Apocalipse 3:10 - Tradução Bíblica Pacaas Novos

¹⁰ Wara hu inuhu' pane, quereme cara jein oro ca to' i'ina nuhu' me inuhu' pane. Tomi' ha' mahu' quem. Je ca narain ho' xim xuhu' pain ca jain jain wa pain oro xec pain ca to' jain jain toton ta' oro wari' co to nanain macan' ma'.

Apocalipse 3:10 Iomraidhean Croise

Mateus 24:14

Pijim' mama' ac cacain tara oro xijein macan' oro wari' ne quem. Tomi' hwet tomi' hwet xam' ac cocon tara oro wari' pain capijacon Iri' Jam ma', pain ca tomi' xo' cocon pain ca taramaxicon pin ta' ca Iri' Jam ma'. Taraju taraju xam' iri tatara oro wari' ne, pi' pin ac ne tara macan' ta.

Mateus 26:41

Ta pi'am hwe me ta ac tococwa na. Momon tomi' jun Iri' Jam, ma' ta om ja' camara' xihwe pain ca tomi' querec cuhu' Caxicon Jam ta. Tomi' ha' xi' paxi' hwe pain xumuhu' ma', ane om hwara' opa hwe pain curuhu' ma' ne na ca tomi' tococwa ma'.

Mateus 6:13

Narain ho' xut pain ca tomi' querec caparut Caxicon Jam quem. To' witan ca' xut con quem. Wum pan ara xi' na co Iri' Taramaxicon cara ma'. Tama' hwara' opa cara ma quem. Tama' awi tamana na ta cara nenem oro wari' cwa' quem. Amém, iri'o' na ca tomi' ne ta. Ac i ma' je pain ca tomi' xun hun Iri' Jam ta na ca tomi' tococwa ma'.

Marcos 14:9

Je ca tomi' xuhu' ca', tomi' iri'o' inuhu'. Oro wari' co pijim' mama' xin nanain pira ma', pain ca tomi' hwet xun cacapa' cocon oro xucucun wari' ma', pijim' hwet ac cacain tara ca ara mi' capa' cam cwa' ta. Mam' pe wet cara ac tacama tara ta na ca tomi' tococwa ma'.

Lucas 2:1

Pan' qui' iri na João ne, om ca pain homa ne, tomi' ac ca na iri' taramaxicon nucucun oro romano ma', Augusto ma'. Tomi' tomi' pi' pin tata oro wari' co to nanain oro macan' ca taramaxicon pe ca pane. Na e' na pain ca xirao' to xine oro wuxuhu' ta tata.

João 17:6

Oro wari' co tora' ma pain macan' ca', co mi' mapa' cwa', an hwet mi' inonon pain ca hwara' opa nem pain ca Iri' Jam nem ta ac con na. Wara wari' ne momon, mi' ac mapa' cocon na. Tomi' ha' nanain capijam quem.

Romanos 1:8

Tomi' cain' xuhu' pain i ca' quem: Tomi' querec te inon Iri' Jam ne cwa' pahu'. Wirico Jeju Cristo co mi' napa' pain ca tomi' querec te ton pahu'. Xi om ne ca taraju taraju xam' ara cucuhu' oro wari' pain oro xijein macan'. Howa nonon Jeju ta nunuhu' oro wari' pain oro xijein macan'.

1 Coríntios 10:13

Taraju wet je e': Pain ca to' i'ina cuhu' oro carawa ma', je cwerein mao na. To' i'ina taxipa' tata oro wari' ma' quem. Ane om an in pan cain capijacon ca wara tomi' pe capari' Iri' Jam ne. Om ca mixein cuhu' Iri' Jam. Narain ho' nuhu' con Caxicon Jam ma', pain ca caracat je caracat je ja' camara' xim cuhu' ma'. Quep xiho' nuhu', to' quereme nuhu' quem. Tomi' querec iri turuhu' Caxicon Jam ma' ne, pain ca caracat je cuhu' ma', quep xiho' pan ac cuhu' tara Iri' Jam. Mi' pan ac cuhu' tara pain ca witan ca' hun Caxicon Jam, ma' ta quereme hwe ma', ma' ta hwara' opa cara hwe ma' quem.

Efésios 6:13

Je ta cut pi' pin qui' hwein oro ca mam' narain ho' xujuhu' ca mi' cuhu' Iri' Jam ta. Maqui' iri tara xec nein ca joc camara' pin xim cuhu' Caxicon Jam ne, na ac cuhu' tara pain ca mam' mixita hun pain oro ca mam' narain ho' xujuhu' ca mi' cuhu' Iri' Jam. Hwara' opa hwara' opa to wet ac hwe ma' tara ta.

2 Timóteo 2:12

Taramaxicon wi xun quem, xi momon quereme ara xin oro ca to' i'ina napari' ca'. Mo ta om querec pin' xim ta xun, om ca querec pin' xim ta ac capari' tara quem.

Tiago 3:12

Noro jein oro xijein panaji memem quem xere. Panajinain figo ma', mi nain azeitona ra? Om na. Panaji uva ma' quem, mi nain figo ra? Om na quem. Ac i ma' na comicon hoi hoi ma' quem. Mo ta weweweo qui' nein com ca toc quirijo ma', om ca jao jao weweweo qui' ac nein com ca toc awi ma' quem.

1Pedro 4:12

Je ca tomi' xuhu' pain ca tomi' querec te xuhu' ca'. Mija paxi' na ca quep em' xihwe ma', ma' ta querec pin' xihwe pain ca howa hwara' opa nuhu' ma'. Je i ma' ira, ta wa ina me hwe me, ta tomi' ximama' hwe pain ca para quep em' cacapa' ne hwe me, je xi nain ho' capa' pain ca jain jain tamana wa Iri' Jam ca' hwe quem me.

2 Pedro 2:9

Mam' pe wet iri irin oro ca ara ca Taramaxicon Iri' Jam pane ne, querec pin' ac urun na pain ca xiram pa' taxi' cocon oro co win xumu nanain ca param pan nucun ma', je pain ca to' witan ca' taxi' cocon pain oro ca to' i'ina nonon ma', querec pin' ac urun na pain ca pao' to taxi' cocon oro caracat co miri'om nonon quem. Pao' to pao' to maqui' pa' ac tococwa tara xec nein ca wap toton cocon pain ca caracat nucucun.

Apocalipse 1:9

João ina pain ca xirao' mi' xuhu' ca'. Xere xijexi' pain ca howa xun Jeju. Win ma' ne xijexi' pain ca jain jain wi iri' cocon oro wari' co quep em' nanapari', xi om ne ca taramaxicon ne ara xun Iri' Jam ta. Win ma' ne xijexi' pain ca quereme cara xin oro ca to' i'ina napari' pain ca howa xun Jeju quem. Pe inain xixi pan nein macan' Patmos. An mao nanapa' pain i cain pane, xi om ne ca pijim' ara tain capijacon Iri' Jam pane, xi om ne ca tomi' hwet ara toton con Jeju oro wari' pane quem.

Apocalipse 11:10

Tomi' querec te tamana tatara oro wari' co to nanain oro xijein macan' ma', tomi' querec te tamana tatara pain ca cono' pin nucucun. Tomi' querec te xi' e', xi om ne ca cono' pin ara caca caram ma' co to' jain jain nanapari' pain ca to xin oro xijein macan' ta tatara, mi' querec te caracan ac xucucun tara pain oro carawa quem.

Apocalipse 13:10

Wari' co wara coromicat an pe mi' ca Iri' Jam pain ca quep xun tocwa ma', quep ac tocwa tara. Wari' co wara coromicat an pe mi' ca Iri' Jam pain ca to' pa' pin xun tocwa pain cote ne quit ma', to' pa' pin ac tocwa tara pain cote ne quit. Je ca tomi' xuhu' pain ca wari' nucun Iri' Jam hwe ma': Quereme cara jein oro ca to' i'ina nuhu' ma'. Win xumu jun Iri' Jam, howa cara jun ta.

Apocalipse 13:14

Mixein mixein pi' pin tata oro wari' co to nanain oro xijein macan', xi om ne oro ca ara ca ma', ca om ara taxi' ne ca wari' wa ma', ca ara ra pan con co hwet qui' cain' ma'. Tomi' ac tococwa na oro wari': Quep jein caji pacun ma', ara an xiho' jein curucun co ma' co hwet qui' cain' ma', co to' pa' pin paxi' wa pain cote ne quit ma', co e' mami' ma'. Pe torotop mi' querec te ac hwein tara ta, ac i ma' na ca tomi' tococwa oro wari'.

Apocalipse 13:8

Co ma' co ac Wijimain Taramaji Ovelha ma', co wara coromicat an pe xo' ca Iri' Jam pain cara pane, pain ca om tomi' ma' pin querec cain macan' pane, co main to' pa' pin xim nenem oro caracat ta ca pane, ma' non tapari carawa ca xirao' to xine wixicocon oro co e' cara xi' nana ma'. Oro wari' co to nanain oro xijein macan' ma', co om xirao' to wa wixicocon pain tapari carawa nucun co ma' co ac Wijimain Taramaji Ovelha ma', wa wa wa wa xam' totoron co ma' co ac caji carawa ma'. Pe torotop mi' querec te totoron quem.

Apocalipse 14:12

Je ca tomi' xuhu' ca': Wahu' pain ca wari' nucun Iri' Jam hwe ma', pain ca tomi' ha' hwein oro ca tomi' ha' je cuhu' ma', je pain ca win xumu cara hun pain ca howa cara hun Jeju ma', quereme cara jein oro ca to' i'ina nuhu' ta.

Apocalipse 14:6

Querec ac ton na xucun jam co taramaja mi' non Iri' Jam. Ho pe nain iri' pawin. Tomi' hwet tain capijacon Iri' Jam ca om pi' ra ha' ma', ca tomi' hwet nonon pain ca to' witan pin toton cocon oro wari' Iri' Jam ta na. Tomi' hwet toton pain oro wari' co to nanain macan' ma', wiricoco co to nanain oro xijein macan' ma', cocon oro co xucun wari' xucun wari' pi' pin nana ma', cocon oro co capija ni ca' nonon oro xucucun wari' ma', cocon oro co to ni ca' nonon oro xucucun wari' pain macaracocon ta na.

Apocalipse 16:14

Iri' caxicon jam nana. Ara nanain oro ca om ara taxi' ne ca wari' wa ma', ca wa wa caca oro wari' ma'. Hwet ac tococwa na oro taramaxicon pain oro xijein macan'. Cut in xijexi', mixita xun Iri' Jam ta ac tococwa na. Xec nein ca mixita xi' nucucun ma', je i ma' tara iri' xec nein ca hwara' opa pan ca Iri' Jam.

Apocalipse 17:2

Caracat wi xi' ta nonon oro taramaxicon co taramaxicon to nanain oro xijein macan', win ne ca param ni ca' ton taxi cwa', param ni ca' jun Iri' Jam ta nonon. Oro wari' co to nanain oro xijein macan' ma' quem, ac ca toc tamanain to cacain na comi uva nequem ca mana' ma', ca tomi' joc mam' mi' nain oro ca om awi wa ca ara cama pain ca caracat wi cocon oro xucucun taramaxicon.

Apocalipse 17:8

Co ac caji carawa co querec ma ma', e' paxi' na ira, ane om e' mami' ca pain xocori ca' ne. Mi' pin na. Wara piri' ca' tain nain cote ne man ca om tawirinain cain. Main to' om pin ac tocwa tara ta, ame ma e'. Oro wari' co to nanain oro xijein macan' ma', co om xirao' to wa wixicocon pain tapari carawa ca xirao' to xine wixicocon oro wari' co e' cara xi' nana ma', co om xirao' to wa wixicocon pain ca om tomi' ma' pin querec xine macan' pain cara pane quem, querec iri totoron co ac caji carawa co ma' 7 ne winacon ma' ne, wa wa ac cocon tara. E' paxi' na ira, ane om e' mami' ta' ca pain xocori ca' ne. Ame ma e', main e' mami' tara quem, ac i ma' na ca tomi' capa' ma'.

Apocalipse 2:10

Ta jin' hwein oro ca jain jain wa ca maqui' pa' xim nuhu' con Caxicon Jam me ta. Ma' tatara oro win ma' nuhu' co wixicao' mi' ca pain xirinain ca tao' to tao' to to wa, quep em' querec ac tococwa tara, am an pe pin xin hwein ca howa nuhu' ta ac tococwa tara quem. Ma' 10 tara xec pain ca jain jain xi' hwe pain ca quep em' xim cuhu' Caxicon Jam. Win xumu cara xine me. Mo ta to' parapa' pin xim cucuhu' pain ca howa mahu' ma', je i ma' ira, to' parapa' pin ma' tatarapa' ne ac huhun tara. Mi' pan ac xuhu' tara pain ca om pi' ra ha' ne ca e' wa ta.

Apocalipse 3:8

Taxi' inuhu' pain oro ca ara hwe ma'. Om paxi' na ca hwara' opa hwe ma', xi om ne ca paric to ara hwe ta. Ane tomi' ha' cara mahu' ne. Om ca an pe pin mahu', howa cara mahu'. Noro je, pa mi' inuhu' pain man ma'. Om ca tao' pa' ac cacain oro wari' quem.

Apocalipse 6:10

Merem mip ca' nana: Cain' cain' ta' ma ma' quem Iri' Taramaxicon co iri'o' ma', co awi tamana pain ca pe ni ca' main ca caracat wa ma'? Cain' cain' ta' ma ma' quem? Je xi wap hap momon oro wari' co to nanain oro xijein macan' quem? Em' hwe, mama' jein cote ne xe ta ximomon quem? Win ne ca to' parapa' pin cacaparut pane, ac i ma' na ca merem mip cocon ma'.

Apocalipse 8:13

Noro noro wet inain, taraju ac ton na wajo co ho pe pawin. Tomi' mip ac ca na: Ximin tamana tatara oro wari' ta. On iri tatarain caji taracom oro xucucun jam co taramaja mi' nonon Iri' Jam ma' ne, co ma' 3 nana ma', co om on querec nanain caji taracom nucucun ma', ximin tamana ac caca tara oro wari' co to nanain macan' ma', pain ca maqui' pa' toton cocon carawa ca om awi. Wa inonon me, wa inonon me, wa inonon me, ac i ma' na ca tomi' mip ca ma'.