Apocalipse 19:10 - Tradução Bíblica Pacaas Novos

¹⁰ Pan' hwet ac ton na pain caximacon jam co taramaja mi' non Iri' Jam. Ma' ta pe torotop mi' querec te ton inon ira. Ane tomi' capa' ne: Ta pe torotop mi' querec te mapa' me ta. Xi ac wum ara ta' ta, taramaja mi' e' inon Iri' Jam. An xiho' inem, an xiho' inonon oro win howa ma ma', co win xumu cara nonon Jeju ma', pain ca om an to camain' cacain oro ca tomi' hwet xine con. Pe torotop mi' querec te pan ron Iri' Jam ta! Xi wirico pan ara ca Jeju co tomi' hwet iri' pain ca pijim' hwet xuxun con oro wari' ta. Ac i ma' na ca tomi' capa' jam co taramaja mi' non Iri' Jam.

Apocalipse 19:10 Iomraidhean Croise

Mateus 4:10

In ca' ne ta Caxicon Jam ac con na Jeju. Xi xirao' pe ara xine pain capijacon Iri' Jam ta: Pe torotop mi' querec te e' ron Taramaxicon co Iri' Jam ne ma ta. Xica' pe tara co ma' co tomi' ha' wa pain ca taramaja mi' tocwa ta na ca xirao' nein con ta. Ac i ma' na ca tomi' in pin con Caxicon Jam Jeju.

Marcos 5:22

Maqui' ac ca na wari' co win ma' ne nonon co querec wet nonon oro win judeu caca pain xirim ca cut in to xucucun ma'. Jairo na wixicon. Querec iri non Jeju Jairo ne, pe torotop mi' ac con na pain caximacon.

Marcos 7:25

Pe nain i ma' narima' ma', co taraju nonon oro wari' pain ca maqui' na Jeju ta caca ma'. Corom pe ho' nam cainacam caxicon jam. Je ca maqui' hap cama ma', pe torotop mi' ac con na Jeju quem.

Lucas 1:19

Om na ta Zacarias ac ca na. Gabriel ina. Wata' co xat pe ho' taxipa' non Iri' Jam pain ca taramaja mi' ton ca'. Hwet ron napa' Iri' Jam pum. Tomi' hwet ron pain carawa ca awi ca ara mi' ton ta' ca' napa' pum pain ca pan' qui' ta' ca panxima.

Lucas 24:44

Je ca tomi' xuhu' pain ca pe ho' pe ho' wet xuhu' pane ac tococwa na. Na e' na pain ca hwet pin ne oro capijacon Iri' Jam pata'. Oro ca xirao' nucun Moisés cocon oro profeta, je pain Oro Tamara' quem, na e' na pain ca hwet hwet pi' pin ne pata' ac tococwa na.

João 5:39

Noro tamana paxi' hwein capijacon Iri' Jam ca xirao' pe xine ma'. Coromicat ac hwe na: Mo ta noro xin capijacon Iri' Jam ca', mam' ac xin tara ca om pi' ra ha' ne ca e' wa pain pawin ta paxi' na ca coromicat nuhu' ma'. Je capijacon Iri' Jam ca tomi' hwet pan napa' quem.

Atos 10:43

Wara tomi' nonon oro wari' oro profeta pane quem, pain ca tomi' hwet tomi' hwet xam' tococwa con wari' nucun Iri' Jam co wara tomi' pe ca pane. Ca' na ca tomi' hwet tococwa pane: Oro wari' co howa xun nonon ma', xic am pin ac xine tara pain ca caracat nucucun ta, xi om ca wari' nucun Iri' Jam co wara tomi' pe ca pane nana oro profeta pane. Ac i ma' na ca pijim' cocon Pedro ma'.

Atos 13:27

Om ca querec pin' cocon Jeju oro wari' nein Jerusalém pane. Om ca querec pin' cocon oro taramaxicon nucucun quem. Om tara wirico co to' witan ca' xim napari' pain ca caracat nexi' ta nonon pane. Noro taxipa' paxi' nanain oro ca xirao' to nucucun oro profeta pain oro sábado pain ca xao to wa cacain ximicocon, ane om taraju pa' cacain ne. Mi' pin ma' tara ne iri nonon Jeju ne, ara pin ac cacain na ca xirao' to caca oro profeta con pane.

2 Coríntios 8:7

Je ca tomi' urut pahu'. Win ne ca tama' ara xo' hwein oro ca ara hwe ma': Howa mip hun Cristo. Pijim' taxi' hwein capijacon Iri' Jam. Taraju pa' hwein quem. Jain jain hwe pain ca win xumu hwein oro ca ara xo' wa. Win hwe ma' maparut pain ca om noc camain' urut pahu' quem. Je ta ara xo' ac i ma' qui' hwe pain ca quep xiho' huhun oro xerexi' co om nonon carawa pain Jerusalém quem. Xiram pa' jujun pain ca cut mi' huhun pain dinheiro quem.

Efésios 5:15

Ma' tara xumuhu' me. Am xuruxut xo' hwe, querec querec je me. Ta an xiho' huhun co om coromicat xo' nana me. An xiho' e' jujun co coromicat xo' nana ma'.

Efésios 5:33

Tomi' paxi' ta Cristo pain ca om noc capari' pain ca howa xun ca'. Ane tomi' tomi' xam' cuhu' pain ca tarama' nuhu' pain ca ma' cuhu' narima' quem ne. Ta noc hwehwem manahu' ta. Win ne ca om noc pan xujuhu' ma'. Wahu' quem oro narima', na e' na pain ca tomi' ha' huhun waram taxuhu' ma' quem.

Filipenses 3:3

Xi iri' wari' nucun Iri' Jam pan caca ta. Wari' pan, pain ca howa xun Cristo cwa', wari' co iri' wari' ne ca Iri' Jam ta. Tamataracon pan ca mi' napari' pain ca in ac xun ca'. Tomi' querec te pan urun Cristo Jeju co to' wari' nucun Iri' Jam napari' quem. Om ca howa camain' xin carawa ca ara pan iri' ca', om na.

1 Tessalonicenses 5:15

Ma' tara xumuhu' con wari' co quep xiram nuhu' ma'. Ta win mapa' ne hun me. Xiram pa' pan e' xujuhu' pain ca ara mi' xujuhu' pain ca awi wa me. Tama' xiram pa' xujuhu' pain ca xere xujuhu' ma', tama' xiram pa' jujun oro wari' ma' quem.

Hebreus 1:14

Cain' cain' caca oro jam co taramaja mi' nonon quem? Om ca tomi' ha' tomi' ha' pi' pin cocon Iri' Jam pain ca quep xiho' jujun oro wari' co to' witan xuxun ta tococwa ra? Je i ma' ca taramaja nucucun ma' ira!

Hebreus 12:25

Ma' tara xumuhu' me. Taraju wet jun Iri' Jam co tomi' nuhu' cwa', ta ari hun me. Noro jujun oro hwanana nexi' cara pane, co om taraju wet jun na nonon pain ca hu to tococwa pain macan' pane. Wap tata, om ca witan ca' cocon Iri' Jam pain ca wap toton cocon pane. Wari' pain xocori ca' iri na ne, mo ta om taraju wet xun Iri' Jam co pe pawin cain, mo ta ari xun pain ca hu capari' ca', ma' tara ca witan ca' ac xun pain ca wap xim capari' ra? Om na ta. Wap tamana tarapari' ta.

1João 5:10

Wari' co howa non Panxica Iri' Jam ma', howa nain ca tomi' nucun Iri' Jam con Jeju Cristo. Wari' co om howa non Iri' Jam ma' iri na ne, tomi' napat non quem. Mixein na Iri' Jam ta non, xi howa cain ca tomi' nucun con Panxica ta.

1João 5:21

Je ca tomi' xuhu' ca', pain ca ac ca mana panxita' xuhu' ne ca'. Ma' tara xumuhu' me, ein jein oro carawa jimao ca Iri' Jam xi' ma wa ma'. Ta howa camain' hwein me ta. Je i ca' ca xirao' ne ca'.

Apocalipse 1:1

Je i ca' carawa ca maqui' ta' ma', ca an hwet pe ca Jeju Cristo pane. Wirico Iri' Jam co an hwet mi' pan non pain, an xin tiquin' mi' roron pain oro co taramaja mi' nanapa' pain macan' ta non. Om ta pain homa ne, maqui' ac ne tara ta non. Mam' ac capa' na con jam co taramaja mi' non ma', tomi' hwet ron pain João cwain, co taramaja mi' napa' cwain non, tomi' hwet ac capa' pain na quem.

Apocalipse 1:9

João ina pain ca xirao' mi' xuhu' ca'. Xere xijexi' pain ca howa xun Jeju. Win ma' ne xijexi' pain ca jain jain wi iri' cocon oro wari' co quep em' nanapari', xi om ne ca taramaxicon ne ara xun Iri' Jam ta. Win ma' ne xijexi' pain ca quereme cara xin oro ca to' i'ina napari' pain ca howa xun Jeju quem. Pe inain xixi pan nein macan' Patmos. An mao nanapa' pain i cain pane, xi om ne ca pijim' ara tain capijacon Iri' Jam pane, xi om ne ca tomi' hwet ara toton con Jeju oro wari' pane quem.

Apocalipse 12:11

Oro xerexi' ma', wiricoco co to' quiji' pin nonon. Mam' to' quiji' pin nonon pain ca hwara' opa nein quicon co ma' co ac Wijimain Taramaji Ovelha ma'. Mam' to' quiji' pin nonon pain capijacon Iri' Jam ca pijim' caca con Jeju ma' quem. Mo ta to' parapa' xim cacapari' pain ca howa xun Iri' Jam cwa', je i ma' ira, to' parapa' ma' tatarapari' ne nana.

Apocalipse 12:17

Mana' tamana pin ac cam na narima' ma', mixita toton ta ac tococwa na humaxicam cocon oro waram winacam ma', wiricoco co tomi' ha' nonon Iri' Jam ma', co om an to camain' nanain oro ca tomi' hwet xine con Jeju.

Apocalipse 14:7

Tomi' mip ac ca na: Tomi' ha' jun Iri' Jam ta. In ac jun pain ca hwara' opa tamana nucun. Xi maqui' pin ara ne xec nein ca wap toton cocon oro caracat. Pe torotop mi' querec te jun co ma' co quep nain pawin je macan' je cote ne com je oro ca hoi hoi ne com ca weweweo qui' nain macan' ta na ca tomi' ca ma'.

Apocalipse 15:4

Tomi' ha' cara teterem oro wari' ta Taramaxicon Iri' Jam. In ac cara teterem quem. Xi xica' pe ara ma pain ca awi ma ma', pain ca pe ni ca' main ca caracat wa ma'. Hwet hwet xam' teterem oro wari' co to nanain oro xijein macan'. Pe torotop mi' querec te teterem. Xi om ne ca querec pin' ara quequem pain oro ca ara xo' tamana ma ma'. Ac i ma' na ca com nucucun.

Apocalipse 19:9

Xirao' ca' ra ta ac capa' na jam co taramaja mi' non Iri' Jam: Param mi' tata pain ca awi wa oro wari' co tomi' wawa pain ca harahap je, cao' querec te wi xijexi' con co ma' co ac Wijimain Taramaji Ovelha ma', co an pin tam nam narima' ta na. Tomi' tomi' tiquin' ac capa' na: Je ca tomi' ca Iri' Jam cwa'. Iri'o' na ca tomi' nucun ta na.

Apocalipse 4:10

pe torotop mi' pan ac cocon na xucucun taramaxicon ma', co ma' 24 nana ma'. Pe torotop mi' querec te nonon co xao pe pe nain ca mam' xao pe nucun ma', co e' cara ma', co om pi' camain' ca e' nucun ma'. An toco' mi' ac cocon na pain caji waji' nucucun. Tomi' ho' tomi' ho' ac cocon na: