Apocalipse 11:15 - Tradução Bíblica Pacaas Novos

¹⁵ On ac cain na caji taracom xucun jam co taramaja mi' non Iri' Jam, ma' 7 pin ac caca na co on nanain ma'. On iri nain ne, taraju ac toton na co tomi' mip to nanain pawin ma'. Tomi' ac i ca' nana: Taramaxicon pin na Iri' Jam co Taramaxicon ne iri' cwa'. Taramaxicon pin na Cristo co tora' pan ca quem. Wirico Iri' Jam na co taramaxicon pe ho' taramaxicon pe ho' pi' pin toton nonon oro wari' pain oro xijein macan'. Taramaxicon cara tara quem. Ac i ma' na ca tomi' mip caca ma'.

Apocalipse 11:15 Iomraidhean Croise

Mateus 24:31

On mip ac ne tara caji taracom. Tomi' ac toton tara oro jam co taramaja mi' nanapa' ma'. Mama' jein oro xijein macan', cut in cut in xam' jujun oro wari' co tora' ca Iri' Jam ta, cut in qui' jujun pain oro xijein macan' pain pira ta, ac i ma' tara ca tomi' toton ta.

Mateus 6:13

Narain ho' xut pain ca tomi' querec caparut Caxicon Jam quem. To' witan ca' xut con quem. Wum pan ara xi' na co Iri' Taramaxicon cara ma'. Tama' hwara' opa cara ma quem. Tama' awi tamana na ta cara nenem oro wari' cwa' quem. Amém, iri'o' na ca tomi' ne ta. Ac i ma' je pain ca tomi' xun hun Iri' Jam ta na ca tomi' tococwa ma'.

Lucas 1:33

Taramaxicon pe ho' cara ac cocon tara waram winacon Jacó cara pane, om ta pi' ra ha' ne ca taramaxicon pe ho' cara cocon ta. Ac i ma' na ca tomi' cam Maria Gabriel pane.

Lucas 15:10

Je ca tomi' xuhu' ca' ac tococwa na. Tomi' querec te ac i ma' nana oro jam co taramaja mi' nonon Iri' Jam, tomi' querec te tamana nonon wari' co cwirin' pin nain ca caracat nucun. Xica' pe paxi' na, tomi' querec te tamana nonon ta na ca tomi' tococwa ma'.

Lucas 15:6

In mao ac cain tara xiricon. Harahap je ac tococwa tara oro win ma' ca cocon oro xucucun co to ho' ja' pan nonon pain cidade nucun ma', tomi' ac tococwa tara: Tomi' querec te wi xijexi' e', xi mam' pin ara tain ovelha ne ca pan' am pane ta na ca tomi' tococwa ma'.

Atos 4:26

Mixita xi' nana oro taramaxicon nucucun oro wari' cwa'. Wara cut in xucucun. Maji mixita xun Taramaxicon Iri' Jam. Maji mixita xun Cristo ta xucucun. Ac i ma' na ca tomi' ca hwanana nuxut Davi cara pane ta Coturut Iri' Jam.

Hebreus 1:8

Ane tomi' ca' ca con Panxica ne: Iri' Jam ma, taramaxicon cara ra. Om ta pi' ra ha' ne ca taramaxicon nem ma'. Taramaxicon xo' ma pain ca taramaxicon hwara' opa pe ho' momon oro wari' nem ta.

Apocalipse 10:7

On tain caji taracom ta iri tara jam co taramaja mi' non ne, co ja' corom mao nonon win ma' ca ma', pain ca ma' 7 pin ta' nucun ma'. On tain iri tarain ne, ara pin ac cain tara ca param nucun Iri' Jam. Ara tarain carawa ca ara ta' ca pane, ca om an hwet querec ca pane ira. Win ne ca wara tomi' an pe mi' tococwa pain ca tomi' nucun oro profeta cocon co taramaja mi' nonon pain cara pane.

Apocalipse 12:10

Taraju ac tain na ca tomi' wa ca maqui' nain pawin. Tomi' mip ca' na: Maqui' pin iri na xec nein ca to' witan pin toton oro wari' ne ta na Iri' Jam nexi', je pain ca tomi' joc mam' mi' cain ca hwara' opa nucun, je pain ca Taramaxicon pin ca ca'. Maqui' pin iri na xec nein ca tora' ca Cristo ma' quem, pain ca hwara' opa pan ca pain ca Taramaxicon pin ca ca'. Xi xin hwet pin ara tocwa co ma' co xina non Iri' Jam ma', co tomi' em' taxipa' nonon oro xerexi' pain xec je pain xim quem.

Apocalipse 15:4

Tomi' ha' cara teterem oro wari' ta Taramaxicon Iri' Jam. In ac cara teterem quem. Xi xica' pe ara ma pain ca awi ma ma', pain ca pe ni ca' main ca caracat wa ma'. Hwet hwet xam' teterem oro wari' co to nanain oro xijein macan'. Pe torotop mi' querec te teterem. Xi om ne ca querec pin' ara quequem pain oro ca ara xo' tamana ma ma'. Ac i ma' na ca com nucucun.

Apocalipse 16:17

Mao ac ca na xucun jam ma', co ja' corom mao nonon win ma' ca ma', ma' 7 pin ac caca na jam co mama' nana. Ji'ao pin ac cain na ca xirac wa ca moin' pe nain too nucun. Ji'ao na pain pawin. Ji'ao iri nain ne, taraju ac tain na ca tomi' wa ca maqui' nain xiricon Iri' Jam ma', maqui' nain ca mam' xao pe nucun ma'. Tomi' mip ac ne na: Ara pi' pin inain oro ca ara ta' ta' pane na.

Apocalipse 17:14

Mixita paxi' totoron co ma' co ac Wijimain Taramaji Ovelha ma', ane to' quiji' pin xun tococwa ne, xi wirico pan ara ne co hwara' opa tamana pan, co taramaxicon hwara' opa tiquin' ca' nonon oro xucucun taramaxicon ma'. Oro wari' co tora' ca ma', co howa xine ca ma', co win xumu nonon ma', to' quiji' wi totoron cocon oro xucucun taramaxicon. Ac i ma' na ca tomi' capa' jam co taramaja mi' non Iri' Jam.

Apocalipse 19:1

An hwet mi' iri napa' pain oro ca hwet pa' tain nain Babilônia ne, taraju ac tain na ca tomi' pa tamana wa. Ac ca mija caca na oro co tomi' querec te xucucun pain pawin ma'. Merem mip ca' nana: Aleluia! Tomi' querec te xun Iri' Jam nexi' cwa'! Wirico co to' witan napari'. Tomi' hwet xin ca awi tamana nucun. Querec pin' xun pain ca hwara' opa tamana nucun.

Apocalipse 19:6

Taraju ac tain na ca tomi' pa tamana wa quem. Ac ca mija caca na wari' co tomi' pa pan xucucun. Ac ca xain ne pacun pain ca weweweo tamana ne com na, ac ca toroho mip ca na comerem ma' quem. Merem ac caca na: Aleluia! Tomi' querec te xun Iri' Jam nexi' ta! Xi om ne ca Iri' Taramaxicon ara ca ta. Hwara' opa pan na ta.

Apocalipse 20:4

Querec ac tain na oro ca mam' xao to nucucun oro taramaxicon. Ma' tocwan na. Xao to to nanain caram ma' co mi' wawa pain ca hwara' opa wa ma', pain ca tomi' xo' jujun oro wari' pain oro carawa ca ara caca pain ca e' e' wet nucucun pane wawa ma'. Querec inain tamataracocon co wara cono' nana ma' quem, co ton tapit pin wawa pain winacocon pane, xi om ne ca tomi' hwet ara cocon con Jeju oro wari' pane. Pijim' nanain capijacon Iri' Jam pane, je ca ton tapit pin xine winacocon pane. Om ca pe torotop mi' querec te cocon co ma' co ac caji carawa co hwet qui' cain' pane, om ca pe torotop mi' querec te cacain pacun ca an xiho' nain curucun pane quem. Om ca xirao' xirac tococwa pain wixinain pain jitaracocon pain micocon pane quem. E' mami' nana, taramaxicon wi ac cocon na Cristo quem. Ma' 1.000 na cawaxi' pain ca taramaxicon wi cocon Cristo.

Apocalipse 8:12

On ac cain na caji taracom nucun xucun ma', co ja' corom mao non ma', ma' 4 pin ac caca na jam co on nanain ma'. On iri nain ne, to' em' um terço pin ac tocwa na xina con panawo' con oro pijo'. Mixem um terço pin na xina pain xec, mixem um terço pin na panawo' con pijo' pain xim quem.

Apocalipse 9:1

On ac cain na caji taracom nucun xucun ma', co ja' corom mao non ma', ma' 5 pin ac caca na jam co on nanain ma'. On iri nain ne, querec ac ton na co ma' co ac pijo' ma', co wara pan' hwet nain macan'. Mi' ac tocwa na pain ca mam' pa xine capijain cote ne man ca om tawirinain.

Apocalipse 9:13

On ac cain na caji taracom nucun xucun ma', co ja' corom mao non ma', ma' 6 pin ac caca na jam co on nanain ma'. On iri nain ne, taraju ac tain na ca tomi' wa ma', ca maqui' nain ca puxu xirac nein pana ca tom tain' pe xine waraqui pana ca hu awi ma', ca mam' quep xine pain ouro ma', ca pe quima hwet non Iri' Jam ma'.