Apocalipse 21:21 - Tradução Bíblica Pacaas Novos

²¹ Ca mam' tao' pa' nein oro manain ca mam' corom ac wa ma', quep ta pain pérola, je i ma' wixinain pacun ca mam' quep xine oro manain ca corom ac wa ma'. Awi tamana na. Mam' quep mam' quep xam' ta pain ca xica' pe nein pérola. Wana pain ximijain cidade ma' iri na ne, ca xuruxut ac caca oro wari' ma', mam' quep ta pain ouro ca awi tamana quem. Om ca em' camain' ne, ac ca mam' querec ca jamu wa na. Awi tamana na quem, om ca tocohon camain' ne.

Apocalipse 21:21 Iomraidhean Croise

Apocalipse 17:4

Caxicam narima' ma', pe non wom co tum ma', co paca' ma' quem. Mija na dinheiro nucun womicam. An warawa pan xequem pain oro xijein too ca mam' xec xec cama ma' quem, je ouro, je oro pacun ca awi tamana, je oro xijein wijimain pacun ma' quem, pérola na wixinain. An na pain micam ouro ca moin' pe nain oro ca om awi ma', ca noc tamana pan ca Iri' Jam. Moin' pe nain oro ca pan tem tamana nequem pain ca param ni ca' con Iri' Jam ma'.

Apocalipse 18:16

merem ac caca tara: Wa urut pahu' pain ca to hwein cidade ma', pain Babilônia ma'. Ximin hwe! Wa wa tamana paxi' nunuhu' oro wari' pane ira. To paxi' hun wom co awi tamana, co mija dinheiro nucun pane, to paxi' hun wom co paca' pane quem. An warawa paxi' xujuhu' pain oro xijein too ca mam' xec xec hwe pane, je oro pacun ca awi tamana, je oro xijein wijimain pacun ma' quem, pérola ma'.

Apocalipse 21:15

Jam co taramaja mi' non Iri' Jam ma', co tomi' napa' ma', an nain taparain pana ca mam' tacan wa, ac taparain pana paxi' na, mam' quep ta pain ouro. Tacan tain cidade ma', je oro manain ca corom ac xine ma', je cote ne pacun ca tao' caho' nain ma' quem ac ca na.

Apocalipse 21:18

Ca tao' caho' nein ma', mam' quep ta pain jaspe, je i ma' wixinain pacun ca mam' quep xine ca tao' caho' nein. Cidade ma' iri na ne, mam' quep ta pain ouro ca awi tamana quem. Om ca em' camain' ne. Ac ca mam' querec ca jamu wa na. Awi tamana na, om ca tocohon camain' ne.

Apocalipse 22:2

Weweweo ac nain ximijain wana ca xuruxut ac caca oro wari' ma', pain ximijain cidade ma'. To nain cacarain com panaji memem ca mi' nain ca e' cara wa, pain xijein cacarain, je pain xijein cacarain ma' quem. Oro winain memem ca mi ne ma', mi mi xam' non oro panawo', mi mi hwet pa' nain xijein cawaxi' quem. Oro tenenein ma', je ca mam' to' om pin xine ca caxi nucucun oro wari' co to nanain oro xijein macan'.

Apocalipse 4:6

Pe quima hwet nain ca mam' xao pe nucun cote ne com ma' quem. Ac ca mam' querec ca jamu wa paxi' na. Awi tamana na, om na homiri, om ca tocohon camain' ne. To nanain ximijain caram ma' co e' nana ma', co ac jam paxi' nana ma'. Ma' 4 nana. Mija na tococon, to to xam' na tococon pain quimacocon, je pain waracocon. To to mam' pin nanain ca mam' xao pe nucun taramaxicon ma'. Pe nain quimacon xucun, pe nain waracon xucun, pe nain quiricon xucun, pe nain xijein quiricon xucun ma' quem.