Apocalipse 20:10 - Tradução Bíblica Pacaas Novos

¹⁰ Xin mi' ac tocwa tara pain cote ne xe Caxicon Jam ma', co mixein nonon oro wari' ma', xin mi' ac tocwa tara pain cote ne xe ca ac xuterem' ma', ca wiran wi nain pacun ca weo tamana ma', ca enxofre caca oro wari' ma'. Wara xin mi' ta pain cote ne xe co ma' co ac caji carawa co hwet qui' cain' ma', wara xin mi' ta pain co ma' co ac caji carawa co hwet qui' pa'ao' ma' quem, co profeta mixein ma', pain ca tomi' hwet taxipa' cain oro ca tomi' nucun co ma' co hwet qui' cain' ma' quem. Je ta xin mi' pe tocwa Caxicon Jam ma' quem. Jain jain cara ac caca tara pain xec je pain xim quem. Om ta pi' camain' ne ca jain jain nucucun, mao ac ne ma' tara cocon ta.

Apocalipse 20:10 Iomraidhean Croise

Mateus 25:41

Tomi' ac toton tara co to nanain paraju quem, co om xuruxut xo' nana quem: Wahu' pain ca tomi' noro cuhu' Te ma', to ni ca' xine. Mama' jein cote ne xe ca om jo' ra ha' cain, ca wara quep awori mi' tocwa pain Caxicon Jam cocon oro jam nucun co taramaja mi' nonon cwain.

Mateus 25:46

Je ca tomi' xuhu' ca' ac caparut na. Oro wari' co om xuruxut xo' nana ma', mama' ac cacain tara ca wap to xun tococwa. Om ta pi' ra ha' ne ca wap cara tococwa ta. Oro wari' co xuruxut xo' nana ma' iri na ne, mama' ac cacain tara ca e' cara to xi' caca quem. Om ta pi' ra ha' ne ca e' cara nucucun ta na ca tomi' caparut pane.

Mateus 7:15

Ma' tara xumuhu' me, ta taraju wet huhun oro wari' co profeta urut ta ximama' nunuhu' pain ca pijim' mixein nucucun ma' me ta ac tococwa na. An xiho' paxi' nanain ovelha ca awi pain ca om mana' nein ma', ac ca awi caca e' na pain curucucun. Ane om awi pan ne ximicocon ne. An xiho' e' nonon copacao' co om awi pain ca mana' nucun.

Marcos 9:44

Om ca cono' camain' ca cwamicocon orojima' pain i cain, om ca jo' ne xe pain i cain quem.

Apocalipse 16:13

Querec ac toton na oro caxicon jam co ac tururu nana. Ma' 3 nana. Hwet qui' nain capijacon co ma' co ac caji hop xucun. Xucun ma', hwet qui' nain capijacon co ma' co ac caji carawa co hwet qui' cain' ma' quem. Xucun ma' iri na ne, hwet qui' ac cain na capijacon co ma' co hwet qui' pa'ao' ma', co profeta mixein ma', pain ca tomi' hwet taxipa' cain oro ca tomi' mixein nucun co hwet qui' cain' ma' quem.

Apocalipse 19:20

Mixita xun paxi' totoron, ane quep pan tococwa ne. Quep ta co ma' co ac caji carawa co hwet qui' cain' ma', quep wi ta con co ma' co profeta mixein ma', co tomi' hwet taxipa' nain oro ca tomi' nucun ma'. Wirico co ma' co mi' ca pain ca hwara' opa nucun pain ca ara taxipa' cain oro ca om ara taxi' ne ca wari' wa ira. To' wa wa tamana nonon oro wari' pane ira. Oro ca ara ca ma', je i ma' ca mam' mixein cocon oro wari' co xirao' xirac wawa pain wixicon co ma' co ac caji carawa ma', co pe torotop mi' querec te nanain pacun ca ara an xiho' xine curucun ma'. Xin mi' ac tocwa na pain cote ne xe ma', ca ac xuterem' ma'. Co ma' co ac caji carawa co hwet qui' nain com ma', wirico win ma' nucun ma' quem, wixicao' mi' nunucun ac tococwa na pain cote ne xe ca wiran wi nain pacun ca weo tamana ma', ca enxofre caca oro wari' ma' quem.

Apocalipse 20:8

Mixein toton oro wari' co to nanain Gogue je Magogue ma' ac ca tara, hwet ac tococwa tara pain ca to cacain oro xijein macan'. Cut in xi', mixita xuxun oro wari' nucun Iri' Jam ta ac tococwa tara. Mija tatara oro wari' co cut in xi' nana, ac namaji pain cacarain cote ne com tatara pain ca tamana nucucun.

Apocalipse 9:17

Querec inonon pain ca tohwein' ne ca', querec inain oro cavalo nucucun, querec inonon co xao to nanain quem. Oro arain too ca to caho' nain quimacocon ma', paca' na, ac ca paca' nein xe na. Tum na, ac ca tum nein pacun ca awi ma' na, ca safira caca oro wari' ma'. Coxic na quem, ac ca coxic nein pacun ca weo ma' na, ca enxofre caca quem. Ac winacon leão na winain cavalo nucucun ma'. Hwerehwet qui' nain capijain xe je tain' je pacun ca weo ma' quem.