Apocalipse 1:17 - Tradução Bíblica Pacaas Novos

¹⁷ Querec iri inon ne, pan' hwet ac ton na pain caximacon. Ac wari' co mi' pin ma' ina pain ca pan' hwet ton pain caximacon. Quep ac capa' na pain micon ma', pain iri' curucun ma'. Tomi' ac capa' na: Ta jin' mapa' me ta. Wata' co ma' cain' pane, pain ca om om wet ne oro carawa pane. Wata' co ma' cara ta' ma' quem, pain ca win pi' pin ta' ne oro carawa quem.

Apocalipse 1:17 Iomraidhean Croise

Mateus 14:27

Ane tomi' hap caparut Jeju ne. Om na, ta jin' mahu' me ta, wata' ta. Quereme je ta naparut.

Mateus 28:4

Jin' tamana ac caca na oro soldado co querec wet nanain manain pacun ma'. Cocoroc tamana nana pain ca jin' nucucun. Camara' mama' ac cacain na macan'. Ac ca cono' pin caca na quem.

Mateus 28:5

Tomi' ac cacam na oro narima' jam co taramaja mi' non Iri' Jam ma': Ta jin' mahu' me ta. Taxi' inuhu' pain ca pirao' hun Jeju co tatatain mi' wa pain pana pane.

João 13:23

Iri' win ma' ne napa' Jeju. Xao pe ja' pan inon.

João 21:20

Noro in ac ca na Pedro. Querec ac capa' na pain ca ja' ja' toton ma'. Wata' co iri' win ma' ne ca Jeju quem. Wata' co xao pe ho' non Jeju pain ca cao' querec te nuxut pane, co joc tomi' non Jeju pain ca ma' co tomi' mi' xim nem cocon oro taramaxicon quem ton pane.

Apocalipse 1:11

Tomi' ac capa' na: Xirao' pe ra pain tapari carawa oro ca querec ta' ma ma'. Mam' ac momon pain tara oro co howa nanapa' ma', co cut in xucucun pain oro cidade ma', ca ma' 7 ma'. Mo na oro cidade nucucun: Éfeso ma', Esmirna ma', Pérgamo ma', Tiatira ma', Sardes ma', Filadélfia ma', je Laodiceia ma' quem. Ac i ma' na ca tomi' capa' pane.

Apocalipse 1:4

João ina pain ca xirao' mi' xuhu' ca'. Xirao' mi' inuhu' pain ca howa hun Jeju ma', pain ca cut in xujuhu' pain oro cidade ca ma' 7 ma', ca to nain Ásia ma', je i ma' wixinain macan' ca to ne oro cidade ma'. Tomi' mi' inuhu' con Iri' Jam co ma' cara ma', co wara ma' pain cara pane, co maqui' ta' ma' quem. Param inon pain ca quep xiho' cuhu' pain ca mi' cuhu' pain ca param nucun, param inon pain ca mi' cuhu' pain ca om toron ne xumuhu' quem. Je ca param ta' pain Tamataracon ca ma' 7 ma' pain ca xat quima hwet nein ca mam' xao pe pe ca ma', pain ca Taramaxicon ca ma'. Param inain pain ca quep xiho' cuhu' pain ca mi' cuhu' pain ca param nein, je pain ca mi' cuhu' pain ca om toron ne xumuhu' ma' quem.

Apocalipse 1:8

Tomi' ca' na Taramaxicon Iri' Jam: Wata' co Alfa cwa', wata' co Ômega cwa'. Wata' co ma' cara cwa', wata' co wara ma', pain cara pane, wata' co maqui' ta' ma' quem. Wata' co hwara' opa pan. Ac i ma' na ca tomi' ca pane.

Apocalipse 2:8

Tomi' ac capa' na: Xirao' mi' ron co ma' co querec wet nonon co howa to nanain Esmirna. Xirao' mi' ac i ca' ron: Je i ca' ca tomi' xim cuhu' co ma' cain' pane, pain ca om om wet ne oro carawa pane, co ma' cara ta' ma' quem, pain ca win pi' pin ta' ne oro carawa quem, wirico co mi' pin pane, co e' mami' ma' quem. Tomi' ca' xim nuhu':

Apocalipse 22:13

Wata' co Alfa cwa', wata' co Ômega cwa'. Wata' co ma' cain' pane, pain ca om om wet ne oro carawa pane, wata' co ma' cara ta' ma' quem, pain ca win pi' pin ta' ne oro carawa quem. Wata' co tomi' ma' pin nain oro carawa, wata' co to' pi' pin nain quem.