1 Coríntios 2:1 - Tradução Bíblica Pacaas Novos

¹ Je ca tomi' xuhu' ca' xere: Hwet iri inuhu' pane ne, pain ca pijim' hwet xim xuhu' pain capijacon Iri' Jam ca om taraju pa' querec wa con Jeju ira, om ca pijim' xuhu' pain ca taxi' tamana ne pain ca coromicat ne pane, om na.

1 Coríntios 2:1 Iomraidhean Croise

1 Coríntios 1:17

Xi ja' roron pain com oro wari' capa' Cristo pane ta. Tomi' e' napa' pain ca pijim' hwet rain capija ca to' taxi' nonon oro wari' pain ca to' witan ton toton ta capa' pane. Tomi' ca' napa' quem: Tomi' hwet iri roron pain capija ne, om ca na ne pain ca an xiho' momon oro wari' co tomi' taxi' tamana e' nanain ca coromicat pan nucucun ta napa' quem. Ma' ta om to' om pin main ca hwara' opa nein capija pain ca tomi' hwet mapa' pain ca mi' pin pe tain pana pane napa'.

1 Coríntios 2:13

Pain ca tomi' hwet urut pain carawa ca mi' capari' Iri' Jam ca', je Tamataracon ca mi' naparut pain ca pijim' taxi' urut pain. Om ca maqui' nein ca coromicat pan nuxut. An hwet mi' naparut pain, tomi' xo' ac urut pain na ca tomi' nein pain ca tomi' xut cocon oro wari' co ma' nonon Tamataracon Iri' Jam.

1 Coríntios 2:4

Noc inain ca mam' pijim' pijim' na xuhu' pain ca pijim' taxi' tamana wa pane. Om ca tomi' ca' xuhu': Pijim' aramao xuhu' pain ca coromicat ne, ma' ta querec pin' hwein ca iri'o' nein ca pijim' ne xuhu' ca', om ca pijim' ac i ma' xuhu' pane. Pijim' aramao iri inuhu' pane ne, an hwet mi' ac xuhu' na pain ca hwara' opa nein Tamataracon Iri' Jam. Querec pin' ac hwein na ca iri'o' nein ca pijim' ne quem.

2 Timóteo 1:8

Je ca tomi' xim ca'. Ta wixipa' ma pain ca tomi' hwet momon con Taramaxicon nexi' oro wari' me. Ta wixipa' ma pain ca tao' pe cacapa' pain xirinain ca tao' to tao' to to wa quem me. Tao' pe e' nanapa', xi om ne ca taramaja mi' ara ton Taramaxicon nexi' ta. Je i ma' ira, ta wixipa' ma pata' me ta. Quereme rain ca jain jain wa pain ca pijim' hwet main capijacon Iri' Jam ca tomi' hwet napari' con Cristo ta. Win ta' ca'. To' hwara' opa terem pain Iri' Jam ta.

Romanos 16:18

Xi taramaja mi' cocon Taramaxicon nexi' Cristo oro wari' co ac i ma' nana ta. Taramaja mi' e' nanain carawa ca cao' wa, taramaja mi' e' nanain pemenecucun, taramaja mi' e' nanain ca param pan teretem caca ma'. Tomi' awi paxi' nonon oro wari', ane tomi' xin to e' cocon ne. Ac i ma' na ca mixein cocon oro wari' co om querec pin' nanain ca pan tem wa ma'.

2 Coríntios 11:6

Am i'ina ta' pain ca tomi' ta' ca', pain ca pijim' tain capijacon Iri' Jam ca'. Ane taxi' tain ne. Taraju pa' inain quem. Wara querec pin' ara xi' maparut pain oro ca taraju pa' nuxut ca', je pain oro ca ara nuxut pain oro xijein xec pane.

Apocalipse 1:2

Je ca an xin tiquin' mi' xuhu' pain ca xirao' pe ta' ca'. Iri'o' na oro ca xirao' ne ca', xirao' xirao' pi' pin inain oro ca querec ta' con, je oro ca tomi' nucun Iri' Jam ma', xirao' xirao' pi' pin inain oro ca tomi' hwet capa' Jeju Cristo pane.

1João 4:14

Querec urut con Panxica pain ca maqui' cain macan' pane. Tomi' hwet urut cocon oro wari' pain ca mam' capari' con Cote ca quem. Hwet roron oro wari' pain macan' cain, to' witan ca' roron pain ca caracat nucucun ta non pari'.

2 Tessalonicenses 1:10

Wap ac i ma' totoron Taramaxicon nexi' pain xec nein ca in qui' ta' nucun. Tomi' querec te pan ac xun tara pain ca wari' nucun iri' quem. Awi ma, xi om ne ca to' witan ara maparut ta ac xun tara, tomi' ac i ma' tomi' ac i ma' xam' xun. In ac in ac xam' xun pain ca howa xun quem. Wahu' tara quem, in ac in ac xam' jun, xi om ne ca howa ara hwein capijacon ca pijim' hwet urut pahu' pane ta.

1 Coríntios 1:6

Pe pin ara xi' nuhu' capijacon ca tomi' hwet urut pahu' con Cristo cwa'.

Atos 22:18

Ac ca querec ton na Taramaxicon ne Jeju. Hap ra ac capa' na. Paca' hap rain Jerusalém ca', xi howa je na caca oro wari' cwa'. Om ta howa quequem pain ca tomi' hwet mapa' cocon ta napa'.

Atos 20:21

Hu hu pi' pin inonon oro wari' quem, co judeu nana ma', co om judeu nana ma' quem. Na e' na pain ca coromicat ni hwe, an to pin jein ca caracat nuhu', tomi' hwet jun pain Iri' Jam quem inonon. Howa jun Taramaxicon nexi' Jeju ta inonon quem.

Apocalipse 19:10

Pan' hwet ac ton na pain caximacon jam co taramaja mi' non Iri' Jam. Ma' ta pe torotop mi' querec te ton inon ira. Ane tomi' capa' ne: Ta pe torotop mi' querec te mapa' me ta. Xi ac wum ara ta' ta, taramaja mi' e' inon Iri' Jam. An xiho' inem, an xiho' inonon oro win howa ma ma', co win xumu cara nonon Jeju ma', pain ca om an to camain' cacain oro ca tomi' hwet xine con. Pe torotop mi' querec te pan ron Iri' Jam ta! Xi wirico pan ara ca Jeju co tomi' hwet iri' pain ca pijim' hwet xuxun con oro wari' ta. Ac i ma' na ca tomi' capa' jam co taramaja mi' non Iri' Jam.

Apocalipse 1:9

João ina pain ca xirao' mi' xuhu' ca'. Xere xijexi' pain ca howa xun Jeju. Win ma' ne xijexi' pain ca jain jain wi iri' cocon oro wari' co quep em' nanapari', xi om ne ca taramaxicon ne ara xun Iri' Jam ta. Win ma' ne xijexi' pain ca quereme cara xin oro ca to' i'ina napari' pain ca howa xun Jeju quem. Pe inain xixi pan nein macan' Patmos. An mao nanapa' pain i cain pane, xi om ne ca pijim' ara tain capijacon Iri' Jam pane, xi om ne ca tomi' hwet ara toton con Jeju oro wari' pane quem.

1 Timóteo 1:11

Ca pijim' nexi' ca', maqui' nain capijacon Iri' Jam con Jeju cwa', pain ca to' witan xim capari' ca'. Iri' Jam ma', co in ac iri' cwa', co awi tamana cwa', wirico co an hwet mi' napari' pain ca pijim' nexi'. Pijim' rain ta napa' quem.

2 Coríntios 10:10

Ma' ara xi' nana oro win ma' nuhu' co coromicat mi' ac i ma' nanapa' ma'. Pan to' e' nain ca taraju wa pain oro ca xirao' nucun, tomi' carapita e' na pain ca hu capari' ta. Hwet iri napari' ne, hehe ac ca na, xi pijim' xo' taxi' capari' ta, ac i ma' na ca tomi' caca ma'.

Romanos 16:25

Tomi' querec te xun Iri' Jam co hwara' opa tamana ta. Ha' non pain ca to' hwara' opa cuhu' quem. Je ca xirao' pe xine pain capijacon ca tomi' hwet napari' con Jeju pain ca to' witan xim capari' ca'. Je ca pijim' taxipa' ta' ca', pain ca pijim' hwet xuhu' con Jeju Cristo. Om paxi' na ca taraju pa' xine ca coromicat xo' nucun con Jeju pane, om ca taraju pa' xine pain ca xo' ma' qui' ne oro carawa cara pane.

1 Coríntios 2:7

Je ca tomi' xuhu' ca': Tomi' hwet jein ca coromicat ne naparut Iri' Jam ma', pain ca param mi' capari' pain carawa ca awi tamana ca quep xiho' xim napari'. Om ca an hwet querec cain ira. Wara coromicat xo' qui' nain pain cara pane, pain ca om ma' querec ne macan' pane.