Apocalipse 16:19 - Tradução Bíblica Pacaas Novos

¹⁹ Cocoroc iri na macan' pain cidade ma' ne, je pain Babilônia co hwara' opa tamana nana oro wari' nein ma', taparapa' pin ac ne na, taparapa' pan na macan'. Ma' 3 na cote ne ca taparapa' nein. To ni to ni xam' ac ne na. To' om pin ac xine na oro cidade pain oro xijein macan' quem. Iri' Jam ma', om ca ji'am pin cain ca pan teretem nucucun oro wari' nein Babilônia ma', co hwara' opa tamana paxi' nana pane. Toc jein ta ac tococwa na pain comi uva nucun ca mana' ma', ca tomi' joc mam' mi' nain ca mana' tamana nucun ma', ca ji'ao mi' ca pain ca mam' toc nucun ca an xiho' nain ca mana' tamana nucun ma'.

Apocalipse 16:19 Iomraidhean Croise

Apocalipse 11:8

To wet iri caca ma' ac tococwa tara pain wana ca xuruxut ac caca oro wari' pain ximijain cote ne cidade ma', pain Jerusalém ma', ca tatatain pe tocwa pain pana Taramaxicon nexi' co taramaja mi' caca ma'. Ma' na ca wuxu ni mao ne Jerusalém ma' quem. Sodoma, je Egito, ac i ma' na ca wuxu ni mao ne ma'. Tomi' joc mam' mi' ara xi' tata oro wari' nein pain ca caracat tamana nucucun ta.

Apocalipse 17:1

Hwet ac capa' na jam co taramaja mi' non Iri' Jam ma', co win ma' ne nonon co cut nanain too ca ma' 7 ma', ca moin' pe nain oro ca xirac wa ma'. Tomi' ac capa' na: Hap ra, an hwet mi' xim pain carawa ca hwet pa' tam nam caxicam narima' ma', co hwara' opa paxi' ma', co xao pe pe nain ca mija pe nein oro iri' cwerein com ma'. An hwet mi' xim pain carawa ca ara tam cam Iri' Jam ma', pain ca wap tam cam ma'.

Apocalipse 17:18

Narima' co querec ma ma', tomi' joc mam' mi' nain cidade ca wa wa caca oro wari' ma'. Wiricam co taramaxicon pe ho' nonon oro xucucun taramaxicon co taramaxicon to nanain oro xijein macan'.

Apocalipse 17:5

Xirao' pe na pain jitaracam wixicam quem. Ma' na ca tomi' mao ne wixicam, i'ina na ca taraju pa' xine ca tomi' mao nein. Ca' na ca xirao' pe nein wixicam: Babilônia cwa', co hwara' opa tamana nana oro wari' nequem cwa', ac ca wijima cacam na oro caxicam narima' co param ni ca' nonon waram taxicacam ma'. Ca' na nanam pain oro ca pan teretem wa ca noc pan ca Iri' Jam. Je i ma' ca tomi' mao nein wixicam ca xirao' pe xine pain jitaracam.

Apocalipse 18:10

Jin' tamana tatara, am wap xim cacapari' quem tatara. To pira ca' e' totoron, merem ac caca tara: Wa urut pahu' ta oro wari' nein Babilônia! Ximin hwe! Wa wa tamana paxi' nunuhu' oro wari' pane ira. Hwara' opa tamana paxi' hwe pane ira. Ane maqui' pa' hap cuhu' carawa ca to' ximin nuhu' ne, pain ca wap pin cuhu' Iri' Jam. Ane ane ximin pin hwe ta. Ac i ma' tara ca merem caca oro xucucun taramaxicon.

Apocalipse 18:2

Merem mip ac ca na: Om pin na, om pin na Babilônia co hwara' opa tamana nana oro wari' nein ma'. Ma' e' nana oro caxicon jam co om querec awi nana ma', wiricoco co xaraxa to nanain Babilônia pain xocori ca'. Oro caji me co om querec awi ma', co noc tamana ca Iri' Jam, je ca xaraxa to nain quem.

Apocalipse 18:21

An ac cain na cote ne pacun jam co hwara' opa ma', co taramaja mi' non Iri' Jam. Cote ne pacun ta, ac iri' cote ne pacun ca mam' ep wa ma'. Xin pocom pin ac ca na pain cote ne com. Tomi' ac ca na: Ac i ma' tara ca xin mi' xine pain macan' cote ne cidade ma', Babilônia ma', ca wa wa tamana caca oro wari'. Om ta querec mami' camain' xine.

Apocalipse 18:5

Xi mija pin ara ne ca caracat nucucun ta. Ac ca moin' tamana cocon na ca caracat nucucun, ac ca xi' xi' hwet nein na pawin cocon. Om ca ji'am pin cocon Iri' Jam quem, mam' pe wet nain ca pan teretem nucucun.