' ne. To nanain ximijain caram ma' co e' nana ma', co ac jam paxi' nana ma'. Ma' 4 nana. Mija na tococon, to to xam' na tococon pain quimacocon, je pain waracocon. To to mam' pin nanain ca mam' xao pe nucun taramaxicon ma'. Pe nain quimacon xucun, pe nain waracon xucun, pe nain quiricon xucun, pe nain xijein quiricon xucun ma' quem.

Apocalipse 4:8

Tapaxu nana quem, ma' 6 ma' 6 xam' na tapaxicocon. Mija na tococon pain curucucun je pain tequipain tapaxicocon quem. Com cara nanain tamara' quem, pain xec je pain xim. Om ca maho' camain' cacain ca com wa tamara'. Com mi' ac i ca' nonon Iri' Jam: Wum co awi tamana ma', co pe ni ca' nain ca caracat wa ta Iri' Jam. Iri'o' ta, wum co awi tamana ma', co pe ni ca' nain ca caracat wa ta. Wum co Taramaxicon ne urut ta Iri' Jam. Hwara' opa pan ma. Wum co wara ma' pain cara pane, wum co ma' cara cwa', wum co maqui' ta' ma' quem. Ac i ma' na ca com mi' cara cocon Iri' Jam caram ma' co e' nana ma', co ac jam paxi' nana ma'.

Apocalipse 5:11

Noro ac ta' na, taraju ac toton na oro jam co taramaja mi' nonon Iri' Jam. Mija tamana nana, om ca tomi' ac tococwa, xi mija tamana ara caca ta. Coco' coco' mam' pin nanain ca mam' xao pe nucun iri' Taramaxicon ma', coco' coco' mam' pin nanain caram ma' co e' nana ma', co ac jam paxi' nana ma', coco' coco' mam' pin nanain oro taramaxicon ma' quem.

Apocalipse 5:12

Com mip ac caca na: Awi tamana na co ma' co ac Wijimain Taramaji Ovelha ma', co to' pa' pin wa pane. Na e' na pain ca querec pin' xun pain ca iri' Taramaxicon ca ma'. Na e' na pain ca caramaju tamana ca ma'. Na e' na pain ca querec pin' xun pain ca taxi' tamana ca ma'. Na e' na pain ca querec pin' xun pain ca hwara' opa tamana ca ma', je pain ca awi tamana ca ma'. Na e' na pain ca tomi' hwet xin ca awi tamana nucun. Na e' na pain ca in ac xun quem. Ac i ma' na ca com mip nucucun ma'.

Apocalipse 5:14

Amém, iri'o' na ca tomi' nuxut ta ac caca na caram ma' co e' nana ma', co ac jam paxi' nana ma', co ma' 4 nana ma'. Oro xucucun taramaxicon co ma' 24 nana ma', pe torotop mi' querec te ac cocon na co ma' co ac Wijimain Taramaji Ovelha ma', pe torotop mi' querec te nonon Iri' Taramaxicon co xao pe pe nain ca mam' xao pe nucun quem.

Apocalipse 5:6

Querec ac ton na co ma' co ac Wijimain Taramaji Ovelha ma'. Xat pe nain i ma', pe ja' pan nain ca mam' xao pe nucun taramaxicon ma', pain ximijain ma'. To to mam' pin nonon caram ma' co e' nana ma', co ac jam paxi' nana ma', co ma' 4 nana ma'. To to mam' pin nonon oro taramaxicon ma' quem. Ac ca wara to' pa' pin tocwa na, ane e' mami' ca ne. Ma' 7 na pixicon, ma' 7 na tocon quem. Oro tocon ma', tomi' joc mam' mi' nain Tamataracon Iri' Jam ca ma' 7 ma' quem, ca mama' mama' xam' jein oro xijein macan' ta pan ca Iri' Jam ma'.

Apocalipse 6:1

Querec ac ton na co ma' co ac Wijimain Taramaji Ovelha ma'. Querec inon pain ca pa cain ca hupa' caho' nein tapari carawa ca joc top ma'. Ma' 7 na ca hupa' caho' nein ma'. Pa ac cain na ca ma' cain' nein. Taraju ac ton na win ma' caca co e' nana ma', co ac jam paxi' nana ma'. Tomi' mip na, ac comerem na ca tomi' nucun. Hap ra ta ac ca na.