Apocalipse 3:5 - Tradução Bíblica Pacaas Novos

⁵ Ac i ma' tatara oro wari' co hwara' opa cara nana pain ca howa nucucun ma', to totoron wom co towo' ma' quem. Om ta xic am camain' tain wixicocon pain tapari carawa ca xirao' to xine wixicocon oro wari' co e' cara xi' nana. Wari' ne inonon caram cwa' ta ac ton tara Te cocon oro jam co taramaja mi' nonon ma', taraju taraju xam' tatarapa' pain ca tomi' ac i ma' toton ta.

Apocalipse 3:5 Iomraidhean Croise

Mateus 10:32

Tomi' ac caparut na: Wari' co tomi' hwet nonon oro win ma' ca pata' pain ca Taramaxicon ne inon Jeju ta cocon pata', ame hwe e'. Main tomi' ca' ton Te co pe pawin cwain: Wari' ne inon co cwa' ta ton con.

Lucas 10:20

Ane tomi' xim xuhu' pain i ca' ne: Ta tomi' querec te e' hwe pain ca tomi' ha' cucuhu' oro caxicon jam pain ca tomi' jein pin huhun ma' me. Tomi' querec te pan e' je pain ca xirao' to xine wuxuhu' pain pawin cain na ca tomi' tococwa ma'.

Lucas 12:8

Tomi' xim inuhu' pain i ca' quem ac tococwa na. Wari' co tomi' hwet nonon oro win ma' ca pata' pain ca Taramaxicon ne inon Jeju ta cocon pata', ame hwe e'. Main tomi' toton oro jam co taramaja mi' nonon Iri' Jam cwain. Wata' pain ca Iri' Wari' ta' ca', tomi' ca' toton: Wari' ne inon co cwa' ta toton con.

Filipenses 4:3

Wum co taramaja wi taxipa' napa' pain ca taramaja ne pane, tomi' xim inem quem. Quep xiho' raram, ma' ta tomi' querec te mami' xequequem. Xi wara quep xiho' tamana ara cacapa' pain ca taramaja ne pane ta. Wiricacam, wirico Clemente, wiricoco oro xucucun co quep xiho' nanapa' pane, pain ca pijim' hwet tain capijacon Iri' Jam con Jeju pane, xirao' to ta wixicacam pain tapari carawa ca xirao' to xine wixicocon oro co e' cara xi' nana quem.

Judas 1:24

Xica' pe na Iri' Jam co Iri' Jam ma', co mam' to' witan napari' con Taramaxicon nexi' Jeju Cristo. Hwara' opa na. Ha' non pain ca narain ho' cuhu' pain ca camara' wa pain ca caracat wa ta. Ha' non pain ca to' om pin cain oro ca to' em' nuhu' ma', je pain ca ja' tomi' querec te tamana cuhu' pain ca aram aram coco' quima hwet xine pain ca awi tamana ne ta cuhu' ma'. Na e' na pain ca tomi' querec te xun pain ca awi tamana nucun ma', je pain ca iri' Taramaxicon nucun ma', je pain ca hwara' opa tamana nucun ma', je pain ca taramaxicon hwara' opa tamana pan ca quem. Wara ac i ma' na pain cara pane, pain ca om quep querec cain oro carawa pane, ac i ma' ac i ma' wet na pain xocori ca', ac i ma' ac i ma' cara tara ta. Amém, iri'o' na ca tomi' ne ta. Je i ca' ca xirao' ne ca'.

Apocalipse 13:8

Co ma' co ac Wijimain Taramaji Ovelha ma', co wara coromicat an pe xo' ca Iri' Jam pain cara pane, pain ca om tomi' ma' pin querec cain macan' pane, co main to' pa' pin xim nenem oro caracat ta ca pane, ma' non tapari carawa ca xirao' to xine wixicocon oro co e' cara xi' nana ma'. Oro wari' co to nanain oro xijein macan' ma', co om xirao' to wa wixicocon pain tapari carawa nucun co ma' co ac Wijimain Taramaji Ovelha ma', wa wa wa wa xam' totoron co ma' co ac caji carawa ma'. Pe torotop mi' querec te totoron quem.

Apocalipse 17:8

Co ac caji carawa co querec ma ma', e' paxi' na ira, ane om e' mami' ca pain xocori ca' ne. Mi' pin na. Wara piri' ca' tain nain cote ne man ca om tawirinain cain. Main to' om pin ac tocwa tara ta, ame ma e'. Oro wari' co to nanain oro xijein macan' ma', co om xirao' to wa wixicocon pain tapari carawa ca xirao' to xine wixicocon oro wari' co e' cara xi' nana ma', co om xirao' to wa wixicocon pain ca om tomi' ma' pin querec xine macan' pain cara pane quem, querec iri totoron co ac caji carawa co ma' 7 ne winacon ma' ne, wa wa ac cocon tara. E' paxi' na ira, ane om e' mami' ta' ca pain xocori ca' ne. Ame ma e', main e' mami' tara quem, ac i ma' na ca tomi' capa' ma'.

Apocalipse 19:8

Wara mi' nam con iri' wom co awi tamana Iri' Jam. Toc meremem na, om ca em' camain' ca quem. Ac i ma' na ca merem caca ma'. Ma' na ca tomi' joc mam' mi' ca wom co pe cama ma', co awi tamana ma'. Tomi' joc mam' mi' nain oro carawa ca awi ca ara caca oro wari' nucun Iri' Jam.

Apocalipse 2:11

Mo ta taraju pa' xixi' na hwe ma', je ta taraju wet qui' hwein ca tomi' nein Tamataracon Iri' Jam ca', pain ca tomi' cocon oro co cut in xucucun pain ca howa cacapa' ma'. Oro wari' co hwara' opa cara nana pain ca howa nucucun ma', om ta cono' mami' caca, om ta mama' cacain cote ne xe, om ta to ni ca' cocon Iri' Jam ta. Je ca xirao' mi' roron oro co howa to nanain Esmirna ta capa' pane.

Apocalipse 2:7

Mo ta taraju pa' xixi' na hwe ma', je ta taraju wet qui' hwein ca tomi' nein Tamataracon Iri' Jam ca', pain ca tomi' cocon oro co cut in xucucun pain ca howa cacapa' ma'. Main tomi' ca' toton oro wari' co hwara' opa cara nana pain ca howa nucucun ma': Xac jein winain panaji memem ca mi' nain ca e' cara wa ma', ca tarama' pe nain totacon Iri' Jam ta toton. Om ta narain ho' toton pain, xac jein ta toton. Je ca xirao' mi' roron oro co howa to nanain Éfeso ta capa' pane.

Apocalipse 20:12

Querec inonon co wara cono' nana ma' quem. Co hwara' opa nana ma', co om hwara' opa nana ma' quem, querec inonon pain ca coco' quima hwet cacain ca mam' xao pe nucun. Pa ac xine na oro tapari carawa ca xirao' to xine oro ca ara caca pain ca e' e' wet nucucun pane. Pa ac xine na wirain tapari carawa ca xirao' to xine wixicocon oro wari' co e' cara xi' nana quem. Noro iri ta ca xirao' to xine oro ca ara nucucun ne, win ne ca ara hwe pane ac tococwa na, wap wap ac tococwa na.

Apocalipse 20:15

Oro wari' co om xirao' to wa wixicocon pain tapari carawa ca xirao' to xine wixicocon co e' cara xi' nana ma', wixicaracao' mi' ac tococwa na pain cote ne xe ca ac xuterem' ta.

Apocalipse 21:27

Om ta corom camain' caca oro wari' co to' em' xucucun pain ca pan teretem nucucun ma', cocon oro co ara taxipa' nanain oro ca om querec awi non Iri' Jam ma' quem, cocon co mixein nonon oro win ma' caca ma' quem, om ta corom camain' caca. Corom xica' to e' tatara oro wari' co xirao' to wa wixicocon pain tapari carawa nucun co ma' co ac Wijimain Taramaji Ovelha ma', corom xica' to e' tatara co xirao' to wa wixicocon pain ca e' cara xi' caca ma'.

Apocalipse 22:19

Wari' co xic am nain ca xirao' nein ma', am xic am wijimain e' tarain, wap ac tocwa tara quem. Wirico Iri' Jam tara co wap ton non. Nain ho' toron pain ca xac wa winain panaji memem ca mi' nain ca e' cara wa, nain ho' toron pain ca corom wa cidade nucun quem.

Apocalipse 3:12

Oro wari' co hwara' opa cara nana pain ca howa nucucun ma', to' hwara' opa ac toton tara, quep ac xipain xirim pin toton, pain xiricon Iri' Jam ne cwa', coco' to cara ac cacain tara, om ta hwerehwet ca' camain' cacain. Xirao' toton pain wixicon Iri' Jam co taramaja mi' ta' cwa', xirao' toton pain wixinain cidade nucun quem, je wixinain Xocori Jerusalém ca quiji' qui' nain ca pe pan ca pain pawin cain quem. Xirao' toton pain xocori wuxu ca' quem.

Apocalipse 3:4

Ac i ma' paxi' hwe, ane ma' paric ca' e' caca oro win ma' nuhu' co om ara em' xucucun pain Sardes ma' ne. Om ca ara mixem pin cocon womicocon. Ame hwe e', main to totoron wom co towo', xuruxut wi ac cacapa' tara. Xi querec pin' ara tococwa pain ca hohot cacapa' ta.

Apocalipse 6:11

Mi' mi' xam' ac tococwa na con wom co towo'. Ame cain' hwe e', ma' ma' wet ara xi' nana oro xuruhu' co win howa hwe ma', co taramaja wi nunuhu' pain ca taramaja mi' mahu' ma'. Xam' cain' tatara pain ca to' parapa' pin xun wawa, win xihwe ma', ac i ma' na ca tomi' tococwa ma'.