Apocalipse 1:11 - Tradução Bíblica Pacaas Novos

¹¹ Tomi' ac capa' na: Xirao' pe ra pain tapari carawa oro ca querec ta' ma ma'. Mam' ac momon pain tara oro co howa nanapa' ma', co cut in xucucun pain oro cidade ma', ca ma' 7 ma'. Mo na oro cidade nucucun: Éfeso ma', Esmirna ma', Pérgamo ma', Tiatira ma', Sardes ma', Filadélfia ma', je Laodiceia ma' quem. Ac i ma' na ca tomi' capa' pane.

Apocalipse 1:11 Iomraidhean Croise

Atos 16:14

Pe nain i ma' narima' co taraju wet naparut quem. Lídia na wixicam. Maqui' nain Tiatira, je i ma' wixinain cidade nequem. Vender taxipa' non wom co awi tamana. Iri' wom cam, ca paca' nucun womicocon co caramaju nana ma', wirico co vender taxipa' cama ma'. Wara tomi' ha' paxi' non Iri' Jam Lídia ma'. Taraju iri nain ca tomi' nucun Paulo ne, mi' pan ac cam na pain ca taraju pa' wa Taramaxicon nexi', howa pin ac cama na.

Atos 18:24

Ac i ma' ac i ma' na. Wa' mao ac cain na Éfeso wari' co judeu. Apolo na wixicon. Maqui' nain Alexandria, je i ma' wixinain macaracon. Pijim' taxi' tamana na Apolo ma'. Taxi' tamana nain capijacon Iri' Jam ca xirao' to caca oro hwanana pane.

Atos 20:17

Tan' mama' iri urut pain Mileto ne, tomi' ac con na wari' Paulo. Mao rain Éfeso cain, mo'o roron co querec wet nonon co cut in xucucun pain ca howa cocon Jeju cwain ta non. Mao ac ca na, mo'o ac tococwa na.

1 Coríntios 15:32

To' i'ina tamana nanapa' oro wari' pain Éfeso pane quem. Ximin ina cocon. Ac oro caxicon copacao' nana pain ca mana' cacapa' pane. Mo xi an xiho' toton oro wari' pain ca om howa cacain ca e' mami' xi' caca ma', je i ma' xira ca om quereme qui' tain ca mana' cacapa' pain ca noc cacapa' quem? Mo xi om e' mami' xi' caca co wara cono' nana ma', na ac ne xira pain ca tomi' ximama' xijexi'. Ca' xixi': Cao' cao' ma'am xi', toc tamanain to xi', xi om ne ca xec cono' pin ara xi' iri' ta, pan' ara'am ac xi' tara ta, ac i ma' xira ca tomi' ximama' nexi' ta.

1 Coríntios 16:8

Ac i ma' paxi' na ca wara coromicat an pe xo' ne ca'. Ane mon to wet cain' tain Éfeso ca' ne. Maqui' pa' ac capa' tara xec nein ca tomi' querec te nucucun oro wari' pain Pentecostes.

Efésios 1:1

Paulo ina pain ca xirao' mi' xuhu' ca'. Apóstolo ra napa' Cristo Jeju pane, pain ca tomi' hwet roron pain capija oro wari' capa' pane. Wirico Iri' Jam co param mi' napa' pain. Xirao' mi' inuhu' pain ca to hwein Éfeso ma', pain ca wari' nucun Iri' Jam hwe ma', je pain ca tomi' ha' hun Cristo Jeju pain ca howa hun ma'.

Colossenses 2:1

Xirao' mi' ac i ma' inuhu', ma' ta taxi' mahu' pain ca taramaja tamana mi' xuhu' ca'. Jain jain ina pain ca quep xiho' xim xuhu'. Wahu', oro co howa to nanain Laodiceia ma', oro xucucun xerexi' co om querec pin' querec nanapa' ma' quem, jain jain jain jain pi' pin inuhu' pain ca quep xiho' xim xuhu' ca'.

1 Timóteo 1:3

Wara tomi' inem pane, tomi' mip inem pain ca mao tain qui' tain Macedônia pane. Mon to wet rain Éfeso ta inem pane. Ma' ta hu mip momon pain ca pijim' maho' je ta momon co pijim' pan teretem nanain capijacon Iri' Jam ta inem pane.

Apocalipse 1:17

Querec iri inon ne, pan' hwet ac ton na pain caximacon. Ac wari' co mi' pin ma' ina pain ca pan' hwet ton pain caximacon. Quep ac capa' na pain micon ma', pain iri' curucun ma'. Tomi' ac capa' na: Ta jin' mapa' me ta. Wata' co ma' cain' pane, pain ca om om wet ne oro carawa pane. Wata' co ma' cara ta' ma' quem, pain ca win pi' pin ta' ne oro carawa quem.

Apocalipse 1:19

Je ca tomi' xim ca' ac capa' na. Xirao' pe ra pain tapari carawa pain oro ca querec ma cara ne, je pain oro ca querec ta' ma pain xocori ca', je pain oro ca maqui' ta' pa'ao' ma' quem, xirao' xirao' pi' pin rain.

Apocalipse 1:2

Je ca an xin tiquin' mi' xuhu' pain ca xirao' pe ta' ca'. Iri'o' na oro ca xirao' ne ca', xirao' xirao' pi' pin inain oro ca querec ta' con, je oro ca tomi' nucun Iri' Jam ma', xirao' xirao' pi' pin inain oro ca tomi' hwet capa' Jeju Cristo pane.

Apocalipse 1:20

Tomi' xo' xim inem con oro pijo' pain oro ca mam' tom pe ne naran ca' quem. Ma' na ca tomi' mao nucun oro pijo' co ma' 7 cwa', co querec ma cwa', co cut ta' pain mu pain iri' cwere ca'. Ma' na ca tomi' mao nein ca mam' tom pe ne naran ca' quem, ca ma' 7 ca'. Oro pijo' cwa', co ma' 7 cwa', tomi' joc mam' mi' nonon co an xin tiquin' mi' nonon pain ca tomi' ne oro co howa to nanain oro cidade ca ma' 7 ma'. Oro ca mam' tom pe ne naran ca' iri na ne, ca ma' 7 ca' quem, tomi' joc mam' mi' nonon oro co cut in xucucun pain ca howa cacapa' ma', co to nanain oro cidade nucucun ca ma' 7 ma'. Ac i ma' na ca tomi' capa' ma'.

Apocalipse 1:4

João ina pain ca xirao' mi' xuhu' ca'. Xirao' mi' inuhu' pain ca howa hun Jeju ma', pain ca cut in xujuhu' pain oro cidade ca ma' 7 ma', ca to nain Ásia ma', je i ma' wixinain macan' ca to ne oro cidade ma'. Tomi' mi' inuhu' con Iri' Jam co ma' cara ma', co wara ma' pain cara pane, co maqui' ta' ma' quem. Param inon pain ca quep xiho' cuhu' pain ca mi' cuhu' pain ca param nucun, param inon pain ca mi' cuhu' pain ca om toron ne xumuhu' quem. Je ca param ta' pain Tamataracon ca ma' 7 ma' pain ca xat quima hwet nein ca mam' xao pe pe ca ma', pain ca Taramaxicon ca ma'. Param inain pain ca quep xiho' cuhu' pain ca mi' cuhu' pain ca param nein, je pain ca mi' cuhu' pain ca om toron ne xumuhu' ma' quem.

Apocalipse 1:8

Tomi' ca' na Taramaxicon Iri' Jam: Wata' co Alfa cwa', wata' co Ômega cwa'. Wata' co ma' cara cwa', wata' co wara ma', pain cara pane, wata' co maqui' ta' ma' quem. Wata' co hwara' opa pan. Ac i ma' na ca tomi' ca pane.

Apocalipse 10:4

Toroho mip iri na comerem ne, xirao' tain paxi' inain ca tomi' nucun ira. Ane taraju tain ca tomi' wa ca maqui' nain pawin ne. Joc xim rain ca tomi' ca comerem cwa', ta tomi' hwet main me. Ta xirao' main me ta ac capa' na.

Apocalipse 14:13

Taraju ac tain na ca tomi' wa ca maqui' nain pawin. Xirao' ca' ra ta ac ne na. Param mi' tata pain ca awi wa oro wari' co cono' pa' nanain ca howa nucucun pain xocori ca', pain ca howa cocon Taramaxicon nexi' Jeju cwa' na ca tomi' nein ma'. Tomi' ac ne na Tamataracon quem: Tomi' iri'o' ma, xao to wa tatarain ximicocon, xao to wa ca' tatarain ca taramaja tamana nucucun. To ho' cara totoron oro carawa ca awi ca mi' xun tococwa, xi om ne ca taramaja tamana ara caca pane ta na ca tomi' ne Tamataracon Iri' Jam ta.

Apocalipse 19:9

Xirao' ca' ra ta ac capa' na jam co taramaja mi' non Iri' Jam: Param mi' tata pain ca awi wa oro wari' co tomi' wawa pain ca harahap je, cao' querec te wi xijexi' con co ma' co ac Wijimain Taramaji Ovelha ma', co an pin tam nam narima' ta na. Tomi' tomi' tiquin' ac capa' na: Je ca tomi' ca Iri' Jam cwa'. Iri'o' na ca tomi' nucun ta na.

Apocalipse 2:1

Tomi' ac capa' na: Xirao' mi' ron co ma' co querec wet nonon co howa to nanain Éfeso. Xirao' mi' ac i ca' ron: Je i ca' ca tomi' xim cuhu' co cut 7 non pijo' pain micon ma', pain iri' curucun ma', co xut in pe nain ximijain oro ca mam' tom pe ne naran ma', ca ma' 7 ma', ca mam' quep xine pain ouro ma' quem, tomi' ca' xim nuhu':

Apocalipse 2:12

Tomi' ac capa' na: Xirao' mi' ron co ma' co querec wet nonon co howa to nanain Pérgamo. Xirao' mi' ac i ca' ron: Je i ca' ca tomi' xim cuhu' co ma' non cote ne quit ca xa xa pi' ca'. Tomi' ca' xim nuhu':

Apocalipse 2:18

Tomi' ac capa' na: Xirao' mi' ron co ma' co querec wet nonon co howa to nanain Tiatira. Xirao' mi' ac i ca' ron: Je i ca' ca tomi' xim cuhu' co Panxica Iri' Jam cwa', co ac ca tom ne xe na tocon pain ca joc xec nein ma', co toc meremem caximacon pain ca an xiho' nein bronze ca xic mip xine ma' quem. Tomi' ca' xim nuhu':

Apocalipse 2:24

Tomi' ho' inonon oro xucucun co to nanain Tiatira ma': Wahu' pain ca om an xiho' hwem caxicam narima' ma', pain ca om taxi' xixi' na hwein oro coximinain caramaxicon Satanás ca tomi' hwet cama ma', ca wirico Satanás co an hwet mi' napari' pain ta pan caca oro wari' nequem ma', tomi' ca' inuhu': Wara tomi' ha' hwein oro xijein ca tomi' ne ca'. Om ta hu mami' xuhu' pain xocori ca', om na xijein ca tomi' ne ca tomi' ha' je xuhu' ca'.

Apocalipse 2:8

Tomi' ac capa' na: Xirao' mi' ron co ma' co querec wet nonon co howa to nanain Esmirna. Xirao' mi' ac i ca' ron: Je i ca' ca tomi' xim cuhu' co ma' cain' pane, pain ca om om wet ne oro carawa pane, co ma' cara ta' ma' quem, pain ca win pi' pin ta' ne oro carawa quem, wirico co mi' pin pane, co e' mami' ma' quem. Tomi' ca' xim nuhu':

Apocalipse 21:5

Tomi' ac ca na co ma' co xao pe pe nain ca mam' xao pe nucun taramaxicon: Ara xocori ara xocori pi' pin inain oro carawa ta na. Tomi' tomi' tiquin' na quem: Xirao' rain oro ca tomi' xim cara ne. Iri'o' na oro ca tomi' ne. Om ca mixein ta', na e' na pain ca howa cacapa' pain ca tomi' ne oro wari' ta. Ac i ma' na ca tomi' ca co ma'.

Apocalipse 22:10

Tomi' tomi' tiquin' ac capa' na: Ta joc xim main oro ca xirao' pe ma pain tapari carawa ma', ca tomi' mi' nain oro carawa ca maqui' ta' ma' me ta. Xi wixicam pin ara ne oro xec nein ca maqui' ta' ne ta.

Apocalipse 22:16

Wata' pain ca Jeju ta' ca', mam' inuhu' con jam co taramaja mi' napa' ma'. Tomi' hwet roron pain oro carawa ca maqui' pa' toton nonon pain ca cut in taxipa' xucucun pain ca howa cacapa' ta inon pahu'. Wata' co iri' winacon taramaxicon Davi co tomi' pe ca Iri' Jam pain cara pane. An xiho' inon pijo' co toc meremem mip ma', co hwet na pain xo' xec. Ac i ma' na ca tomi' ca Jeju.

Apocalipse 3:1

Tomi' ac capa' na: Xirao' mi' ron co ma' co querec wet nonon co howa to nanain Sardes. Xirao' mi' ac i ca' ron: Je i ca' ca tomi' xim cuhu' co ma' co taramaxicon pe ho' nain Tamataracon Iri' Jam ma', ca ma' 7 ne ca hwara' opa nein ma', co ma' co taramaxicon pe ho' nonon oro co ac pijo' co ma' 7 nana ma' quem. Tomi' ca' xim nuhu': Taxi' inuhu' pain oro ca ara hwe ma'. Ac ca howa xo' mahu' na, howa xo' totoron xi' ma nunuhu' oro wari' pata'. Ane om howa iri'o' mahu' ne.

Apocalipse 3:14

Tomi' ac capa' na: Xirao' mi' ron co ma' co querec wet nonon co howa to nanain Laodiceia. Xirao' mi' ac i ca' ron: Je i ca' ca tomi' xim cuhu' Iri' Wari' co wara tora' ca Iri' Jam pane, wirico co iri'o' ma'. Je i ca' ca tomi' xim cuhu' co Amém na wixicon ma', co om mixein camain' pain ca tomi' hwet cain oro ca iri'o' wa con Iri' Jam ma', co taramaxicon pe ho' nain oro carawa jimao ca tomi' ma' pin ca Iri' Jam pane. Tomi' ca' xim nuhu':

Apocalipse 3:4

Ac i ma' paxi' hwe, ane ma' paric ca' e' caca oro win ma' nuhu' co om ara em' xucucun pain Sardes ma' ne. Om ca ara mixem pin cocon womicocon. Ame hwe e', main to totoron wom co towo', xuruxut wi ac cacapa' tara. Xi querec pin' ara tococwa pain ca hohot cacapa' ta.

Apocalipse 3:7

Tomi' ac capa' na: Xirao' mi' ron co ma' co querec wet nonon co howa to nanain Filadélfia. Xirao' mi' ac i ca' ron: Je i ca' ca tomi' xim cuhu' co ma' co wara tora' ca Iri' Jam pane, co pe ni ca' nain ca caracat wa ma', wirico co iri'o' ma'. Je i ca' ca tomi' xim cuhu' co pe ho' non ca mam' pa xine manain ca corom ac xine cidade nucun Taramaxicon Davi cara pane. Mo ta pa cain manain, om ca tao' pa' ac cain xucun wari'. Mo ta tao' pa' cain, om ca pa ac cain xucun wari' quem. Tomi' ca' xim nuhu':