Apocalipse 17:2 - Tradução Bíblica Pacaas Novos

² Caracat wi xi' ta nonon oro taramaxicon co taramaxicon to nanain oro xijein macan', win ne ca param ni ca' ton taxi cwa', param ni ca' jun Iri' Jam ta nonon. Oro wari' co to nanain oro xijein macan' ma' quem, ac ca toc tamanain to cacain na comi uva nequem ca mana' ma', ca tomi' joc mam' mi' nain oro ca om awi wa ca ara cama pain ca caracat wi cocon oro xucucun taramaxicon.

Apocalipse 17:2 Iomraidhean Croise

João 2:10

Tomi' ac con na: Cain' cain' xima quem? Oro wari' ma', cam mi' cain' taxipa' nanain comi uva ca awi tamana. Toc toc ma'am pin iri nana co toc nanain ma' ne, cam mi' ac tococwa na pain comi uva ca om awi homa. Wum iri na ne, cam mi' cain' main ca om awi homa nein, aram aram cam mi' ac main na ca awi tamana nein ca' na ca tomi' ca ma'.

Apocalipse 14:8

Mao iri na jam co taramaja mi' non Iri' Jam ne, co maqui' cain' ma', maqui' ac ca na xucun jam co taramaja mi' non Iri' Jam. Ma' 2 pin nana. Tomi' ac ca na: Om pin na cidade pain Babilônia, om pin na Babilônia co hwara' opa tamana nana oro wari' nein ma'. Tomi' joc mam' mi' nam caxicam narima' co param ni ca' non taxicam ma'. Ac ca caracat wi xijexi' ta tococwa na oro xucucun wari' co to nanain oro xijein macan' ma', ac ca toc jein ta tococwa na pain comi uva ca mana' ma', ca an xiho' nain ca param ximama' xine oro ca om awi wa. Ac i ma' na ca tomi' ca ma'.

Apocalipse 17:13

Xin ne ac xucucun tara, an an ari tara ca coromicat nucucun. Tomi' xo' ac xucucun tara, mi' xun pain ca hwara' opa nexi' co ma' co ac caji carawa ma', co hwet qui' cain' ma', taramaxicon pan ac ca tara ta, ac i ma' tara ca tomi' xo' xucucun.

Apocalipse 17:17

Wirico Iri' Jam ara xi' na co an pe mi' nonon pain ximicocon pain ca ara xin cacain ca param pan nucun. Wirico Iri' Jam pan co mi' nonon pain ca tomi' xo' xucucun ma', pain ca mi' xun pain ca hwara' opa nexi' pain ca taramaxicon iri' ca' cocon co ma' co ac caji carawa co hwet qui' cain' ma', pain ca taramaxicon pan ra ta cocon ma'. Taramaxicon ac ca tara, taramaxicon taramaxicon maqui' pa' ac con tara xec nein ca ara ara pi' pin tain cain oro ca wara tomi' pe pan nucun Iri' Jam. Taramaxicon taramaxicon om pin ac ca tara ta.

Apocalipse 17:5

Xirao' pe na pain jitaracam wixicam quem. Ma' na ca tomi' mao ne wixicam, i'ina na ca taraju pa' xine ca tomi' mao nein. Ca' na ca xirao' pe nein wixicam: Babilônia cwa', co hwara' opa tamana nana oro wari' nequem cwa', ac ca wijima cacam na oro caxicam narima' co param ni ca' nonon waram taxicacam ma'. Ca' na nanam pain oro ca pan teretem wa ca noc pan ca Iri' Jam. Je i ma' ca tomi' mao nein wixicam ca xirao' pe xine pain jitaracam.

Apocalipse 17:8

Co ac caji carawa co querec ma ma', e' paxi' na ira, ane om e' mami' ca pain xocori ca' ne. Mi' pin na. Wara piri' ca' tain nain cote ne man ca om tawirinain cain. Main to' om pin ac tocwa tara ta, ame ma e'. Oro wari' co to nanain oro xijein macan' ma', co om xirao' to wa wixicocon pain tapari carawa ca xirao' to xine wixicocon oro wari' co e' cara xi' nana ma', co om xirao' to wa wixicocon pain ca om tomi' ma' pin querec xine macan' pain cara pane quem, querec iri totoron co ac caji carawa co ma' 7 ne winacon ma' ne, wa wa ac cocon tara. E' paxi' na ira, ane om e' mami' ta' ca pain xocori ca' ne. Ame ma e', main e' mami' tara quem, ac i ma' na ca tomi' capa' ma'.

Apocalipse 18:23

Om ta tom xica' pe camain' ne naran pain oro xuruhu'. Om ta taraju mami' tocwa wari' ma', pain ca tomi' cam manacon pain ca tomi' querec te xequequem pain ca xo' an xequequem ma'. Hwara' opa paxi' nana oro win ma' nuhu' co vender tiquin' taxipa' nanain carawa nucucun pain oro xijein macan' ma'. Ane mixein mixein pi' pin cocon oro wari' co to nanain oro xijein macan' ne. Ara xirac nonon oro wari'. Ac i ma' na ca tomi' ca jam co taramaja mi' non Iri' Jam ma', co xin mi' na pain com cote ne pacun ma'.

Apocalipse 18:3

Xi ara em' pin ara tococwa oro wari' co to nanain oro xijein macan' ta. Ac ca toc jein ta tococwa na pain comi uva ca mana' ma', ca tomi' joc mam' mi' nain oro ca param ximama' cama caxicam narima' ma'. Ac ca caracat wi xi' ta tococwa na oro xucucun taramaxicon co taramaxicon to nanain oro xijein macan' ma', pain ca param ni ca' xun Iri' Jam ta tococwa ma'. Oro wari' co maqui' nanain oro xijein macan' ma', co vender taxipa' nanain oro carawa ma', caramaju tamana pin nana, xi om ne ca param ximama' ara cacain oro carawa ca awi oro wari' nein Babilônia ta. Ac i ma' na ca tomi' mip capa' jam co taramaja mi' non Iri' Jam ma', co quiji' qui' nain pawin ma'.

Apocalipse 18:9

Tomi' tomi' tiquin' ac ca na co tomi' qui' nain pawin: Oro xucucun taramaxicon co taramaxicon to nanain oro xijein macan' ma', co caracat wi nana cocon oro wari' nein Babilônia ma', pain ca param ni ca' cocon Iri' Jam ma', co waraju wi nonon pain oro caramaxicocon ca mam' tomi' querec te ximama' caca ma', querec iri tatarain tain' pain ca tom pin tococwa ma' ne, awaran tamana ac tococwa tara.

Apocalipse 2:22

Je ca tomi' xuhu' ca': To' caxi tamana tam, jain jain ac cama tara. To' jain jain tamana toton co quep nanam quem, mija tara ca jain jain caca. Mo ta om cwirin' pin cacain ca caracat nucucun ma', mo ta om an to pin cacain ca pan teretem nucucun ma', to' jain jain ho' toton ta.

Apocalipse 3:10

Wara hu inuhu' pane, quereme cara jein oro ca to' i'ina nuhu' me inuhu' pane. Tomi' ha' mahu' quem. Je ca narain ho' xim xuhu' pain ca jain jain wa pain oro xec pain ca to' jain jain toton ta' oro wari' co to nanain macan' ma'.

Apocalipse 9:21

Om ca cwirin' cacain oro ca ara caca ma', pain ca to' parapa' cocon oro wari', je pain ca ara xirac cocon, je pain oro ca quep ximama' xucucun, je pain ca an noc xa cacain caramaxicocon oro win ma' caca quem. Om ca cwirin' camain' caca ta.