Apocalipse 1:6 - Tradução Bíblica Pacaas Novos

⁶ Wari' ne napari' pain ca taramaxicon pe ho' capari', sacerdote je pain ca taramaja mi' hun Te Iri' Jam cwa' napari' pain ca Iri' Jam ne con Cote ca. Na e' na pain ca tomi' querec te xun Jeju Cristo co awi tamana cara ta. Wirico co iri' Taramaxicon cara quem. Amém, iri'o' na ca tomi' ne ta.

Apocalipse 1:6 Iomraidhean Croise

Mateus 6:13

Narain ho' xut pain ca tomi' querec caparut Caxicon Jam quem. To' witan ca' xut con quem. Wum pan ara xi' na co Iri' Taramaxicon cara ma'. Tama' hwara' opa cara ma quem. Tama' awi tamana na ta cara nenem oro wari' cwa' quem. Amém, iri'o' na ca tomi' ne ta. Ac i ma' je pain ca tomi' xun hun Iri' Jam ta na ca tomi' tococwa ma'.

João 5:23

Ma' ta in ac in ac pi' pin quequem oro wari' ta arain napa'. Win ne ca in ac cacapa' ca' napa'. Oro wari' co om in ac nanapa' pain ca Panxica Iri' Jam ta' ca', om ca in ac cocon Te co hwet roron oro wari' ta napa' quem.

Romanos 11:36

Xi wirico ara ca co tomi' ma' tomi' ma' pi' pin nain oro carawa ta. Mam' to' e' nain pain ca hwara' opa nucun. Ma' ta querec pin' mahu' ta napari'. Ma' ta awi tamana na Iri' Jam ta mahu' ta napari'. Amém, iri'o' na ca tomi' ne ta.

Romanos 15:6

Ma' ta awi na Iri' Jam awi na Iri' Jam pi' pin hwe ta inuhu'. Ac ca xica' pe ne tara capijahu' pain ca tomi' hwet hwein ca awi nucun. Awi na Iri' Jam ta, awi na Cote ca Taramaxicon nexi' Jeju Cristo ta, ac i ma' tara ca tomi' nuhu' ta.

Filipenses 2:11

Querec pin' totoron pain ca hwara' opa nucun quem. Iri' Taramaxicon na Jeju Cristo ta tatara oro wari' pain oro xijein macan'. Ac i ma' tara ca an hwet pe cacain ca awi nucun Cotere' Iri' Jam ma' quem.

1 Timóteo 6:16

Xica' pe na Iri' Jam co om mi' pin ra ha' ma'. Pe ho' nain naran ca toc meremem tamana. Je ca om xut hwet ac tocwa. Om na wari' co querec non. Om ca querec ac tocwa quem. Na e' na pain ca querec pin' xun pain ca awi cara nucun ma', je pain ca hwara' opa cara nucun ma' quem. Amém, iri'o' na ca tomi' ne ta.

Hebreus 13:21

pain ca mi' cuhu' pain ca ara taxi' hwein ca awi wa ma', ma' ta ha' cuhu' pain ca ara hwein ca param nucun ma'. Param inon pain ca meo capari' pain iri' ximixi' ca', pain ca mi' capari' pain ca ara e' xin ca hohot pan non quem. Wirico Jeju Cristo ara xi' na co mi' napari' pain ca ara e' xin ca hohot pan non quem. Na e' na pain ca tomi' querec te cara xun co awi tamana ta! Amém, iri'o' na ca tomi' ne ta.

1Pedro 4:11

Mo ta mi' cuhu' pain ca pijim' wa ma', pijim' xo' ac hwe tara. Xi capijacon Iri' Jam pan ara ne ca pijim' hwe ta. Mo ta mi' cuhu' pain ca quep xiho' hun win ma' nuhu' ma', mam' quep xiho' ac hun tara pain ca hwara' opa nucun Iri' Jam ca mi' taxipa' ca ma'. Ma' ta awi na Iri' Jam ta caca oro wari'. Wirico Jeju Cristo tara co mi' nonon pain ca tomi' ac i ma' caca ma'. Hohot na pain ca tomi' querec te xun pain ca awi tamana cara nucun. Na e' na pain ca tomi' querec te xun pain ca hwara' opa tamana cara nucun ma' quem. Amém, iri'o' na ca tomi' ne ta.

1Pedro 5:11

Na e' na pain ca tomi' querec te xun pain ca hwara' opa cara nucun ta. Amém, iri'o' na ca tomi' ne ta.

2 Pedro 3:18

Xuruxut xo' xuruxut xo' tiquin' e' je, ma' ta querec pin' hun Taramaxicon nexi' Jeju Cristo co to' witan napari' cwa', co xiram pa' e' napari' cwa'. Tomi' hwet xin ca awi nucun pain xocori ca', tomi' hwet cara xin ca awi nucun pain oro xec ca maqui' ta' ma' quem. Amém, iri'o' na ca tomi' ne ta. Je i ca' ca xirao' ne ca'.

Apocalipse 1:9

João ina pain ca xirao' mi' xuhu' ca'. Xere xijexi' pain ca howa xun Jeju. Win ma' ne xijexi' pain ca jain jain wi iri' cocon oro wari' co quep em' nanapari', xi om ne ca taramaxicon ne ara xun Iri' Jam ta. Win ma' ne xijexi' pain ca quereme cara xin oro ca to' i'ina napari' pain ca howa xun Jeju quem. Pe inain xixi pan nein macan' Patmos. An mao nanapa' pain i cain pane, xi om ne ca pijim' ara tain capijacon Iri' Jam pane, xi om ne ca tomi' hwet ara toton con Jeju oro wari' pane quem.

Apocalipse 20:6

Param mi' tata pain ca awi wa oro co e' mami' cain' nana ma', co iri' wari' nucun Iri' Jam nana ma'. Om ta cono' mami' caca, om ta wixicaracao' mi' tococwa pain cote ne xe. Sacerdote pin tatara pain ca taramaja mi' xun cocon Iri' Jam con Cristo ma', taramaxicon wi ac cocon tara, ma' 1.000 tara cawaxi' pain ca taramaxicon wi xun cocon ta.

Apocalipse 4:11

Taramaxicon ne urut pum ta Iri' Jam. Iri' Jam ne urut pum quem. Na e' na pain ca tomi' hwet urut pain ca awi tamana nem. Na e' na pain ca querec pin' urut pum pain ca awi tamana ma ma', je pain ca hwara' opa tamana ma ma' quem. Xi om ne ca to' ma' to' ma' pi' pin ara main oro carawa ta. Je i ma' ca param nem pane. Je ca ma' ne oro carawa ma' quem. Ac i ma' na ca tomi' cocon ma'.

Apocalipse 5:10

Wari' ne momon pain ca taramaxicon pe ho' momon. Sacerdote je momon pain ca taramaja mi' xine momon. Taramaxicon to ho' ac cocon tara oro wari' pain oro xijein macan' ta. Ac i ma' na xocori tamara' ca com caca ma'.