Apocalipse 19:14 - Tradução Bíblica Pacaas Novos

¹⁴ Ja' ja' nonon oro wari' nucun co to nanain pawin quem. To nonon iri' wom co awi tamana. Ac soldado nucun nana. Xao to nanain cavalo ca towo' quem.

Apocalipse 19:14 Iomraidhean Croise

Mateus 21:5

Tomi' jujun oro wari' co to nanain Jerusalém ma'. Taraju wet je! Hwet nuhu' taramaxicon nuhu' ta! Om ca xec xec ca. Xao pe pe nain xonein wijimain burro. Ac i ma' na ca tomi' pe ca profeta pane.

Mateus 26:53

Cain' cain' ne ca coromicat nem quem? Om ta quep xiho' con Cote ca mapa' ra? Mo xi quep xiho' ne ton, mam' hap ac capa' xira cocon oro jam co taramaja mi' nonon. Mija xira ca 1.000 nucucun. Om xi narain ho' capa' cocon ta.

Mateus 28:3

Ac ca coc wein ca comerem na ca joc xec ca jam co taramaja mi' non Iri' Jam ma'. Towo' tamana na womicon quem.

2 Tessalonicenses 1:7

Ara xo' na pain ca to' om pin tain cain ca jain jain nuhu' pain ca quep em' xihwe ma' quem. To' om pin tarain ca jain jain nuhu', to' om pin tarain ca jain jain nuxut ca' quem, pain ca aram aram quiji' qui' tain cain pawin Taramaxicon nexi' Jeju. Maqui' wi tara pain ca weo nein xe. Ja' ja' totoron oro jam co taramaja mi' nonon ma', co hwara' opa nana ma'.

Judas 1:14

Adão cara pane, wanxi' ac ca na, wanxi' ac caca na waram winacon quem. Aram aram to' 7 pa' ac cocon na Enoque co wara tomi' pe nain carawa ca hwet pa' xun tococwa oro co caracat nana pain ca miri'om cocon Iri' Jam. Tomi' ca' tata pane: Taraju wet je e'! Maqui' ta' tara Taramaxicon nexi'. Maqui' wi tara cocon oro jam co taramaja mi' nonon ma', co mija tamana nana ma', co mija tiquin' ca' nanain ca 1.000 nucucun ma'.

Apocalipse 14:1

Noro ac ta' na, querec ac ton na co ma' co ac Wijimain Taramaji Ovelha ma'. Xat pe nain tamain pacun ma', ca Sião caca oro wari' ma'. Ma' 144.000 nana wari' co coco' to ho' nonon quem. Wara xirao' to tata pain jitaracocon pain wixicon co ma' co ac Wijimain Taramaji Ovelha ma', je pain wixicon Cote ca quem.

Apocalipse 14:20

Xom xom torotot pin ac xine na pain manain pacun ca pe ni ca' nain cidade ma'. Weweweo hwet qui' ac nein na wic quem. Mija na wic ta. Weweweo mao nain pira, ac ca ma' 300 ne na quilômetro nein ca weweweo mao nein pira. Xopain na quem, hwet nain paramain cavalo ca xopain nein.

Apocalipse 17:14

Mixita paxi' totoron co ma' co ac Wijimain Taramaji Ovelha ma', ane to' quiji' pin xun tococwa ne, xi wirico pan ara ne co hwara' opa tamana pan, co taramaxicon hwara' opa tiquin' ca' nonon oro xucucun taramaxicon ma'. Oro wari' co tora' ca ma', co howa xine ca ma', co win xumu nonon ma', to' quiji' wi totoron cocon oro xucucun taramaxicon. Ac i ma' na ca tomi' capa' jam co taramaja mi' non Iri' Jam.

Apocalipse 19:11

Querec ac tain na pawin pain ca pa xat ne ma'. Pe quima hwet napa' cavalo ca towo'. Wari' co xao pe nain ma', tocwan na wixicon. Co Om Mixein Camain', Co Iri'o' Taxipa', je i ma' oro wixicon. Tomi' xo' iri tata oro wari' pain oro carawa ca ara caca ne, om ca wap ximao tococwa, wap xo' e' tata. Mixita xo' tata oro co noc nonon ma', om ca mixita ximao camain' tococwa.

Apocalipse 19:8

Wara mi' nam con iri' wom co awi tamana Iri' Jam. Toc meremem na, om ca em' camain' ca quem. Ac i ma' na ca merem caca ma'. Ma' na ca tomi' joc mam' mi' ca wom co pe cama ma', co awi tamana ma'. Tomi' joc mam' mi' nain oro carawa ca awi ca ara caca oro wari' nucun Iri' Jam.

Apocalipse 3:4

Ac i ma' paxi' hwe, ane ma' paric ca' e' caca oro win ma' nuhu' co om ara em' xucucun pain Sardes ma' ne. Om ca ara mixem pin cocon womicocon. Ame hwe e', main to totoron wom co towo', xuruxut wi ac cacapa' tara. Xi querec pin' ara tococwa pain ca hohot cacapa' ta.

Apocalipse 4:4

To to mam' pin nain ca mam' xao pe nucun oro wirain ca mam' xao pe wa, ma' 24 nana xucucun taramaxicon co xao to nanain quem. To nonon wom co towo', to nanain caji waji' nucun taramaxicon pain winacocon quem. Mam' quep ta pain ouro caji waji' nucucun.

Apocalipse 7:9

Xirao' pin iri tata pain jitaracocon oro waram winacon Israel ne, noro ac ta' na, querec ac toton na oro wari' pain ca cut in tamana nucucun. Mija nana wari' ta, om ca tomi' ac tococwa, xi paric caca ta. Maqui' nanain oro xijein macan'. Xucun wari' xucun wari' pi' pin nana, to ni ca' nonon oro xucucun wari' pain macaracocon, capija ni ca' xucucun quem. Coco' quima hwet nanain ca mam' xao pe pe ca Iri' Jam co Iri' Taramaxicon ma', coco' quima hwet nonon co ma' co ac Wijimain Taramaji Ovelha ma' quem. To nonon wom co towo', cut nanain tahot pain micocon quem.