Apocalipse 11:9 - Tradução Bíblica Pacaas Novos

⁹ Querec querec xam' totoron oro wari' co to ni ca' nonon oro xucucun wari' pain macaracocon ma', co xucun wari' xucun wari' pi' pin nana ma', co capija ni ca' xucucun ma', co maqui' nanain oro xijein macan' ma' quem, querec querec xam' tatarain curucucun co to' parapa' wawa ma'. Ma' 3 tara xec pain ca querec e' cacain curucucun. Tocon xina pain xijein xec pa' totoron quem, querec e' tatarain curucucun. Narain ho' ac tococwa tara oro wari' pain ca tequi' pa' cocon quem.

Apocalipse 11:9 Iomraidhean Croise

Mateus 7:2

Mo ta tomi' em' xujuhu' pain ca pan teretem wa ma', ac i ma' tara ca tomi' em' xim cuhu' pain ca pan teretem wa Iri' Jam quem. Ca tomi' em' tamana nuhu' ma', win hwe ma' ac cuhu' tara, tomi' em' ac i ma' ac cuhu' tara pain ca pan teretem wa quem.

Apocalipse 10:11

Tomi' ac capa' na: Tomi' hwet mami' rain carawa ca hwet pa' ton nonon oro wari' cocon oro taramaxicon pain oro xijein macan' ma', wiricoco co to ni ca' nonon oro xucucun wari' pain macaracocon ma', co to nanain oro xijein macan' ma', wiricoco co capija ni ca' xucucun ma' quem. Tomi' hwet mami' roron pain carawa ca hwet pa' ton nonon ta, ac i ma' na ca tomi' capa' ma'.

Apocalipse 11:11

Ma' 3 pin iri na xec pain ca to' parapa' pin tococwa ne, je pain ca tocon xina pa' pin tococwa pain xijein xec quem, huco' mi' pan ac cocon na pain iri' ca e' nucun Iri' Jam. Tequi' to pin ac caca na, jin' tamana ac caca na oro wari' co querec nonon pain ca tequi' to pin nucucun. Om ca jin' pije' camain' caca.

Apocalipse 13:7

Mi' ta pain ca mixita cocon oro wari' nucun Iri' Jam, mi' ta pain ca to' quiji' pin cocon quem. Mi' ta pain ca taramaxicon pe ho' cocon oro co xucun wari' xucun wari' pi' pin nana ma', cocon oro co to ni ca' nonon oro xucucun wari' pain macaracocon ma', cocon oro co capija ni ca' nonon ma', cocon oro co to nanain oro xijein macan' ma' quem.

Apocalipse 17:15

Tomi' tomi' tiquin' ac capa' na quem. Oro iri' cwerein com ca querec ma ma', ca xao pe pe cama caxicam narima' ma', tomi' joc mam' mi' nonon oro wari' co to nanain oro xijein macan'. Mija nana, capija ni ca' xucucun.

Apocalipse 5:8

An ca' iri non pain ne, pe torotop mi' pan ac cocon na caram ma' co e' nana ma', co ac jam paxi' nana ma', co ma' 4 nana ma'. Pe torotop mi' nonon caram ma' co ma' 24 nana ma' quem. Ma' ma' xam' nonon ca mam' tao' wa, ac violão paxi' na cocon. Ma' ma' xam' nonon too ca mam' quep xine pain ouro ma', ca moin' to pain incenso ma', ca tomi' joc mam' mi' nain ca tomi' nucucun oro wari' nucun Iri' Jam ma', pain ca tomi' cocon ma' quem.

Apocalipse 5:9

Com ac cacain na xocori tamara': Wum co awi tamana, wum co hohot pain ca an main tapari carawa ca joc top ma', je pain ca pa main oro ca hupa' caho' nein ma'. Xi om ne ca to' pa' pin ara xima pane ta. Cut mi' momon con Iri' Jam oro wari' co xucun wari' xucun wari' pi' pin nana ma', co capija ni ca' nonon oro xucucun wari' ma', co to ni ca' nonon oro xucucun wari' pain macaracocon ma', co to nanain oro xijein macan' ma' quem. Pain ca cut mi' momon con Iri' Jam ma', mam' to' witan momon pain cocum.