Apocalipse 4:2 - Tradução Bíblica Pacaas Novos

² Ane ane pe ho' mip ac capa' na Tamataracon Iri' Jam. Pe quima hwet ac capa' na ca mam' xao pe ca taramaxicon ma', pain pawin ma'. Querec inon co xao pe pe nain ma'.

Apocalipse 4:2 Iomraidhean Croise

Mateus 22:43

Cain' cain' xira quem ac tococwa na. Davi cara pane, co wina non Cristo pane, Taramaxicon ne non quem. Je Tamataracon Iri' Jam ca mi' non pain ca tomi' nucun pane. Para Taramaxicon ne con pain ca xirao' pe nucun quem? Xi tomi' ac i ca' ara ca Davi pain ca tomi' mi' con Cristo pane:

Hebreus 8:1

Oro ca xirao' mi' xuhu' ca' ne, pain ca tomi' xo' xuhu' cocon oro sacerdote cwa', tomi' mi' inuhu' con sacerdote co iri' taramaxicon. Taraju pa' je e'. Ma' napari' sacerdote co iri' taramaxicon. Xao pe ho' nain iri' cwerein ca mam' xao pe nucun Iri' Jam cwain, co hwara' opa tamana cwain, co pe pawin cwain.

Apocalipse 1:10

Xec nein ca mam' pe wet xine ca e' mami' ca Taramaxicon nexi' pin iri na ne, pain domingo pain cara pane, pe ho' mip ac capa' na Tamataracon Iri' Jam. Taraju ac tain na ca tomi' wa ma', pain wara ma'. Tomi' mip na. Ac ca on xine caji taracom napa'.

Apocalipse 12:5

Pan' qui' ac ca na cawinacam. Cao' ton paxi' na co ma' co ac caji hop ma', ane an mao hap pan tocwa pain pawin cain ne, pain ca pe pan ca Iri' Jam cwain. Cawinacam co xo' pan' ma', wirico tara co taramaxicon pe ho' toton nonon oro wari' pain oro xijein macan'. Iri' taramaxicon tara, taramaxicon hwara' opa tamana tara. Om ta xiram pa' camain' cocon oro wari' co om tomi' ha' nonon ma' quem.

Apocalipse 17:3

Pe ho' mip ac capa' na Tamataracon Iri' Jam. O mao ac capa' na jam co taramaja mi' non ma', o mao napa' pain mahweri. Querec ac tam na narima' co xao pe pe nain xunucun co ma' co ac caji carawa co hwet qui' cain' ma', co paca' ma'. Xirao' pe xirao' pe xam' ta pain oro curucun oro ca om awi wa ca tomi' napat non Iri' Jam. Ma' 7 na winacon, ma' 10 na pixicon quem.

Apocalipse 19:4

Torotop to ac caca na oro taramaxicon co ma' 24 nana ma'. Pe torotop mi' querec te nonon Iri' Jam ma', co xao pe pe nain ca mam' xao pe nucun pain ca Taramaxicon ca ma'. Merem ac caca na: Amém, iri'o' na ca tomi' nuxut ta. Aleluia! Tomi' querec te xun Iri' Jam ta! Ac i ma' na ca merem caca ma'.

Apocalipse 20:11

Querec ac tain na cote ne ca mam' xao pe ca taramaxicon. Towo' na. Querec inon co xao pe pe nain quem. Jein ca' non macan' je pawin quem. Om ca querec mami' xine.

Apocalipse 21:10

Pe ho' mip ac capa' na Tamataracon Iri' Jam. O mao ac capa' na jam co taramaja mi' non quem, o mao napa' pain cote ne pacun ca mao tamana pawin. An hwet mi' ac capa' na pain Jerusalém ma', iri' cidade nucun Iri' Jam ma', ca quiji' qui' nain pawin ma'. Maqui' nain ca pe pan ca Iri' Jam.

Apocalipse 21:5

Tomi' ac ca na co ma' co xao pe pe nain ca mam' xao pe nucun taramaxicon: Ara xocori ara xocori pi' pin inain oro carawa ta na. Tomi' tomi' tiquin' na quem: Xirao' rain oro ca tomi' xim cara ne. Iri'o' na oro ca tomi' ne. Om ca mixein ta', na e' na pain ca howa cacapa' pain ca tomi' ne oro wari' ta. Ac i ma' na ca tomi' ca co ma'.

Apocalipse 3:21

Oro wari' co hwara' opa cara nana pain ca howa nucucun ma', mi' ac toton tara pain ca xao to ho' cacapa' pain ca mam' xao pe ne pain ca taramaxicon pin ta' ta' ca'. Taramaxicon wi ac cacapa' tara. Win ta' pain xocori ca', pain ca to' quiji' pin ton Caxicon Jam pane, je pain ca xao pe ho' pin ton Te pain ca mam' xao pe nucun pain ca taramaxicon nucun quem.

Apocalipse 4:10

pe torotop mi' pan ac cocon na xucucun taramaxicon ma', co ma' 24 nana ma'. Pe torotop mi' querec te nonon co xao pe pe nain ca mam' xao pe nucun ma', co e' cara ma', co om pi' camain' ca e' nucun ma'. An toco' mi' ac cocon na pain caji waji' nucucun. Tomi' ho' tomi' ho' ac cocon na:

Apocalipse 4:5

Mija na ca coc wein ca comerem ma', coc wein qui' nain ca mam' xao pe nucun taramaxicon ma'. Toroho mip na comerem quem, mija na. To quima hwet non naran ca wara tom ma', ca ma' 7 ma', ca ac Tamataracon Iri' Jam ma' quem.

Apocalipse 4:9

Caram ma' co e' nana ma', co ac jam paxi' nana ma', com mi' nonon co xao pe pe nain ca mam' xao pe nucun ma', co e' cara ma', co om pi' camain' ca e' nucun ma'. Wum co awi tamana, querec pin' urut pum pain ca awi tamana nem. Tomi' querec te tamana urut pum ta nonon. Com mi' ac i ma' iri nonon ne,

Apocalipse 5:1

Querec ac tain na tapari carawa ca joc top ma', ca an ca co xao pe pe nain ca mam' xao pe nucun ma'. An na pain micon ma', pain iri' curucun ma'. Wara xirao' nain pain quimain je xonein. Mam' hupa' caho' na pain carawa ca ac catocwan' ma' quem. Ma' 7 na ca hupa' caho' nein. Ma' ta pa xica' pe cain co pa rain ta ta' ca' na.

Apocalipse 5:13

Taraju ac tain na ca tomi' wa. Oro carawa ca tomi' ma' pin ca Iri' Jam ma', oro wari' quem, co to nanain pawin ma', co to nanain macan' ca', co to nanain ca to pan caca co cono' nana ma', pain tequipain macan' je pain cote ne com ma', oro carawa ca tomi' ma' pin ca Iri' Jam ma' quem, tomi' ac caca na: In ac cara xun iri' Taramaxicon co xao pe pe nain ca mam' xao pe nucun ma'. In ac cara xun co ma' co ac Wijimain Taramaji Ovelha ma' quem. In ac cara xuxun. Tomi' querec te cara xuxun. Tomi' hwet cara xin ca awi tamana nucucun. Querec pin' cara xuxun pain ca iri' Taramaxicon nucucun. Ac i ma' na ca tomi' nucucun ma'.

Apocalipse 6:16

Merem ac cacain oro pacun na: Camara' hwet xut ta pacun! Tequi' pa' xut, ma' ta om querec caparut co cwain co xao pe pe nain ca mam' xao pe nucun cwain. Narain ho' xut pain ca mana' nucun co cwain co ac Wijimain Taramaji Ovelha cwain.