Apocalipse 2:5 - Tradução Bíblica Pacaas Novos

⁵ Je ca tomi' xuhu' ca': Mam' pe wet jein ca tomi' querec te nuhu' pane, pain ca tomi' ha' xixim na mahu' pain ca xo' howa ten qui' mahu' pane. Cwirin' pin jein ca caracat nuhu', jain jain mami' xine pain ca tama' tomi' ha' xixim na mahu' ma', tomi' querec te ac i ma' mami' xine. Ac pain cara pane tara pain ca xo' howa qui' mahu' pane. Mo ta om cwirin' pin hwein ca caracat nuhu' ma', hwet ac xuhu' tara, an ca' ac xuhu' tara pain ca mam' tom pe ne naran nuhu' ma'. Pe pe om pin ac nein tara maxinain pahu'.

Apocalipse 2:5 Iomraidhean Croise

Mateus 5:14

Ac naran hwe quem. Win ne cidade ca pe nain tamain pacun ma'. Tom pin iri na oro naran nein ne, om ca xaraxa mami' ac ne, querec querec xam' nanain oro wari'.

Mateus 5:15

Noro jun wari' co tom nain naran ma' quem. Om ca tatep pa' ca pain too. Tom an hwet pe na pain maxinain. Toha mi' ac tococwa na oro wari' co to nanain xirim.

Marcos 12:9

Tomi' querec ac tococwa na: Cain' cain' ta' ca waximain xitot quem? Taraju wet xine e'. Hwet pan totoron oro co taramaja to nanain totacon, to' parapa' pin ac cocon tara, noro ac cocon tara oro xucucun co taramaja to nanain totain uva nucun quem.

Lucas 1:17

Wirico tara panxima co wara o ta' na con Iri' Taramaxicon co wara tomi' pe ca Iri' Jam pane. Pijim' hwara' opa tamana tara, win ca profeta Elias cara pane, an xiho' toron Elias pain ca pijim' hwara' opa nucun. To' om pin tarain ca mana' caracan xucucun mana cote caca cocon mana panxicaca, tomi' querec te pin mami' ac xucucun tara. To' coromicat xo' pin ac cocon tara oro wari' co ari nonon Iri' Jam ma', aram aram coromicat an xiho' pin ac cocon tara co tomi' ha' nana ma' quem. Tomi' tomi' wara awori xo' totoron oro wari', ma' ta winim' xo' cocon Iri' Taramaxicon pain ca aram aram maqui' nucun. Ac i ma' na ca tomi' con Zacarias jam co taramaja mi' non Iri' Jam pane.

Lucas 20:16

Taraju wet xine e': Hwet pan totoron co taramaja to nanain totacon ma', to' parapa' pin ac cocon tara, noro ac cocon tara oro xucucun co taramaja to nanain totain uva nucun quem na ca tomi' tococwa ma'. Oro wari' ma', co taraju nonon pain ca pijim' nucun ma', tomi' ac caca na: Cain' cain' xira waximain xitot ne? Om ca ha' camain' ne pain ca ara wa i ma' ta nana.

Gálatas 5:4

Wahu' pain ca to' hohot xijexi' pain ca tomi' ha' xin ca xirao' nucun Moisés hwe ma', to ni ca' hun Cristo. To' hohot xijexi' pain ca tomi' ha' xin ca xirao' nucun Moisés ta iri hwe ne, noc pin ac hun na Iri' Jam pain ca xiram pa' e' cuhu' ma'.

Filipenses 2:15

Ma' ta querec pin' xihwe pain ca xumu xo' nuhu' ma', pain ca om hwet ne wuxuhu' pain ca caracat wa ma'. To ho' paxi' huhun oro caracat co pan teretem nana ma', co ara taxipa' nanain oro ca om awi wa ma'. Ane om hohot camain' ne pain ca ma' cuhu' oro ca to' em' nuhu' pain ca caracat wa pain ca mana panxica Iri' Jam hwe ne. Ac oro pijo' co toha to nain pawin je. Ac ca toha mi' huhun tara pain naran ma', to' querec pin' jujun pain ca xuruxut xo' wa ta.

Hebreus 10:32

Ane tomi' xim xuhu' pain i ca' ne: Mam' pe wet jein oro ca hwet pa' nuhu' pain cara pane, pain ca xo' toha mi' qui' cuhu' naran nucun Iri' Jam pain ca taraju pa' pin hwein capijacon con Cristo pane. Mija paxi' na oro ca to' i'ina nuhu' pane. Jain jain paxi' hwe pane. Ane quereme hwein ne.

2 Pedro 3:17

Je ca tomi' xuhu' pain ca tomi' querec te xuhu' ca'. Wara taxi' huhun caram ma' co ca' na mixein xim nunuhu' ma'. Je ta ma' qui' ne xumuhu' cocon. Ma' ta om tomi' tomi' na cucuhu' pain ca pan teretem nucucun pain ca quep ximama' nucucun ma', je pain ca om ne ximicocon pain ca howa ni ca' jein oro ca howa nuhu' pane ta cucuhu' ma'. Ma' ta om camara' hwe pain ca caracat wa, ma' ta howa xo' cara hwein capijacon Iri' Jam ca ca' na xihwe ma', ca taraju pa' hwe ma'.

Judas 1:24

Xica' pe na Iri' Jam co Iri' Jam ma', co mam' to' witan napari' con Taramaxicon nexi' Jeju Cristo. Hwara' opa na. Ha' non pain ca narain ho' cuhu' pain ca camara' wa pain ca caracat wa ta. Ha' non pain ca to' om pin cain oro ca to' em' nuhu' ma', je pain ca ja' tomi' querec te tamana cuhu' pain ca aram aram coco' quima hwet xine pain ca awi tamana ne ta cuhu' ma'. Na e' na pain ca tomi' querec te xun pain ca awi tamana nucun ma', je pain ca iri' Taramaxicon nucun ma', je pain ca hwara' opa tamana nucun ma', je pain ca taramaxicon hwara' opa tamana pan ca quem. Wara ac i ma' na pain cara pane, pain ca om quep querec cain oro carawa pane, ac i ma' ac i ma' wet na pain xocori ca', ac i ma' ac i ma' cara tara ta. Amém, iri'o' na ca tomi' ne ta. Je i ca' ca xirao' ne ca'.

Apocalipse 1:20

Tomi' xo' xim inem con oro pijo' pain oro ca mam' tom pe ne naran ca' quem. Ma' na ca tomi' mao nucun oro pijo' co ma' 7 cwa', co querec ma cwa', co cut ta' pain mu pain iri' cwere ca'. Ma' na ca tomi' mao nein ca mam' tom pe ne naran ca' quem, ca ma' 7 ca'. Oro pijo' cwa', co ma' 7 cwa', tomi' joc mam' mi' nonon co an xin tiquin' mi' nonon pain ca tomi' ne oro co howa to nanain oro cidade ca ma' 7 ma'. Oro ca mam' tom pe ne naran ca' iri na ne, ca ma' 7 ca' quem, tomi' joc mam' mi' nonon oro co cut in xucucun pain ca howa cacapa' ma', co to nanain oro cidade nucucun ca ma' 7 ma'. Ac i ma' na ca tomi' capa' ma'.

Apocalipse 16:9

Jam' tamana nonon. Tomi' noro ac cocon na Iri' Jam ma', co to' jain jain nonon pain oro ca xirac wa ma'. Ximin paxi' nana, ane om cwirin' je ha' caca ne. Om ca in ac jun ha' cocon Iri' Jam quem.

Apocalipse 2:16

Je ca tomi' xuhu' ca': Cwirin' pin jein ca caracat nuhu'. Mo ta om cwirin' pin hwe, hwet hap ac xuhu' tara, mam' mixita ac toton tara pain cote ne quit ca hwet qui' nain capija ta.

Apocalipse 2:19

Taxi' inuhu' pain oro ca ara hwe ma'. Taxi' inuhu' pain ca om noc mahu', je pain ca om noc xujuhu' ma'. Taxi' inuhu' pain ca howa mahu' ma', je pain ca quep xiho' xujuhu' ma', je pain ca quereme cara hwein oro ca to' i'ina nuhu' ma' quem. Oro ca ara hwe pain xocori ca', tiquin' ca' nain oro ca ara hwe pain ca xo' howa qui' mahu' pane.

Apocalipse 2:2

Taxi' inuhu' pain oro ca ara hwe ma'. Taxi' inuhu' pain ca taramaja tamana hwe ma', je pain ca quereme cara hwein oro ca to' i'ina nuhu' ma'. Taxi' inuhu' pain ca noc mip huhun oro wari' co pan teretem nana ma', je pain ca tomi' querec huhun caram ma' co apóstolo urut mixein nana ma'. Xi iri' apóstolo caca ta. Querec pin' huhun pain ca mixein nucucun ma'.

Apocalipse 3:19

Tomi' inain taraxicocon oro wari' co om noc ta' cwa'. Hu xo' hu xo' pi' pin inonon. Je ca tomi' xuhu' ca': Ma' tara xumuhu' me, win xumu jein ca xuruxut xo' wa, cwirin' pin jein ca caracat nuhu' ta.