Apocalipse 20:12 - Tradução Bíblica Pacaas Novos

¹² Querec inonon co wara cono' nana ma' quem. Co hwara' opa nana ma', co om hwara' opa nana ma' quem, querec inonon pain ca coco' quima hwet cacain ca mam' xao pe nucun. Pa ac xine na oro tapari carawa ca xirao' to xine oro ca ara caca pain ca e' e' wet nucucun pane. Pa ac xine na wirain tapari carawa ca xirao' to xine wixicocon oro wari' co e' cara xi' nana quem. Noro iri ta ca xirao' to xine oro ca ara nucucun ne, win ne ca ara hwe pane ac tococwa na, wap wap ac tococwa na.

Apocalipse 20:12 Iomraidhean Croise

Mateus 11:22

Ane tomi' pan xuhu' pain i ca' ne, tomi' iri'o' inuhu': Maqui' iri tara xec nein ca wap toton oro wari' pain ca caracat nucucun Iri' Jam ne, wap ac cuhu' tara. Wap pije' totoron oro caracat co to nanain Tiro je Sidom cara pane. Wahu' iri na ne, pain ca to hwein Corazim je Betsaida ma', wap tamana pan ac cuhu' tara ta!

Mateus 16:27

Je ca tomi' xuhu' ca' ac caparut na. Ja' ja' xine. Ta jin' huhun oro wari' co quep em' xim nunuhu' pain ca ja' ja' mahu' me. Maqui' ta' ara xi' na xec nein ca in qui' ta' ne ca', wata' pain ca Iri' Wari' ta' ca', in qui' ac tain tara pawin. Maqui' wi ta' cocon oro jam co taramaja mi' nanapa'. Maqui' wi ta' pain ca hwara' opa nucun Te quem. Pagar ac toton tara oro wari', pagar toton pain oro ca ara caca pain ca e' e' wet nucucun. Win ne ca ara hwe pane toton, mi' mi' xam' ac toton pain tara. Wahu' quem, win ne ca ara hwe pain ca ja' ja' mahu' pane xuhu', pagar pagar xam' ac xuhu' tara quem.

Lucas 10:20

Ane tomi' xim xuhu' pain i ca' ne: Ta tomi' querec te e' hwe pain ca tomi' ha' cucuhu' oro caxicon jam pain ca tomi' jein pin huhun ma' me. Tomi' querec te pan e' je pain ca xirao' to xine wuxuhu' pain pawin cain na ca tomi' tococwa ma'.

Atos 24:15

Howa inon Iri' Jam pain ca main to' e' mami' toton cocon oro wari' co wara cono' nana quem. Ac i ma' nana caram cwa' quem. Howa howa pi' pin urut con Iri' Jam pain ca main to' e' mami' toton cocon oro wari' co wara cono' nana ma'. Je je ari na ca howa nuxut cocon pain ca main to' e' mami' xun tococwa quem. Co tomi' ha' nonon pain ca e' e' wet nucucun, co om tomi' ha' nonon pain ca e' e' wet nucucun ma' quem, main to' e' mami' toton nonon oro wari' Iri' Jam ta urut.

Romanos 2:6

Tomi' tomi' xam' ac cocon tara oro wari': Win hwe pane, win ne ca ara ara hwe pane ac cocon tara, mi' ac cocon tara pain ca taramaja mi' caca ma'.

1 Coríntios 4:5

Je ca tomi' xuhu' ca': Ta tomi' em' hap huhun pain ca taramaja nucucun oro wari' me ta. Winim' jein xec nein ca in qui' ta ca Taramaxicon nexi'. Wirico tara co an hwet pin tain nain oro ca coromicat nucucun oro wari' ca joc xim caca ira. Para taramaja mi' cocon Cristo quem? Om na, wirico tara co to' querec pin' napari' pain oro ca coromicat nucucun pain ca taramaja mi' cocon ma'. Wirico tara co tomi' nonon oro wari' co taramaja xo' nana. Mo ta taramaja xo' caca pain ca e' e' wet nucucun pane, hohot ma ta ac cocon tara, taramaja xo' ma ma' ira ac cocon tara, tomi' tomi' xam' ac cocon tara ta.

2 Coríntios 5:10

Xi na e' ara ne pain ca main coco' quima hwet xun Cristo ta. Coco' quima hwet coco' quima hwet pi' pin xun, tomi' xo' ac capari' tara pain oro ca ara iri' pain ca e' e' wet nexi' ca'. Mi' mi' xam' ac capari' tara pain oro carawa ca taramaja mi' iri' ca'. Wari' co ara nain oro ca awi wa, mi' ac tocwa tara pain ca awi wa. Wari' co ara nain oro ca om awi wa ma' iri tara ne, mi' ac tocwa tara pain ca om awi wa quem.

Filipenses 4:3

Wum co taramaja wi taxipa' napa' pain ca taramaja ne pane, tomi' xim inem quem. Quep xiho' raram, ma' ta tomi' querec te mami' xequequem. Xi wara quep xiho' tamana ara cacapa' pain ca taramaja ne pane ta. Wiricacam, wirico Clemente, wiricoco oro xucucun co quep xiho' nanapa' pane, pain ca pijim' hwet tain capijacon Iri' Jam con Jeju pane, xirao' to ta wixicacam pain tapari carawa ca xirao' to xine wixicocon oro co e' cara xi' nana quem.

Apocalipse 11:18

Mana' tamana paxi' nana oro wari' co to nanain oro xijein macan' ma', ane maqui' pin ne xec nein ca mana' toton pan momon pain ca win hwe pane toton momon ne. Maqui' pin na xec nein ca wap toton momon oro wari' co wara cono' nana. Wap toton momon pain oro carawa ca ara caca pain ca e' e' wet nucucun pane. Win hwe pane ac momon tara oro co taramaja mi' nenem pane, cocon oro profeta cocon oro wari' nem ma', cocon oro co tomi' ha' taxipa' nenem pane, co hwara' opa nana ma', co om hwara' opa nana ma' quem, win hwe pane ac momon tara, mi' ac momon tara pain oro ca awi wa. Maqui' pin na xec nein ca to' parapa' pin toton momon oro co to' parapa' pin nonon oro wari' pain macan' quem. Ac i ma' na ca tomi' cocon Iri' Jam.

Apocalipse 13:8

Co ma' co ac Wijimain Taramaji Ovelha ma', co wara coromicat an pe xo' ca Iri' Jam pain cara pane, pain ca om tomi' ma' pin querec cain macan' pane, co main to' pa' pin xim nenem oro caracat ta ca pane, ma' non tapari carawa ca xirao' to xine wixicocon oro co e' cara xi' nana ma'. Oro wari' co to nanain oro xijein macan' ma', co om xirao' to wa wixicocon pain tapari carawa nucun co ma' co ac Wijimain Taramaji Ovelha ma', wa wa wa wa xam' totoron co ma' co ac caji carawa ma'. Pe torotop mi' querec te totoron quem.

Apocalipse 17:8

Co ac caji carawa co querec ma ma', e' paxi' na ira, ane om e' mami' ca pain xocori ca' ne. Mi' pin na. Wara piri' ca' tain nain cote ne man ca om tawirinain cain. Main to' om pin ac tocwa tara ta, ame ma e'. Oro wari' co to nanain oro xijein macan' ma', co om xirao' to wa wixicocon pain tapari carawa ca xirao' to xine wixicocon oro wari' co e' cara xi' nana ma', co om xirao' to wa wixicocon pain ca om tomi' ma' pin querec xine macan' pain cara pane quem, querec iri totoron co ac caji carawa co ma' 7 ne winacon ma' ne, wa wa ac cocon tara. E' paxi' na ira, ane om e' mami' ta' ca pain xocori ca' ne. Ame ma e', main e' mami' tara quem, ac i ma' na ca tomi' capa' ma'.

Apocalipse 19:5

Taraju ac xine na ca tomi' wa ca maqui' nain ca mam' xao pe ca Iri' Jam ma'. Merem ac ca na: Tomi' querec te jun Iri' Jam nexi' cwa'. Tomi' tomi' pi' pin inuhu' pain ca taramaja mi' hun ma', pain ca tomi' ha' taxipa' hun ma', wahu' pain ca om hwara' opa hwe ma', wahu' pain ca hwara' opa hwe ma' quem, tomi' querec te jun Iri' Jam ta! Ac i ma' na ca merem ca ma'.

Apocalipse 2:23

To' parapa' pin toton oro co an xiho' nanam ma', co ac humaxicam nana ma'. Querec pin' ac cacapa' tara oro co howa nana ma', pain ca cut in xucucun pain oro cidade ma', querec pin' tatarapa' pain ca taxi' tain oro ca coromicat nucucun oro wari' ma', je pain ca taxi' tain oro ca param nucucun ma' quem. Wahu' pain ca pan teretem hwe ma', wap wap xam' xuhu'. Win hwe pane xuhu', win ne ca ara ara hwe pane xuhu', ac i ma' tara ca wap xuhu' ta.

Apocalipse 20:11

Querec ac tain na cote ne ca mam' xao pe ca taramaxicon. Towo' na. Querec inon co xao pe pe nain quem. Jein ca' non macan' je pawin quem. Om ca querec mami' xine.

Apocalipse 20:13

Oro wari' co wara cono' nana pane, co cono' to nanain cote ne com pane, co cono' to nanain macan' pane, co wara mama' nanain ca to pan caca oro co cono' nana ma' quem, coco' quima hwet nonon co ma' co xao pe pe nain cote ne ca mam' xao pe ca taramaxicon ma'. Win ne ca ara hwe pane ac tococwa na, wap wap xam' ac tococwa na quem.

Apocalipse 20:15

Oro wari' co om xirao' to wa wixicocon pain tapari carawa ca xirao' to xine wixicocon co e' cara xi' nana ma', wixicaracao' mi' ac tococwa na pain cote ne xe ca ac xuterem' ta.

Apocalipse 21:27

Om ta corom camain' caca oro wari' co to' em' xucucun pain ca pan teretem nucucun ma', cocon oro co ara taxipa' nanain oro ca om querec awi non Iri' Jam ma' quem, cocon co mixein nonon oro win ma' caca ma' quem, om ta corom camain' caca. Corom xica' to e' tatara oro wari' co xirao' to wa wixicocon pain tapari carawa nucun co ma' co ac Wijimain Taramaji Ovelha ma', corom xica' to e' tatara co xirao' to wa wixicocon pain ca e' cara xi' caca ma'.

Apocalipse 22:12

Je ca tomi' ca Jeju cwa': Taraju wet je e'. Maqui' ho' ta' ina. Om ta om om ta', maqui' hap ta' ina. Maqui' wi tarapa' carawa ca mi' toton toton oro wari' ma'. Win ne ca ara hwe pane toton, mi' mi' ac toton pain tara.

Apocalipse 3:5

Ac i ma' tatara oro wari' co hwara' opa cara nana pain ca howa nucucun ma', to totoron wom co towo' ma' quem. Om ta xic am camain' tain wixicocon pain tapari carawa ca xirao' to xine wixicocon oro wari' co e' cara xi' nana. Wari' ne inonon caram cwa' ta ac ton tara Te cocon oro jam co taramaja mi' nonon ma', taraju taraju xam' tatarapa' pain ca tomi' ac i ma' toton ta.