Apocalipse 3:17 - Tradução Bíblica Pacaas Novos

¹⁷ Tomi' ac i ca' hwe: Caramaju urut, mija naparut oro carawa. Om na carawa ca om naparut, ma' ma' pi' pin naparut oro carawa ca param urut, ac i ma' paxi' na ca tomi' hwe ma'. Ane om querec pin' hwein ca ximin nuhu' ne. Xiram pa' inuhu' ta. Xi querec pin' xujuhu' pain ca om cuhu' iri' carawa ta. Om na tucuhu', om na womuhu' quem.

Apocalipse 3:17 Iomraidhean Croise

Mateus 5:3

Param mi' tata pain ca awi wa oro wari' co ximin nana ma', xi wari' ne ara tococwa pain ca taramaxicon pe ho' xun tococwa ma'.

Mateus 9:12

Taraju nonon Jeju ma' quem. Tomi' ac cocon na: Om ca cwirin' je toton oro wari' co awi urut xi' ma nana ma'. Cwirin' je e' inonon co querec pin' pan xucucun pain ca caracat nucucun. Win ne ca om aramao xio tococwa oro wari' co om caxi nana ma'. Aramao xio e' tata co caxi nana ma'.

Lucas 1:53

Oro wari' co pe' nana ma', xiram pa' ac tococwa na, to' ma'am ac tococwa na pain oro carawa ca awi. Oro xucucun wari' co caramaju nana ma' iri nana ne, om ca xiram pa' tococwa, in ca' xine tata, werem pa' e' nana.

Lucas 6:24

Wahu' pain ca caramaju hwe pain xocori ca' iri na ne, main maqui' tara xec nein ca ximin tamana xi' hwe. Xi wara ma' ara cuhu' carawa ca ja' tomi' querec te nuhu' pain xocori ca' quem.

Romanos 11:20

Je paxi' na, ane hohot ne pain ca mam' pe wet hwein i ca' ne: Jicaracat pin tata, wac pit pin tata. Xi howa caca ta. Wahu' iri na ne, hwara' opa hwe, to pin hwein pana, xi om ne ca howa ara hwe ta. Ta xin to hwe me ta. Jin' je, ma' tara xumuhu' me.

Romanos 11:25

Je ca tomi' xuhu' ca' xere: Ma' na ca coromicat nucun Iri' Jam ca om taraju pa' wa ira. Taraju pa' ho' jein inuhu'. Ma' ta om coromicat ximama' hwe pain ca awi tamana urut ximama' hwe ma'. Ca' na ca coromicat nucun Iri' Jam ca om an hwet querec ca ira: Oro judeu cwa', co waram winacon Israel nana cwa', om ta ari cara cacapa'. Ari ari ca' tatarapa'. Xam' iri tatara oro co om judeu nana ne, co howa xim nanapa' ma', ari ari om ac cacapa' tara oro judeu cwa', ac i ma' na ca coromicat nucun Iri' Jam.

Romanos 12:3

Je ca tomi' xuhu' ca': Hu xim inuhu', hu hu pi' pin xim inuhu', xi om ne ca hu roron ara capa' Iri' Jam pahu'. Ta coromicat mi' xujuhu' pain ca awi ina, taxi' tamana ina wa me. Coromicat xo' je, querec pin' jein ca taramaja taxi' wa ca mi' cuhu' Iri' Jam ma', pain ca taramaja mi' taxi' hun ma'. Win ne ca mi' pan cuhu' pain ca howa hun ma' quem.

Romanos 7:24

Ximin ina ta! Ma' co to' witan pin xim napa' cwa' ne ma' ina. Ma' co mi' xim napa' pain ca witan ca' tain cwere ca taramaja mi' nain ca mi' pin wa ca' ne ma' ina.

2 Pedro 1:9

Wari' co om ara nain ca tomi' mi' xuhu' ca' iri na ne, ac ca om ne na tocon, ac ca paxi' pe ca na, xi taraju pa' ca ta. Ji'am pin nain ca ara nucun Iri' Jam pane, pain ca xic am pin qui' cain ca caracat nucun pane.

Apocalipse 16:15

Je ca tomi' capari' ca': Taraju wet xine me. Ane ane maqui' pa' xuhu'. Win ne ca ane ane maqui' ca wari' co an noc xa ta' ma', ac i ma' tara ca ane ane maqui' pa' xuhu'. Iri' Jam ma', param mi' totoron pain ca awi wa oro wari' co winim' xo' cara nanapa' ma', pain ca wara an pe xo' cocon womicocon ma', pain ca om an xiho' cocon wari' co pi'am ca' nonon co an noc xa ta' ma'. Om ta wixipa' caca pain ca ane ane maqui' pa' toton pain ca ac ca hwet pe ne ne curucucun pain ca om winim' xo' cacapa' pain ca maqui' ta' ne ta. Ac i ma' na ca tomi' capari' ca'.

Apocalipse 2:9

Taxi' inuhu' pain ca jain jain nuhu' pain ca quep em' xihwe ma'. Taxi' inuhu' pain ca ximin hwe ma', pain ca om cuhu' oro carawa ma' quem. Om paxi' nuhu' carawa, ane ma' cuhu' iri' carawa pata' ne. Taxi' inuhu' pain ca tomi' napat cucuhu' caram ma' co judeu urut paxi' nana ma'. Xi iri' judeu caca ta. Oro wari' nucun Satanás ara xi' nana pain ca ca' na cacain oro ca tomi' nucun ta.

Apocalipse 3:16

Je i ma' ira mahu'. Mo xi win xumu mip mahu'. Xi om ne ca an xiho' ara hwein com ca xain wijimain ma'. Noro jun wari' co toc nain com ma'. Toc iri nain ca xain wijimain nein ne, we' hwet pin ac cain na. Ac i ma' xuhu' quem, an xiho' ara xi' hwein com ca xain wijimain ma'. We' hwet pin ac xuhu' tara ta.