1Pedro 5:10 - Tradução Bíblica Pacaas Novos

¹⁰ Ame hwe e', om ta jain jain cara hwe, main pi' pin tara ca jain jain nuhu'. To' hohot pin ac cuhu' tara Iri' Jam. To' hwara' opa turuhu', mi' turuhu' pain ca om naro camain' wa, to' hwara' opa cara ac cuhu' tara. Xi wirico ara ca co xiram pa' taxipa' nuhu'. Wirico co wara param mi' nuhu' pain ca jao jao ma' hun pain ca awi nucun pain ca hwara' opa nucun ca om pi' ra ha' ma', xi om ne ca win cwere ara hun Cristo Jeju ta.

1Pedro 5:10 Iomraidhean Croise

Lucas 22:32

Ane tomi' mi' xim con Te quem ne Simão. Ma' ta om pan' ma con, ma' ta hwara' opa cara ma pain ca howa nem inon pum. Cwirin' pin iri rain ca caracat nem ne, to' hwara' opa ac momon tara pain ca howa nucucun xerem cwa' quem na ca tomi' con Simão Jeju ma'.

Romanos 15:13

Wirico Iri' Jam co mi' napari' pain ca howa xun pain ca winim' cara xin oro carawa ca awi ca mi' xim capari' ca'. Param inon pain ca mi' cuhu' pain ca tomi' querec te wa, param inon pain ca mi' cuhu' pain ca om toron ne xumuhu' quem. Xi howa ara hun ta. Param inain Tamataracon pain ca mi' mi' tiquin' cuhu' pain ca winim' cara hun ma'. Mam' mi' turuhu' pain ca winim' cara wa pain ca hwara' opa nein quem.

Romanos 15:5

Wirico Iri' Jam co mi' napari' pain ca hwara' opa wa pain ca to' i'ina capari' oro carawa. Wirico co to' quereme napari' quem. Param inon pain ca mi' cuhu' pain ca an xiho' xujuhu' pain ca coromicat nuhu'. Param inon pain ca mi' cuhu' pain ca an xiho' hun Cristo Jeju quem.

Romanos 16:25

Tomi' querec te xun Iri' Jam co hwara' opa tamana ta. Ha' non pain ca to' hwara' opa cuhu' quem. Je ca xirao' pe xine pain capijacon ca tomi' hwet napari' con Jeju pain ca to' witan xim capari' ca'. Je ca pijim' taxipa' ta' ca', pain ca pijim' hwet xuhu' con Jeju Cristo. Om paxi' na ca taraju pa' xine ca coromicat xo' nucun con Jeju pane, om ca taraju pa' xine pain ca xo' ma' qui' ne oro carawa cara pane.

Romanos 9:11

Tomi' ac cam na Iri' Jam pain ca om camara' querec caca humaxicam pane. Ca' nam pane: Pije' co pan' cain' ma' pum, taramaja mi' toron coxa' ca co pan' qui' pa'ao', ac i ma' nam pane. Om ca camara' querec caca humaxicam, om ca ara querec cacain ca awi wa, om ca ara querec cacain ca pan tem wa quem. Tomi' ac i ma' e' nam Iri' Jam, ma' ta tora' ton co wara coromicat xo' ta' cwa', co wara tora' pe ta' cwa', ac i ma' nam. Je ca tora' con co pan' qui' pa'ao' pane. Param pan inon ta non Iri' Jam. Om ca param ton pain ca ara pan ca ma' non. Param pan inon ta na, je ca tora' ton ca' nam pane.

Romanos 9:24

Wari' pan co tora' ca cwa'. Tora' napari'. Tora' naparut pain ca judeu urut ca', tora' nuhu' pain ca om judeu hwe ma' quem.

1 Coríntios 1:10

Tomi' mip inuhu' pain i ca' quem xere. Wirico Taramaxicon nexi' Jeju Cristo co mi' napa' pain ca tomi' mip xuhu' ca'. Tomi' tomi' pi' pin inuhu': Ac je ac je ari tara ca tomi' nuhu' me. Jao jao ma' xujuhu', ta coromicat ni ca' xujuhu' me, ac je ac je ari tara ca coromicat nuhu'.

1 Coríntios 1:9

To' hwara' opa turuhu' Iri' Jam, xi mixein capari' ta. Ara taxipa' nain oro ca wara tomi' pe nucun. Tomi' nuhu' quem: Jao jao ma' jun Panxita' Jeju Cristo co Taramaxicon ne hwe cwa' nuhu', taxipa' jun ta nuhu'.

2 Coríntios 13:11

Je i ca' ca xirao' ne ca' xere. Tomi' querec te je me. Win xumu jein ca xuruxut xo' hwe. Tomi' ha' xine pain ca hu xuhu' ca'. Ac je ac je ari tara ca coromicat nuhu'. Tomi' querec te xujuhu' pain ca to ho' xujuhu' ma' quem. Pe ho' ac cuhu' tara Iri' Jam. Wirico co mi' napari' pain ca om noc xijexi' ca', wirico co mi' napari' pain ca om toron ne ximixi' ca' quem.

2 Coríntios 4:17

Jain jain paxi' urut, ane to' hwara' opa caparut oro ca jain jain nuxut ne, xi winim' ara urut pain ca awi tamana wa ca mi' xim caparut Iri' Jam ta. Awi tamana tara, om ta pi' ra ha' ne quem. Awi tiquin' ca' tarain oro ca jain jain wijimain nuxut pain macan' ca'.

Filipenses 4:13

Quereme quereme pi' pin inain oro ca ara napa', xi om ne ca wirico ara ca co to' hwara' opa napa' ta.

Colossenses 2:7

Win ne pana ca hwara' opa ma', pain ca corom mama' nein paxicom caximain ma', ac i ma' tara pain ca hwara' opa hwe con Taramaxicon nexi'. Horon horon tiquin' je pain ca win cwere hun ma'. Howa mip jein oro ca pijim' xihwe con pane. Tama' tomi' hwet tomi' hwet tiquin' jein ca tomi' querec te nuhu' con Iri' Jam quem.

1 Tessalonicenses 2:12

Ac cote cacama hwijima' urut pahu' pain ca hu urut pahu' ma'. Tomi' toto urut pahu', hu urut pahu' pain ca xuruxut xo' je urut pahu' ma'. Win ne ca howa pin hun Iri' Jam co tora' nuhu' ma', pain ca taramaxicon pe ho' xim cuhu' ma', je pain ca jao jao ma' xine pain ca awi tamana ne cuhu' ma' urut pahu' pane.

2 Tessalonicenses 2:14

To' witan xim nuhu' pane. Je ca howa xine cuhu' pain ca xo' taraju hwein capijacon ca tomi' hwet urut pahu' con Jeju quem. Ma' ta aram aram mi' xim cuhu' pain ca awi nucun Taramaxicon nexi' Jeju Cristo ma', je pain ca hwara' opa nucun ma', je pain ca om caracat nucun ma' quem.

2 Tessalonicenses 2:17

Tomi' mi' urut pahu' cocon. To' hwara' opa jujun pain iri' ximicocon ta urut cocon pahu'. Quep xiho' cara jujun, mi' cara jujun pain ca tama' ara cacain ca awi wa ta urut cocon pahu'. Pain oro ca ara nucucun, je pain oro ca tomi' nucucun quem, quep xiho' cara jujun pain ta urut con pahu'.

2 Tessalonicenses 3:3

Ane om mixein capari' Taramaxicon nexi' ne. Tama' ara mi' napari' pain oro ca tomi' pe mi' capari' ca'. To' hwara' opa turuhu' pain iri' xumuhu'. Narain ho' turuhu' con Caxicon Jam quem.

1 Timóteo 6:12

Pain ca howa cara mon Cristo Jeju ma', ma' mija tara oro ca to' i'ina nem ma'. Je i ma' ira, na e' na pain ca momon hwara' opa tiquin' ca' main ta. Querec pin' ron Iri' Jam pain ca pe ho' cara ne ta quem, pain ca mi' xim pain ca om pi' ra ha' ne ca e' wa ta quem. Wara tomi' pe ara xi' nem pain ca e' cara wa pain ca xo' tora' qui' quem pane ta. Mija nana wari' co taraju nenem pain ca tomi' hwet main ca howa nem pane quem.

2 Timóteo 1:9

Wirico co to' witan napari', wirico co tora' napari', iri' wari' ne napari' quem. Om ca mam' to' witan capari' pain carawa ca awi ca ara xi' paxi' iri', om na. Mam' to' witan napari' pain ca param pan nucun. Mam' to' witan napari' pain ca xiram pa' pan capari' quem. Om xi xiram pa' capari', xi iri' wari' iri' ta. Ane wara xiram pa' qui' capari' pain cara pane ne, pain ca om tomi' ma' pin querec cain macan' pane, wara coromicat an pe xo' mi' napari' pain ca xiram pa' nucun. Main to' witan turuhu' Cristo Jeju cwa' napari', ac i ma' tara ca xiram pa' xuhu' ta napari' pane.

2 Timóteo 2:10

Je ca quereme tain oro ca to' i'ina napa' ca'. Ma' ta quep xiho' toton oro wari' co tora' ca Iri' Jam ta ina. Quereme inain oro ca to' i'ina napa' ca'. Ma' ta to' witan pin tococwa pain ca howa cocon Cristo Jeju ma' inonon. Ma' ta mi' tococwa pain ca e' cara wa pain ca to ho' cara cocon Iri' Jam pain pawin cain.

Hebreus 9:15

Je ca tomi' an pe xo' cain xocori ca tomi' xo' nucun Iri' Jam Cristo ma'. Ma' ta ha' cuhu' pain ca aram aram cut xin hwein oro ca awi wa ca tomi' pe mi' xihwe ca', ca om pi' ra ha' ca' tata pain ca xo' howa xine qui' tococwa pane. Xi mi' pin pe ara cain maxicocon Cristo pane ta. To' witan ca' ac tococwa na pain oro ca caracat nucucun pain ca om tomi' ha' qui' cacain ca wara tomi' xo' nucun quem.

1Pedro 1:15

To ni ca' jein ca caracat wa pain oro ca ara hwe ta. Win ne ca pe ni ca' cain ca caracat wa Iri' Jam co howa xine nuhu' ma'.

1Pedro 4:10

Wara mi' mi' xam' nuhu' pain oro xijein ca taramaja taxi' wa Iri' Jam. Je ta ara xo' qui' hwein ta. Mam' quep xiho' caracan ac xujuhu' tara pain oro ca taramaja taxi' wa ca mi' cuhu' ma'.

1Pedro 4:11

Mo ta mi' cuhu' pain ca pijim' wa ma', pijim' xo' ac hwe tara. Xi capijacon Iri' Jam pan ara ne ca pijim' hwe ta. Mo ta mi' cuhu' pain ca quep xiho' hun win ma' nuhu' ma', mam' quep xiho' ac hun tara pain ca hwara' opa nucun Iri' Jam ca mi' taxipa' ca ma'. Ma' ta awi na Iri' Jam ta caca oro wari'. Wirico Jeju Cristo tara co mi' nonon pain ca tomi' ac i ma' caca ma'. Hohot na pain ca tomi' querec te xun pain ca awi tamana cara nucun. Na e' na pain ca tomi' querec te xun pain ca hwara' opa tamana cara nucun ma' quem. Amém, iri'o' na ca tomi' ne ta.

2 Pedro 1:3

Quep xiho' tamana napari' Iri' Jam, xi om ne ca hwara' opa ara ca pain ca mi' mi' pi' pin capari' pain oro ca to' xuruxut xo' napari' pain ca win xumu e' xin ca param nucun. Ha' napari' pain ca xuruxut xo' wa quem, xi mi' ara capari' pain ca querec pin' xo' xun Jeju Cristo. Wirico co wari' ne napari', ma' ta jao jao ma' mahu' pain ca hwara' opa ne ca', je pain ca awi tamana ne ca' quem napari'.

1João 2:25

Je ca wara tomi' pe mi' capari' ca'. Mi' xuhu' pain ca om pi' ra ha' ne ca e' wa ta napari' ta.

Judas 1:24

Xica' pe na Iri' Jam co Iri' Jam ma', co mam' to' witan napari' con Taramaxicon nexi' Jeju Cristo. Hwara' opa na. Ha' non pain ca narain ho' cuhu' pain ca camara' wa pain ca caracat wa ta. Ha' non pain ca to' om pin cain oro ca to' em' nuhu' ma', je pain ca ja' tomi' querec te tamana cuhu' pain ca aram aram coco' quima hwet xine pain ca awi tamana ne ta cuhu' ma'. Na e' na pain ca tomi' querec te xun pain ca awi tamana nucun ma', je pain ca iri' Taramaxicon nucun ma', je pain ca hwara' opa tamana nucun ma', je pain ca taramaxicon hwara' opa tamana pan ca quem. Wara ac i ma' na pain cara pane, pain ca om quep querec cain oro carawa pane, ac i ma' ac i ma' wet na pain xocori ca', ac i ma' ac i ma' cara tara ta. Amém, iri'o' na ca tomi' ne ta. Je i ca' ca xirao' ne ca'.