Apocalipse 4:1 - Tradução Bíblica Pacaas Novos

¹ Pi' pin iri na ca tomi' capa' ne, noro ac ta' na, querec ac tain na man ca pa xat pain pawin ma'. Tomi' mami' ac capa' na co wara tomi' napa' ma', co an xiho' nain caji taracom ca tomi' nucun ma'. Tomi' ac capa' na: Piri' qui' ra, an hwet mi' ac xim tara pain oro carawa ca maqui' ta' ma' quem, ac i ma' na ca tomi' capa' ma'.

Apocalipse 4:1 Iomraidhean Croise

Mateus 3:16

Ja' pin iri ta ne, hwet ca' ac cain na com. Ane ane pa ac ne na nanawin. Querec ac cain na Tamataracon Iri' Jam pain ca quiji' hwet con ma'. Ac ca quiji' qui' ca xucu' na pain ca quiji' hwet con ma', pain ca xat con ma'.

Marcos 1:10

Je win hwet ca' cain com Jeju ma', querec ac cain na nanawin pain ca pa ne ma'. Querec ac cain na Tamataracon Iri' Jam pain ca quiji' hwet con ma' quem. Ac ca quiji' qui' ca xucu' na pain ca quiji' hwet con ma'.

Lucas 3:21

Pain ca om tao' pe querec tocwa João pane, pain ca ja' ja' wet tococwa pain com oro wari' pane, ja' ac tocwa na Jeju quem. Ja' pin iri ta ne, pain ca tomi' tomi' wet con Cote ca ma', pa ac ne na nanawin.

João 16:13

Ane maqui' ta' ne Tamataracon Te ca an hwet pe taxipa' nain oro capijacon Te ca iri'o' ne. Maqui' iri tara ne, tomi' xo' ac cuhu' tara pain oro capijacon Te ca iri'o'. Om ta tomi' hwet cuhu' pain ca coromicat pan nein, om na. Tomi' hwet e' turuhu' pain oro ca taraju ne con Te. Tomi' hwet turuhu' pain oro carawa ca ara ta' ma' quem.

Atos 10:11

Ac ca querec cain na ca wein mao nein nanawin ma'. Ac ca quiji' qui' cain na pawin carawa ca ac cote ca wom ma'. Tucu tucu xam' na tamacon. Ac i ma' na ca quiji' hwet cain macan'.

Atos 7:56

Tomi' ac ca na: Noro je! Querec inain ca pa xat ne pawin ma'. Querec inon Jeju co Iri' Wari' cwain, pain ca xat pe ho' cain iri' curucun Iri' Jam ma'.

Apocalipse 1:10

Xec nein ca mam' pe wet xine ca e' mami' ca Taramaxicon nexi' pin iri na ne, pain domingo pain cara pane, pe ho' mip ac capa' na Tamataracon Iri' Jam. Taraju ac tain na ca tomi' wa ma', pain wara ma'. Tomi' mip na. Ac ca on xine caji taracom napa'.

Apocalipse 1:12

Noro in ac ta' na, querec ton co tomi' napa' ma' ina ira. Noro in iri ina ne, querec ac tain na oro ca mam' tom pe ne naran ma', ca mam' quep xine pain ouro ma'. Ma' 7 na.

Apocalipse 1:19

Je ca tomi' xim ca' ac capa' na. Xirao' pe ra pain tapari carawa pain oro ca querec ma cara ne, je pain oro ca querec ta' ma pain xocori ca', je pain oro ca maqui' ta' pa'ao' ma' quem, xirao' xirao' pi' pin rain.

Apocalipse 11:12

Caram ma' co tequi' to pin nana ma', taraju ac cacain na ca tomi' wa ca maqui' nain pawin. Tomi' mip tata. Piri' qui' je ta ac tococwa na, piri' mama' ac cacain na pawin pain tajain nanawin ma'. Oro wari' co noc nonon ma', ja' noro nonon pain ca piri' mama' nucucun.

Apocalipse 11:19

Pa ac xine na xiricon Iri' Jam pain pawin ma'. Querec ac tain na iri' panaxicon ma', ca cut ho' pe xine pacun ca xirao' pe mi' tococwa oro wari' nucun ma', pain ca tomi' ha' xine tococwa ma'. Coc irija' ac ca na comerem ma', toroho mip pan na comerem quem, mija na. Cocoroc ac ne na macan' ma' quem. Nuru mip ac ne na camana', camara' ac ne na caji pacun nein xowi' ma' quem. Mija na.

Apocalipse 16:17

Mao ac ca na xucun jam ma', co ja' corom mao nonon win ma' ca ma', ma' 7 pin ac caca na jam co mama' nana. Ji'ao pin ac cain na ca xirac wa ca moin' pe nain too nucun. Ji'ao na pain pawin. Ji'ao iri nain ne, taraju ac tain na ca tomi' wa ca maqui' nain xiricon Iri' Jam ma', maqui' nain ca mam' xao pe nucun ma'. Tomi' mip ac ne na: Ara pi' pin inain oro ca ara ta' ta' pane na.

Apocalipse 19:11

Querec ac tain na pawin pain ca pa xat ne ma'. Pe quima hwet napa' cavalo ca towo'. Wari' co xao pe nain ma', tocwan na wixicon. Co Om Mixein Camain', Co Iri'o' Taxipa', je i ma' oro wixicon. Tomi' xo' iri tata oro wari' pain oro carawa ca ara caca ne, om ca wap ximao tococwa, wap xo' e' tata. Mixita xo' tata oro co noc nonon ma', om ca mixita ximao camain' tococwa.

Apocalipse 22:6

Tomi' ac capa' na jam co taramaja mi' non Iri' Jam. Oro ca tomi' xim cara ne, na e' na pain ca howa cacapa' pain ca tomi' ne oro wari' ta. Xi om ne ca tomi' iri'o' ara ta' ta. Om ca mixein ta'. Taramaxicon nexi' ma', co Iri' Jam ma', co mi' nonon pain ca tomi' hwet wa oro profeta ma', wirico co tomi' ca' napa' pain ca taramaja mi' ton ca'. Hwet roron oro wari' ne co taramaja mi' nanapa' ma', an hwet mi' roron pain oro carawa ca maqui' ta' ma'. Om ta om om ne, maqui' ho' tara ta napa'. Ac i ma' na ca tomi' capa' ta.