Apocalipse 1:2 - Tradução Bíblica Pacaas Novos

² Je ca an xin tiquin' mi' xuhu' pain ca xirao' pe ta' ca'. Iri'o' na oro ca xirao' ne ca', xirao' xirao' pi' pin inain oro ca querec ta' con, je oro ca tomi' nucun Iri' Jam ma', xirao' xirao' pi' pin inain oro ca tomi' hwet capa' Jeju Cristo pane.

Apocalipse 1:2 Iomraidhean Croise

João 1:32

Tomi' ac tococwa na: Querec inain Tamataracon Iri' Jam pain ca quiji' qui' nein pawin pane. Ac ca quiji' ca xucu' cwa' na pain ca quiji' qui' nein pawin. Quiji' quiji' xat ho' ac con na Jeju.

João 12:17

Oro wari' ma', co querec nonon Jeju pain ca hwet ca' rain manain pacun ta qui' con Lázaro pane, pain ca to' e' mami' con pane, tomi' hwet tomi' hwet tiquin' ac cocon pain na oro xucucun wari'.

João 19:35

Querec inain ca mi' pin nucun quem. Iri'o' na ca xirao' ne ca'. Om ca mixein ta', iri'o' na ca xirao' ne ca'. Je ca xirao' mi' xuhu' ca' pain. Ma' ta howa cara hun quem inuhu'.

João 21:24

Wata' pain ca taxipa' ton Jeju ca', tomi' hwet pan inuhu' pain oro ca ara ca Jeju pane. Xirao' pe mi' inuhu' pain quem. Taxi' urut pain ca tomi' iri'o' ta' ca' quem.

João 3:11

Warut pain ca pijim' urut pahu' ca', tomi' hwet paxi' urut pahu' pain ca taxi' nuxut. Tomi' hwet paxi' urut pahu' pain ca querec nuxut quem. Ane om howa jein na hwein ca tomi' nuxut ne. Tomi' iri'o' inem ta.

Atos 22:15

Tomi' hwet ne cocon oro wari' ta ara xi' nem. Tomi' hwet tomi' hwet xam' roron pain oro ca querec ma pata', je pain oro ca taraju ma pata' quem nem.

Atos 26:16

Je i ma' ta ac capa' na. Tequi' pe ho' ra ta. Tora' inem, taramaja mi' ne ta inem. Je ca hwet pa' xim ca'. Tomi' hwet roron oro wari' pain ca querec mapa' ca', main tomi' hwet ac momon tara pain oro carawa ca an hwet mi' xim xim quem.

Atos 4:20

Xi tacana to taxi' urut ta. Om ca tacana to ac urut. Om ca pijim' hwet maho' ac urut pain oro ca querec urut pane, om ca pijim' hwet maho' ac urut pain oro ca taraju urut pane. Ac i ma' na ca tomi' tococwa ma'.

1 Coríntios 1:6

Pe pin ara xi' nuhu' capijacon ca tomi' hwet urut pahu' con Cristo cwa'.

1 Coríntios 2:1

Je ca tomi' xuhu' ca' xere: Hwet iri inuhu' pane ne, pain ca pijim' hwet xim xuhu' pain capijacon Iri' Jam ca om taraju pa' querec wa con Jeju ira, om ca pijim' xuhu' pain ca taxi' tamana ne pain ca coromicat ne pane, om na.

1João 1:1

Xirao' mi' urut pahu' con Jeju Cristo co wara ma', pain ca om om wet ne macan' pane, co ma' ma' wet pain xocori ca' quem. Taraju urut con, querec urut con pain tocoxut. Querec pin' urut con, quep urut con pain muxut quem. Je ca tomi' hwet urut pahu' con. Wirico co capijacon Iri' Jam ma', co an hwet mi' napari' pain ca om pi' ra ha' ne ca e' wa ta.

1João 4:14

Querec urut con Panxica pain ca maqui' cain macan' pane. Tomi' hwet urut cocon oro wari' pain ca mam' capari' con Cote ca quem. Hwet roron oro wari' pain macan' cain, to' witan ca' roron pain ca caracat nucucun ta non pari'.

3João 1:12

Win ca Demétrio ma'. Taraju urut cocon oro wari' co awi na awi na pi' pin nonon. Tomi' iri'o' nana quem, querec pin' ara xi' ta pain ca awi nucun, je pain ca xut xo' nucun ta. Taxi' urut con quem, awi na urut con. Taxi' maparut pain ca tomi' iri'o' nuxut ca' quem.

Apocalipse 1:11

Tomi' ac capa' na: Xirao' pe ra pain tapari carawa oro ca querec ta' ma ma'. Mam' ac momon pain tara oro co howa nanapa' ma', co cut in xucucun pain oro cidade ma', ca ma' 7 ma'. Mo na oro cidade nucucun: Éfeso ma', Esmirna ma', Pérgamo ma', Tiatira ma', Sardes ma', Filadélfia ma', je Laodiceia ma' quem. Ac i ma' na ca tomi' capa' pane.

Apocalipse 1:19

Je ca tomi' xim ca' ac capa' na. Xirao' pe ra pain tapari carawa pain oro ca querec ma cara ne, je pain oro ca querec ta' ma pain xocori ca', je pain oro ca maqui' ta' pa'ao' ma' quem, xirao' xirao' pi' pin rain.

Apocalipse 1:9

João ina pain ca xirao' mi' xuhu' ca'. Xere xijexi' pain ca howa xun Jeju. Win ma' ne xijexi' pain ca jain jain wi iri' cocon oro wari' co quep em' nanapari', xi om ne ca taramaxicon ne ara xun Iri' Jam ta. Win ma' ne xijexi' pain ca quereme cara xin oro ca to' i'ina napari' pain ca howa xun Jeju quem. Pe inain xixi pan nein macan' Patmos. An mao nanapa' pain i cain pane, xi om ne ca pijim' ara tain capijacon Iri' Jam pane, xi om ne ca tomi' hwet ara toton con Jeju oro wari' pane quem.

Apocalipse 12:11

Oro xerexi' ma', wiricoco co to' quiji' pin nonon. Mam' to' quiji' pin nonon pain ca hwara' opa nein quicon co ma' co ac Wijimain Taramaji Ovelha ma'. Mam' to' quiji' pin nonon pain capijacon Iri' Jam ca pijim' caca con Jeju ma' quem. Mo ta to' parapa' xim cacapari' pain ca howa xun Iri' Jam cwa', je i ma' ira, to' parapa' ma' tatarapari' ne nana.

Apocalipse 12:17

Mana' tamana pin ac cam na narima' ma', mixita toton ta ac tococwa na humaxicam cocon oro waram winacam ma', wiricoco co tomi' ha' nonon Iri' Jam ma', co om an to camain' nanain oro ca tomi' hwet xine con Jeju.

Apocalipse 20:4

Querec ac tain na oro ca mam' xao to nucucun oro taramaxicon. Ma' tocwan na. Xao to to nanain caram ma' co mi' wawa pain ca hwara' opa wa ma', pain ca tomi' xo' jujun oro wari' pain oro carawa ca ara caca pain ca e' e' wet nucucun pane wawa ma'. Querec inain tamataracocon co wara cono' nana ma' quem, co ton tapit pin wawa pain winacocon pane, xi om ne ca tomi' hwet ara cocon con Jeju oro wari' pane. Pijim' nanain capijacon Iri' Jam pane, je ca ton tapit pin xine winacocon pane. Om ca pe torotop mi' querec te cocon co ma' co ac caji carawa co hwet qui' cain' pane, om ca pe torotop mi' querec te cacain pacun ca an xiho' nain curucun pane quem. Om ca xirao' xirac tococwa pain wixinain pain jitaracocon pain micocon pane quem. E' mami' nana, taramaxicon wi ac cocon na Cristo quem. Ma' 1.000 na cawaxi' pain ca taramaxicon wi cocon Cristo.

Apocalipse 22:21

Param inon Taramaxicon nexi' Jeju pain ca quep xiho' quep xiho' xam' cuhu' ma', pain ca mi' e' cuhu' pain ca param nucun ta. Amém, iri'o' na ca tomi' nucun ta.

Apocalipse 6:9

Co ma' co ac Wijimain Taramaji Ovelha ma', pa pin ac cain na wirain ca hupa' caho' nein tapari carawa ca joc top ma', ma' 5 pin ac ne na ca pa nein. Pa pin iri nain ne, querec ac tain na tamataracocon co to' parapa' pin wawa pain ca howa cacain capijacon Iri' Jam, je pain ca tomi' hwet cocon con Jeju oro wari' ma'. To nanain xiquijinain maxinain ca tomi' querec te pe tocwa Iri' Jam.