Apocalipse 20:4 - Tradução Bíblica Pacaas Novos

⁴ Querec ac tain na oro ca mam' xao to nucucun oro taramaxicon. Ma' tocwan na. Xao to to nanain caram ma' co mi' wawa pain ca hwara' opa wa ma', pain ca tomi' xo' jujun oro wari' pain oro carawa ca ara caca pain ca e' e' wet nucucun pane wawa ma'. Querec inain tamataracocon co wara cono' nana ma' quem, co ton tapit pin wawa pain winacocon pane, xi om ne ca tomi' hwet ara cocon con Jeju oro wari' pane. Pijim' nanain capijacon Iri' Jam pane, je ca ton tapit pin xine winacocon pane. Om ca pe torotop mi' querec te cocon co ma' co ac caji carawa co hwet qui' cain' pane, om ca pe torotop mi' querec te cacain pacun ca an xiho' nain curucun pane quem. Om ca xirao' xirac tococwa pain wixinain pain jitaracocon pain micocon pane quem. E' mami' nana, taramaxicon wi ac cocon na Cristo quem. Ma' 1.000 na cawaxi' pain ca taramaxicon wi cocon Cristo.

Apocalipse 20:4 Iomraidhean Croise

Mateus 19:28

Ame hwe e' ac caparut na. Maqui' cain' tara xec nein ca quep xocori pin tain cain oro carawa pain macan' ta na Iri' Jam ca'. Xao pe ho' pin ac tain tara ca mam' xao pe ne pain ca taramaxicon pin ta' ta' ca'. Wata' pain ca Iri' Wari' ta' ca', taramaxicon hwara' opa pin ac ta' tara ta. Awi tamana tara ca taramaxicon ne. Taramaxicon wi ac mahu' tara quem. Wahu' pain ca taxipa' mahu' ma', xao to xao to xam' ac hwein tara ca mam' xao pe nucun taramaxicon. Ma' 12 tara ca mam' xao to nuhu' pain ca taramaxicon wi mahu'. Taramaxicon to ho' ac huhun tara waram winacocon mana panxica Israel cara pane, co ma' 12 nana cara pane. Tomi' iri'o' inuhu'.

Mateus 24:10

Aram aram mija pin ac caca tara co an to pin nanapa'. Howa howa om pin tatarapa'. Noc ac xucucun tara, tomi' mi' caracan ac xucucun tara cocon oro taramaxicon.

Marcos 6:16

Herodes ma', taraju iri nain ca tomi' nucucun ne, tomi' ac ca na: Om na, wirico tara João cara pane. Ton tapit pin jein winacon paxi' inonon oro wari' ne co taramaja mi' nanapa' pane, ane e' mami' ca ne. Wirico tara ta na.

Marcos 6:27

Tomi' hap ac con na soldado nucun: Ton tapit pin rain winacon João ma'. An qui' ac main tara ta na ca tomi' con ma'. Mao ac cain na xirinain ca tao' to tao' to to wa ma', ton tapit pin ac cain na winacon.

Marcos 9:11

Tomi' querec ac cocon na quem: In qui' cain' tara nonon Elias oro co ca' na taxipa' nanain ca xirao' nucun Moisés ma'. In qui' cain' tara, maqui' ac ca tara co tomi' pe pin ca Iri' Jam pane nana. Cain' cain' xirara quem? Para tomi' ac i ma' caca quem? Ac i ma' na ca tomi' querec cocon ma'.

Lucas 1:17

Wirico tara panxima co wara o ta' na con Iri' Taramaxicon co wara tomi' pe ca Iri' Jam pane. Pijim' hwara' opa tamana tara, win ca profeta Elias cara pane, an xiho' toron Elias pain ca pijim' hwara' opa nucun. To' om pin tarain ca mana' caracan xucucun mana cote caca cocon mana panxicaca, tomi' querec te pin mami' ac xucucun tara. To' coromicat xo' pin ac cocon tara oro wari' co ari nonon Iri' Jam ma', aram aram coromicat an xiho' pin ac cocon tara co tomi' ha' nana ma' quem. Tomi' tomi' wara awori xo' totoron oro wari', ma' ta winim' xo' cocon Iri' Taramaxicon pain ca aram aram maqui' nucun. Ac i ma' na ca tomi' con Zacarias jam co taramaja mi' non Iri' Jam pane.

Lucas 14:14

Param mi' ac quem tara pain ca awi wa Iri' Jam ma', xi ha' cocon pain ca pagar in hwet ac quequem co ximin nana ma'. Om ca win maparut pain ca harahap je maparut pane ac quequem. Pagar in hwet pan terem Iri' Jam ma', pagar in hwet pan terem pain xec nein ca to' e' mami' toton cocon oro wari' co hohot nonon ma' na ca tomi' con ma'.

Lucas 22:30

Cao' querec te to ho' ac xijexi' tara pain ca taramaxicon pe ta' ta' cain. Xao to ac hwein tara ca mam' xao pe nucun taramaxicon, tomi' querec tomi' querec ac huhun tara pain oro ca ara nucucun waram winacocon mana panxica Israel cara pane, co ma' 12 nana cara pane na ca tomi' tococwa ma'.

João 14:19

Om ta pain homa ne, om ac ne tara ca querec mami' cacapa' co om howa nanapa' ma'. Wahu' iri na ne, querec mami' ac mahu' tara. Om ta pi' ra ha' ne ca e' nuhu' ta. Xi pi' ra ha' ne ca e' ne ca' quem.

Romanos 11:15

Joc in pin iri nonon oro win judeu ta' Iri' Jam pane ne, taxipa' pin xine ta ac tococwa na oro wari' pain oro xijein macan'. Je ca tomi' xuhu' ca': Om ta awi tamana ne ca tomi' querec te xun pin tococwa oro win judeu ta' cwa' ra? Ac ca to' e' pin tococwa tara co cono' nana ta.

Romanos 8:17

Je ca mi' xim capari' pain oro ca awi wa ca wara tomi' pe mi' capari' pane, xi om ne ca mana panxica ara iri' ta. Main cut xin con, cut wi xin con Cristo. Mo ta an xiho' xun Cristo pain ca jain jain nucun pain macan' ca', mo ta jain jain wi xun, tomi' querec te ac capari' tara Iri' Jam. Tomi' querec te wi ac capari' tara con Cristo, mi' wi ac capari' tara pain ca jao jao ma' xun pain ca awi nucun pain ca hwara' opa nucun quem.

2 Timóteo 2:12

Taramaxicon wi xun quem, xi momon quereme ara xin oro ca to' i'ina napari' ca'. Mo ta om querec pin' xim ta xun, om ca querec pin' xim ta ac capari' tara quem.

Apocalipse 1:2

Je ca an xin tiquin' mi' xuhu' pain ca xirao' pe ta' ca'. Iri'o' na oro ca xirao' ne ca', xirao' xirao' pi' pin inain oro ca querec ta' con, je oro ca tomi' nucun Iri' Jam ma', xirao' xirao' pi' pin inain oro ca tomi' hwet capa' Jeju Cristo pane.

Apocalipse 1:9

João ina pain ca xirao' mi' xuhu' ca'. Xere xijexi' pain ca howa xun Jeju. Win ma' ne xijexi' pain ca jain jain wi iri' cocon oro wari' co quep em' nanapari', xi om ne ca taramaxicon ne ara xun Iri' Jam ta. Win ma' ne xijexi' pain ca quereme cara xin oro ca to' i'ina napari' pain ca howa xun Jeju quem. Pe inain xixi pan nein macan' Patmos. An mao nanapa' pain i cain pane, xi om ne ca pijim' ara tain capijacon Iri' Jam pane, xi om ne ca tomi' hwet ara toton con Jeju oro wari' pane quem.

Apocalipse 11:11

Ma' 3 pin iri na xec pain ca to' parapa' pin tococwa ne, je pain ca tocon xina pa' pin tococwa pain xijein xec quem, huco' mi' pan ac cocon na pain iri' ca e' nucun Iri' Jam. Tequi' to pin ac caca na, jin' tamana ac caca na oro wari' co querec nonon pain ca tequi' to pin nucucun. Om ca jin' pije' camain' caca.

Apocalipse 11:15

On ac cain na caji taracom xucun jam co taramaja mi' non Iri' Jam, ma' 7 pin ac caca na co on nanain ma'. On iri nain ne, taraju ac toton na co tomi' mip to nanain pawin ma'. Tomi' ac i ca' nana: Taramaxicon pin na Iri' Jam co Taramaxicon ne iri' cwa'. Taramaxicon pin na Cristo co tora' pan ca quem. Wirico Iri' Jam na co taramaxicon pe ho' taramaxicon pe ho' pi' pin toton nonon oro wari' pain oro xijein macan'. Taramaxicon cara tara quem. Ac i ma' na ca tomi' mip caca ma'.

Apocalipse 11:3

Ma' 2 tatara wari' ne co pijim' xin nanain capija ca iri'o'. To totoron caxicon wom, ma' ta querec pin' cacapari' pain ca tomi' xaxa' nexi' pain ca caracat nucucun oro wari' ta tatara. Pijim' hwet ac cacain tara capija. Ma' 1.260 tara xec pain ca pijim' nucucun. Ac i ma' na ca tomi' capa' ma'.

Apocalipse 11:7

Pijim' hwet pi' pin iri tatarain oro ca pijim' je tococwa ne, hwet qui' ac ca tara co ma' co ac caji carawa ca mana' tamana, hwet qui' tarain cote ne man ca om tawirinain cain. Quep toton ta ac tococwa tara, to' quiji' pin ac tococwa tara, to' parapa' pin ac tococwa tara quem.

Apocalipse 12:11

Oro xerexi' ma', wiricoco co to' quiji' pin nonon. Mam' to' quiji' pin nonon pain ca hwara' opa nein quicon co ma' co ac Wijimain Taramaji Ovelha ma'. Mam' to' quiji' pin nonon pain capijacon Iri' Jam ca pijim' caca con Jeju ma' quem. Mo ta to' parapa' xim cacapari' pain ca howa xun Iri' Jam cwa', je i ma' ira, to' parapa' ma' tatarapari' ne nana.

Apocalipse 14:11

Oro wari' co pe torotop mi' querec te ac i ma' nonon co ma' co ac caji carawa co mana' tamana ma', co hwet qui' cain' ma', oro wari' co pe torotop mi' querec te ac i ma' nanain caji pacun ca an xiho' nain curucun ma', co xirao' xirac wawa pain wixicon ma', jain jain cara tatara, pain xec je pain xim. Piri' cara tara tajain xe pain ca jain jain to caca. Om ta pi' pin camain' ne ca jain jain nucucun. Ac i ma' na ca tomi' ca co ma'.

Apocalipse 15:2

Querec ac tain na carawa ca ac cote ne com ma' quem, ca an xiho' nain ca mam' querec ca jamu wa ma'. Ac ca weo ne na xe pain ximijain. Querec ac toton na caram ma' co to' quiji' pin nonon co ac caji carawa co mana' tamana ma' quem, co hwet qui' cain' ma'. Caram ma' co querec ta' ma', to' quiji' pin nonon co ac caji carawa ma', xi pe torotop mi' querec te cacain caji pacun ca ara an xiho' tocwa ta, tomi' in pin nonon oro co xirao' xirac xut pahu' pain número nein wixicon ta nonon ma' quem. Coco' ja' pan nanain cacarain cote ne com ca an xiho' nain ca mam' querec ca jamu wa ma'. Cut nana ca mam' tao' wa ma', ca ac violão paxi' ma', ca mi' pan cocon Iri' Jam ma'.

Apocalipse 17:8

Co ac caji carawa co querec ma ma', e' paxi' na ira, ane om e' mami' ca pain xocori ca' ne. Mi' pin na. Wara piri' ca' tain nain cote ne man ca om tawirinain cain. Main to' om pin ac tocwa tara ta, ame ma e'. Oro wari' co to nanain oro xijein macan' ma', co om xirao' to wa wixicocon pain tapari carawa ca xirao' to xine wixicocon oro wari' co e' cara xi' nana ma', co om xirao' to wa wixicocon pain ca om tomi' ma' pin querec xine macan' pain cara pane quem, querec iri totoron co ac caji carawa co ma' 7 ne winacon ma' ne, wa wa ac cocon tara. E' paxi' na ira, ane om e' mami' ta' ca pain xocori ca' ne. Ame ma e', main e' mami' tara quem, ac i ma' na ca tomi' capa' ma'.

Apocalipse 2:26

Oro wari' co hwara' opa cara nana pain ca howa nucucun ma', co tomi' ha' cara nanapa' ma', co mi' pin pa' ma' tain ca tomi' ha' ne ne nana ma', mi' ac toton tara pain ca taramaxicon to ho' cocon oro wari' pain oro xijein macan'.

Apocalipse 20:6

Param mi' tata pain ca awi wa oro co e' mami' cain' nana ma', co iri' wari' nucun Iri' Jam nana ma'. Om ta cono' mami' caca, om ta wixicaracao' mi' tococwa pain cote ne xe. Sacerdote pin tatara pain ca taramaja mi' xun cocon Iri' Jam con Cristo ma', taramaxicon wi ac cocon tara, ma' 1.000 tara cawaxi' pain ca taramaxicon wi xun cocon ta.

Apocalipse 22:5

Om ta xim mami' ne pain i cain. Om ta ma' xirapari' naran na caca oro wari', om ta ma' xira xina co toha mi' napari' na caca quem, xi om ne ca toha mi' pan toton ara cocon Taramaxicon Iri' Jam ta. Taramaxicon cara ac caca tara quem.

Apocalipse 3:21

Oro wari' co hwara' opa cara nana pain ca howa nucucun ma', mi' ac toton tara pain ca xao to ho' cacapa' pain ca mam' xao pe ne pain ca taramaxicon pin ta' ta' ca'. Taramaxicon wi ac cacapa' tara. Win ta' pain xocori ca', pain ca to' quiji' pin ton Caxicon Jam pane, je pain ca xao pe ho' pin ton Te pain ca mam' xao pe nucun pain ca taramaxicon nucun quem.

Apocalipse 4:4

To to mam' pin nain ca mam' xao pe nucun oro wirain ca mam' xao pe wa, ma' 24 nana xucucun taramaxicon co xao to nanain quem. To nonon wom co towo', to nanain caji waji' nucun taramaxicon pain winacocon quem. Mam' quep ta pain ouro caji waji' nucucun.

Apocalipse 6:9

Co ma' co ac Wijimain Taramaji Ovelha ma', pa pin ac cain na wirain ca hupa' caho' nein tapari carawa ca joc top ma', ma' 5 pin ac ne na ca pa nein. Pa pin iri nain ne, querec ac tain na tamataracocon co to' parapa' pin wawa pain ca howa cacain capijacon Iri' Jam, je pain ca tomi' hwet cocon con Jeju oro wari' ma'. To nanain xiquijinain maxinain ca tomi' querec te pe tocwa Iri' Jam.

Apocalipse 7:3

Ame hwe e', ta to' em' querec hwein macan' pain oro cote ne com pain oro pana me ta ac tococwa na. Xirao' cain' xut pain jitaracocon oro co taramaja mi' nonon Iri' Jam nexi' cwa', to' em' pin ac hwein tara macan' je oro cote ne com je oro pana ta ac tococwa na.