Apocalipse 20:15 - Tradução Bíblica Pacaas Novos

¹⁵ Oro wari' co om xirao' to wa wixicocon pain tapari carawa ca xirao' to xine wixicocon co e' cara xi' nana ma', wixicaracao' mi' ac tococwa na pain cote ne xe ca ac xuterem' ta.

Apocalipse 20:15 Iomraidhean Croise

Mateus 13:42

Wixicaracao' mi' ac tococwa tara pain cote ne xe. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun.

Mateus 13:50

Co pan teretem nana ma', wixicaracao' mi' ac tococwa tara pain cote ne xe. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun. Ac i ma' na ca pijim' joc mam' mi' caparut pain caji wi ca mam' quep wa hwam pane.

Mateus 25:41

Tomi' ac toton tara co to nanain paraju quem, co om xuruxut xo' nana quem: Wahu' pain ca tomi' noro cuhu' Te ma', to ni ca' xine. Mama' jein cote ne xe ca om jo' ra ha' cain, ca wara quep awori mi' tocwa pain Caxicon Jam cocon oro jam nucun co taramaja mi' nonon cwain.

Marcos 16:16

Tomi' ac tococwa na: Wari' co howa ma', co ja' com ma' quem, to' witan ca' ac tocwa tara pain ca caracat nucun. Wari' co om howa ma' iri na ne, em' ma ta ac tocwa tara, wap tamana ac tocwa tara ta.

Lucas 10:20

Ane tomi' xim xuhu' pain i ca' ne: Ta tomi' querec te e' hwe pain ca tomi' ha' cucuhu' oro caxicon jam pain ca tomi' jein pin huhun ma' me. Tomi' querec te pan e' je pain ca xirao' to xine wuxuhu' pain pawin cain na ca tomi' tococwa ma'.

João 14:6

Om na, wata' co Iri' Wanaxicon Te Iri' Jam pan cwa' ta ac ca na Jeju. Wata' co an hwet mi' nuhu' pain ca iri'o' wa con. Wata' co mi' nuhu' pain ca e' cara wa quem. Xica' pe ina pain ca mi' taxi' xuhu' pain ca hwet hun Te ta. Om na xucun.

João 3:36

Om ta pi' ra ha' ne ca e' nucucun oro wari' co howa nonon Panxica. To ho' cara totoron Iri' Jam pain pawin. Oro wari' co om tomi' ha' nonon Panxica cwa' iri nana ne, om ta to ho' cocon Iri' Jam pain pawin. Mana' pan ac tococwa tara, wap tamana cara ac tococwa tara quem.

Atos 4:12

Je ca tomi' xuhu' ca' ac tococwa na. Xica' pe na Jeju co to' witan taxi' napari'. Om na xucun co to' witan roron oro wari' ta ca Iri' Jam pari', om om na pain oro xijein macan' pain pira quem. Xica' pe na Jeju co to' witan taxi' napari'. Ac i ma' na ca pijim' cocon oro taramaxicon Pedro ma'.

Hebreus 12:25

Ma' tara xumuhu' me. Taraju wet jun Iri' Jam co tomi' nuhu' cwa', ta ari hun me. Noro jujun oro hwanana nexi' cara pane, co om taraju wet jun na nonon pain ca hu to tococwa pain macan' pane. Wap tata, om ca witan ca' cocon Iri' Jam pain ca wap toton cocon pane. Wari' pain xocori ca' iri na ne, mo ta om taraju wet xun Iri' Jam co pe pawin cain, mo ta ari xun pain ca hu capari' ca', ma' tara ca witan ca' ac xun pain ca wap xim capari' ra? Om na ta. Wap tamana tarapari' ta.

Hebreus 2:3

Je ca tomi' xuhu' ca'. Mo ta miri'om xun Jeju pain ca to' witan pin xim capari', ma' tara ca witan ac iri' ra? Wirico Taramaxicon nexi' pan ara xi' na co pijim' hwet cain' nonon pain oro wari' ca to' witan pin xun wawa pane, tomi' hwet ac cacapari' pain na oro co taraju nonon. Iri'o' na ca tomi' nucun ta nanapari'.

Apocalipse 19:20

Mixita xun paxi' totoron, ane quep pan tococwa ne. Quep ta co ma' co ac caji carawa co hwet qui' cain' ma', quep wi ta con co ma' co profeta mixein ma', co tomi' hwet taxipa' nain oro ca tomi' nucun ma'. Wirico co ma' co mi' ca pain ca hwara' opa nucun pain ca ara taxipa' cain oro ca om ara taxi' ne ca wari' wa ira. To' wa wa tamana nonon oro wari' pane ira. Oro ca ara ca ma', je i ma' ca mam' mixein cocon oro wari' co xirao' xirac wawa pain wixicon co ma' co ac caji carawa ma', co pe torotop mi' querec te nanain pacun ca ara an xiho' xine curucun ma'. Xin mi' ac tocwa na pain cote ne xe ma', ca ac xuterem' ma'. Co ma' co ac caji carawa co hwet qui' nain com ma', wirico win ma' nucun ma' quem, wixicao' mi' nunucun ac tococwa na pain cote ne xe ca wiran wi nain pacun ca weo tamana ma', ca enxofre caca oro wari' ma' quem.

Apocalipse 20:10

Xin mi' ac tocwa tara pain cote ne xe Caxicon Jam ma', co mixein nonon oro wari' ma', xin mi' ac tocwa tara pain cote ne xe ca ac xuterem' ma', ca wiran wi nain pacun ca weo tamana ma', ca enxofre caca oro wari' ma'. Wara xin mi' ta pain cote ne xe co ma' co ac caji carawa co hwet qui' cain' ma', wara xin mi' ta pain co ma' co ac caji carawa co hwet qui' pa'ao' ma' quem, co profeta mixein ma', pain ca tomi' hwet taxipa' cain oro ca tomi' nucun co ma' co hwet qui' cain' ma' quem. Je ta xin mi' pe tocwa Caxicon Jam ma' quem. Jain jain cara ac caca tara pain xec je pain xim quem. Om ta pi' camain' ne ca jain jain nucucun, mao ac ne ma' tara cocon ta.

Apocalipse 20:12

Querec inonon co wara cono' nana ma' quem. Co hwara' opa nana ma', co om hwara' opa nana ma' quem, querec inonon pain ca coco' quima hwet cacain ca mam' xao pe nucun. Pa ac xine na oro tapari carawa ca xirao' to xine oro ca ara caca pain ca e' e' wet nucucun pane. Pa ac xine na wirain tapari carawa ca xirao' to xine wixicocon oro wari' co e' cara xi' nana quem. Noro iri ta ca xirao' to xine oro ca ara nucucun ne, win ne ca ara hwe pane ac tococwa na, wap wap ac tococwa na.

Apocalipse 20:14

Oro wari' co wara cono' nana ma', wiricoco co to nanain ca to pan caca oro co wara cono' nana ma', wixicaracao' mi' ac tococwa na pain cote ne xe ca ac xuterem' ma'. Cote ne xe ma', ca ac xuterem' ma', tomi' joc mam' mi' nain ca cono' mami' wa.

Apocalipse 3:5

Ac i ma' tatara oro wari' co hwara' opa cara nana pain ca howa nucucun ma', to totoron wom co towo' ma' quem. Om ta xic am camain' tain wixicocon pain tapari carawa ca xirao' to xine wixicocon oro wari' co e' cara xi' nana. Wari' ne inonon caram cwa' ta ac ton tara Te cocon oro jam co taramaja mi' nonon ma', taraju taraju xam' tatarapa' pain ca tomi' ac i ma' toton ta.