1Pedro 4:13 - Tradução Bíblica Pacaas Novos

¹³ Jain jain iri hwe pain ca quep em' xihwe pain ca howa hun Cristo ne, jain jain wi ac hun na. Je ta tomi' querec te qui' hwe pain, ma' ta tomi' querec te tamana hwe pain ca aram aram an hwet mi' xim capari' pain ca hwara' opa nucun pain ca awi tamana nucun quem.

1Pedro 4:13 Iomraidhean Croise

Mateus 16:27

Je ca tomi' xuhu' ca' ac caparut na. Ja' ja' xine. Ta jin' huhun oro wari' co quep em' xim nunuhu' pain ca ja' ja' mahu' me. Maqui' ta' ara xi' na xec nein ca in qui' ta' ne ca', wata' pain ca Iri' Wari' ta' ca', in qui' ac tain tara pawin. Maqui' wi ta' cocon oro jam co taramaja mi' nanapa'. Maqui' wi ta' pain ca hwara' opa nucun Te quem. Pagar ac toton tara oro wari', pagar toton pain oro ca ara caca pain ca e' e' wet nucucun. Win ne ca ara hwe pane toton, mi' mi' xam' ac toton pain tara. Wahu' quem, win ne ca ara hwe pain ca ja' ja' mahu' pane xuhu', pagar pagar xam' ac xuhu' tara quem.

Mateus 25:21

Awi na ta ac con na. Awi na ca taramaja nem, taramaja xo' ma ma' ira. Mam' taramaja xo' main wijimain dinheiro ne cara pane. Je ca mi' hwara' mami' xim xim pain, ma' ta mam' taramaja xo' mami' main quem. Maji tomi' querec te wi xi' e' ac con na.

Mateus 25:23

Awi na ta ac con na. Awi na ca taramaja nem, taramaja xo' ma ma' ira. Mam' taramaja xo' main wijimain dinheiro ne cara pane. Je ca mi' hwara' mami' xim xim pain, ma' ta mam' taramaja xo' mami' main quem. Maji tomi' querec te wi xi' e' ac con na quem.

Mateus 25:31

Wata' pain ca Iri' Wari' ta' ca', in qui' ta' ina ta ac caparut na. Mam' maqui' ta' pain ca hwara' opa ne. Maqui' wi ta' cocon oro jam co taramaja mi' nanapa' quem. Maqui' ta' iri ta' ne, xao pe ac tain tara iri' ca mam' xao pe nucun taramaxicon, iri' taramaxicon pin ac ta' tara ta.

Mateus 25:34

Tomi' ac toton tara co to nanain iri' cwere ma', co xuruxut xo' nana ma'. Wahu' pain ca param mi' cuhu' pain ca awi wa Te ma', harahap je. To ho' cara xine, taramaxicon pe ho' ac xuhu' tara. Wara coromicat an pe xo' nain i ma' Te pahu' pain cara pane, pain ca xo' ma' ten qui' xine macan' pane.

Mateus 5:12

Tomi' querec te je pain ca to' i'ina ac i ma' xihwe. Tomi' querec te tamana je. Xi om ne ca awi tamana ara ne oro ca mi' xim cuhu' Iri' Jam pain pawin cain ta. Ac i ma' ara xi' na ca ja' tequi' quep em' qui' tococwa oro profeta co wara ma' nana pane.

Marcos 8:38

Mija nana wari' co caracat tamana nana pain oro xec nexi' ca'. An to pin nonon Iri' Jam. Mo ta ma' ca wari' co wixipa' napa' ma', pain ca noc capa' pain ca wari' ne ton ca', pain ca noc cain ca tomi' ne ca' quem, to' wixipa' ac capa' tara pain ca Iri' Wari' ta' ca'. Maqui' wi iri ta' cocon oro jam co taramaja mi' nonon Te ne, pain ca mam' maqui' tain ca hwara' opa nucun ma', wixipa' ac ta' con tara, om ta wari' ne ton ta na ca tomi' tococwa ma'.

Lucas 17:30

Ac i ma' tatara oro wari' pain xec nein ca in qui' ta' ne quem. Om ta maqui' ca ma' tatarapa'. Ara ara e' tatarain oro ca ara taxipa' caca ma', ane ane hwet pa' ac toton tara. Wata' pain ca Iri' Wari' ta' ca', ane ane hwet pa' ac toton tara ta.

Atos 16:25

Xim pa' ac cocon na. Ximijain xim pin iri na cocon ne, tomi' tomi' ac con Iri' Jam na Paulo con Silas ma'. Com querec te mi' nonon pain tamara' quem. Taraju wet nonon co win tao' to caca ma' quem.

Atos 5:41

Hwerehwet ca' iri tata pain ca cut in to nucucun ne, tomi' querec te tamana ac caca na. Ca' xucucun pain ca tomi' querec te nucucun: Ac ca hohot xun Iri' Jam na, xi om ne ca mi' ara capari' pain ca jain jain wa pain ca pijim' hwet xuxun con Jeju oro wari' ta xucucun.

Romanos 5:3

Cain' cain' iri' quem? Winim' cara e' urun pain ca aram aram mi' xim capari' pain ca jao jao ma' xun pain ca awi nucun pain ca hwara' opa nucun ra? Om na ta. Tomi' querec te urun pain ca to' i'ina capari' oro carawa, je pain ca to' jain jain cacapari' oro wari' cwa' quem. To' i'ina iri napari' oro carawa ca' ne, to' jain jain iri nanapari' oro wari' ma' ne, hwara' opa cara ac iri' na quem, wara taxi' irin i ma' ta.

Romanos 8:17

Je ca mi' xim capari' pain oro ca awi wa ca wara tomi' pe mi' capari' pane, xi om ne ca mana panxica ara iri' ta. Main cut xin con, cut wi xin con Cristo. Mo ta an xiho' xun Cristo pain ca jain jain nucun pain macan' ca', mo ta jain jain wi xun, tomi' querec te ac capari' tara Iri' Jam. Tomi' querec te wi ac capari' tara con Cristo, mi' wi ac capari' tara pain ca jao jao ma' xun pain ca awi nucun pain ca hwara' opa nucun quem.

Romanos 8:18

Ca' na ca coromicat ne ca'. Oro ca jain jain nexi' ca', pain ca to' i'ina capari' oro carawa pain xocori ca', om ca an xiho' camain' nein ca awi wa ca mi' xim capari' Iri' Jam ta. Tiquin' mao pan na ca awi nein oro ca mi' xim capari' ma', pain ca mi' xim capari' pain ca jao jao ma' xun pain ca awi nucun pain ca hwara' opa nucun ma'.

2 Coríntios 1:5

Je ca tomi' urut pahu' ca'. Jain jain tamana ara xi' urut pain oro ca to' i'ina caparut ca', ac ca jain jain wi urut con na Cristo ma', xi om ne ca win cwere ara urut con ta. To' hwara' opa tamana naparut pain xumuxut ca' quem, mam' to' hwara' opa naparut con Cristo.

2 Coríntios 1:7

Taxi' urut pahu' pain ca quereme cara xin hwein oro ca to' i'ina nuhu' quem, xi taxi' ara urut pain i ca' quem: Jain jain iri hwe ne, to' hwara' opa ac cuhu' na pain xumuhu' Iri' Jam. Win urut pain ca jain jain urut ca'. To' hwara' opa ac caparut na pain xumuxut ca' quem.

2 Coríntios 4:10

Tama' jain jain urut pain ca to' parapa' pin xim cacaparut oro wari' co noc nanaparut ma'. Win ca Jeju pain ca jain jain ca pain ca to' pa' pin tocwa pane, ac i ma' na ca tama' jain jain urut quem. Ma' ta querec pin' tocwa Jeju pain ca e' pe ho' caparut pain curuxut ta.

2 Coríntios 4:17

Jain jain paxi' urut, ane to' hwara' opa caparut oro ca jain jain nuxut ne, xi winim' ara urut pain ca awi tamana wa ca mi' xim caparut Iri' Jam ta. Awi tamana tara, om ta pi' ra ha' ne quem. Awi tiquin' ca' tarain oro ca jain jain wijimain nuxut pain macan' ca'.

Filipenses 3:10

Querec pin' xiton na inon Cristo ta, je ca param ta' ca'. Mi' xirapa' na inon pain ca hwara' opa nucun ca pe ho' non pain ca to' e' mami' tocwa pane. Jain jain wi xiton na ina pain oro ca to' i'ina non pane, ac wirico pain ca mi' pin nucun xita' na ina quem.

Colossenses 1:24

Jain jain paxi' ina pain xocori ca', xi om ne oro ca taramaja ne pain ca quep xiho' toton oro win ma' nuhu' pain ca om judeu hwe ma'. Ane tomi' querec te pan ta' ne. Ac ca jain jain wi ta' con Cristo na, ac ca moin' pin ne na ca jain jain ne pahu'. Xi om ne ca quep xiho' ara xihwe pain ca jain jain ne ca', pain ca ac curucun iri' pain ca howa xun ca'.

2 Timóteo 2:12

Taramaxicon wi xun quem, xi momon quereme ara xin oro ca to' i'ina napari' ca'. Mo ta om querec pin' xim ta xun, om ca querec pin' xim ta ac capari' tara quem.

1Pedro 1:13

Je ca tomi' xuhu' ca'. Coromicat xo' je. Wara awori xo' je pain ca ara xin hwein ca param nucun Iri' Jam. Ma' tara xumuhu'. Howa mip jun Iri' Jam pain ca xiram pa' xim cuhu' ma', pain ca to' witan e' xim cuhu' pain ca in qui' ta' nucun Jeju Cristo ta.

1Pedro 2:21

Je ara xi' na ca wara param mi' cuhu' pain ca xo' howa xine ta qui' cuhu' pain cara pane. Mo ta quep em' ximama' xihwe, je i ma' ira je, quereme ac hwein tara ta nuhu'. Xi om ne ca quereme ara ca Cristo pain ca quep em' ximao pan tocwa pain ca mi' pin caho' cuhu' pane ta. Win ta' pane, an xiho' xine pain ca quereme ta' pane nuhu' quem.

1Pedro 5:1

Je ca tomi' xuhu' pain ca querec wet huhun oro co howa nonon Jeju ma'. Tomi' mip inuhu', xi om ne ca querec wet pan ara toton oro co howa nonon Jeju pain i ca' ta. Tomi' hwet inonon oro wari' pain ca jain jain nucun Cristo, jao jao ma' ton pain ca an hwet pe xine ca awi nucun pain ca hwara' opa nucun quem.

1Pedro 5:10

Ame hwe e', om ta jain jain cara hwe, main pi' pin tara ca jain jain nuhu'. To' hohot pin ac cuhu' tara Iri' Jam. To' hwara' opa turuhu', mi' turuhu' pain ca om naro camain' wa, to' hwara' opa cara ac cuhu' tara. Xi wirico ara ca co xiram pa' taxipa' nuhu'. Wirico co wara param mi' nuhu' pain ca jao jao ma' hun pain ca awi nucun pain ca hwara' opa nucun ca om pi' ra ha' ma', xi om ne ca win cwere ara hun Cristo Jeju ta.

Judas 1:24

Xica' pe na Iri' Jam co Iri' Jam ma', co mam' to' witan napari' con Taramaxicon nexi' Jeju Cristo. Hwara' opa na. Ha' non pain ca narain ho' cuhu' pain ca camara' wa pain ca caracat wa ta. Ha' non pain ca to' om pin cain oro ca to' em' nuhu' ma', je pain ca ja' tomi' querec te tamana cuhu' pain ca aram aram coco' quima hwet xine pain ca awi tamana ne ta cuhu' ma'. Na e' na pain ca tomi' querec te xun pain ca awi tamana nucun ma', je pain ca iri' Taramaxicon nucun ma', je pain ca hwara' opa tamana nucun ma', je pain ca taramaxicon hwara' opa tamana pan ca quem. Wara ac i ma' na pain cara pane, pain ca om quep querec cain oro carawa pane, ac i ma' ac i ma' wet na pain xocori ca', ac i ma' ac i ma' cara tara ta. Amém, iri'o' na ca tomi' ne ta. Je i ca' ca xirao' ne ca'.

Apocalipse 1:7

Noro je! Maqui' tara pain tajain nanawin Jeju. Querec querec pi' pin totoron oro wari'. Oro wari' co xucun' pa' nonon quem, querec querec pi' pin totoron. Awaran awaran pi' pin ac caca tara con oro xucucun wari' pain oro xijein macan'. Amém, iri'o' na ca tomi' ne ta.

Apocalipse 1:9

João ina pain ca xirao' mi' xuhu' ca'. Xere xijexi' pain ca howa xun Jeju. Win ma' ne xijexi' pain ca jain jain wi iri' cocon oro wari' co quep em' nanapari', xi om ne ca taramaxicon ne ara xun Iri' Jam ta. Win ma' ne xijexi' pain ca quereme cara xin oro ca to' i'ina napari' pain ca howa xun Jeju quem. Pe inain xixi pan nein macan' Patmos. An mao nanapa' pain i cain pane, xi om ne ca pijim' ara tain capijacon Iri' Jam pane, xi om ne ca tomi' hwet ara toton con Jeju oro wari' pane quem.